LECCIÓN 15
¿Machʼa-a te Jesuse?
Nameyix naʼbil sba stukel te Jesuse. Pero maʼyuk bayal te machʼatik ya snaʼbeyik sba ta leke, ay jaʼnax ya snaʼbeyik te sbiile sok yanyantik-a te bin snopojik ta stojole. ¿Bin ya yal te Biblia ta swenta te Jesuse?
1. ¿Machʼa-a te Jesuse?
Te Jesús jaʼ jtul chʼul-abat te ay ta chʼulchane. Te Jehová jaʼ nail la spas te Jesuse. Te Biblia ya yal te «ha ba-alalil yuʼun spisil bintic pasticlambil» (Colosenses 1:15). Jaʼnix jich naʼbil sba bitʼil «hip jtuhl Snichʼan» Dios, melel maʼyuk machʼa koltayot te Jehová ta spasel te sNichʼane (Juan 3:16). Te Jesús jun aʼtej sok te sTate, la skoltay ta spasel spisil te bintik aye (kʼopona Proverbios 8:30). Te Jehová sok te Jesús mero lek ya yil sbaik. Te Jesús naʼbil sba bitʼil «Cʼopil», jaʼ-abi ya skʼan ya yal te jaʼ jkʼasesej kʼop yuʼun te Diose, te jaʼ ya yakʼ ta naʼel te bin ya yal te sTate (Juan 1:14).
2. ¿Bin yuʼun xtaluk ta Balumilal te Jesuse?
Kʼaxemix ta 2 mil jaʼbil te Jehová la spas jun milagro ta swenta te schʼul espiritue: jaʼ te la skʼasesbey te skuxlejal te Jesús—te chʼul-abat te bayal yuʼel—ta schʼujt te María te jaʼ jtul achʼix te ma tabil ta winik-ae. Jich ayin ta Balumilal te Jesús bitʼil chʼichʼbakʼet (kʼopona Lucas 1:34, 35). Te Jesús tal ta Balumilal yuʼun ya yichʼ yaʼtel ta Cristo, o ta Mesías te albil skʼoplale, te ya yakʼbey skolel te ants winiketike.a Spisil te bin la yichʼ alel ta Biblia ta swenta te Mesías kʼot ta pasel ta stojol te Jesuse. Jich ya xjuʼ ya snaʼik-a te ants winiketik te jaʼ te Cristo, te sNichʼan te kuxul Dios (Mateo 16:16).
3. ¿Banti ay te Jesús ta ora ini?
Kʼalal laj te Jesuse, chaʼkuxaj jich bitʼil jtul chʼul-abat sok ta patil sujt moel ta chʼulchan. Jich te «Dios la stohytesbe scʼoblal» (Filipenses 2:9). Ta ora ini yichʼoj mukʼ yaʼtel te Jesuse, pero jaʼ toyolxan stukel te Jehovae.
JNOPTIKXAN TA LEK
Ya jnoptikxan ta lek machʼanix-a te Jesuse sok te bin yuʼun mukʼ skʼoplal te ya jnaʼbeytik sbae.
4. Te Jesús ma jaʼuk te Dios te Spisil ya xjuʼ yuʼune
Te Jesús jaʼ jtul chʼul-abat ta chʼulchan te bayal yuʼel, manchukme jich-abi, te Biblia ya yal te ya schʼuunbey smantal te Jehová, te jaʼ sDios sok sTat. ¿Bin yuʼun te jich ya kaltike? Ilawilik te VIDEO yuʼun ya anaʼik bin yuʼun ya yal te Biblia te ma pajal te Jesús sok te Dios te Spisil ya xjuʼ yuʼune.
Te textoetik te ya xbajt jkʼopontike ya skoltayotik ta snaʼel bin yuʼun te maba pajal te Jehová sok te Jesuse. Kʼoponaik te textoetik sok albeyaik skʼoplal ini:
Kʼoponaik Lucas 1:30-32.
Ta swenta te bin la yal te chʼul-abate, ¿bin yuʼun te maba pajal te Jesús sok te Jehová, te jaʼ te «Machʼa ay ta toyol»?
Kʼoponaik Mateo 3:16, 17.
¿Bin la yal te machʼa kʼopoj tal ta chʼulchan kʼalal la yichʼ jaʼ te Jesuse?
¿Machʼawan-a te kʼopoj tale?
Kʼoponaik Juan 14:28.
¿Machʼa toyolxan ay sok te mukʼxan yaʼtele? ¿Jaʼbal te tatile, o jaʼ te nichʼanile?
