Apocalipsis

11 La kichʼ akʼbeyel jalal* te jich yilel te bin-utʼil jchʼix teʼ yuʼun pʼisojibal sok jich la yalbon: «Jajchan sok pʼisa te chʼul awilal ta templo yuʼun te Diose, te skajtajib chikʼbil majtanil sok te machʼatik ya yichʼik ta mukʼ tey-a te Diose. 2 Pero mame xa apʼis stukel te yamakʼul te ay ta fuera yuʼun te chʼul awilal ta templo, melel la yichʼix akʼbeyel ta skʼab te jyanlumetike, yame stsʼoʼik* ta tekʼel 42 u te chʼul lume. 3 Yame kakʼ te ya yalik skʼop j-alwanej 1,260 kʼajkʼal te chaʼtul testigoetik kuʼun te slapojik chʼixal pakʼ».* 4 Te chaʼtul testigoetik ini jaʼ señailik te chaʼpejt* olivo sok te cheb skajtajib kʼajkʼ, sok tekʼajtik ta stojol te Ajwalil yuʼun te balumilal.

5 Teme ay machʼa ya skʼan ya yakʼtiklanbey swokole, yame xlokʼ kʼajkʼ ta yeik yuʼun jich ya slajinik te skontratakike. Jichme ya xlajik te machʼatik ya skʼan ya yakʼbeyik swokole. 6 Yichʼojik tulan yaʼtelik yuʼun ya smakik te chʼulchan yuʼun jich ma xyakʼ jaʼal te jayeb kʼajkʼal ya yalik skʼop j-alwanej. Jaʼnix jich yichʼojik tulan yaʼtelik yuʼun ya skʼatpʼunik ta chʼichʼ te jaʼetike sok te ya yakʼbeyik swokol te balumilal ta bayal ta chajp wokolil jaʼ chikan te jayeb buelta ya skʼanike.

7 Te kʼalal ya xlaj yoʼtanik ta yalel skʼop j-alwanej, te chambalam te xiʼbantik sba te yak ta lokʼel tal ta xaab ya yakʼbey guerra te chaʼtul testigoetik, yame stsaltiklan sok yame smiltiklan. 8 Tasalme ya xjil te sbakʼetalik ta mukʼul calle yuʼun te mukʼul lume —te Sodoma sok Egipto sbiil ta lokʼombakʼop—, jaʼnix te banti la yichʼ jijpanel ta teʼ te Yajwalike. 9 Te ants winiketik te talemik ta yanyantik lumetik, tsʼumbaliletik, kʼopiletik sok nacionetik yame yilbeyik te sbakʼetalik oxeb kʼajkʼal sok olil, sok maba ya yakʼik ta mukbeyel te sbakʼetalike. 10 Te machʼatik nainemik ta balumilal tseʼelnax yoʼtanik yuʼun sok yame spasik kʼin ta swenta te lajemik ya yilike, talel kʼaxel yame stikunbey sbaik smajtanik, melel te chaʼtul j-alwanejetik ini bayal la yakʼbeyik swokolik te machʼatik nainemik ta balumilale.

11 Te kʼalal kʼaxix-a te oxeb kʼajkʼal sok olile, och ta stojolik te yip kuxlejalil te talem ta stojol Dios, jich la stejkʼan sbaik jajchel. Te machʼatik la yilike bayal xiwik yuʼun. 12 Tey-abi la yaʼiyik te ay machʼa tulan kʼopoj ta chʼulchan te jich albotik yuʼune: «Moanik tal liʼi». Moik bael ta chʼulchan ta tokal, ilotik yuʼun te skontratakike. 13 Ta yorailnix-abi tal tulan nijkel. Jun ta slajunxejtʼel jin te mukʼul lume sok 7 mil ta tul ants winiketik lajik yuʼun te tulan nijkele. Te jayebxan jilike bayal xiwik yuʼun sok la yalbeyik yutsil skʼoplal te Dios te ay ta chʼulchane.

14 Kʼaxix te schebal wokolile. ¡Aʼiya awaʼiyik stojol! Nopol* ya xtalix te yoxebal wokolile.

15 Te sjukebal chʼul-abat la yokʼesin te strompeta. Tey-abi ay machʼatik tulan kʼopojik ta chʼulchan te jich yakik ta yalele: «Te wentainel yuʼun te balumilal jaʼ yuʼunix te Kajwaltik sok te Cristo yuʼune, sok jaʼnax stukel ya xwentainwan ta sbajtelkʼinal».

16 Te 24 ta tul mamaletik te nakalik ta smukʼul naktajibik ta stojol te Dios la spajkan sbaik, jich la yichʼik ta mukʼ te Diose. 17 Jich la yalik: «Ya kalbatkotik wokol, Jehová* Dios —jaʼat te Machʼa spisil ya xjuʼ awuʼun, te machʼa ay ta ora ini sok te machʼa ay ta namey—, melel la atsakix mukʼ awaʼtel sok jajchatix ta wentainwanej. 18 Pero, bayal ilinik te nacionetike, jich yuʼun tal-euk te awilinba, kʼotix yorail te tiempo te albil skʼoplal te ya awichʼ ta kʼop te machʼatik lajemike sok te ya awakʼbey smajtan te j-abatetik awuʼun, jaʼ te j-alwanejetike, sok te machʼatik chʼultesbilik soknix te machʼatik xiʼojik* te abiil chikan teme mukʼ bikʼit sok ta slajinel te machʼatik yakik ta sjinel te balumilale».

19 Tey-abi jam te chʼul awilal ta templo yuʼun Dios te ay ta chʼulchan sok chiknaj te skaxaul chapbilkʼop ta chʼul awilal te ay ta templo yuʼun. Chiknaj tsantsewal, chawuk, tulan nijkel, tulan bat sok ay machʼatik la kaʼiy te tulan kʼopojike.