Yaʼtel te Jpuk-kʼopetik

3 Te Pedro sok te Juan moik bael ta templo ta nopol* oxeb ora ta mal kʼajkʼal te jaʼ yorail skʼoponel Dios, 2 ay jtul winik tey-a te koxo ta yayinelto* te ya skuchik tal kʼalalto ta tiʼ templo, te tiʼ templo ini Tʼujbil sbiil. Ta jujun kʼajkʼal ya yakʼik tey-a yuʼun ya skʼanbey takʼin te machʼatik ya x-ochik bael ta templo. 3 Te kʼalal lanax yil te Pedro sok te Juan te yakik ta ochel bael ta templo, jajch skʼanbey takʼin. 4 Te Pedro, te jokinbil yuʼun te Juan, la yilbey sit te koxo winik sok jich la yalbey: «Ilawonkotik». 5 Jich kʼeluyotik yuʼun te koxo yuʼun la skuy te ay bin ya x-akʼbote. 6 Pero, jich albot yuʼun te Pedro: «Maʼyuk plata ni oro kuʼun, pero jaʼ ya kakʼbat te bin ay kuʼune. ¡Ta swenta sbiil te Jesucristo te Nazareno, beenan!». 7 Te kʼalal jich la yale, la stsak ta swaʼel kʼab, la snit jajchel. Oranax la yichʼ yip te yok sok te snukʼ yok 8 sok wil jajchel ta oranax te winike, jajch ta beel, la sjokin ochel ta templo te Pedro sok te Juan, yak ta beel, yak ta wilel sok yak ta yalbeyel yutsil skʼoplal te Diose. 9 Spisil te ants winiketik la yilik te yak ta beel sok te yak ta yalbeyel yutsil skʼoplal te Diose. 10 La snaʼbeyik sba te jaʼ te winik te ya snajkan sba ta skʼanel takʼin ta tiʼ templo te Tʼujbil sbiile, chamnax yoʼtanik* yuʼun sok yan-nax la yilik-a te bin kʼot ta pasele.

11 Te kʼalal stsakojbeyto skʼab-a te Pedro sok te Juan, te ants winiketik animalnax bajtik ta Slejchelul Na yuʼun Salomón. Melel te ants winiketik te tey ayik-ae, chamnax yoʼtanik* yuʼun te bin kʼot ta pasele. 12 Te kʼalal jich la yil te Pedro, jich la yaltiklanbey: «Winiketik yuʼun Israel, ¿bin yuʼun te chamnax awoʼtanik* yuʼun ini? ¿Bin yuʼun ya awilonkotik? ¿Yuʼunbal ya akuyik te joʼonkotik la kakʼtik beenuk te winik ini ta swenta kuʼelkotik o ta swenta te bitʼil kichʼojtik ta mukʼ te Diose? 13 Te Dios yuʼun te Abrahán, Isaac sok te Jacob, te Dios yuʼun te antiguo jmeʼ jtatik, la yakʼbey yutsilal te j-abat yuʼun, te jaʼ te Jesús, te jaʼexnix la awakʼik ta kʼabal sok te la amuk ta awoʼtanik ta stojol te Pilato te kʼalal kʼan skoltay bael stukele. 14 Ta melel la apʼajik te winik te chʼultesbil sok te toj yoʼtane, jaʼ la akʼanik te ya yichʼ koltayel lokʼel jtul jmilawal 15 sok la amilik te Machʼa yichʼoj yaʼtel ta yakʼel te kuxlejalile. Pero, Dios la schaʼkuxajtes tal ta yolil te machʼatik lajemike, joʼotik testigoonkotik yuʼun-abi. 16 Ta swenta sbiil sok ta swenta schʼuunel koʼtantik ta sbiil la yichʼ yip te winik ini te yakex ta yilel te ya anaʼbeyik sbae. Ta swenta te schʼuunel koʼtantik ta stojol te Jesús lekubix ta jkʼaxel te winik ini te ay ta atojolike. 17 Kermanotak, la jnaʼ te jich la apasik ta skaj te maba la anaʼike, jichnix te bin-utʼil machʼatik yichʼojik mukʼ yaʼtel ta atojolike. 18 Pero, jich la yakʼ kʼotuk ta pasel Dios te bintik albil jilel yuʼun spisil te j-alwanejetike: jaʼ te ya xkʼax swokol te Cristo yuʼune.

19 »Jich yuʼun sujtesa awoʼtanik sok sujtanik tal swenta jich ya yichʼ tupʼel te amulike, jichme ya sta yorail te jaʼnix te Jehová* ya yakʼ te xkuxet awoʼtanik 20 sok te ya stikunbeyex tal ta atojolik te Cristo te akʼbil yaʼtel, jaʼ te Jesuse. 21 Ya skʼan ya x-ayin ta chʼulchan jaʼto te kʼalal ya xkʼot yorail te ya yichʼ chaʼlekubtesel spisil te bintik la yal Dios ta stojol te chʼul j-alwanejetik yuʼun ta namey kʼinale. 22 Ta melel, jich la yal te Moisés: ‹Te Jehová* te Dios awuʼunik yame yakʼbeyex jtul j-alwanej te ya xlokʼ tal ta yolil te awermanotak jich bin-utʼil te joʼone, yame skʼan ya awaʼiybeyik te skʼope sok yame skʼan ya apasik spisil te bin ya yalbeyexe. 23 Spisil te machʼa ma xyaʼiybey skʼop te J-alwanej-abi yame yichʼ lajinel yuʼun te Diose›. 24 Spisil te j-alwanejetik —jaʼto tal ta Samuel— la yalbeyik skʼoplal te kʼajkʼaleltik ini. 25 Jaʼex te yal snichʼnabex te j-alwanejetik sok jaʼex te ay ta awentaik te chapbilkʼop te la spas Dios sok te antiguo ameʼ atatik te kʼalal jich la yalbey te Abrahán: ‹Yame staik bendición spisil ta chajp ants winiketik te ay ta balumilal ta swenta te atsʼumbale›. 26 Te kʼalal la yakʼbey yaʼtel te J-abat yuʼune, te Dios nail la stikun tal ta atojolik yuʼun ya yakʼbeyex bendición sok ya yakʼ te ya awijkitayik spasel ta jujuntul te bin chopole».*