Te lek yachʼil kʼop ya yal te Mateo

24 Te k’alal lokʼ bael ta templo te Jesuse, talik ta stojol te jnopojeletik yuʼune sok la yakʼbeyik yil te naetik yuʼun te temploe. 2 Jich albotik yuʼun te Jesuse: «¿Yabal awilik spisil ini? Jamal ya kalbeyex te maʼyuk jpʼijuk ton te kajal ya xjil ta sba yan ton. Spisil ya yichʼ jinel».

3 Te k’alal nakal ta wits yuʼun Olivoetik-a te Jesuse, stukelnax talik te jnopojeletike, jich la yalbeyik: «Ala kaʼiykotik, ¿bin-ora ya xkʼot ta pasel-abi sok bin señail ya xchiknaj te kʼalal liʼ ayatix-ae* sok te kʼalal nopolix-a* te slajibal kʼajkʼale?».

4 Jich la yal te Jesuse: «Tsajtayame* abaik. Mame ayuk machʼa ya sloʼlayex, 5 melel bayal machʼatik ya xtalik te ya yichʼbonik te jbiile sok jich ya yalik ‹Joʼon te Cristoon›, xchiik, sok bayalme machʼatik ya sloʼlayik. 6 Yame awaʼiyik te ay guerraetik sok yame awaʼiybeyik skʼoplal te ay guerraetik ta bayuk. Pero mame xiwex, melel puersa ya xkʼot ta pasel spisil ini, pero matome jaʼuk te slajibal kʼajkʼale.

7 »Melel yame skontrain sbaik te nacionetik sok yame skontrain sbaik te ajwaliletike, yame xtal tulan wiʼnal sok tulan nijkel ta bayuk. 8 Spisil ini sjajchibaltonax te tulan wokoliletik* ya xtale.

9 »Jich yuʼun yame awichʼik utsʼinel* sok yame awichʼik milel, sok ta swenta te jbiile yame spʼajex spisil te nacionetike. 10 Sok bayal machʼatik ya xchʼay te schʼuunel yoʼtanik, talel kʼaxel yame yakʼ sbaik ta kʼabal sok talel kʼaxel yame spʼaj sbaik. 11 Yame xtal bayal lotil j-alwanejetik sok yame sloʼlay bayal ta tul ants winiketik. 12 Ta skaj te ya xpʼol te bintik ma lek ta pasele,* jteb ma spisiluk te ants winiketik yame xpejkʼaj te skʼuxul yoʼtanike. 13 Pero, te machʼa ya xkujch yuʼun kʼalalto ta slajibal kʼajkʼal yame xkol stukel. 14 Jich yuʼun yame xpujk ta alel ta swolol balumilal te lek yachʼil kʼop yuʼun te Wentainel* yuʼun te Diose, jichme ya yaʼiyik te skʼop Dios spisil te ants winiketik, tey-abi ya xtal te slajibal kʼajkʼale.

15 »Jaʼ yuʼun, te kʼalal ya awilik te ya stejkʼan sba ta chʼul awilal te bin ilobtik sba sok te ya xlajinwan te la yalbey skʼoplal te j-alwanej Daniel (te machʼa ya skʼopon* ini ayukme spʼijil ta yichʼbeyel swentail), 16 jich yuʼun te machʼatik ayik ta Judea, akʼa anukik bael ta witstikil. 17 Te machʼa ay ta sba sna, mame xkoix tal ta slokʼesel te bintik ay yuʼun te ay ta yutil snae, 18 te machʼa baem ta aʼtel ta skʼinale, mame sujtix ta sleel te skʼuʼe. 19 ¡Ayme swokolik te antsetik te yikʼojik alal ta schʼujtik o te ayik ta schuʼuntesel alal ta yorail-abi! 20 Kʼoponaik Dios ta spisil-ora te manchuk yorailuk sik o te skʼajkʼalel sábado-a te ya xlokʼex bael ta anele. 21 Melel yame xtal tulan wokolil te maʼyuk jich kʼoem ta pasel kʼalalto tal ta sjajchibal te balumilale sok maʼyuk bin-ora jich ya xkʼotxan ta pasel ta patil. 22 Ta melel, te manchuk ya yichʼ komobtesel te kʼajkʼaletik-abi, maʼyuk jtuluk ya sta skolel te jichuke; pero ta swenta te machʼatik tsabilike, yame yichʼ komobtesel te kʼajkʼaletik-abi.

23 »Jich yuʼun, teme ay machʼa ya yalbeyex ‹¡Ilawilik, liʼ ay te Cristoe!› o ‹¡Lum ay ini!›, teme xchie, mame xa achʼuunik. 24 Melel yame xtal lotil cristoetik sok lotil j-alwanejetik te ya spasik mukʼul milagroetik* sok ya spasik mukʼul aʼteliletik yuʼun ya xloʼlaywanik, jaʼnix jich ya xjuʼ ya yichʼik loʼlayel-euk te machʼatik tsabilike. 25 Mame xchʼay ta awoʼtanik, lame kakʼbeyex anaʼik ini. 26 Teme ay machʼa ya yalbeyex ‹¡Ilawilik, ay ta jochol takin kʼinal!›, mame xbaex; teme ya yalbeyex ‹¡Ilawilik, ay ta yutil na!›, teme xchie, mame xa achʼuunik. 27 Melel jich te bin-utʼil tsantsewal te ya xjajch tal ta slokʼib kʼajkʼal sok te ya xchiknaj kʼalalto ta smalib kʼajkʼal, jaʼme jich-euk te kʼalal liʼ ayix-a* te sNichʼan te Winike.* 28 Te banti ay te chamen bakʼete, teyme ya stsob sbaik-a te mukʼul xiketik.*

