Te lek yach’il k’op ya yal te Juan

10 «Jamal ya kalbeyex te machʼa maba ya x-och ta stiʼ corral yuʼun te tuminchijetik, teme kʼejel ya xwil ochel, jaʼ j-elekʼ sok jpojbiluketik. 2 Yan stukel te machʼa ya x-och ta stiʼil te corrale jaʼme te jkanan yuʼun te tuminchijetike. 3 Te jkanantuminchij jaʼme ya xjambot yuʼun te tiʼ corral te jkanan tiʼ corrale sok yame x-aʼiybot skʼop yuʼun te tuminchijetike. Te jkanantuminchij ya yikʼtiklan tal te tuminchijetik yuʼun ta sbiil sok ya yikʼtiklan lokʼel. 4 Te kʼalal slokʼesojix spisil-a te tuminchijetik yuʼune, jaʼme ya xnailaj bael. Te tuminchijetik ya stʼunik te jkanantuminchij, melel ya snaʼbeyik sba te skʼope. 5 Maʼyuk bin-ora ya stʼunik te machʼa ma snaʼbeyik sbae. Ya x-anik bael ta stojol, melel ma snaʼbeyik sba te skʼope». 6 Te Jesús la yaltiklanbey yaʼiy te lokʼombakʼop ini, pero ma la snaʼbeyik swentail te bin yak ta yalele.

7 Jich albotikxan yuʼun te Jesús: «Jamal ya kalbeyex te joʼon te stiʼ corralon yuʼun te tuminchijetike. 8 Spisil te machʼatik ya xtalik sok ya skuy sbaik ta joʼone jaʼ j-elekʼetik sok jpojbiluketik, pero maba ya x-aʼiybot skʼop yuʼun te tuminchijetike. 9 Joʼon te stiʼ corralone; te machʼa ya x-och bael ta jwentae yame sta skolel; ya xjuʼ ya x-och sok ya xjuʼ ya xlokʼ, jaʼnix jich yame sta sweʼelik. 10 Te j-elekʼe jaʼnax ya xtal ta elekʼ, ta milaw sok ta jinaw. Te joʼone talemon yuʼun ya ata akuxlejalik ta sbajtelkʼinal. 11 Joʼon te lekil jkanantuminchijone, te lekil jkanantuminchije ya yak’ skuxlejal ta stojol te tuminchijetik yuʼune. 12 Te machʼa jle-aʼtelnax te ma jaʼuk jkanantuminchij sok te ma jaʼuk yuʼun te tuminchijetike, te kʼalal ya yil ya xtal te jtiʼawal jaʼmal tsʼiʼ, ya yijkitay jilel te tuminchijetik sok ya xlokʼ bael ta anel. Te jtiʼawal jaʼmal tsʼiʼ ya stiʼtiklan te tuminchijetik jich ya xpujkik bael yuʼun. 13 Te jle-aʼtel ya xlokʼ bael ta anel, melel jaʼnax ya x-aʼtej yuʼun te ya yichʼ tojele sok maʼyuk skʼoplal ta yoʼtan te tuminchijetike. 14 Joʼon te lekil jkanantuminchijone. Ya jnaʼtiklanbey sba te tuminchijetik kuʼune, jaʼnix jich ya snaʼbonik jba te tuminchijetik kuʼune, 15 jich te bin-utʼil ya snaʼbon jba te Tatile, jaʼnix jich ya jnaʼbey sba-euk te Tatile; sok ya kakʼ jkuxlejal ta stojol te tuminchijetike.

16 »Sok ay yantik tuminchijetik kuʼun te maba liʼ ayik ta corral ini; jaʼnix jich yame kikʼtiklan tal-euk sok yame yaʼiybonik te jkʼope. Jtsojbnax ya xkʼotik sok jtulnax jkanan yuʼunik ya xkʼot. 17 Kʼuxon ta yoʼtan te Tatil ta swenta ini: melel ya kakʼ te jkuxlejal sok patil ya kichʼ akʼbeyel yan buelta. 18 Maʼyuk machʼa ya spojbon te jkuxlejal, joʼon spasemal koʼtan ya kakʼ. Ay derecho kuʼun yuʼun ya kakʼ te jkuxlejal sok ay derecho kuʼun yuʼun ya kichʼ akʼbeyel yan buelta. Melel jich yalojbon ta mantal te jTate».

