Schebal carta ta stojol te Tesalonicenseetik

1 Joʼon Pabloon sok te Silvano* soknix te Timoteo ya jtikunbeyexkotik te carta ini, jaʼex te ayex ta congregación ta Tesalónica te jun ayex ta stojol te jTatik Dios sok te Kajwaltik Jesucristo:

2 Ayukme ta atojolik te slekil yoʼtan Dios te ma snujpʼuk ya kichʼtik sok te lamalkʼinal te talem ta stojol te jTatik Dios sok te Kajwaltik Jesucristo.

3 Kermanotak, spisil-ora jich la kaʼiy ta koʼtankotik te ya skʼan ya kalbeytik wokol Dios ta atojolike. Yuʼun jich ya skʼan pasel, melel kʼaxto yak ta mukʼubel te schʼuunel awoʼtanik sok yak ta yichʼbel yip te skʼuxul awoʼtanik te ya awakʼbey aba awilik ta jujuntule. 4 Jaʼ yuʼun, leknax kʼinal ya kaʼiytik te kʼalal ya kalbeyexkotik akʼoplalik ta stojol te congregacionetik yuʼun Dios ta skaj te kujchem awuʼunik sok te ya awakʼik ta ilel te schʼuunel awoʼtanik ta yorail te kontrainel sok te yak ta tsʼijkel awuʼunik te wokoliletike. 5 Spisil ini ya yakʼ ta ilel te stojil te bin-utʼil ya x-ichʼawan ta kʼop te Diose sok te snujpʼ te ya awichʼik te Wentainel* yuʼun Dios te jaʼ ta swenta te ayex ta wokol yuʼune.

6 Ta melel, jaʼ stojil te ya x-akʼbotik stoj yuʼun Dios te machʼatik ya yakʼbeyex awokolike. 7 Pero, te jaʼex te yak ta kʼaxel awokolik yame yakʼbeyex akux awoʼtanik, jich bitʼil te joʼonkotik, te kʼalal ya xchiknaj tal ta chʼulchan te Kajwaltik Jesús sok te chʼul-abatetik yuʼun te ay yipik 8 te joytaybilik ta kʼajkʼ, te kʼalal ya yakʼbey castigo te machʼatik ma snaʼbeyik sba te Dios sok te machʼatik maba la schʼuunik spasel te lek yachʼil kʼop ta swenta te Kajwaltik Jesús. 9 Jaʼik te machʼatik ya yichʼik ichʼel ta kʼop yuʼun te Kajwaltike, te castigo ya yichʼik jaʼ te lajinel ta sbajtelkʼinal, jich ya yichʼik lajinel ta stojol te Kajwaltik sok ta stojol te yutsil yuʼele, 10 te kʼalal ya xtal yuʼun ya x-albot yutsil skʼoplal ta swenta te machʼatik chʼultesbilik yuʼune sok ta kʼajkʼal-abi ya yichʼ ichʼel ta mukʼ yuʼun spisil te machʼatik la yakʼik ta ilel schʼuunel yoʼtanike, melel te jaʼexe la achʼuunik te bin la kalbeyexkotik awaʼiyike.

11 Jaʼ swentail te spisil-ora ya jkʼopontik Dios ta atojolike, yuʼun jich snujpʼ ya yil te Dios kuʼuntik te ya yikʼex ta stojol sok yuʼun jich ta swenta yuʼel tsʼakal ya spas spisil te bin lek ya skʼan ya spas sok spisil te awaʼtelik ya apasik ta swenta schʼuunel awoʼtanik. 12 Jaʼme jich te bin-utʼil ya yichʼ albeyel yutsil skʼoplal te sbiil te Kajwaltik Jesús ta awentaik sok te ya awichʼik albeyel yutsil akʼoplalik-euk ta swenta te jun ayex soke, jaʼ wokolayal te Dios kuʼuntik sok te Kajwaltik Jesucristo te ya yakʼbotik kiltik te slekil yoʼtanik te ma snujpʼuk ya kichʼtike.