Te bitʼil ya xwentainwanik ta kongregasion

 1. ¿Bin yuʼun jun-nax ay te sfamilia te Jehová?

¿MABAL JICHUK te tseʼel koʼtantik te ayotik ta sfamilia te Jehová? Te bitʼil jich ya kaʼiytik jbatike, jaʼ yuʼun te ay lamalkʼinal sok te jun-nax ayotik, melel ya jpastik tulan te ya kakʼ jbatik ta wentainel yuʼun te machʼatik yakʼbeyoj yaʼtel te Jehová. Teme kʼoem ta lek ta koʼtantik spisil ini, jun-nax ayotik.

 2. ¿Bin jojkʼoyeletik ya kakʼbeytik sujtib ta artikulo ini?

² Ta artikulo ini ya kalbeytik skʼoplal te machʼatik ya swentainik te kongregasion. Ya kakʼbeytik sujtib te jojkʼoyeletik ini: ¿Bin ay ta swentaik spasel te ermanaetik?, ¿jaʼbal jolal spisil te ermanoetik yuʼun te ermanaetik? Sok ¿pajalbal te bin-utʼil ya xwentainwanik te ansianoetik sok te jolaletik ta familia? Ta nail ya kiltik bin ay ta swentaik spasel te ermanaetik sok bin-utʼil ya skʼan ya kiltik.

 3. ¿Bin ya skoltayotik yuʼun mukʼxan skʼoplal ya xkʼot ta koʼtantik te ermanaetik?

³ Ya skʼan te lekuk ya kiltik te ermanaetik, melel ya skanantay te sfamiliaik, ya xlokʼik ta scholel skʼop Dios sok ya skoltayik te ermanoetik ta kongregasion. Teme ya jnoptik bin-utʼil ilotik yuʼun te Jehová, te Jesús sok te jpuk-kʼop Pablo, mukʼxan skʼoplal ya xkʼot ta koʼtantik.

 4. ¿Bin-utʼil ya yakʼ ta ilel te Biblia te pajal ya yil Jehová te winiketik sok te antsetik?

⁴ Te Biblia ya yal te pajal ta sit Jehová te winiketik sok te antsetik. Ta sbabial siglo, te Jehová la yakʼbey te schʼul espiritu te winiketik sok te antsetik yuʼun ya spasik milagroetik, jich bitʼil te ya xkʼopojik ta yanyantik kʼopiletik (Hech. 2:1-4, 15-18). Te machʼatik ya x-ajwalinik sok te Cristo ta chʼulchan, ay winiketik sok antsetik (Gál. 3:26-29). Te machʼatik ya yakʼbey skuxlejal ta sbajtelkʼinal liʼ ta Balumilal te Jehová, ay winiketik sok antsetik (Apoc. 7:9, 10, 13-15). Te Jesús la yal ta mantal te yakuk scholik skʼop Dios te winiketik sok te antsetik (Mat. 28:19, 20). Ta libro yuʼun Hechos ya yalbey skʼoplal te Priscila. Te ants ini sok te smamalal Áquila, «la yalbeyic ta lec» te bin smelelil jtul winik te Apolos sbiil (Hech. 18:24-26).

 5. Jich bitʼil ya yal te Lucas 10:38, 39, 42, ¿bin-utʼil la yil Jesús te antsetik?

⁵ Te Jesús ya yichʼ ta wenta te antsetik. Ma jichuk stalel bitʼil te fariseoetik te ya spʼajik te antsetik, te ma skʼoponik te kʼalal ayik ta komonsitil sok ma xyalbeyik yaʼiy te bin ya yal te sJun Dios. Te bin la spas stukel te Jesús, jaʼ te la scholbey yaʼiy skʼop Dios chikan teme antsetik o winiketik (kʼopona Lucas 10:38, 39, 42).b Jaʼnix jich la yakʼ te yakuk xjokinot yuʼun bayal ta tul antsetik ta scholel skʼop Dios (Luc. 8:1-3). Sok la yakʼ te jaʼuk ya yalbeyik te jpuk-kʼopetik te chaʼkuxaj te Jesús (Juan 20:16-18).

 6. ¿Bin-utʼil la yakʼ ta ilel te jpuk-kʼop Pablo te ya yichʼ ta mukʼ te antsetike?

⁶ Te jpuk-kʼop Pablo la yalbey te Timoteo te yakuk yichʼ ta mukʼ te antsetik. La yalbey te jichuk akʼa yil te antsetik te ayix yaʼbilalik bitʼil snan sok te achʼixetik jichuk ya yil bitʼil yijtsʼinab (1 Tim. 5:1, 2). Manchukme te Pablo bayal bin la spas yuʼun la skoltay te Timoteo yuʼun tulanuk te schʼuunel yoʼtan, pero jaʼnix jich snaʼoj te jaʼ te snan sok te schuchuʼ meʼel te la snojptesik ta swenta te «bin tsʼihbabil ta schʼul Shun Dios» (2 Tim. 1:5; 3:14, 15). Jaʼnix jich te kʼalal la stsʼibaybey bael karta te romanoetik, te Pablo la stikunbey spatil yoʼtan chaʼoxtul ermanaetik sok la yaltiklanbey sbiil. La sta ta ilel te bayal bin ya spasik te ermanaetik, jaʼ yuʼun la yaltiklanbey te ay skʼoplalik ta yoʼtan (Rom. 16:1-4, 6, 12; Filip. 4:3).

