Yaʼtel te Jpuk-kʼopetik

20 Te kʼalal lamaj te kʼop jajchem-ae, te Pablo la stikun ta ikʼel te jnopojeletike. La yakʼtiklanbey jilel smukʼul yoʼtan sok la skʼoponlan jilel, jich bajt ta Macedonia. 2 Te kʼalal kʼax ta lumetik te ay ta skʼinal Macedonia sok te la yakʼbey bayal smukʼul yoʼtan te jnopojeletik tey-ae, kʼot ta Grecia. 3 Jil oxeb u tey-a; pero te kʼalal nopol* ya x-ochix ta barco yuʼun ya xbajt ta Siria, te judioetik la schapbeyik skʼoplal ta skontrainel. Jich yuʼun la snop te ya xchaʼsujt bael ta Macedonia. 4 Jokinot bael yuʼun te Sópater te snichʼan Pirro te talem ta Berea, Aristarco sok te Segundo te talemik ta Tesalónica, Gayo te talem ta Derbe, Timoteo, jaʼnix jich te Tíquico sok te Trófimo te talemik ta skʼinal Asia. 5 Jaʼ nailajik bael sok la smaliyonkotik ta Troas. 6 Te kʼalal kʼaxix-a te Kʼin yuʼun pan te maba yichʼoj levadura, ochonkotik ta barco yuʼun bootik ta Filipos, joʼeb kʼajkʼal ta patil la jta jbakotik ta Troas, tey jilotik jukeb kʼajkʼal-a.

7 Te sbabial kʼajkʼal yuʼun te semana, te kʼalal jtsoboj jbatik ta weʼel-ae, te Pablo jajch snojpteslan te machʼatik tey ayik-ae, melel ta yan kʼajkʼal ya xbajtix-a. Jalaj ta yalel skʼop Dios jaʼto ta olil ajkʼabal. 8 Jaʼ yuʼun, bayal tsumbil kʼajkʼ tey ta cuarto ta yoxkajal na te banti jtsoboj jbatik-ae. 9 Ay jtul kerem te Eutico sbiil te nakal ta ventana, te kʼalal yak ta kʼop-a te Pabloe, och swayel. Te bitʼil tsalot yuʼun te swayele, chʼay koel ta yoxkajal na te banti ayotik-ae, te kʼalal la sjachike, lajemix-a. 10 Jich yuʼun ko bael te Pabloe, la spajkan sba ta sba te kereme sok la spet. Jich la yal: «Ma xa amel awoʼtanik. Kuxul te kereme». 11 Chaʼmo bael, la xetʼ te pane jich och ta weʼel. Ta patil, jalajxan ta kʼop jaʼto kʼalal sakub te kʼinale, jich bajt. 12 Kuxul la yikʼik bael te kereme sok la staik bayal smukʼul kʼinal yaʼiyik yuʼun.

13 Te joʼotike ochotik ta barco, bootik kʼalalto ta Asón te banti ya xkʼax kikʼtik te Pabloe. Jich la jpastik, melel jaʼnix la yalbotik yuʼun ya skʼan ya xbajt ta yok stukel. 14 Jich yuʼun, te kʼalal la staotik ta Asón, la kikʼtik ochel ta barco, jich bootik ta Mitilene. 15 Ta yan kʼajkʼal ochotik ta barco, kʼootik ta yelaw Quíos. Ta schebal kʼajkʼal jilotik jtsʼinuk* ta Samos, jaʼto ta yoxebal kʼajkʼal kʼootik ta Mileto. 16 Te Pablo la sta ta nopel te maba ya xkʼax ta Éfeso yuʼun ma la skʼan jalajix ta skʼinal Asia. La skʼan te oranax ya xkʼot ta Jerusalén, melel yoʼtanuk ya skʼan te tey ayukix-a ta yorail te Kʼin yuʼun Pentecostés.

