Levítico

19 Te Jehová la schaʼkʼopon te Moisés, jich la yalbey: 2 «Jich xa awalbey spisil te lum Israel: ‹Ya skʼan te chʼultesbilex, melel chʼul Dioson, joʼon Jehovaon te Dioson awuʼunik.

3 »›Ta jujuntulex yame skʼan ya awichʼik ta mukʼ te ananik* sok te atatik sok yame awichʼik ta mukʼ te sábado kuʼun. Joʼon Jehovaon te Dioson awuʼunik. 4 Mame xbaex ta stojol diosetik te maʼyuk skʼoplalik sok mame xa apasik diosetik ta ultesbil takʼin. Joʼon Jehovaon te Dioson awuʼunik.

5 »›Teme ya awakʼbeyik milbil majtanil ta swenta lamalkʼinal te Jehová, jichme xa awakʼik te bin-utʼil ya skʼan pasel swenta lek ya yilex-a. 6 Yame yichʼ weʼel te bin kʼajkʼalil ya yichʼ akʼel sok ta yan kʼajkʼal, pero ta yoxebal kʼajkʼal yame skʼan ya yichʼ chikʼel te jayebxan ya xjile. 7 Pero, teme ya yichʼ weʼel jtebuk te tiʼbal ta yoxebal kʼajkʼal, maba ya yichʼ tsakel te majtanil, melel ilaybil ya xkʼot te tiʼbale. 8 Te machʼa ya sweʼ yame skʼan ya stoj te smul, melel la sbolobtesbey skʼoplal te bin chʼultesbil yuʼun te Jehová; te ants winik-abi yame yichʼ milel.

9 »›Te kʼalal ya atsob te awal tsʼunubil awuʼun, mame xa atsob kʼalalto ta stiʼil te akʼinal sok mame xa atsob te bin jilemix awuʼune. 10 Jaʼnix jich mame xa atsob te jayeb jil ta tsʼusubiltik awuʼun sok mame xa atsob te jayeb lubajem, yame skʼan ya awijkitaybey jilel te pobreetik sok te jyanlumetik. Joʼon Jehovaon te Dioson awuʼunik.

11 »›Mame xa awaʼiyik elekʼ, mame xa alotiy abaik sok mame talel kʼaxeluk xa aloʼlay abaik. 12 Mame ayuk bin ya awalik ta jamal ta lot ta swenta jbiil, melel jich ya abolobtesbeyik skʼoplal sbiil te Dios awuʼunike. Joʼon Jehovaon. 13 Mame xa aloʼlay te apatxujk sok mame ayuk bin xa awelkʼanbey. Mame jaʼukto ta yan kʼajkʼal ya awakʼbey stojol te j-aʼtel awuʼun.

14 »›Mame xa abolkʼoptay te jkojkʼchikin sok mame ayuk bin ya awakʼ skʼojchin yok-a te machʼa ma xyil kʼinal sok xiʼame* te Dios awuʼun. Joʼon Jehovaon.

15 »›Stojilukme ya xchajpanwanex. Mame xa anaʼbey yoʼbolil sba te pobre ni mame xa akoltaybey skʼoplal te jkʼulej. Stojilukme xa achajpan te apatxujk.

16 »›Mame xa awaʼiy le kʼop ta alumal. Mame ayuk bin xa apas te ya yakʼ ta wokol te skuxlejal* te apatxujk. Joʼon Jehovaon.

17 »›Mame xa apʼaj ta awoʼtan te awermano. Yame skʼan ya atojobtes te apatxujk swenta ma pajaluk ya ata amul sok.

18 »›Mame xa awakʼbey spakol te bin ya spasbat te alumal sok mame xa akʼej slab awoʼtan ta stojolik. Kʼuxukme xa awaʼiy ta awoʼtan te apatxujk jichnix te bin-utʼil kʼux ya awaʼiy aba te jaʼate. Joʼon Jehovaon.

19 »›Chʼuunaik spasel te bintik kaloj: mame xa awakʼ skuch sba chaʼkojt chambalam te ma pajaluk stsʼumbalik, mame xa akap ta tsʼunel chaʼchajp stsʼumbal sit awal tsʼunubil, mame xa alap kʼuʼul te chaʼchajp hilo yichʼoj pasel-ae.

