Sbabial carta ta stojol te Corintioetik

15 Kermanotak, ya jultesbeyex-xan ta awoʼtanik te lek yachʼil kʼop te la kalbeyexe, te la achʼuunik sok te yakʼoj te jun awoʼtanike. 2 Jaʼnix jich yame ata akolelik ta swenta te lek yachʼil kʼop te la kalbeyex teme jun awoʼtan ya achʼuunike. Teme maʼuke, tojolnax te ochex ta jchʼuunjel.

3 Melel te bintik sbabial la kakʼbeyex anopike jaʼnix te bin la kichʼ albeyel-euk: jaʼ te laj te Cristo ta swenta te jmultik, jich te bin-utʼil ya yal te sJun Dios; 4 te la yichʼ mukel sok te la yichʼ chaʼkuxajtesel ta yoxebal kʼajkʼal jich te bin-utʼil ya yal te sJun Diose, 5 sok te la yakʼ sba ta ilel ta stojol te Cefas* sok te patil la yakʼ sba ta ilel ta stojol te 12 ta tule. 6 Patil la yakʼ sba ta ilel ta stojol kʼaxem ta 500 ta tul hermanoetik ta jun-nax buelta, jteb ma spisilik sjokinojotikto ta ora ini, manchukme ay machʼatik te wayix sbakʼetalike. 7 Patil la yakʼ sba ta ilel ta stojol te Santiago; patil la yakʼxan sba ta ilel ta stojol spisil te jpuk-kʼopetike. 8 Ta slajibal la yakʼ sba ta ilel ta jtojol, jichon-a te bin-utʼil alal te mato staoj yorail te ya x-ayine.*

9 Te joʼone pekʼel ayon ta stojol te yantik jpuk-kʼopetike, ma snujpʼuk te ya kichʼ albeyel jpuk-kʼop, melel la jkontrain te congregación yuʼun te Diose. 10 Pero, te bin jtaoje jaʼ ta swenta te slekil yoʼtan Dios te ma snujpʼuk ya kichʼtike. Ma tojoluknax te yakʼojbon kil te slekil yoʼtan Dios te ma snujpʼuk ya kichʼtike, melel kʼax jich aʼtejemonxan-a te bin-utʼil te yantik jpuk-kʼopetike. Pero, ma joʼukon ta jwenta jaʼ ta swenta te ay ta jtojol te slekil yoʼtan Dios te ma snujpʼuk ya kichʼtike; 11 chikan teme joʼon o jaʼ te yantik jpuk-kʼopetike, jaʼ jich te bin-utʼil ya jcholtik skʼop Dios sok jaʼ jich la achʼuunik te jaʼexe.

12 Jich yuʼun, teme yak ta cholbeyel skʼoplal te la yichʼ chaʼkuxajtesel te Cristo ta yolil te machʼatik lajemike, ¿bin-utʼil ay-a te ay chaʼoxtulex te ya awalik te maʼyuk chaʼkuxajel yuʼun te machʼatik lajemike? 13 Ta melel, teme maʼyuk chaʼkuxajel yuʼun te machʼatik lajemike, jaʼnix jich maba la yichʼ chaʼkuxajtesel te Cristoe. 14 Pero, teme maba la yichʼ chaʼkuxajtesel te Cristoe, tojolnax te ya jcholtik skʼop Dios sok tojolnax-euk te schʼuunel awoʼtanike. 15 Jaʼnix jich, lotil testigootik yuʼun Dios, melel yakotik ta skontrainel te Dios te kʼalal ya kaltik te la schaʼkuxajtes te Cristoe, teme smelelil te maba ya yichʼik chaʼkuxajtesel te machʼatik lajemike, maba la yichʼ chaʼkuxajtesel te Cristoe. 16 Jich yuʼun, teme maba ya yichʼik chaʼkuxajtesel te machʼatik lajemike, jaʼnix jich maba la yichʼ chaʼkuxajtesel te Cristoe. 17 Jaʼnix jich, teme maba la yichʼ chaʼkuxajtesel te Cristoe, tojolnax te schʼuunel awoʼtanike; ayexto ta mulil. 18 Jich yuʼun, te machʼatik wayix sbakʼetalik te jun ayik sok-a te Cristo maʼyuk bin-ora ya xchaʼkuxajikix-a. 19 Teme jaʼnax smukʼulinoj koʼtantik te Cristo te jayeb kʼajkʼal kuxulotik ta kʼinale, kʼax jich oʼbol jbatik te bin-utʼil te ants winiketike.

