Génesis

49 Te Jacob la stsob te snichʼnab sok jich la yaltiklanbey: «Tsoba abaik tal yuʼun ya kalbeyex awaʼiyik te bin ya xkʼot ta pasel ta atojolik ta pajel chaʼbej. 2 Snichʼnab Jacob, tsoba abaik tal sok chʼama awaʼiyik te bin ya kalbeyexe. Chʼama awaʼiyik te bin ya yalbeyex te atatik Israel.

3 »Rubén, jaʼat te banichʼanil kuʼun, jaʼat te kip sok sba jtsʼumbalat, jaʼat te ichʼbilat ta mukʼ sok te ay awip-ae. 4 Pero maba mukʼ akʼoplal ya xkʼoat, melel ma la akom aba jich te bin-utʼil jaʼ te maba ya skom sba ta syukʼilanel sba te jich moat ta jwayib, ta yorail-abi la abolobtesbey skʼoplal te jwayibe. ¡Yuʼun-nix jich la apas-a!

5 »Te Simeón sok te Leví sbankil yijtsʼin sbaik. Te awaʼtejibik jaʼ aʼtejibal yuʼun utsʼinwanej.* 6 Maba ya x-ochon ta sjokinlanel. Maba ya jokin jba sok te kʼalal ya stsob sbaike, melel ta skaj yilinbaik la smiltiklanik winiketik sok ta swenta sbolil yoʼtanik la sbojtiklanbeyik schial yok toroetik. 7 Bolobukme skʼoplal te awilinbaik, melel kʼax jelawen sok bolobukme skʼoplal te skʼajkʼal awoʼtanik, melel jkʼaxel ma snaʼ yoʼbolil jbatik. Joʼon ya jpukex ta yolil te Jacob. Ya jpukex ta yolil te Israel.

8 »Te jaʼate, Judá, yame awichʼ albeyel yutsil akʼoplal yuʼun te abankil awijtsʼinab. Yame apichʼbey snukʼ te akontratake. Te yantik jnichʼnab yame snijan sbaik ta atojol. 9 Jaʼat, Judá, alal león-chojat. Jnichʼan, yame xjajchat lokʼel ta stojol te banti ay te aweʼele. Jun awoʼtan ya apajkan aba jich te bin-utʼil jkojt león-choj. ¿Machʼa ya xtal ta yoʼtan te ya stij jajchele? 10 Te bastón maba ya xlokʼ bael ta stojol te Judá ni jaʼuk te bastón yuʼun te mantalteswanej maba ya xlokʼ bael ta yolil yok jaʼto te kʼalal ya xtal te Siló.* Jaʼme ya yichʼ chʼuunbeyel skʼop yuʼun te lumetike. 11 Yame schuk te sburro ta steʼel tsʼusub sok yame schuk te yal te meʼ burra yuʼun ta lekil steʼel tsʼusub. Te skʼuʼ ya sakʼ ta vino, te snajtil kʼuʼ ya sakʼ ta yaʼlel tsʼusub. 12 Tsaj te sit ta swenta te vino sok saknax te sbakel ye ta swenta te leche.

13 »Te Zabulón ya xnain ta tiʼ mar te banti nopol* ay te yawil te barcoetike. Ta stojol bael te skʼinal Sidón teyto ya xkʼot-a te stiʼil skʼinale.

14 »Te Isacar jaʼ jich te bin-utʼil jkojt burro te tulan sbakel te pakal ta yolil cheb ijkatsil. 15 Sok yame yil te leknax te lugar yuʼun ya skux yoʼtan sok ya yil te tʼujbilnax te kʼinale. Yame yakʼ spat* yuʼun ya skuch bael ijkatsil sok yame yakʼ sba ta spasel tulan aʼtelil.

16 »Te Dan, te jaʼ jun tsʼumbalil yuʼun Israel, yame x-och ta juez ta stojol te lum yuʼune. 17 Te Dan jich ya xkʼot te bin-utʼil chan ta tiʼbe, jkojt chan te ay xulub te ay ta tiʼbe te ya stiʼbey yok te caballo sok te ya yakʼ xchʼay koel ta spat te machʼa kajal tey-ae. 18 Kajwal, Jehová, ya jmaliytik te ya akoltayotik.

