Te lek yachʼil kʼop ya yal te Mateo

28 Te kʼalal kʼaxix-a te skʼajkʼalel sabadoe, te kʼalal yakix ta sakubel-a te kʼinal yuʼun te sbabial kʼajkʼal yuʼun te semanae, te María Magdalena sok te yan María bajt yilik te mukenale.

2 Tal tulan nijkel ta skaj te ko tal te chʼul-abat yuʼun Jehová,* kʼot ta mukenal, la stsel lokʼel te mukʼul ton sok la snajkan sba tey-a. 3 Te chʼul-abate xlemetnax jich bitʼil tsantsewal, te skʼuʼ spakʼe saknax jich bitʼil meʼsik o toyiw. 4 Te soldadoetik te yakik ta skanantayel te mukenal kʼax bayal xiwik te jich jajchik ta nijkel yuʼun sok jich yilel te lajike.

5 Te chʼul-abat jich la yalbey te antsetike: «Mame xiwex; ya jnaʼ te jaʼ yakex ta sleel te Jesús te la yichʼ jijpanel ta teʼe. 6 Maba liʼ ayix, melel la yichʼix chaʼkuxajtesel jich te bitʼil la yale. Laʼik, ilawilik te banti yakʼojbeyik-a te sbakʼetal te Jesuse. 7 Jaʼ yuʼun baanik ta oranax, jichme xa awalbeyik te jnopojeletik yuʼune: ‹La yichʼix chaʼkuxajtesel ta yolil te machʼatik lajemike sok nailajemix bael awuʼunik ta Galilea, teyme ya xkʼot awilik-a›. Jaʼme te bin tal kalbeyexe».

8 Jich yuʼun, te antsetike, manchukme ayik ta xiwel, tseʼelnax yoʼtanik. Jich lokʼik bael ta oranax ta mukenal, animalnax bajt yalbeyik yaʼiy te jnopojeletike. 9 Tey-abi, te Jesús la sta ta be te antsetike sok jich la yaltiklanbey: «¡Bin xchi!». Te antsetik talik te banti ay te Jesuse, la snijan sbaik ta stojol sok la spetbeyik te yoke. 10 Jich albotik yuʼun te Jesús: «Mame xiwex. Baan, albeyaik te kermanotak te akʼa bajtukik ta Galilea; teyme ya xkʼot yilonik-a».

11 Te kʼalal yakik ta bael ta be te antsetike, ay chaʼoxtul te soldadoetik te skanantayojik-a te mukenale bajtik ta mukʼul lum ta yalbeyel yaʼiy te jwolwanej sacerdoteetik spisil te bin kʼot ta pasele. 12 Te jwolwanej sacerdoteetik sok te jwolwanejetik yuʼun te judioetike la schap skʼopik te ya yakʼbeyik bayal ta sejp plata-takʼin te soldadoetike, 13 jich la yalbeyik: «Jichme xa awalik: ‹Talik ta ajkʼabal te jnopojeletik yuʼune, la yelkʼanik bael te sbakʼetal te kʼalal wayalonkotik-ae›. 14 Teme ay la yaʼiy stojol te gobernador te bin kʼot ta pasele, joʼonkotikme ya jcholbeytik yaʼiy.* Te jaʼexe mame ayuk bin ya amel awoʼtanik yuʼun». 15 Jich yuʼun, te soldadoetik la stsakik te takʼin te la yichʼik akʼbeyele sok jich la spasik te bin albotik ta mantale. Jichto schʼuunojik te judioetik ta ora ini.

16 Yan stukel te 11 ta tul jnopojeletike bajtik ta Galilea, ta wits te banti albotik yuʼun Jesús te ya xkʼot yil sbaike. 17 Te kʼalal la yilik te Jesuse, la snijan sbaik ta stojol. Pero, ay chaʼoxtul te xchebet yoʼtanik yuʼun teme jaʼnix-a te Jesuse. 18 Te Jesús noptsaj* ta stojolik sok jich la yaltiklanbey: «La kichʼix akʼbeyel tulan kaʼtel ta chʼulchan sok ta balumilal. 19 Jich yuʼun baanik, otsesaik ta jnopojel te ants winiketik ta spisil nacionetik. Akʼtiklanbeyaik yichʼik jaʼ* ta sbiil te Tatil, te Nichʼanil sok te chʼul espíritu.* 20 Akʼtiklanbeyaik snop te akʼa schʼuunik spasel spisil te bin la kalbeyex ta mantale, sok mame xchʼay ta awoʼtanik te jokinojex ta jujun kʼajkʼal jaʼto ta slajibal kʼajkʼal».