20 Pero, te Cristo la yichʼ chaʼkuxajtesel ta yolil te machʼatik lajemike, jaʼ sbabial chaʼkuxaj tal yuʼun te machʼatik wayem sbakʼetalike. 21 Jich te bin-utʼil ta swenta jtul winik och tal te lajele, jaʼnix jich ta swenta jtul winik ay chaʼkuxajel yuʼun te machʼatik lajemike. 22 Jich te bin-utʼil ta swenta Adán yakik ta lajel te ants winiketike, jaʼnix jich ta swenta te Cristo ya sta skuxlejal te ants winiketike. 23 Pero, xmelmon ya xchaʼkuxajik tal ta jujuntul: jaʼ sbabial te Cristo, patil ya xchaʼkuxajik te machʼatik yuʼun te Cristo te kʼalal liʼ ayix-ae.* 24 Ta slajibal, te kʼalal ya yakʼ te Wentainel* ta skʼab te Dios yuʼun sok te jaʼnix sTate, jaʼ te kʼalal slajinojix spisil-a te ajwaliletik, te machʼatik yichʼoj mukʼ yaʼtelik sok te machʼatik ay yipik ta mantalteswanej. 25 Melel jaʼto ya x-och ta wentainwanej-a kʼalal te Dios ya yakʼbey ta yeʼtal yok spisil te skontratake. 26 Te slajibal jkontratik te ya yichʼ lajinele jaʼ te lajele. 27 Melel te Diose «la yakʼbey ta yeʼtal yok spisil te bintik aye». Pero, te kʼalal ya yal te la yakʼ ta wentainel spisil te bintik aye, jamal chikan te maba tey ochem skʼoplal-a te machʼa la yakʼ ta wentainel spisil te bintik aye. 28 Te kʼalal akʼbilix swentain spisil-a te bintik aye, jaʼnix jich-euk te Nichʼanil ya yakʼ sba ta wentainel yuʼun te machʼa la yakʼ ta wentainel spisil te bintik aye; swenta jaʼ yuʼun Dios ya xkʼot spisil te bintik aye.

29 Te manchuk jichuke, ¿bin swentail te machʼatik ya yichʼik jaʼ* teme jaʼnax ya xlajik baele? Teme maba ya yichʼik chaʼkuxajtesel te machʼatik lajemike, ¿bin yuʼun te ya yichʼik jaʼ-euk teme maba ya yichʼik chaʼkuxajtesele? 30 ¿Bin yuʼun-nix-a te spisil-ora ayotik ta wokole? 31 Jujun kʼajkʼal ya jsitintay jba sok te lajele. Smelelil te bin ya kalbeyex, kermanotak, jaʼ jich te bin-utʼil tseʼel koʼtan ta atojolik ta swenta te Kajwaltik Cristo Jesús. 32 Teme la jtsak jba sok jtiʼawal chambalametik ta Éfeso, jich te bin-utʼil yantik winiketik,* ¿bin ya xlokʼ kuʼun-a teme maba ya yichʼik chaʼkuxajtesel te machʼatik lajemike? Jaʼ lek te jichuk ya kaltik-euk te bin-utʼil ya yichʼ alel, «ochukotik te weʼel uchʼel, melel pajel ya xlajotik». 33 Mame xa awakʼ abaik ta loʼlayel. Te machʼatik maba lekik ta jokinel ya yakʼbotik ta chʼayel te lekil taleliletik* kuʼuntike. 34 Naʼaikme kʼinal, jaʼme xa apasik te bin stojil ta pasel, ijkitayaik te mulile, melel ay machʼatik ma snaʼbeyik sba te Diose. Ya kalbeyex ini yuʼun jich ya xkʼexawex-a.

35 Pero ayniwan machʼa jich ya yal, ¿bin-utʼil ya xchaʼkuxajik tal te machʼatik lajemike? Jich, ¿bin yilel sbakʼetal ya xchaʼkuxajik tal? 36 ¡Ma xa anaʼ kʼinal! Te sit awal tsʼunubil ya atsʼune maba ya xchʼi tal teme ma nailuk ya xlaje. 37 Te bin la atsʼun jaʼnax te sbakʼ te awal tsʼunubile, ma jaʼuk te bin ya xlokʼ tal ta patile, chikan teme sbakʼ trigo o biluk yan awal tsʼunubil. 38 Pero, te Dios jaʼ ya yakʼbey steʼel sok yabinal, jaʼ chikan te bin-utʼil ya skʼan stukele. Ta jujunchajp sit awal tsʼunubil ya yakʼbey steʼel sok yabinal. 39 Ma spisiluk pajal te bakʼetalile: yan sbakʼetal te ants winiketik, yan sbakʼetal te wakax, yan sbakʼetal te jaʼmal mutetik sok yan sbakʼetal te chayetike. 40 Ay bintik ay ta chʼulchan sok ay bintik ay ta balumilal, pero yan yutsilalik te bintik ay ta chʼulchan sok yan yutsilalik te bintik ay ta balumilal. 41 Yan yutsilal-a te kʼajkʼale, yan yutsilal-a te ue sok yan yutsilal-a te ekʼetike; ta melel, yanyantik yutsilal-a te jujunchajp ekʼetike.

