Te lek yachʼil kʼop ya yal te Mateo

13 Ta yorail-abi lokʼ bael ta na te Jesuse, kʼot snajkan sba ta stiʼil mar. 2 Kʼax bayal ta tul ants winiketik kʼotik tey-a, jich yuʼun och ta barco te Jesús sok tey la snajkan sba-a, yan stukel te tsobol ants winiketike tekʼajtik jilel ta stiʼil mar. 3 Jich yuʼun, te Jesús bayal bintik jajch yakʼbey snop te ants winiketik ta lokʼombakʼopetik. Jich la yaltiklanbey: «¡Chʼama awaʼiyik! Ay jtul jtsʼunbajel lokʼ bael ta stsʼunel te yawal tsʼunube. 4 Te kʼalal yak ta stsʼunel-a te yawal tsʼunube, ay kʼot ta tiʼbe. Tal te jaʼmal mutetik, la sbikʼik bael te awal tsʼunubile. 5 Ay yantik kʼot ta tontikil te banti maʼyuk lek slumil, oranax chʼiik tal, melel maba kʼubul te slumile. 6 Pero, te kʼalal lokʼ tal te kʼajkʼale, takijik yuʼun, melel maba kʼuben te slojpʼ o yisim.* 7 Ay yantik kʼot ta yolil chʼixtikil, chʼi tal te chʼixetike, jich tenotik yuʼun. 8 Ay yantik te kʼot ta lekil lum, jaʼ yuʼun sitinik ta lek: ay la yakʼ ta 100, ay la yakʼ ta 60 sok ay la yakʼ ta 30 te site. 9 Te machʼa ay schikine, akʼame schʼam yaʼiy ta lek te kʼope».

10 Jich te jnopojeletike noptsajik* tal ta stojol te Jesuse, jich la sjojkʼoybeyik: «¿Bin yuʼun ya atuuntes lokʼombakʼopetik ta snojptesel te ants winiketike?». 11 Jich la yal te Jesús: «Te jaʼexe ya awichʼik akʼbeyel anaʼik yuʼun Dios te bin mato yak’oj ta na’el-a ta swenta te Wentainel* yuʼun te chʼulchane, yan stukelik maʼuk. 12 Melel te machʼa ay bin ya xkʼot ta yoʼtane yame x-akʼbotxan xkʼot ta yoʼtan ta lek, jichme bayal bin ya xkʼot ta yoʼtan; pero te machʼa maʼyuk bin kʼoem ta yoʼtane yame yichʼ pojbeyel te bin jteb kʼoem ta yoʼtane. 13 Jaʼ yuʼun ya jtuuntes lokʼombakʼopetik ta snojptesel te ants winiketike. Melel ya yilik kʼinal yilel, pero maba ya yilik kʼinal, sok ya yaʼiyik stojol yilel, pero maba ya yaʼiyik stojol, jkʼaxel maʼyuk bin ya xkʼot ta yoʼtanik. 14 Jich ya xkʼot ta pasel ta stojolik te bin albil jilel yuʼun te j-alwanej Isaías: ‹Te jaʼexe yame awaʼiyik, pero jkʼaxel maba ya xkʼot ta awoʼtanik. Yame awilik, pero jkʼaxel maba ya awichʼbeyik swentail. 15 Melel te ants winiketik ini kʼax tonoben yoʼtanik. La smak schikinik* sok la smak sitik swenta jkʼaxel maba ya yilik kʼinal sok maba ya yaʼiyik stojol te kʼope, ma xkʼot ta yoʼtanik ni yakuk sujtik tal ta stojol Dios yuʼun ya jlekubteslan›.

16 »Yan te jaʼexe, tseʼelme awoʼtanik yuʼun te ya awilik sok te ya awaʼiyik stojol spisil ini. 17 Jamal ya kalbeyex te bayal j-alwanejetik sok j-abatetik yuʼun Dios la skʼan yilik te bintik yakex ta yilel te jaʼexe, pero maba la yilik, sok la skʼan yaʼiyik stojol te bin yakex ta yaʼiyel stojole, pero maba la yaʼiyik stojol.

