Yaʼtel te Jpuk-kʼopetik

1 Te bin sbabial la jtsʼibaybat, Teófilo, jaʼ ta swenta te bintik jajch spas te Jesús sok te bintik la yakʼ ta nopel 2 jaʼto te kʼalal la yichʼ ikʼel moel ta chʼulchan, jaʼ te kʼalal yakʼojbeyix jilel mantaliletik ta swenta te chʼul espíritu* te jpuk-kʼopetik te tsabil yuʼune. 3 Te kʼalal kʼaxix-a te swokole, la yakʼ sba ta ilel ta stojolik sok la yakʼ ta ilel bayal pruebaetik te yuʼun-nix kuxul-ae. Jaʼnix jich la yakʼ sba ta ilel 40 kʼajkʼal ta stojolik sok la yalbeyxan skʼoplal te Wentainel* yuʼun te Diose. 4 Te kʼalal stsoboj sba sok te jnopojeletik yuʼune, jich la yaltiklanbey ta mantal: «Mame xlokʼex bael ta Jerusalén. Maliyaik te bin jamal yalojbeyex te Tatil te ya yakʼbeyexe, jich te bitʼil la kalbeyexe. 5 Melel te Juan la yakʼ ichʼjaʼ* ta swenta jaʼ, yan te jaʼexe nopolme* ya awichʼik jaʼ ta swenta chʼul espíritu».*

6 Te kʼalal stsoboj sbaik-ae, jich la sjojkʼoybeyik te Jesús: «Kajwal, ¿yorailixbal te ya achaʼjachxan te wentainel yuʼun te Israel?». 7 Jich albotik yuʼun te Jesús: «Te jaʼexe ma jaʼuk ay ta awentaik snaʼel te bin-ora sok te bin kʼajkʼalile, jaʼnax ay ta swenta snaʼel stukel te Tatile. 8 Pero yame awichʼ awuʼelik te kʼalal ya xjul ta atojolik te chʼul espiritue.* Testigo ya xkʼoex kuʼun ta Jerusalén, ta spamal skʼinal Judea sok ta Samaria, sok kʼalalto ta stiʼil te balumilale». 9 Te kʼalal laj yoʼtan ta yalel ini, la yilik te la yichʼ ikʼel moel ta chʼulchan. Tey-abi potsot ta tokal, jich chʼay ta sitik. 10 Baemnax yoʼtanik ta yilel te chʼulchan te kʼalal yak ta moel bael-a, ta repentenax chiknaj chaʼtul winiketik ta stsʼeelik te slapojik sakal kʼuʼule. 11 Jich albotik yuʼun: «Winiketik yuʼun Galilea, ¿bin yuʼun te yakex ta yilel moel te chʼulchane? Te Jesús te ajokinojik-ae sok te la yichʼix ikʼel moel ta chʼulchan, jichnixme ya xtal te bin-utʼil la awilik te bajt ta chʼulchane».

12 Tey-abi la yijkitayik jilel te wits yuʼun Olivoetik sbiile, sujtik ta Jerusalén, te wits-abi nopol* ay ta Jerusalén, jteb ma sta jun kilómetro* yiloj sbaik. 13 Te kʼalal kʼotik tey-ae, moik bael ta cuarto te ay ta schaʼkajal na te banti ya xjilik-ae. Tey ay-a te Pedro, Juan, Santiago, Andrés, Felipe, Tomás, Bartolomé, Mateo, Santiago snichʼan Alfeo, Simón te Machʼa ay sbujtsʼ yoʼtan sok te Judas te snichʼan Santiago. 14 Ta spisilik jun-nax la stsob sbaik ta skʼoponel Dios sok jokinbilik yuʼun chaʼoxtul antsetik, tey ay-a te María te snan* te Jesús sok te yijtsʼinabe.

15 Ta yorail tal-abi, te Pedro la stejkʼan sba ta yolil te yermanotak (ayniwan 120 ta tul te machʼatik stsoboj sbaik tey-ae), jich la yaltiklanbey: 16 «Winiketik, kermanotak, la skʼan kʼot ta pasel te bin tsʼibaybil ta sjun Dios te banti la yal ta swenta chʼul espíritu* te David ta stojol te Judas, jaʼ te machʼa la yikʼ tal te machʼatik la stsakik bael te Jesuse. 17 Jaʼ te machʼa la sjokinotik sok te la yichʼ tsael yuʼun ya spas-euk te aʼtelil ini. 18 (Te winik-abi la sman jsejp kʼinal sok te stojol te bin chopol* la spase, te kʼalal chʼay koel tale, jul smaj ta lum te sjole, tʼom te schʼujte sok lokʼ spisil te sbikile. 19 Spisil te yajwalul Jerusalén la snaʼik stojol, jich yuʼun la yakʼbeyik sbiilin Akéldama te jsejp kʼinal-abi, ‹skʼinal chʼichʼ› ya skʼan ya yal ta skʼopiknix). 20 Melel jich tsʼibaybil jilel ta libro yuʼun Salmoetik: ‹Jochol akʼa jiluk te snae sok mame ayuk machʼa ya xnain tey-a›, sok ‹Yanuk machʼa ya yichʼbey jilel te yaʼtel›,* te xchie. 21 Jich yuʼun ya skʼan ya jtsatik jtuluk te winiketik te la sjokinotik te jayeb kʼajkʼal la spas yaʼtel te Kajwaltik Jesús, 22 jaʼto te kʼalal akʼbot yichʼ jaʼ* yuʼun te Juane jaʼto te bin kʼajkʼalil la yichʼ ikʼel moel ta chʼulchan, yuʼun pajal testigo ya xkʼootik sok te winik-abi te bitʼil chaʼkuxaj te Jesuse».

23 Jich yuʼun la sleik chaʼtul: jaʼ te José te Barsabás ya yalbeyik, jaʼnix jich naʼbil sba bitʼil Justo, sok te Matías. 24 Ta patil, jich la yalik ta skʼoponel Dios: «Jaʼat, Jehová,* te ya anaʼ te bin ay ta yoʼtan spisil te ants winiketik, akʼa ta naʼel machʼa ta schebalik ya atsa 25 swenta ya yichʼ te aʼtelil ini sok te aʼtelil ta jpuk-kʼop te la schʼay jilel te Judas ta skaj te la stʼun bael yan be». 26 Jich yuʼun la spasik suerte* ta swenta snaʼel, te suerte kʼot ta stojol te Matías, jich jun kʼot sok te 11 ta tul jpuk-kʼopetike.