42 Jaʼ jich ya xkʼot ta pasel ta swenta te chaʼkuxajel yuʼun te machʼatik lajemike. Te bakʼetalil te ya xlaje ya xkʼaʼ, pero maba ya xkʼaʼ te bakʼetalil te ya yichʼ chaʼkuxajtesele. 43 Maba ichʼbil ta mukʼ te kʼalal ya yichʼ mukele, pero ya yichʼ ichʼel ta mukʼ te kʼalal ya xchaʼkuxaje. Maʼyuk yip te kʼalal ya yichʼ mukele, pero ayix yip-a te kʼalal ya xchaʼkuxaje. 44 Chʼichʼbakʼet te ya yichʼ mukele, pero ya yichʼ chaʼkuxajtesel jich bitʼil espíritu. Teme ay kuxlejalil ta swenta chʼichʼbakʼet, jaʼnix jich ay kuxlejalil ta swenta espíritu. 45 Melel jich tsʼibaybil: «Te sbabial winik, jaʼ te Adán, la yichʼ akʼbeyel skuxlejal». Te slajibal Adán jich kʼot te bin-utʼil jun espíritu te ya yakʼ kuxlejalil. 46 Pero, ma jaʼuk nail ya xchiknaj te kuxlejalil ta swenta espíritu. Jaʼ nail ya xchiknaj te kuxlejalil ta swenta chʼichʼbakʼet, jaʼ patil ya xchiknaj te kuxlejalil ta swenta espíritu. 47 Te sbabial winik jajchem tal ta balumilal, pasbil ta tsʼubil lum; te schebal winik talem ta chʼulchan. 48 Te machʼatik pasbilik ta tsʼubil lum jaʼ pajalik sok te machʼa la yichʼ pasel ta tsʼubil lume; te machʼatik ayik ta chʼulchan jaʼ pajalik sok te machʼa talem ta chʼulchane. 49 Jich te bin-utʼil kichʼojbeytik slokʼomba te machʼa la yichʼ pasel ta tsʼubil lume, jaʼnix jich ya kichʼbeytik slokʼomba te machʼa talem ta chʼulchane.

50 Pero, kermanotak, ya kalbeyex ini: te chʼichʼbakʼet ma xjuʼ ya yichʼ te Wentainel* yuʼun te Dios ni jaʼuk te bin ya xkʼaʼ ya xjuʼ ya yichʼ te bin ma xkʼaʼe. 51 ¡Aʼiya awaʼiyik! Ya kalbeyex te bin mato yakʼoj ta naʼel te Diose: ma jpisiltikuk ya xway jbakʼetaltik, pero jpisiltik ya kichʼtik kʼatpʼunel 52 ta oranax, ta mujtsʼnax sitil, te kʼalal yak ta okʼesinel-a te slajibal trompetae. Melel yame yichʼ okʼesinel te trompetae, te machʼatik lajemik te ya yichʼik chaʼkuxajtesel maba ya xkʼaʼikix, te joʼotike yame kichʼtik kʼatpʼunel. 53 Melel te bakʼetalil ini te ya xkʼaʼ yame skʼuʼin te bin ma xkʼaʼe; te bakʼetalil ini te ya xlaj yame skʼuʼin te bin ma xlaje. 54 Pero, te kʼalal ya skʼuʼin te bin ma xkʼaʼ te bakʼetalil ini te ya xkʼaʼe sok te kʼalal ya skʼuʼin te bin ma xlaj te bakʼetalil ini te ya xlaje, jichme ya xkʼot ta pasel te bin tsʼibaybile: «Te lajel yame yichʼ lajinel ta sbajtelkʼinal». 55 «Lajel, ¿banti ay te tsalaw awuʼune? Lajel, ¿banti ay te avenenoile?». 56 Te veneno te ya yakʼ te lajele jaʼ te mulile, sok te yip te mulile jaʼ te Leye. 57 ¡Pero ya kalbeytik wokol te Diose, melel jaʼ ya yakʼ kaʼiytik tsalaw ta swenta te Kajwaltik Jesucristoe!

58 Jich yuʼun, kermanotak te kʼuxex ta koʼtane, junukme awoʼtanik, mame xtal xbajtuk awoʼtanik, sok jaʼukme spisil-ora ya xbajt ta awoʼtanik spasbeyel yaʼtel te Kajwaltike, melel anaʼojik te ma tojoluknax te awaʼtelik ta stojol te Kajwaltike.