17 Kʼalalto ta Mileto la stikun ta ikʼel te ancianoetik yuʼun te congregación te ay ta Éfeso. 18 Te kʼalal kʼotik te banti ay te Pabloe, jich albotik yuʼun: «Anaʼojik ta lek te bin yilel jtalel kakʼoj ta ilel ta awolilik kʼalalto ta sbabial kʼajkʼal te julon ta skʼinal Asia. 19 Sok spekʼelil koʼtan kakʼoj jba ta abatinel ta stojol te Kajwaltike, sok bayal jmaloj yaʼlel jsit, jaʼnix jich kʼaxem jwokol yuʼun te pruebaetik te yakʼojbonik te judioetike. 20 Manchukme jich-abi, maba xchebet koʼtan la kalbeyex te bintik ya xtuun awuʼunike sok maba la jkom jba ta snojpteselex ta komonsitil sok ta nanatik. 21 Te bin la jpase jaʼ te la jcholbey yaʼiyik ta lek te judioetik sok te griegoetik te ya skʼan ya sujtes yoʼtanik, te yakuk sujtik tal ta stojol Dios sok te yakuk yakʼ schʼuunel yoʼtanik ta stojol te Kajwaltik Jesús. 22 Pero, ta ora ini ya yikʼon bael ta Jerusalén te chʼul espiritue,* manchukme ma jnaʼ te bin ya xkʼot ta jtojol tey-ae, 23 te bin-nax jnaʼoje jaʼ te ya yalbon te chʼul espíritu* te bin ya xkʼot ta jtojol ta jujunpam lum te banti ya xboone, jaʼ te ya smaliyon te chukel sok te wokolil. 24 Pero, maʼyuk skʼoplal ta koʼtan te jkuxlejale. Te bin-nax ya jkʼane jaʼ te yakuk xjuʼ kuʼun slajinel te animal kuʼune sok te aʼtelil la yakʼbon te Kajwaltik Jesús, jaʼ te ya jcholbey skʼoplal ta tsʼakal te lek yachʼil kʼop yuʼun te slekil yoʼtan Dios te ma snujpʼuk ya kichʼtike.

25 »Ta ora ini jnaʼoj te maʼyuk bin-ora ya awilonikix jaʼex te la jcholbeyex awaʼiyik te Wentainel* yuʼun te Diose. 26 Jaʼ yuʼun la jtikunex ta ikʼel yuʼun testigo ya xkʼoex te maʼyukix ta jwenta te schʼichʼel spisil te ants winiketike, 27 melel jamal la kakʼbeyex anaʼik spisil te skʼanojel yoʼtan te Diose. 28 Jich yuʼun kanantaya abaik sok kanantayaik te tuminchijetike, melel la awichʼ awaʼtelik yuʼun te chʼul espíritu* jich bitʼil ancianoetik* yuʼun ya akanantayik te congregación yuʼun te Diose te jaʼ la sman ta swenta schʼichʼel te sNichʼane. 29 Jnaʼoj te kʼalal ya xboone, ya x-och tal ta awolilik jtiʼawal jaʼmal tsʼiʼetik te ya yutsʼin te tuminchijetike. 30 Jaʼnix jich yame xchiknaj ta awolilik winiketik te ya yakʼik ta nopel lotil kʼopetik, jich ya sloʼlay te jnopojeletik swenta jich ya xtʼunotik yuʼun.

31 »Jich yuʼun wikʼilukme asitik sok julukme ta awoʼtanik te oxeb jaʼbil ta kʼajkʼal ajkʼabal maba la jkom jba yuʼun la kakʼbeyex mantal ta jujuntul sok yaʼlel jsit. 32 Ta ora ini ya kakʼex jilel ta kanantayel yuʼun te Dios sok akʼa skanantayex te bin ya yal te skʼop Dios ta swenta te slekil yoʼtan te ma snujpʼuk ya kichʼtike, jaʼ-abi ya yakʼbeyex yip awoʼtanik, jaʼnix jich pajal ya yakʼbeyex awichʼik sok te machʼatik chʼultesbilik te bin kechel ya awichʼike. 33 Maʼyuk machʼa la jbikʼtal oʼtantaybey plata yuʼun sok oro yuʼun soknix te skʼuʼ spakʼe. 34 Te jaʼexe anaʼojik ta lek te aʼtejon ta jkʼab ta sleel te bin ya xtuun kuʼun sok te machʼatik sjokinojonike. 35 Ta spisil la kakʼbeyex awilik te jich tulan ya skʼan ya x-aʼtejex-euk yuʼun jich ya akoltayik te machʼatik pejkʼajem schʼuunel yoʼtanik sok te ayuk ta awoʼtanik te bin la yal te Kajwaltik Jesús: ‹Te machʼa ay bin ya yakʼ jaʼ bayalxan stseʼelil yoʼtan te bin-utʼil machʼa ay bin ya yichʼe›».

36 Te kʼalal laj yoʼtan ta kʼope, la skejan sba sok te yantik, la skʼopon Dios. 37 Tey-abi jajchik ta okʼel ta spisilik, la smeyik sok la yujtsʼuyik* te Pablo sok skʼuxul yoʼtanik, 38 melel bayal smeloj yoʼtanik, kʼaxtoxan-a te kʼalal la yal te Pablo te maʼyuk bin-ora ya yilikxane. Tey-abi la sjokinik bael kʼalalto ta barco.