19 »Te Gad yame yichʼ ochintayel yuʼun jtsojb j-elekʼetik, pero yame skoltay sba sok yame snutstiklan bael.

20 »Te Aser ya xbajt ayin bayal weʼelil yuʼun sok ya xbajt yakʼ weʼelil jich te bin-utʼil sweʼel ajwalil.

21 »Te Neftalí jaʼ jich te bin-utʼil jkojt meʼ chij te jaynax sok te tʼujbil ya xkʼopoj.

22 »Te José jaʼ spul jpejt* teʼ te bayal ya yakʼ sit, jaʼ jpejt teʼ te ya yakʼ sit te nopol* ay ta slokʼib jaʼ sok te ya xkʼot skʼabkʼab ta sba tsʼajkʼ. 23 Pero, te j-akʼtʼimalteʼetik la yakʼbeyik swokol, la stʼimuyik flechaetik ta stojol sok maba la skom sbaik ta yil-oʼtantayel. 24 Pero, te stʼimalteʼ maba laj yip sok te skʼab maba lujb sok oranax aʼtej. Jaʼ wokolayal te skʼab te Jacob te ay yip te jich kʼot ta pasele, jaʼ wokolyal te jkanantuminchij, te ton yuʼun Israel. 25 Jaʼ talem ta stojol te Dios yuʼun te atate, jaʼ te Dios te ya skoltayat. Jokinbil yuʼun te Machʼa spisil ya xjuʼ yuʼun, jaʼme ya yakʼbat bendición ta swenta te jaʼ te ya yakʼ tal ta chʼulchan sok te mukʼul jaʼetik te ya xlokʼ tal ta yeʼtal lumkʼinal. Sok ya yakʼbat bendición swenta ya x-ayin* bayal awal anichʼnab sok te ya x-ayin bayal achambalam. 26 Te bendicionetik yuʼun te atate jaʼ kʼax bayalxan-a te bitʼil te bendicionetik ya yakʼ te witsetik te sbajtelkʼinal ayik sok jaʼ kʼax bayalxan-a te bitʼil te bintik mukʼ skʼoplal te ya yakʼ te chʼin witsetik te stalel ayike. Yame x-ayin ta sjol te José, te machʼa la yichʼ tsael ta yolil te sbankil yijtsʼinabe.

27 »Te Benjamín jaʼ jich te bin-utʼil jkojt jaʼmal tsʼiʼ te yak ta stuchʼel ta tiʼel te bin la stsake. Ta sakubel kʼinal ya stiʼ te bin la stsak sok ta xmal kʼajkʼal ya spuk te bintik la spoje».

28 Spisil ini jaʼik te 12 ta chajp stsʼumbal Israel, jaʼ jich te bin albotik yuʼun te statik te kʼalal akʼbotik bendición yuʼun. Ta jujuntul akʼbotik te bendición jaʼ chikan te bitʼil snujpʼ ya yichʼike.

29 Ta patil, jich la yaltiklanbey ta mantal te snichʼnab: «Jtebxanix ya skʼan ya xlajon. Yame amukonik te banti mukul te antiguo jmeʼ jtat ta chʼen te ay ta skʼinal Efrón, te hitita-winik. 30 Jaʼ te chʼen te ay ta Macpelá te nopol* yiloj sba sok te Mamré te ay ta skʼinal Canaán. Jaʼ te kʼinal te chonbot te Abrahán yuʼun te Efrón, te hitita-winik, yuʼun ya stuuntes jich bitʼil mukenal. 31 Tey la smukik-a te Abrahán sok te Sara, te yiname. Tey la smukik-a te Isaac sok te Rebeca, te yiname. Tey la jmuk-euk-a te Lea. 32 Te kʼinal sok te chʼen te tey ay-a jaʼ la smanbeyik te snichʼnab Het».

33 Jich laj yoʼtan te Jacob ta yalbeyel mantal te snichʼnabe. Tey-abi la schaʼmojtes te yok ta swayib, jich laj, la yichʼ mukel sok te antiguo smeʼ state.