Schebal carta ta stojol te Tesalonicenseetik

3 Ta slajibal, kermanotak, mame xa akom abaik ta skʼoponel Dios ta jtojolkotik yuʼun jich ya xpujkxan bael ta oranax te skʼop te Jehová* sok te ya yichʼ albeyel yutsil skʼoplale, jich bitʼil te yakex ta spasel te jaʼexe, 2 sok te ya kichʼtik koltayel ta skʼab te chopol ants winiketik te ya skʼan ya yutsʼinotik, melel ma jpisiltikuk ay kuʼuntik te chʼuunel oʼtanile. 3 Pero, jun yoʼtan stukel te Kajwaltike, jaʼme ya yakʼbeyex yip awoʼtanik sok yame skanantayex ta stojol te Satanase.* 4 Jaʼnix jich ay smukʼul koʼtantik ta stojol te Kajwaltik te ya achʼuunik mantal te jaʼexe sok te ya achʼuunik spasel te bin ya kalbeyexkotik ta mantale. 5 Akʼame stojobtesbeyex bael awoʼtanik te Kajwaltik ta stojol te skʼuxul yoʼtan te Dios sok te yakuk xkujch awuʼunik ta swenta te Cristo.

6 Ta ora ini, kermanotak, yame kalbeyexkotik mantal ta swenta sbiil te Kajwaltik Jesucristo te mame xa ajokinik te machʼauk hermanoil te ma schʼuun mantale sok te ma schʼuun te nojptesel te la kakʼbeyexkotike. 7 Te jaʼexe ya anaʼik te bin-utʼil ya skʼan ya akʼayinik te jtalelkotike, melel te joʼonkotike maba la kakʼtik ta ilel te ma jchʼuuntik mantal ta awolilik 8 sok maba majtanil la jkʼanbeyexkotik te jweʼelkotike. Te bin la jpastike jaʼ te maba la jkux koʼtantik ta aʼtel ta kʼajkʼal ajkʼabal sok tulan aʼtejotik yuʼun jich maba la kakʼbeyex awokolik ta swenta takʼin. 9 Ma yuʼunuk ma xjuʼ te ya jkʼanbeyexkotike, pero jaʼ la jkʼankotik te yakuk akʼayinik te jtalelkotike. 10 Ta melel, te kʼalal jokinojexkotik-ae, jich la kalbeyexkotik ta mantal: «Teme ay machʼa ma skʼan ya x-aʼtej, jaʼnix jich mame akʼa weʼuk». 11 Melel ay kaʼiyojkotik te ay chaʼoxtul ta awolilik te yakik ta skʼaxuntayel mantal, melel maba ya x-aʼtejik sok jaʼnax ya schʼik sbaik-a te bin ma swentaikuke. 12 Te machʼatik jich yakik ta spasele ya kalbeykotik ta mantal sok ya jkʼanbeytik wokol ta swenta te Kajwaltik Jesucristo te junuk yoʼtan ya x-aʼtejik sok akʼa weʼukik ta swenta te bin ya spasik ganar.

13 Jaʼex, kermanotak, mame xa akom abaik ta spasel te bin leke. 14 Pero, teme ay machʼa ma schʼuun te bin la kalkotik ta carta ini, akʼaik ta naʼel machʼa-a sok te manchuk ya ajokinikix, yuʼun jich ya xkʼexaw-a. 15 Pero, mame jichuk xa awilik te bin-utʼil akontraik. Jaʼ lekxan te ya atojobtesik jich bitʼil jtul hermano.

16 Te Kajwaltik yuʼun lamalkʼinal jaʼuknixme ya yakʼbeyex lamalkʼinal spisil-ora. Akʼame sjokinex ta apisilik te Kajwaltike.

17 Joʼon Pabloon, te la jtsʼibaybeyex ta jkʼab te spatjibal oʼtanil ini, te jaʼ señail spisil te cartaetik kuʼune. Jaʼ jich te bin-utʼil ya stsʼibajone.

18 Ayukme ta atojolik te slekil yoʼtan te Kajwaltik Jesucristo te ma snujpʼuk ya kichʼtike.