Te lek yach’il k’op ya yal te Juan

19 Jich yuʼun, te Pilato la yal mantal te ya yikʼik bael te Jesús sok te ya yichʼ akʼbeyel nujkul.* 2 Te soldadoetik la spasbeyik scoronain chʼix sok la xojbeyik ta sjol, sok la yakʼbeyik slap najtil kʼuʼul te kuxul morado sbonile. 3 Noptsajikxan* ta stojol sok jich la yalik ta labanwanej: «¡Talonme, ajwalil yuʼun te judioetik!». Jaʼnix jich la spakʼbeyik ta majel yelaw. 4 Te Pilato chaʼlokʼ bael sok jich la yalbey te ants winiketike: «¡Ilawilik! La kikʼbeyex lokʼel tal yuʼun ya anaʼik te maba ya jtabey smul te winik ini». 5 Jich lokʼ tal te Jesuse, scoronainej chʼix sok slapoj te najtil kʼuʼul te kuxul morado sbonile. Te Pilato jich la yalbey te ants winiketik: «¡Ilawilik te winike!». 6 Pero, te kʼalal la yilik te Jesús te jwolwanej sacerdoteetik sok te jkananetik, jich jajchik ta aw: «¡Akʼa yichʼ jijpanel ta teʼ! ¡Akʼa yichʼ jijpanel ta teʼ!». Jich albotik yuʼun te Pilato: «Ikʼaik bael sok jijpanaik ta teʼ jaʼex, melel te joʼone maba ya jtabey smul te winik ini». 7 Jich la yalik te judioetik: «Te joʼonkotike ay jun ley kuʼunkotik, te ley-abi ya yal te ya skʼan ya xlaje, melel la skuy sba ta snichʼan Dios».

8 Te kʼalal jich la yaʼiy stojol te Pilato, talxan xiwel ta yoʼtan yuʼun, 9 chaʼsujt ochel ta spalacio sok jich la sjojkʼoybey te Jesús: «¿Banti talemat?». Pero, te Jesús maba la sjakʼ jpʼaluk. 10 Jaʼ yuʼun, jich albot yuʼun te Pilato: «¿Mabal ya ajakʼbon te jkʼope? ¿Yuʼunbal ma xa anaʼ te kichʼoj tulan kaʼtel yuʼun ya jkoltayat bael sok te ya xjuʼ ya kakʼat ta jijpanel ta teʼe?». 11 Jich albot yuʼun te Jesús: «Te manchuk jaʼ la yakʼbat awaʼtel te Diose, maʼyuk tulan awaʼtel te jichuke. Jaʼ yuʼun, jaʼ tulanxan smul te winik te la yakʼon ta akʼabe».

12 Ta swenta-abi, te Pilato la slexan te bin-utʼil ya skoltay bael te Jesuse, pero jich jajchikxan ta aw te judioetike: «¡Teme ya akoltay baele, maba jun awoʼtan ta stojol te César! ¡Spisil te machʼa ya skuy sba ta ajwalil ya skontrain te César!». 13 Te kʼalal jich la yaʼiy stojol te Pilatoe, la slokʼes tal te Jesús sok la snajkan sba ta chajpajibal te Limbil pejchel tonetik sbiil, Gábbatha xchi ta hebreo. 14 Jaʼix skʼajkʼalel-a te ya schajpan sbaik ta swenta te Kʼin yuʼun Pascua, nopolix* olil kʼajkʼal-a. Te Pilato jich la yalbey te judioetik: «¡Ilawilik te ajwalil awuʼunike!». 15 Pero, jich tulan awunik: «¡Bajtukix ta milel! ¡Bajtukix ta milel! ¡Akʼa yichʼ jijpanel ta teʼ!». Jich albotik yuʼun te Pilato: «¿Yuʼunbal jaʼ ya akʼanik te ya kakʼ ta milel te ajwalil awuʼunike?». Jich la yalik te jwolwanej sacerdoteetike: «Maʼyuk yan ajwalil kuʼuntik, jaʼnax te Cesare». 16 Tey-abi, te Pilato la yakʼbey ta skʼab te judioetik yuʼun ya sjijpanik ta teʼ.

Jich la yikʼik bael te Jesuse. 17 Jaʼnix la skuch bael te teʼ yuʼun wokolile,* bajt te banti Yawil bakel jolal sbiile, te Gólgota sbiil ta hebreo. 18 Tey la sjijpanik ta teʼ te Jesús sok chaʼtul winiketik, jujuntul ay ta stsʼeel, jaʼ olil ay te Jesuse. 19 Jaʼnix jich, te Pilato la yakʼ ta tsʼibayel jun letrero sok la yakʼ ta banti te teʼ yuʼun wokolil* te jich ya yal: «Te Jesús te Nazareno, te ajwalil yuʼun te judioetike». 20 Bayal ta tul judioetik la skʼoponik te bin tsʼibaybil ta letreroe, melel te lugar te banti la sjijpanik ta teʼ te Jesuse nopol* yiloj sba sok te mukʼul lume. Jaʼnix jich ay ta hebreo, ta latín sok ta griego te bin tsʼibaybile. 21 Pero, te jwolwanej sacerdoteetik yuʼun te judioetik jich la yalbeyik te Pilato: «¿Bin yuʼun te la atsʼibay ‹Ajwalil yuʼun te judioetike›? Melel jaʼnix la yal ‹Joʼon ajwalilon yuʼun te judioetik›». 22 Jich albotik yuʼun te Pilato: «Te bin la kakʼix ta tsʼibayele, tsʼibaybilix».

