Sbabial carta ta stojol te Tesalonicenseetik

2 Kermanotak, anaʼojik ta lek te ma tojolnax te kʼot kulaʼtayexkotike. 2 Jich bitʼil anaʼojik, kʼax jwokolkotik sok la kichʼtik utsʼinel ta Filipos, pero ta swenta te Dios kuʼuntik la yichʼ yip koʼtantik yuʼun ya jcholbeyexkotik awaʼiyik te lek yachʼil kʼop yuʼun te Diose, manchukme ay tulan kontrainel. 3 Melel te tojobtesel la kakʼbeyexkotike maba talem ta swenta te bin chopol* o te bin ilobtik sba sok maba ya xloʼlaywan, 4 jich te bitʼil lek yilojotik te Diose sok te jaʼ yakʼojbotik ta jkʼabtik te lek yachʼil kʼope, ma jaʼuk ya xkʼopojotik yuʼun lek yoʼtan kuʼuntik te ants winiketike, jaʼ ya jkʼantik te lek yoʼtan kuʼuntik te Dios te ya stsajtay* te koʼtantike.

5 Melel anaʼojik te maʼyuk bin-ora la jmonbeyex awoʼtanik ta tʼujbil kʼopetik sok maʼyuk bin-ora la jmuk ta koʼtantik te bin yilel jtaleltik ta swentanax sbikʼtal koʼtantik. ¡Jaʼ testigo kuʼunkotik te Dios ta swenta ini! 6 Jaʼnix jich maba jleojkotik te ya kichʼtik utsilkʼoptayel yuʼun te ants winiketike —ni jaʼuk ta atojolik ni jaʼuk ta stojol te yantike—, manchukme ya xjuʼ ya jkʼanbeyexkotik koltayel ta swenta takʼin ta skaj te jpuk-kʼopotik yuʼun te Cristoe. 7 Te bin la jpastike jaʼ te leknax la kilexkotik jich te bin-utʼil jtul nanil* te ya schuʼuntes sok ya skanantay sok skʼuxul yoʼtan te yalatake. 8 Jich yuʼun, te bitʼil bayal kʼuxex ta koʼtantik-a, kakʼoj ta koʼtantik-a te ma jaʼuknax ya kalbeyexkotik awaʼiyik te lek yachʼil kʼop yuʼun te Diose, jaʼnix jich te ya kakʼ jkuxlejaltik ta atojolik, melel kʼax kʼux la kaʼiyexkotik ta koʼtantik.

9 Anaʼojik ta lek, kermanotak, te tulan aʼtejotik sok te la jpastik tulan ta yakʼel koltayel. Kʼalal la jcholbeyexkotik te lek yachʼil kʼop yuʼun Dios, aʼtejotik ta kʼajkʼal ajkʼabal yuʼun jich maʼyuk machʼa la kakʼbeytik swokol ta swenta takʼin. 10 Ta melel, jaʼex testigoex soknix te Dios te jun koʼtankotik la kakʼ jbatik ta atojolik, te toj sok te maʼyuk bin chopol* la jpastik ta atojolik, jaʼex te jchʼuunjelexe. 11 Anaʼojik ta lek te jich bin-utʼil ya spas jtul tatil ta stojol te snichʼnab, la jtojobtesexkotik, la kakʼbeyex smukʼul kʼinal awaʼiyik sok la jnojptesex ta jujuntul, 12 yuʼun jich toj ya xkuxinex te bin-utʼil ya skʼan te Dios te yak yikʼbelex ta Wentainel* yuʼun sok ta yutsilal.

13 Jaʼ yuʼun, te joʼonkotik spisil-ora ya kalbeytik wokol Dios, melel te kʼalal la achʼuunik te skʼop Dios —te la awaʼiyik ta jwentakotik—, ma jichuk la awilik te bin-utʼil skʼop ants winiketik, jich la awilik te bin-utʼil skʼop Dios, ta melel jaʼnix-a. Jaʼ te yak ta aʼtel ta awoʼtanik, jaʼex te jchʼuunjelexe. 14 Kermanotak, jaʼex la akʼayinbeyik stalel te hermanoetik ta congregacionetik yuʼun Dios te ayik ta Judea te jun-nax ayik sok te Cristo Jesús, melel te ants winiketik ta alumalik la yakʼbeyex awokolik jichnix te bin-utʼil yak ta kʼaxel ta stojolik-euk ta skʼab te judioetike, 15 te jaʼiknix la smilik te Kajwaltik Jesús sok te j-alwanejetike soknix te la skontrainotik-euk. Jaʼnix jich, ta swenta te bin la spasike, ma lek ilbilik yuʼun Dios sok ya skontrainik te bin ya snop ya spas spisil te ants winiketik 16 te kʼalal ya skʼan ya skomik te ya jcholbeytik skʼop Dios te jyanlumetik yuʼun ya sta skolelik. Jich ya snojesik ta jkʼaxel te yawil te smulike. Pero te yilinba te Dios julix ta stojolik.

17 Te kʼalal puersa la skʼan te ya kijkitayex cheʼoxebuk kʼajkʼale, spisil-ora ayex ta koʼtankotik-a, koʼtantikuk te ya kilbeyexkotik asitik yan buelta, jaʼ yuʼun ya jpastik tulan yuʼun jichuk ya xkʼot ta pasel. 18 Jich yuʼun la jkʼankotik te ya xbajt kulaʼtayexkotik. Jich, joʼon-nix te Pablo, ma jaʼuknax jun buelta la jpas tulan, cheb buelta jich la jpas. Pero, jaʼ la smak jbetik te Satanase. 19 Melel, ¿machʼa-a te smukʼul koʼtantik, te stseʼelil koʼtantik o te jcoronatik te ya yakʼ sbujtsʼ kʼinal kaʼiytik ta stojol te Kajwaltik Jesús te kʼalal liʼ ayix-ae?* ¿Mabal jaʼukex? 20 Jaʼ, jaʼex te kutsilalexkotik sok stseʼelilex koʼtankotik.