Génesis

1 Ta sjajchibal, te Dios la spas te chʼulchan sok te balumilal.

2 Maba chajpanbil te balumilal sok jochol-a. Uʼuninbil ta ijkʼal kʼinal spisil te bintik ay ta sba sok ta yeʼtal jaʼ. Te yip yuʼel te Dios ya stij sba ta sbaba jaʼetik.

3 Jich la yal te Diose: «Ayuk sakal kʼinal». Jich chiknaj te sakal kʼinale. 4 Ta patil, te Dios lek la yil te sakal kʼinale, jich la xat te sakal kʼinal sok te ijkʼal kʼinal. 5 Te Dios la yakʼbey sbiilin te sakal kʼinale Kʼajkʼal, yan te ijkʼal kʼinale Ajkʼabal. Jich ayin mal kʼajkʼal sok sab. Jaʼme-abi te sbabial kʼajkʼale.

6 Tey-abi la yal te Dios: «Ayuk sjamalul ta yolil te jaʼe sok akʼa xat sba te jaʼetike». 7 Te Dios la yakʼ te ayuk sjamalul te jaʼe, parte la yakʼ ta sba; parte la yakʼ ta alan. Jaʼme jich kʼot ta pasel-abi. 8 Te Dios la yakʼbey sbiilin Chʼulchan te sjamalule. Jich ayin mal kʼajkʼal sok sab. Jaʼme-abi te schebal kʼajkʼale.

9 Tey-abi la yal te Dios: «Akʼa stsob sba ta jun-nax lugar te jaʼ te ay ta yeʼtal te chʼulchane, jich akʼa chiknajuk te lumkʼinale». Jich kʼot ta pasel. 10 Te Dios la yakʼbey sbiilin Balumilal te lumkʼinal te takine, yan te jtsojb jaʼetik, Maretik. Jaʼ-abi lek la yil te Diose. 11 Tey-abi la yal te Dios: «Akʼa chʼiuk ta lumkʼinal chʼin jaʼmaletik* sok jaʼmaletik te ya yakʼ sit soknix teʼetik te ya yakʼ sit jaʼ chikan bin yilel ta jujunchajpe». Jich kʼot ta pasel. 12 Jich jajch ta chʼiel chʼin jaʼmaletik, jaʼmaletik* te ya yakʼ sit soknix teʼetik te ya yakʼ sit jaʼ chikan bin yilel ta jujunchajpe. Jaʼ-abi lek la yil te Diose. 13 Jich ayin mal kʼajkʼal sok sab. Jaʼme-abi te yoxebal kʼajkʼale.

14 Tey-abi la yal te Dios: «Akʼa chiknajuk te bintik ya xtil skʼajkʼal ta sjamalul chʼulchan, yuʼun jich parte ya xkʼot te kʼajkʼal sok parte ya xkʼot te ajkʼabal, jaʼ señailetik ya xkʼot yuʼun ya sjel sba te kʼinal, te jujun kʼajkʼal sok te jujun jaʼbile. 15 Jaʼ ya yakʼ xojobil ta sjamalul chʼulchan yuʼun jich ay sakal kʼinal ta balumilal». Jich kʼot ta pasel. 16 Te Dios la spas cheb te bintik ya xtil skʼajkʼal: te mukʼe jaʼ ya swentain te kʼajkʼal, te yan te chʼin-naxe jaʼ ya swentain te ajkʼabale, jaʼnix jich la spas te ekʼetike. 17 Te Dios la yakʼtiklan ta sjamalul chʼulchan yuʼun jich ay sakal kʼinal ta balumilal, 18 yuʼunme jich ya swentain te kʼajkʼal sok te ajkʼabal, jaʼ ya xat te sakal kʼinal sok te ijkʼal kʼinal. Jaʼ-abi lek la yil te Diose. 19 Jich ayin mal kʼajkʼal sok sab. Jaʼme-abi te schanebal kʼajkʼale.

