Apocalipsis

4 Ta patil la kil jun tiʼnail ta chʼulchan te jamale, te sbabial kʼop te la kaʼiy te yak skʼoponbelon jich skʼop te bin-utʼil skʼop te trompeta. Jich la yalbon: «Moan tal liʼi yuʼun ya kakʼbat awil te bintik yato xkʼot ta pasele». 2 Ta patil, ta oranax la swentainon te chʼul espiritue.* Tey-abi la kil jun mukʼul naktajibal ta chʼulchan sok ay machʼa nakal tey-a. 3 Te machʼa nakal tey-ae jaʼ jich yilel te bin-utʼil jaspe-ton sok tʼujbil tsajal-ton, ta sjoyobal te mukʼul naktajibal ay jun arcoiris te jich yilel te bin-utʼil esmeralda-ton.

4 Ta sjoyobal te mukʼul naktajibal ay 24 mukʼul naktajibaletik, ta mukʼul naktajibaletik-abi la kil te ay nakajtik 24 ta tul mamaletik. Slapojik sakal kʼuʼul pakʼal sok ay scoronaik ta sjolik te pasbil ta oro. 5 Ta banti te mukʼul naktajibal yak ta lokʼel tsantsewal, chawuk sok ay machʼatik la kaʼiy te tulan kʼopojike; sok ay jukeb tsumbil kʼajkʼ te yakik ta tilel ta stojol te mukʼul naktajibale. Jaʼ señail te jukeb espirituetik yuʼun te Diose. 6 Ta stojol te mukʼul naktajibal ay bin pamal la kil te jich yilel te bin-utʼil mar yuʼun cristal.

Ta yolil te mukʼul naktajibal sok ta sjoyobal ay chantul querubinetik* te skojtol ay sitik ta yelawik sok ta spatik. 7 Te sbabial querubín* jich yilel te bin-utʼil león-choj, te schebal querubín jich yilel te bin-utʼil jkolel* toro, te yoxebal querubín jich yilel sit yelaw te bin-utʼil winik, te schanebal querubín jich yilel te bin-utʼil águila te yak ta wilele. 8 Te chantul querubinetik* ay wakeb xikʼik ta jujuntul te nojel ta sitil te yutil sok te spat te xikʼike. Ta spisil-ora, ta kʼajkʼal ajkʼabal jich ya yalik: «Chʼul Dios, chʼul Dios, chʼul Dios te Jehová,* te Machʼa spisil ya xjuʼ yuʼune, jaʼ te machʼa ay ta namey, te machʼa ay ta ora ini sok te ya xtale».

9 Te kʼalal jujun buelta ya yalbeyik yutsil skʼoplal, ya yichʼik ta mukʼ sok ya yalbeyik wokol te machʼa nakal ta mukʼul naktajibal, te machʼa kuxul ta sbajtelkʼinal, 10 te 24 ta tul mamaletik ya skejan sbaik ta stojol te machʼa nakal ta mukʼul naktajibal sok ya yichʼik ta mukʼ te machʼa kuxul ta sbajtelkʼinal. Ya slokʼesik te scoronaik ta stojol te mukʼul naktajibal sok jich ya yalik: 11 «Jehová* Dios kuʼuntik, snujpʼ te ya awichʼ albeyel yutsil akʼoplal sok ichʼel ta mukʼ ta swenta te ay awuʼele, melel jaʼat la apas spisil te bintik aye sok ta swenta skʼanojel awoʼtan chiknajik sok la yichʼtiklan pasel».