29 »Te kʼalal lajeltonax-a te tulan wokolil ta yorail-abi, yame x-ijkʼub te kʼajkʼale, maba ya yakʼix xojobil te ue, yame xchʼay koel tal te ekʼetik ta chʼulchane sok yame yichʼ yukʼilanel te bintik ay ta chʼulchane. 30 Jichme ya xchiknaj ta chʼulchan te señail te sNichʼan te Winike,* spisil te ants winiketik* ta balumilal yame yokʼetay sbaik yuʼun te wokolil sok yame yilik te sNichʼan te Winik te yak ta talel ta stokalil chʼulchan sok yuʼel sok bayal yutsilal. 31 Te kʼalal ya yichʼ okʼesinel ta tulan te trompeta, yame stikun te chʼul-abatetik yuʼun. Yame xtal stsobik te machʼatik tsabilik kʼalalto ta schanxujkul balumilal, jaʼto ta jujunjejch stiʼil te chʼulchane.

32 »Ayukme bin ya anopik ta swenta te lokʼombakʼop yuʼun te higuerae. Te kʼalal ya x-achʼub te skʼabkʼab sok te yabinale, ya anaʼik te nopolix* yorail te jaʼale. 33 Jaʼnix jichex-euk, te kʼalal ya awilik te ya xkʼot ta pasel spisil ini, naʼaikme te nopol* ayix te sNichʼan te Winike,* te tekʼelix ta tiʼnaile. 34 Jamal ya kalbeyex te maba ya xlaj skʼoplal te jkaj tsʼumbalil ini jaʼto teme kʼot ta pasel spisil ini. 35 Te chʼulchan sok te balumilal yame xlaj, pero te jkʼope maʼyuk bin-ora ya xlaj skʼoplal stukel.

36 »Ta swenta-abi, maʼyuk machʼa ya snaʼ te bin kʼajkʼalil sok te jayeb ora ya xtalon, ni jaʼuk te chʼul-abatetik ta chʼulchan ni jaʼuk te Nichʼanile; jaʼnax te Tatile. 37 Jichnix bin-utʼil ta skʼajkʼalel te Noé, jichnix ya xkʼot ta pasel te kʼalal liʼ ayix-a* te sNichʼan te Winike.* 38 Melel te kʼalal mato xtal-a te Pulemale,* te ants winiketik yakik ta weʼel uchʼel, te winiketik yakik ta nujpunel, te antsetik yakik ta akʼel ta nujpunel... jaʼto te kʼalal och ta arca te Noé; 39 maba la schʼuunik te bin la yal jaʼto kʼalal tal te Pulemale* sok spisil lajik yuʼun. Jichme ya xkʼot ta pasel te kʼalal liʼ ayix-a* te sNichʼan te Winike.* 40 Ay chaʼtul winiketik te yakik ta aʼtel ta skʼinalik: jtul ya yichʼ ikʼel bael, jtul ya yichʼ ijkitayel. 41 Ay chaʼtul antsetik te ay bin yakik ta sjuchʼel ta molino: jtul ya yichʼ ikʼel bael, jtul ya yichʼ ijkitayel. 42 Jaʼ yuʼun wikʼilukme asitik ta spisil-ora, melel ma naʼbiluk awuʼunik te bin kʼajkʼalil ya xtal te Awajwalike.

43 »Naʼaikme ini: te yakuk snaʼ te yajwal na te jayeb ora ta ajkʼabal ya x-och te j-elekʼ ta snae, wikʼil sit ya xjil te jichuke sok maba ya yakʼ ochel ta sna te jichuke. 44 Jaʼnixme jich te jaʼexe, chapalukexme, melel te sNichʼan te Winik* yame xtal ta jun ora te ma naʼbiluk awuʼunike.

45 »¿Machʼanix ta smelelil-a te j-abat te jun yoʼtan sok pʼij te akʼbot jilel ta skʼab yuʼun te yajwal ta swentainel te yantik j-abatetik swenta ya smakʼlin ta yorail? 46 ¡Tseʼelnaxme yoʼtan te j-abat-abi teme jich yak ta spasel te kʼalal ya xjul tal te yajwale! 47 Jamal ya kalbeyex te yame x-akʼbot swentain spisil te bintik ay yuʼun te yajwale.

48 »Pero, teme ay bin-ora ya spas te bin ma lekuk te j-abat-abi sok teme ay jich ya yal ta yoʼtan ‹Jalajix te kajwale› 49 sok teme ya xjajch smajtiklan te sjoʼtak ta abatil, sok te ya xbajt ta weʼel sok ta uchʼajel sok te jyakubeletike, 50 yame xtal te yajwal ta jun kʼajkʼal te ma naʼbiluk yuʼun te j-abat sok te bin-ora ma na’biluk yuʼun-ae, 51 yame x-akʼbot kʼax tulan castigo sok yame x-akʼbot sjokin te jchaʼlam-oʼtanetike.* Teyme ya yokʼetay sba-a sok teyme ya skʼuxuxan ye-a.*