23 Te kʼalal sjijpanojikix ta teʼ-a te Jesuse, te soldadoetik la stsakbeyik te skʼuʼ sok chaneb la slokʼesik-a, jujunlijkʼ la stsakik jujuntul, jaʼnix jich la yichʼbeyik te snajtil kʼuʼe. Pero, te snajtil kʼuʼe maʼyuk stsʼisbenal, melel jlijkʼnax jalbil. 24 Jaʼ yuʼun, jich la yalbey sbaik: «Mame jchʼiʼtik.* Yuʼun jich ya kiltik te machʼa ya yichʼbey jilel te skʼuʼe». Jich la spasik ini yuʼun jich ya xkʼot ta pasel te bin ya yal te sJun Dios te jich ya yale: «La spukbey sbaik te jkʼuʼe sok la stsal sbaik ta tajimal ta swenta suerte* yuʼun ya snaʼik te machʼa ya yichʼ jilel te jkʼuʼ», te xchie. Jichnix la spasik-a te soldadoetike.

25 Ta nopol* te teʼ yuʼun wokolil* te banti jipil te Jesuse tey tekʼel-a te snan* sok te yijtsʼin te snane; jaʼnix jich te María te yinam te Clopas sok te María Magdalena. 26 Te kʼalal la yil te Jesús te nopol* tey ay-a te snan* sok te jnopojel te kʼux ta yoʼtane, jich la yalbey te snane: «¡Ants, tey ay te awale!». 27 Jich la yalbey-euk te jnopojel-abi: «¡Tey ay te anane!».* Teyto-abi, te jnopojel la yikʼ bael sjokin ta sna.

28 Te bitʼil snaʼojix te Jesús te kʼotix ta pasel spisil yuʼune, jich la yal: «Takin koʼtan». Jich kʼot ta pasel te bin tsʼibaybil jilel ta sJun Dios. 29 Ay chʼin kʼib tey-a te nojel ta pajal vino, jaʼ yuʼun la skajanik ta sniʼ hisopo-teʼ* jun esponja te mulbil ta pajal vino, la yakʼbeyik ta ye te Jesuse. 30 Te k’alal la yuchʼ Jesús te pajal vinoe, jich la yal: «¡Kʼotix ta pasel!». Patil la snijan koel sjol, jich laj.

31 Te bitʼil jaʼ yorailix-a te ya schajpan sbaike, te judioetik la skʼanbeyik te Pilato te yakuk yichʼ wakʼtiklanbeyel* yakanik te winiketik sok te yakuk yichʼbeyik bael te sbakʼetalike, yuʼun jich maba jipajtik ya xjil te sbakʼetalik ta teʼ yuʼun wokolil* ta skʼajkʼalel sábado (melel mukʼ skʼoplal te skʼajkʼalel sábado-abi). 32 Jich bajt te soldadoetik, la swakʼtiklanbeyik* yakan te jtule soknix te yan winik te jipil ta stsʼeel te Jesuse. 33 Pero, te kʼalal kʼotik te banti jipil te Jesuse, la yilik te lajemixe; jaʼ yuʼun maba la swakʼtiklanbeyik* te yakane. 34 Pero, ay jtul soldado te la slowbey ta lanza te smoch bakele,* ta oranax lokʼ tal chʼichʼ sok jaʼ. 35 Te machʼa la yil ini jaʼ ya yalbey skʼoplal, smelelil te bin ya yalbey skʼoplal sok snaʼoj te smelelil te bin ya yale, yuʼun jich ya achʼuunik-euk te jaʼexe. 36 Jich kʼot ta pasel ini yuʼun jich ya xkʼot ta pasel-a te bin tsʼibaybil jilel ta sJun Dios: «Maba ya yichʼ wakʼbeyel* jchʼixuk sbakel», te xchie. 37 Jaʼnix jich ay yan te bin tsʼibaybil jilel ta sJun Dios te jich ya yale: «Yame yilik te machʼa la slowik», te xchie.

38 Te kʼalal kʼotix ta pasel spisil ini, te José te talem ta Arimatea (te jaʼ jtul jnopojel yuʼun te Jesús te muken schʼuunoj, melel jaʼ xiʼoj-a te judioetik) la sjojkʼoybey te Pilato teme ya xjuʼ ya yichʼbey bael te sbakʼetal te Jesuse, jich te Pilato la yakʼ permiso. Jich tal yichʼbey bael te sbakʼetale. 39 Jaʼnix jich kʼot te Nicodemo —jaʼ te winik te bajt yulaʼtay sbabial buelta te Jesús ta ajkʼabal— yichʼoj kʼoel mirra te kapal sok áloe* te kʼaxem ta 30 kilo yalal. 40 La skojtesbeyik tal te sbakʼetal te Jesús, la spotsik ta lino-pakʼ te yichʼoj te bintik sumet* yikʼe, jich te bin-utʼil kʼayemik ta spasel te judioetik te kʼalal ya smukik te machʼa ya xlaj yuʼunike. 41 Ay awal tsʼunubiletik te banti la yichʼ jijpanel ta teʼ te Jesuse, ta awal tsʼunubiletik-abi ay jun yachʼil mukenal tey-a te maʼyuk machʼa yichʼoj mukel tey-ae. 42 Te bitʼil jaʼ skʼajkʼalel te ya schajpan sbaik te judioetik yuʼun te kʼine sok te bitʼil nopol* ay te mukenale, tey la yakʼbeyik sbakʼetal-a te Jesuse.