Te Jesús la yal te jaʼ sTat te Jehovae, ¿bin ya yakʼ jnaʼtik-abi?
Kʼoponaik Juan 12:49.
¿Labal skuy sba ta Tatil te Jesuse? ¿Bin ya awal te jaʼate?
5. Te Jesús jaʼ te Mesiase
Ta Biblia bayal bintik la yakʼ ta tsʼibayel te Dios swenta ya yichʼ naʼel machʼa-a te Mesías te jaʼ tsabil yuʼun Dios yuʼun ya yakʼbey skolel spisil te ants winiketike. Ilawilik te VIDEO, tey ya scholbey skʼoplal cheʼoxeb albilkʼopetik te kʼot ta pasel ta stojol te Jesús kʼalal ay ta Balumilal-a.
Kʼoponaik te textoetike sok albeyaik skʼoplal ini:
Kʼoponaik Miqueas 5:2 yuʼun ya anaʼik banti la yichʼ alel te ya x-ayin te Mesiase.b
¿Teynixbal ayin-a te Jesús jich bitʼil la yal te albilkʼope? (Mateo 2:1).
Kʼoponaik Salmo 34:20 sok Zacarías 12:10 yuʼun ya awilik cheʼoxeb te bin albilix-a te ya xkʼot ta pasel ta stojol te Mesías te kʼalal ya xlaje.
¿Kʼotbal ta pasel te albilkʼopetik-abi? (Juan 19:33-37).
¿Jaʼnixbal la yakʼ kʼotuk ta pasel te Jesús te bin albilix ta stojol-ae?
¿Bin ya yakʼbat anop ta swenta Jesús te albilkʼopetike?
6. Mero mukʼ skʼoplal te ya jnaʼbeytik sba te Jesuse
Te Biblia ya yal te bin yuʼun mukʼ skʼoplal te ya jnaʼbeytik sba te Jesús sok te bin aʼtelil akʼbil spas yuʼun te Diose. Kʼoponaik Juan 14:6 sok 17:3, sok albeyaik skʼoplal ini:
¿Bin yuʼun mukʼ skʼoplal te ya jnaʼbeytik sba te Jesuse?
Te Jesús la sjam te be yuʼun ya xjuʼ ya kamigointik te Diose sok la yakʼ ta nopel te smelelil ta swenta te Jehová. Sok ta swenta te Jesús ya xjuʼ ya jtatik te kuxlejalil ta sbajtelkʼinal.
AY MACHʼATIK JICH YA YALIK: «Te testigoetik yuʼun Jehová ma schʼuunik te Jesucristo».
¿Bin ya awalbey teme ay machʼa jich ya yalbate?
BINTIK LA JNOPTIK?
Te Jesús jaʼ jtul chʼul-abat te ay yuʼel, te jaʼ sNichʼan Dios sok te jaʼ te Mesiase.
¿Jilbal ta awoʼtan into?
¿Bin yuʼun ya yichʼ alel te «ha ba-alalil yuʼun spisil bintic pasticlambil» te Jesuse?
¿Bin aʼtelil la spas te Jesús te kʼalal mato xtal ta Balumilal-ae?
¿Bin-utʼil ya jnaʼtik te jaʼ te Mesías te Jesuse?
YA XJUʼ YA ANOPXAN INI
Ilawil bintik ya yakʼxan ta ilel te jaʼ Mesías te Jesuse.
«¿Yabal yakʼ ta naʼel te albilkʼopetik ay ta Biblia te jaʼ Mesías te Jesuse?» (Ay ta jw.org)
Ilawil teme ya yakʼ ta nopel te Biblia te jich chiknaj te sNichʼan te Dios jich bitʼil ya xnichʼnaj te winiketike.
«¿Bin yuʼun te ya yichʼ alel te jaʼ sNichʼan Dios te Jesús?» (Ay ta jw.org)
Ilawil bin yuʼun te Biblia maba ya yakʼ ta nopel te ay oxeb dios te jun-nax ayike.
«¿Jaʼbal Dios te Jesuse?» (Te J-ilkʼinal ta toyol, 1 yuʼun abril 2009)
Ilawil bin-utʼil jelon skuxlejal jtul ants te kʼalal la snop te bin ya yal te Biblia ta swenta te Jesuse.
«¿Bin yuʼun la sjeltay te bin schʼuunoj jtul judía-ants?» (¡Wikʼame asit!, mayo 2013)
a Ta lección 26 sok 27 ya scholbeyel skʼoplal bin yuʼun ya skʼan te ayuk machʼa ya yakʼ jkoleltik sok bin-utʼil ya yakʼ jkoleltik te Jesuse.