20 »›Teme jtul winik ya sjokin ta wayel jtul ants te jaʼ j-abat te makbil yuʼun yan winik pero maba manbil sok maba libre ay, yame yichʼik castigo ta schebalik. Pero maba ya yichʼik milel, melel maba libre ay-a te antse. 21 Te winik yame skʼan ya yikʼ bael ta stojol te Jehová ta yochibal te nailpakʼ ta swenta tsoblej: jkojt tat tuminchij jich bitʼil majtanil ta swenta chʼayel ta stojol Dios. 22 Ta swenta te tat tuminchij yuʼun te majtanil ta swenta chʼayel ta stojol Dios, te sacerdote ya yakʼ te ya sta perdón yuʼun smul te winik ta stojol te Jehová, jichme ya xpasbot perdón yuʼun te smul la stae.

23 »›Te kʼalal ya x-ochex bael ta lumkʼinal sok ya atsʼunik biluk ta chajp teʼ te ya yakʼ sit, jichme ya xkʼot awuʼun te bin boloben skʼoplal sok ma xjuʼ ya aloʼbeyik te site. Mame xa aloʼbeyik sit oxeb jaʼbil. Mame xa aloʼik. 24 Pero, ta schanebal jaʼbil chʼultesbilme ya xkʼot spisil te site, jaʼnix jich sok stseʼelil awoʼtanik ya awakʼik ta stojol te Jehová. 25 Ta yoʼebal jaʼbil ya xjuʼ ya aloʼbeyikix sit; jich bayalix sit ya atsobeyik-a. Joʼon Jehovaon te Dioson awuʼunik.

26 »›Mame xa aweʼ te bin ay schʼichʼel.

»›Mame x-ochex ta spasel chopol* señailetik sok mame xa apasik magia.

27 »›Ma xa ajoxik* te stsotsel ajolik ta sjoyobal, mame xa asetʼbeyik te sniʼ te awisimik.

28 »›Mame xa aboj abakʼetalik ta skaj te ay machʼa laje, mame ayuk bin xa alokʼtayik ta anujkulelik. Joʼon Jehovaon.

29 »›Mame xa abolobtesbey skʼoplal te awantsil nichʼan ta skaj te ya awakʼ ta j-antsinel* ants swenta maba ya yakʼ sbaik ta antsinel te machʼatik ayik ta kʼinal te jich ya xnoj ta bintik chopol.*

30 »›Yame skʼan ya awichʼik ta mukʼ te sábado kuʼun sok yame skʼan te kʼaxto ya awichʼik ta mukʼ te chʼul awilal kuʼun. Joʼon Jehovaon.

31 »›Mame xbaex ta stojol te machʼatik ya spasik espiritismo* ni ta stojol te jnaʼojeletik, melel yame xbolob akʼoplalik yuʼun. Joʼon Jehovaon te Dioson awuʼunik.

32 »›Yame skʼan ya atejkʼan aba ta stojol te machʼatik sakix stsotsel sjolik, yame skʼan ya awichʼ ta mukʼ te machʼatik ayix yaʼbilalik sok yame skʼan ya axiʼ* te Dios awuʼun. Joʼon Jehovaon.

33 »›Teme yak ta nainel jtul jyanlum ta alumalik, mame xa awutsʼinik.* 34 Jichuk ya awilik te jyanlum jich te bitʼil jtul israel sok kʼuxme xa awaʼiy ta awoʼtanik jich te bitʼil kʼux ya awaʼiy abaik, melel jyanlum kʼoex ta skʼinal Egipto. Joʼon Jehovaon te Dioson awuʼunik.

35 »›Mame xloʼlaywanex te kʼalal ay bin ya apʼisbeyik snajtil, yalal o smukʼul. 36 Lekukme te slikojibal awuʼunik sok tsʼakalukme te spʼisojibal awuʼunik, tsʼakalukme spʼisojibal awuʼunik yuʼun te bintik takin* sok tsʼakalukme spʼisojibal awuʼunik yuʼun te bintik ay yaʼlel.* Joʼon Jehovaon te Dioson awuʼunik te la jlokʼesex tal ta skʼinal Egipto. 37 Chʼuunaik spasel spisil te bintik kaloj sok spisil te bintik jchapoj, sok tʼunaik. Joʼon Jehovaon te Dioson awuʼunik›».