Apocalipsis

5 Te machʼa nakal ta mukʼul naktajibal la kil te stsakoj ta swaʼel kʼab jun balbil jun te schaʼjejchel tsʼibaybile. Makbil ta lek ta jukeb selloetik. 2 Sok la kil jtul chʼul-abat te bayal yuʼel te jich tulan yak ta yalel: «¿Machʼa snujpʼ te ya sjam te balbil jun sok te ya sjam te selloetik te makbil-ae?». 3 Pero, maʼyuk jtuluk ta chʼulchan ni ta balumilal ni ta yeʼtal te balumilal te ya xjuʼ ya sjam te balbil jun sok te ya xjuʼ ya yil te bin tsʼibaybil tey-ae. 4 Bayal la kokʼetay jba yuʼun, melel maba la yichʼ tael te machʼa snujpʼ te ya sjam te balbil jun sok te ya yil te bin tsʼibaybil tey-ae. 5 Pero ay jtul ta yolil te mamaletik te jich la yalbon: «Ma x-okʼatix. Ilawil, te León-choj te talem ta stsʼumbal te Judá, te jaʼ stsʼumbal te David, la yaʼiyix tsalaw. Jich yuʼun, jaʼ ya xjuʼ ya sjam te balbil jun sok te jukeb selloetik te makbilik-ae».

6 Ta yolil te mukʼul naktajibal te joytaybil yuʼun te chantul querubinetik* sok te mamaletike, la kil te kotol jkojt jkolel* tuminchij te jich yilel te yichʼoj milele. Ay jukeb xulub sok jukeb sit. (Te sitiletik jaʼ señail te jukeb espirituetik yuʼun Dios te la yichʼik tikunel ta swolol te balumilale). 7 Oranax noptsaj* tal te Jkolel* Tuminchij sok la stsak te balbil jun te ay ta swaʼel kʼab te machʼa nakal ta mukʼul naktajibale. 8 Te kʼalal la stsak te balbil june, te chantul querubinetik* sok te 24 ta tul mamaletik la skejan sbaik ta stojol te Jkolel* Tuminchij. Ta jujuntul yichʼojik jun arpa sok tazaetik te pasbilik ta oro te nojelik ta pom. (Te pom jaʼ señail te oración ya spasik te machʼatik chʼultesbilike). 9 Sok yakik ta skʼayojtayel jun yachʼil kʼayojil te jich ya yal: «Snujpʼ te jaʼat ya atsak te balbil jun sok te ya ajam te selloetik yichʼoje, melel la awichʼ milel sok ta swenta achʼichʼel la aman te ants winiketik swenta jaʼ yuʼun ya xkʼot te Dios te talemik ta spisil tsʼumbaliletik, kʼopiletik, lumetik sok nacionetik. 10 La awakʼ te ya x-ochik ta wentainwanej sok ta sacerdoteil ta spasbeyel yaʼtel te Dios kuʼuntike. Sok jaʼme ya xwentainwanik ta stojol te balumilale».

11 La kil sok la kaʼiybey skʼop bayal ta tul chʼul-abatetik te sjoytayojik te mukʼul naktajibal, te querubinetik* sok te mamaletik. Te yajtalul te chʼul-abatetike jaʼ 10 mil buelta ta 10 mil sok bayal buelta ta mil te bayal buelta ta mil, 12 jich tulan yakik ta yalel: «Te Jkolel* Tuminchij te la yichʼ milel snujpʼ te ya yichʼ akʼbeyel yuʼel, skʼulejal, spʼijil yoʼtan, yip, te ya yichʼ ichʼel ta mukʼ, albeyel yutsil skʼoplal sok te ya yichʼ bendición».

13 Sok la kaʼiybey skʼop spisil te bintik kuxajtik ta chʼulchan, ta balumilal, ta yeʼtal te balumilal sok ta mar —spisil te bintik ay tey-ae— jich yakik ta yalel: «Te machʼa nakal ta mukʼul naktajibal sok te Jkolel* Tuminchij te ay yuʼelik akʼa yichʼik albeyel lek skʼoplalik, akʼa yichʼik ichʼel ta mukʼ, akʼa yichʼik albeyel yutsil skʼoplalik ta sbajtelkʼinal». 14 Te chantul querubinetik* jich yakik ta yalel: «¡Jichuk!». Te mamaletik la skejan sbaik sok la yichʼik ta mukʼ te Diose.