19 Ta swenta te bin la yal te Jesuse, te judioetik yanyantik-a te bin jajch yalik ta stojole. 20 Bayal machʼatik jich la yalik: «Ochem pukuj ta yoʼtan sok sojkem sjol. ¿Bistuk awuʼunik te ya awaʼiybeyik te skʼope?». 21 Ay yantik te jich la yalik: «Ma jichuk ya xkʼopoj te machʼa ochem pukuj ta yoʼtane, melel jtul pukuj ma xjuʼ ya sjambey sit te machʼatik ma xyilik kʼinale, ¿mabal jichuk?».

22 Ta yorail-abi yak ta pasel ta Jerusalén te Kʼin yuʼun yakʼel ta stojol Dios te templo. Jaʼ yorail sik-a, 23 te Jesús yak ta beel ta templo ta Slejchelul Na yuʼun Salomón. 24 Jich yuʼun, te judioetik la sjoytayik te Jesús sok jich jajch yalbeyik: «¿Binto-ora ya awal kaʼiytik teme jaʼatnix-a te Cristoate? Ala kaʼiytik ta jamal». 25 Jich albotik yuʼun te Jesús: «La kalbeyexix, pero ma xa akʼan ya achʼuunik. Te aʼteliletik ya jpas ta swenta sbiil te jTate ya yalbon lek jkʼoplal. 26 Pero, te jaʼexe ma xa achʼuunik, melel maba tuminchijex kuʼun. 27 Te tuminchijetik kuʼun ya yaʼiybonik te jkʼope; ya jnaʼtiklanbey sba sok ya stʼunonik. 28 Joʼon ya kakʼtiklanbey skuxlejalik sbajtelkʼinal; maʼyuk bin-ora ya yichʼik lajinel sok maʼyuk machʼa ya spojbon lokʼel ta jkʼab. 29 Te tuminchijetik yakʼojbon ta jkʼab te jTate jaʼ mukʼxan skʼoplal ta spisil te bintik yakʼojbone, sok maʼyuk machʼa ya xjuʼ ya spojbey lokʼel ta skʼab te Tatil te tuminchijetike. 30 Te joʼon sok te Tatile jun-nax ayotik».

31 Te judioetik la stamik ton yan buelta yuʼun ya schʼojik-a te Jesuse. 32 Jich albotik yuʼun te Jesús: «La kakʼbeyexix awilik bayal lekil aʼteliletik te talem ta stojol te Tatile. Ta spisil te aʼteliletik-abi, ¿bin aʼtelil la jpas te ya akʼan ya achʼojonik ta ton yuʼun?». 33 Jich la yalik te judioetik: «Maba ya jchʼojatkotik ta ton ta swenta lekil aʼtelil, jaʼ ta swenta te ya abolkʼoptay te Diose; melel te jaʼate winikatnax, pero ya akuy aba ta dios». 34 Jich albotik yuʼun te Jesús: «¿Mabal jichuk tsʼibaybil ta Ley awuʼunik ‹Joʼon kaloj: «Jaʼex diosex», te xchie?›. 35 Teme diosex xchi skʼoplalik yuʼun Dios te machʼatik la skontrainbeyik te skʼope (manchukme jich-abi, ma xjuʼ ya xchʼay te bin ya yal te sJun Diose), 36 joʼon —te chʼultesbilon yuʼun te Tatil sok te la stikunon tal ta balumilal—, ¿bin yuʼun ya awalbonik te ‹ya jbolkʼoptay te Dios› jaʼnax yuʼun te ya kal te ‹sNichʼanon te Diose›? 37 Teme ma jaʼuk yakon ta spasbeyel yaʼtel te jTate, mame xa achʼuunonik. 38 Pero, teme yakon ta spasele, manchukme ma xa achʼuunonik te joʼone, chʼuunaik ta swenta te aʼteliletik ya jpase. Jich ya anaʼik sok maʼyuk bin-ora ya awijkitayik ta snaʼel te jun ay ta jtojol te Tatile sok jun ayon ta stojol-euk te Tatile». 39 Kʼan stsakik yan buelta, pero kol bael ta skʼabik.

40 Jich bajt yan buelta te Jesús ta jejch jaʼ Jordán, te banti la yakʼ ichʼjaʼ* te Juan ta sjajchibale, sok tey jil-a. 41 Bayal ants winiketik bajt yilik sok jich jajch yalik: «Maʼyuk junuk milagro* la spas te Juane, pero smelelil spisil te bin la yal ta stojol te winik ini». 42 Ta lugar-abi, bayal machʼatik la yakʼ schʼuunel yoʼtanik ta stojol te Jesuse.