Te lek yach’il k’op ya yal te Juan

15 »Joʼon te smelelil steʼelon te tsʼusube, te jTate jaʼ te machʼa ya yaʼiy tsʼunbajel. 2 Spisil te skʼabkʼab te ya xlokʼ tal ta jtojol te maba ya yakʼ site ya sboj lokʼel, pero spisil te skʼabkʼab te ya yakʼ sit ya slekubtes yuʼun jich ya sitinxan ta lek. 3 Te jaʼexe lekubenexix ta swenta te jkʼop la kalbeyexe. 4 Junukme ya x-ayinex ta jtojol, jich junme ya x-ayinon ta atojolik-euk. Jich te bin-utʼil te skʼabkʼab te tsʼusub teme stukel aye ma xjuʼ ya yakʼ sit, ya skʼan mero jun-nax ay sok te steʼele, jaʼnix jichex-euk ma xjuʼ ya sitinex teme maba jun ayex ta jtojole. 5 Joʼon te mero steʼelon te tsʼusube, te jaʼexe jaʼ skʼabkʼabex. Te machʼa jun ay ta jtojole sok te jun ayon ta stojol-euke jaʼ-abi yame yakʼ bayal sit. Melel teme maba jun ayex ta jtojole maʼyuk bin ya xjuʼ ya apasik. 6 Teme ay machʼa maba jun ay ta jtojole, yame yichʼ bojel lokʼel jich te bin-utʼil skʼabkʼab te tsʼusube sok yame xtakij. Yame yichʼ tsobel te skʼabkʼab-abi sok yame yichʼ chʼojel ochel ta kʼajkʼ. 7 Teme jun ayex ta jtojol sok teme maba ya awijkitaybonik te jkʼope, kʼanaik te bin ya akʼanike, yame awichʼik akʼbeyel. 8 Teme bayal ya sitinex sok teme ya awakʼik ta ilel te jaʼ jnopojelex kuʼune, jichme ya yichʼ yutsilal te jTate. 9 Jich te bin-utʼil kʼuxon ta yoʼtan te Tatile, jaʼnix jich kʼuxex ta koʼtan-euk; ayinanikme ta skʼuxul koʼtan. 10 Teme ya achʼuunbonik te mantaliletik kuʼune, yame x-ayinex ta skʼuxul koʼtan, jich te bin-utʼil jchʼuunojbey te mantaliletik yuʼun te Tatile sok ayon ta skʼuxul yoʼtan.

11 »La kalbeyexix spisil ini yuʼun jich tseʼel awoʼtanik te bin-utʼil tseʼel koʼtane sok jich tsʼakal ya ataikxan-a te stseʼelil awoʼtanike. 12 Jaʼ mantalil kuʼun ini: jaʼ te talel kʼaxel kʼuxme xa awaʼiy aba ta awoʼtanik jich te bin-utʼil kʼux ya kaʼiyex ta koʼtane. 13 Maʼyuk machʼa kʼax jich ay skʼuxul yoʼtan-a te bin-utʼil machʼa ya yakʼ skuxlejal ta stojol te yamigotake. 14 Jaʼ kamigoex teme ya apasik te bin la kalbeyex ta mantale. 15 Maba ya kalbeyex te jaʼ j-abatex kuʼun, melel te j-abate ma snaʼ te bin ya spas te yajwale. Jaʼ kamigoex, melel la kalbeyexix spisil te bin la kaʼiy stojol te la yal te jTate. 16 Te jaʼexe ma jaʼuk la atsaonik; joʼon la jtsaex. La kakʼbeyex awaʼtelik yuʼun ya xbaex sok te spisil-ora ya sitinex, sok te asit ya awakʼike maba ya xchʼay. Jichme ya yakʼbeyex te Tatil biluk-a te bin ya akʼanik ta swenta jbiil.

17 »La kalbeyex ta mantal ini yuʼun jich talel kʼaxel kʼuxme xa awaʼiy aba ta awoʼtanik. 18 Teme ya spʼajex te balumilal, naʼaikme te jaʼ nail la spʼajonike. 19 Te yuʼunukex te balumilale, kʼux ya yaʼiyex te jichuke, melel jaʼ yuʼunex. Pero, te bitʼil maba yuʼunex te balumilal, jaʼ yuʼun ya spʼajex, melel la jtsaex lokʼel tal ta yolil te balumilale. 20 Mame xchʼay ta awoʼtanik te bin la kalbeyexe, te j-abate ma jaʼuk toyolxan ta stojol te yajwale. Teme la skontrainonike, jaʼnix jich ya skontrainex-euk; teme la schʼuunbonik te jkʼope, jaʼnix jich ya schʼuunbeyex-euk te akʼopike. 21 Ta swenta te jbiile, jichme ya spasbeyex spisil ini, melel ma snaʼbeyik sba te machʼa la stikunon tale. 22 Te manchuk talone sok te manchuk la jkʼoponlane, maʼyuk smulik te jichuke. Pero, ta ora ini maʼyuk bin ya xjuʼ ya smakix sbaik ta kʼop yuʼun te smulike. 23 Te machʼa ya spʼajone jaʼnix jich ya spʼaj-euk te jTate. 24 Te manchuk la jpas ta stojolik te aʼteliletik te maʼyuk machʼa jich spasoje, maʼyuk smulik te jichuke; pero ta ora ini la yilonikix sok la spʼajonik soknix la spʼajik-euk te jTate. 25 Jich la spasik ini swenta ya xkʼot ta pasel te bin tsʼibaybil jilel ta Ley yuʼunike: ‹Maʼyuk swentail te bin yuʼun la spʼajonik›, te xchie. 26 Te kʼalal ya jtikunbeyex tal te jkoltaywanej te talem ta stojol te Tatile, jaʼ te chʼul espíritu* te ya yakʼ ta naʼel te smelelil kʼop te talem ta stojol te Tatile, jaʼme ya yalbon lek jkʼoplal; 27 jaʼnix jichex-euk yame skʼan ya awalbonik jkʼoplal, melel ajokinojonik kʼalalto tal ta sjajchibal.