18 »Jaʼ yuʼun aʼiya awaʼiyik te bin swentail te lokʼombakʼop yuʼun te jtsʼunbajele. 19 Te kʼalal ay machʼa ya yaʼiybey skʼoplal te Wentainel* yuʼun te Diose, pero maba ya xkʼot ta yoʼtan, ya xtal te Satanás* ta sbulbeyel lokʼel te bin la yichʼ tsʼunel ta yoʼtane. Jaʼme te awal tsʼunubil te kʼot ta tiʼbee. 20 Te awal tsʼunubil te kʼot ta tontikil jaʼ skʼoplal te machʼa ya yaʼiy stojol te skʼop Dios sok te oranax ya schʼuun sok sbujtsʼ yoʼtan. 21 Pero, ta skaj te maba kʼuben te slojpʼ o yisime,* maba ya xjalaj. Te kʼalal ya xtal wokolil sok kontrainel ta swenta te skʼop Diose, oranax ya xchebaj yoʼtan. 22 Te awal tsʼunubil te kʼot ta yolil chʼixtikil jaʼ skʼoplal te machʼa ya yaʼiy te skʼop Dios, pero ya yakʼ xtenot yuʼun te bitʼil ya xkuxin ta jujun kʼajkʼal sok te loʼlayel yuʼun te kʼulejalile. Jich yuʼun ma sitin ta yoʼtan te skʼop Diose. 23 Te awal tsʼunubil te kʼot ta lekil lume jaʼik skʼoplal te machʼatik ya yaʼiyik te skʼop Dios sok te ya yichʼbeyik swentaile. Jaʼ ini ya sitinik stukel. Ay ya yakʼ ta 100, ay yakʼ ta 60 sok ay ya yakʼ ta 30 te site».

24 Te Jesús la yal yan lokʼombakʼop: «Te Wentainel* yuʼun te chʼulchane jaʼ pajal kʼoem sok jtul winik te bajt stsʼun lekil awal tsʼunubil ta skʼinal. 25 Te kʼalal wayalik-a te j-abatetike, tal te skontrae sok la stsʼun jilel ak ta yolil te trigo, jich bajt. 26 Te kʼalal chʼi tal te trigo sok chiknaj te site, chiknaj-euk te ake. 27 Jich tal te j-abatetik yuʼun te yajwal te kʼinale sok jich jul yalbeyik: ‹Kajwal, ¿mabal lekil awal tsʼunubiluk te la atsʼun ta akʼinale? Jich yuʼun, ¿bin yuʼun te chiknaj ake?›. 28 Jich la yal te yajwalike: ‹Jaʼ la stsʼun te jkontrae›. Jich la sjojkʼoyik te j-abatetike: ‹¿Yabal akʼan te ya xbajt jbultik lokʼel te ake?›. 29 Jich albotik yuʼun te yajwalike: ‹Maʼuk, melel te kʼalal ya abulik te ake ya xjuʼ te pajal ya abulik tal sok te trigoe. 30 Pajal akʼa chʼiukik jaʼto kʼalal ya yichʼ tsobeyel te site. Ta yorail-abi ya kalbey te j-aʼteletik te nail akʼa sbulik te ak sok te akʼa stsobik ta tomoltom* yuʼun ya yichʼ chikʼel, patil ya stsobik te trigo sok ya skʼejik ta yawil›».

31 Jaʼnix jich la yalbey skʼoplal yan lokʼombakʼop: «Te Wentainel* yuʼun te chʼulchane jaʼ jich kʼoem te bin-utʼil jpʼij sbakʼ mostaza* te la stsʼun ta skʼinal jtul winik. 32 Te jpʼij sbakʼ awal tsʼunubil ini jaʼ kʼax chʼinxan-a te bin-utʼil te yantik sit awal tsʼunubile, pero te kʼalal ya xchʼie, jaʼ kʼax mukʼxan ya xkʼot-a te bin-utʼil te yantik awal tsʼunubile, jich ya xkʼot bin-utʼil jpejt* teʼ. Tey ya xtal spas spechechik-a te jaʼmal mutetik ta banti te skʼabkʼabe».

33 La yalxan yan lokʼombakʼop ta stojolik: «Te Wentainel* yuʼun te chʼulchane jaʼ jich kʼoem bin-utʼil levadura te jtul ants la swotsʼ sok bayal harina.* Jaʼto te kʼalal la spajubtes skʼolol te harinae».

34 Te kʼalal la schol Jesús spisil ini, la stuuntes lokʼombakʼopetik ta stojol te ants winiketike. Ta melel, spisil-ora la stuuntes lokʼombakʼop kʼalal kʼopoj sok te ants winiketike. 35 Jich kʼot ta pasel te bin albil jilel yuʼun te j-alwanej te jich la yale: «Yame jam ke ta yalel lokʼombakʼopetik; yame kalbey skʼoplal te bintik muken ay kʼalalto tal ta sjajchibal».*