20 Tey-abi la yal te Dios: «Akʼa chiknajuk te bintik ya xkuxinik ta jaʼ sok akʼa wiluk te jaʼmal mutetik* ta sjamalul chʼulchan, ta sba te balumilal». 21 Jich yuʼun, te Dios la spas mukʼul chambalametik ta jaʼ sok spisil te chambalametik te ya xkuxinik ta jaʼ, jaʼ chikan te bin yilel ta jujunchajp stsʼumbale sok la spas spisil ta chajp jaʼmal mutetik* te ya xwilik jaʼ chikan te bin yilel ta jujunchajp stsʼumbale. Jaʼ-abi lek la yil te Diose. 22 Ta patil, jich la yal te Dios kʼalal la yakʼtiklanbey bendición: «Pʼola abaik, bayaluk ya xkʼoex sok nojesaik te maretike, jaʼnix jich akʼa spʼol sbaik ta balumilal te jaʼmal mutetik* te ya xwilike». 23 Jich ayin mal kʼajkʼal sok sab. Jaʼme-abi te yoʼebal kʼajkʼale.

24 Tey-abi la yal te Dios: «Akʼa chiknajuk chambalametik ta balumilal jaʼ chikan te bin yilel ta jujunchajp stsʼumbal. Alakʼil chambalametik,* chambalametik te staslajan ya xbeenik ta lum sok jtiʼawal chambalametik jaʼ chikan te bin yilel ta jujunchajp stsʼumbal». Jich kʼot ta pasel. 25 Te Dios la spas te jtiʼawal chambalametik jaʼ chikan te bin yilel ta jujunchajp stsʼumbal, te alakʼil chambalametik* jaʼ chikan te bin yilel ta jujunchajp stsʼumbal sok te chambalametik te staslajan ya xbeenik ta lum jaʼ chikan te bin yilel ta jujunchajp stsʼumbal. Jaʼ-abi lek la yil te Diose.

26 Tey-abi la yal te Dios: «Akʼa jpastik jtul winik ta jlokʼombatik, te pajal yilel sok te joʼotike, jaʼ akʼa swentain te schayul te maretik, te jaʼmal mutetik* te ya xwilik ta sjamalul chʼulchan, te alakʼil chambalametik* sok spisil te bintik ay ta balumilal soknix te chambalametik te staslajan ya xbeenik ta lum». 27 Jich yuʼun, te Dios la spas jtul winik jich bitʼil te slokʼomba. Ta slokʼomba Dios la spas, la spas te winik sok te ants. 28 Jaʼnix jich, te Dios la yakʼtiklanbey bendición sok jich la yaltiklanbey: «Akʼa ayinuk* bayal awal anichʼnabik, pʼola abaik, nojesaik te balumilal sok tuuntesaik sok jaʼ xa awentainik te schayul te maretik, te jaʼmal mutetik* te ya xwilik ta sjamalul chʼulchan sok spisil te bintik kuxajtik te ya stij sbaik ta balumilal».

29 Ta patil, jich la yal te Diose: «Ya kakʼbeyex spisil te jaʼmaletik te ya xchʼi ta lumkʼinal te ya yakʼ sit sok spisil te teʼetik te ya yakʼ site, jaʼme aweʼelik ya xkʼot. 30 Jaʼnix jich ta swenta spisil te jtiʼawal chambalametik te ayik ta balumilal, spisil te jaʼmal mutetik* te ya xwilik ta sjamalul chʼulchan sok spisil te bintik kuxajtik te ya stij sbaik ta balumilal, jaʼme ya kakʼbey sweʼelinik spisil te yaxal jaʼmaletik».* Jich kʼot ta pasel.

31 Kʼalal la yil Dios spisil te bintik la spase, ¡ilawilik!,* mero lek te bintik la spase. Jich ayin mal kʼajkʼal sok sab. Jaʼme-abi te swakebal kʼajkʼale.