Génesis

6 Kʼalal la spʼol sbaik te ants winiketik ta swolol balumilal sok te la sta yal snichʼnabik, 2 te snichʼnab* te smelelil Dios* jajch yilik te kʼax tʼujbilik te yantsil nichʼnab te ants winiketike. La yikʼ yinaminik chikan te jayeb ta tul la smulanike. 3 Te Jehová jich la yal: «Ma xkakʼ te ya xkuxin te ants winiketik ta skaj te jmulawiletik. Jaʼ yuʼun, jaʼxanix 120 jaʼbil ya xkuxinik».

4 Te kʼalal jich la yal-abi te Diose, ayikix ta balumilal-a te nefilimetik.* Ta yorail-abi, te snichʼnab* te smelelil Dios* la sjokinik ta wayel te yantsil nichʼnab te ants winiketik. Jich ayin* yal snichʼnabik jaʼik te machʼatik bayal yipik sok te la yichʼik naʼbeyel sba ta lek ta namey.

5 Te Jehová la yil te yak ta toyel ta balumilal te schopolil yoʼtan te ants winiketik sok te spisil-ora jaʼ baem ta yoʼtanik snopel te bin chopole.* 6 Te Jehová kʼaxto la smel yoʼtan yuʼun te la spas te ants winiketik ta balumilal, kʼax ejchenajem la yaʼiy te yoʼtan. 7 Jaʼ yuʼun, jich la yal te Jehová: «Yame jtupʼ ta jkʼaxel te ants winiketik jpastiklanoje, jaʼnix jich ya jtupʼ te alakʼil chambalametik,* te chambalametik te staslajan ya xbeenik ta lum sok te jaʼmal mutetik* te ya xwilik ta sjamalul chʼulchan, melel ya jmel koʼtan yuʼun te la jpastiklane». 8 Pero, te Noé lek ilot yuʼun te Jehová.

9 Jaʼ jich te bin kʼax ta skuxlejal te Noé.

Tojil winik te Noé. Maba la yichʼ tabeyel smul ta yolil te ants winiketik te pajal kuxin soke. Been sok te smelelil Diose.* 10 Ta patil bael, te Noé ayin* oxtul snichʼnab jaʼik te Sem, Cam sok te Jafet. 11 Te smelelil Dios* la yil te bolobenix te balumilal sok te nojel ta utsʼinwanej.* 12 Yuʼun-nix jich-a, te Dios la yil te boloben te balumilale. Jkʼaxel ma stojiluk te bin la spasik spisil te ants winiketike.

13 Tey-abi, te Dios jich la yalbey te Noé: «La kakʼ ta koʼtan te ya jlajin spisil te bintik kuxajtik, melel nojel ta utsʼinwanej* te balumilale. Jaʼ yuʼun ya jlajin spisil te ants winiketik sok te bintikxan ay ta balumilale. 14 Pasa jun arca,* pasa ta teʼ te ay xuchʼile. Tsalatsalme xa apas, sok akʼbeya xuchʼil ta yutil sok ta spatpat. 15 Jich ya apas ini: 300 xujkʼubil* te snajtile, 50 xujkʼubil* te sjamalul sok 30 xujkʼubil* te stoyolil. 16 Ya skʼan oxkaj ya apas: ta yeʼtal, ta yolil sok ta kajal. Ya skʼan ya apasbey sventanaul te jun xujkʼubil* yiloj sba sok te sbae, yuʼun tey ya x-och-a te xojobil kʼinale.* Sok yame apasbey spuertaul ta jun jejch.

17 »Ya kakʼ tal pulemal* te ya snojes te balumilal sok ya slajin te bintik kuxajtik te ya yichʼik ikʼ te ayik ta yeʼtal chʼulchan. Spisil te bintik ay ta balumilal yame xlajik. 18 Ya jpas jun chapbilkʼop sok jaʼat. Yame skʼan ya x-ochat ta arca* sok te anichʼnab, awinam sok te awalibtak. 19 Jaʼnix jich ya skʼan ya awotses ta arca* ta chaʼchaʼkojt te jujunchajp chambalametik —stat sok smeʼ— yuʼun jich ya xkuxinik-a. 20 Chaʼchaʼkojt jaʼmal mutetik* te ya xwilik jaʼ chikan te bin yilel ta jujunchajp stsʼumbal, chaʼchaʼkojt alakʼil chambalametik* jaʼ chikan te bin yilel ta jujunchajp stsʼumbal sok chaʼchaʼkojt chambalametik te staslajan ya xbeenik ta lum jaʼ chikan te bin yilel ta jujunchajp stsʼumbal yame xkʼotik te banti ayat sok ya x-ochik ta arca* yuʼun jich maba ya xlajik-a. 21 Yame atsob spisil ta chajp weʼelil yuʼun ya aweʼik sok ya sweʼik-euk te chambalametike».

22 Jich yuʼun, te Noé la spas spisil te bin albot ta mantal yuʼun te Dios. Jich la spas te bitʼil albot yuʼune.