LEKSION 4

Nail cholbeya skʼoplal te tekstoetik ya akʼopone

Mateo 22:41-45

TE BIN YA SKʼAN YA ANOP: Kʼalal mato akʼoponoj-a te teksto ta Biblia chajpanbeya yoʼtan nailuk te machʼatik ya schʼam yaʼiyike.

Nopa bin yuʼun ya akʼopon te tekstoe. Kʼalal mato akʼoponoj-a te tekstoe, ala chaʼoxpʼal kʼopetik te ya xkoltayotik te ants winiketik ta snaʼel bin punto ya akʼan ya awalbey skʼoplal.

Ichʼa ta wenta te bin ya yichʼ alel ta sjajchibal o ta slajibal te tekstoe. Mame xa ajelbey sbiil te machʼa jich la yal te bin ya akʼopone sok albeya sbiil te machʼa la stsʼibay te libroe.
Lokʼemuk ta Biblia te bin ya awale. Kʼalal ya xkʼopojat sok ants winiketik te schʼuunejikix Dios, albeya te jaʼ «sKʼop Dios» te Bibliae, jichme ya awakʼ ta naʼel te talem ta stojol Dios te bintik ya awakʼ ta nopele.
Tijbeya yoʼtanik ta swenta te tekstoe. Pasa jun jojkʼoyel te ya yakʼbey sujtib te teksto-abi, albeya skʼoplal jun wokolil banti jaʼ ya atuuntes te teksto ta schajpanel-abi o ya xjuʼ ya awal junuk te bintik smelelil ya xtojobteswan ta teksto-abi.

Ichʼa ta wenta te bin snaʼojikix ta swenta te tema sok te tekstoe. Pasa tulan yuʼun tʼujbiluk te bitʼil ya ajachbey skʼoplal te teksto manchukme kʼax naʼbil sba. Jaʼnix jich koltaya te machʼatik ya schʼam yaʼiyik te akʼop yuʼun ya xkʼot lek ta yoʼtanik o ta stael yachʼil nojptesel ta teksto-abi.