36 Te kʼalal la stikunix bael-a te ants winiketike, och ta na. Noptsajik* tal te jnopojeletik sok jich la yalbeyik te Jesuse: «Chola kaʼiykotik te bin swentail te lokʼombakʼop yuʼun te ak te la yichʼ tsʼunel ta kʼinale». 37 Jich la schol te Jesús: «Te machʼa la stsʼun te lekil awal tsʼunubile, jaʼ te sNichʼan te Winike.* 38 Te kʼinale jaʼ skʼoplal te ants winiketike. Te lekil awal tsʼunubile jaʼ skʼoplal te yal snichʼnab te Wentainele.* Te ake jaʼ skʼoplal te yal snichʼnab te Satanase. 39 Te jkontrainwanej te la stsʼun te ake jaʼ te Pukuj.* Te stsobeyel sit te awal tsʼunubile jaʼ skʼoplal te kʼalal nopolix-a* te slajibal kʼajkʼale, te j-aʼteletik jaʼik te chʼul-abatetike. 40 Jich bitʼil ya yichʼ bulel sok ya yichʼ chikʼel te ake, jichme ya xkʼot ta pasel te kʼalal nopolix-a* te slajibal kʼajkʼale. 41 Te sNichʼan te Winike* yame stikun te chʼul-abatetik yuʼun, jaʼikme ya slokʼeslan ta Wentainel* yuʼun Dios te bintik ya x-ikʼawan bael ta spasel mulil sok te machʼatik ya skʼaxuntayik te mantale, 42 yame schʼojtiklan ochel ta horno yuʼun kʼajkʼ. Teyme ya yokʼetay sbaik-a sok teyme ya skʼuxuxan yeik-a.* 43 Ta yorail-abi, te machʼatik toj yoʼtanik kʼaxtome jich ya xtilik-a te bin-utʼil kʼajkʼal ta banti te Wentainel* yuʼun te sTatike. Te machʼa ay schikine, akʼame schʼam yaʼiy ta lek te kʼope.

44 »Te Wentainel* yuʼun te chʼulchane jaʼ jich kʼoem bin-utʼil kʼulejalil te mukul ta lum te la sta jtul winike. Te winike la schaʼmuk jilel te kʼulejalile sok akʼbot bayal stseʼelil yoʼtan, jich bajt schon spisil te bintik ay yuʼun sok la sman te kʼinale.

45 »Te Wentainel* yuʼun te chʼulchane jaʼnix jich kʼoem bin-utʼil jchonbajel winik te yak ta sleel lekil perlaetik. 46 Te kʼalal la sta jun perla te kʼax toyol stojole, sujt bael, bajt schon ta oranax spisil te bintik ay yuʼune sok la sman te perla-abi.

47 »Te Wentainel* yuʼun te chʼulchane jaʼnix jich kʼoem bin-utʼil stsakojibal chay te la schʼojik koel ta mar sok te la stsob tal bayal ta chajp chayetik. 48 Te kʼalal noj te stsakojibal chaye, te jtsakchayetike la sjochik lokʼel ta stiʼil mar, la snajkan sbaik ta stsael te chayetike, la yakʼik ta yawil te lekike, pero la schʼojik bael te chayetik te ma lekuke. 49 Jichme ya xkʼot ta pasel te kʼalal nopolix-a* te slajibal kʼajkʼale. Yame xtal te chʼul-abatetik, parte ya yakʼ te machʼatik toj yoʼtanik sok parte ya yakʼ te machʼatik ma lek stalelik. 50 Yame schʼojtiklan ochel ta horno yuʼun kʼajkʼ te machʼatik ma lek stalelike. Teyme ya yokʼetay sbaik-a sok teyme ya skʼuxuxan yeik-a.

51 »Te Jesús jich la sjojkʼoybey te jnopojeletik yuʼune: «¿Kʼotbal ta awoʼtanik bin swentail te bin la kalbeyexe?». «Kʼot», xchiik. 52 Jaʼ yuʼun, jich albotik yuʼun te Jesús: «Teme jiche, ya skʼan ya anaʼik ini: spisil te jpʼijubteswanejetik te yichʼojikix pʼijubtesel ta swenta te Wentainel* yuʼun te chʼulchane jaʼ pajal kʼoem sok jtul winik te jaʼ yajwal na, te ya slokʼes tal ta yawil skʼulejal te bintik yachʼil sok te bintik pokoʼbenixe».

53 Te kʼalal laj yoʼtan te Jesús ta yalel te lokʼombakʼopetik ini, lokʼ bael tey-a. 54 Te kʼalal kʼot ta slumale, och ta nojpteswanej ta sinagoga yuʼunik, chamnax yoʼtanik* yuʼun te ants winiketike. Jich la yalik: «¿Banti la sta spʼijil te winik ini sok te yuʼel yuʼun ya spas milagroetik? 55 ¿Mabal jaʼuk te snichʼan carpinteroe? ¿Mabal jaʼuk snan* te Mariae? Sok ¿mabal jaʼuk yijtsʼinab te Santiago, José, Simón sok te Judase? 56 ¿Mabal liʼuk ay ta nainel ta jlumaltik te yijtsʼinab achʼixetike? Jich yuʼun, ¿banti la staix-a te spʼijil sok te yuʼele?». 57 Ta swenta-abi maba la yakʼ schʼuunel yoʼtanik ta stojol. Pero, jich albotik yuʼun te Jesús: «Te j-alwaneje bayuk ichʼbil ta mukʼ, pero maba ya yichʼ ichʼel ta mukʼ ta slumal soknix ta yutil sna». 58 Jich yuʼun, ta skaj te maʼyuk schʼuunel yoʼtanike, maba la spas bayal milagroetik tey-a te Jesuse.