 7. ¿Bintik jojkʼoyel ya kakʼbeytik sujtib?

⁷ Jich bitʼil te la kilbeytikix skʼoplale, te Biblia maba ya yal te jaʼ pekʼel skʼoplal te ermanaetik. Te bitʼil ya yakʼ ta ilel slekil yoʼtan sok skʼuxul yoʼtan te ermanaetik, bayal bin ya spasik ta kongregasion sok ya skoltayik te ansianoetik yuʼun ayuk lamalkʼinal sok junuk yoʼtanik te kongregasion. Pero yato kakʼbeytik sujtib te jojkʼoyeletik ini: ¿Bin yuʼun ya yal te Jehová te ay baeltik ya skʼan ya smuk sjolik te antsetik? Sok te bitʼil yichʼoj yaʼtel te winiketik jich bitʼil ansiano o sierbo ministerial, ¿yabal skʼan ya yal-abi te spisil te ermanoetik jaʼ jolal yuʼun te ermanaetik?

 8. Jich bitʼil ya yal te Efesios 5:23, ¿bin yuʼun ma jaʼuk spisil te ermanoetik jolal yuʼun te ermanaetik?

⁸ Te Cristo jaʼ jolal yuʼun spisil te ermanaetik ta kongregasion ma jaʼuk te ermanoetik (kʼopona Efesios 5:23). Ta jun familia, te mamalalil jaʼ ya swentain te yiname, pero teme ay skerem alik te yichʼojix jaʼ ma jaʼuk ya swentain te smamae (Efes. 6:1, 2). Ta kongregasion aynax ban kʼalal te ansianoetik ya xjuʼ ya swentain te ermanaetik sok te ermanoetik (1 Tes. 5:12; Heb. 13:17). Jtul ermana te mato ba nujpunem te maʼyukix ta kuxinel sok te smeʼ stat yato yichʼ ta mukʼ te smeʼ state, pero ma jaʼukix ya xwentainot yuʼun te state. Ya yichʼ ta mukʼ te ansianoetik, pero jaʼnax jolal yuʼun te Jesús.

 9. ¿Bin yuʼun ay baeltik ya skʼan ya smuk sjol te ermanaetik?

⁹ Te Jehová, jaʼ yakʼoj te jaʼ ya swentainik te kongregasion te winiketik ma jaʼuk te antsetik (1 Tim. 2:12). ¿Binwan yuʼun? Yuʼun jich chapal ta lek-a te kongregasion: jich bitʼil te Jesús jaʼ jolal yuʼun te winik. Teme jtul ermana ya spas jun aʼtelil ta kongregasion te jaʼnax ya xjuʼ ya spas te ermanoetik, te Jehová ya yal ta ya skʼan ya smuk sjol (1 Cor. 11:4-7).c Ma yuʼunuk ya xpejkʼanbot skʼoplal teme jich ya spase, jich ya yakʼ ta ilel te ya yichʼ ta mukʼ te machʼa ya xwentainwan. Ya kakʼbeytik sujtib te jojkʼoyel ini: ¿Bantito kʼalal ya xwentainwan te jolaletik yuʼun te familia sok te ansianoetik?

10. ¿Bin yuʼun jtul ansiano ya xjuʼ ya snop te ya spas ta mantal te ermanoetik ta kongregasion?

¹⁰ Te ansianoetik kʼux ta yoʼtanik te Cristo sok kʼux ta yoʼtanik te tuminchijetik te akʼbot skanantayik yuʼun te Jehová sok te sNichʼane (Juan 21:15-17). Jtul ansiano sok yutsil yoʼtan jich ya xjuʼ ya skuy sba bitʼil te jaʼ tatil yuʼun te ermanoetik ta kongregasion. Jichniwan ya xjuʼ ya snop: «Teme jtul jolal ta familia ya xjuʼ ya yakʼ mantal yuʼun jich ya skanantay-a te sfamilia, jaʼnix jich jtul ansiano ya xjuʼ ya yakʼ mantal yuʼun jich ya skanantay-a te tuminchijetik yuʼun Dios». Teme te ermanoetik sok te ermanaetik jaʼ ya sjojkʼobeyik te ansianoetik te bin ya skʼan ya spas ta skuxlejalik, yaniwan xjuʼ ya snop te ansiano te jaʼ ay ta swenta yalel te bin ya spasike. Pero ¿pajalbal ya xwentainwanik te ansianoetik sok te jolaletik ta familia?

11. ¿Bintik pajal ya spasik te jolaletik ta familia sok te ansianoetik?

¹¹ Te jpuk-kʼop Pablo la yal te bitʼil ya xwentainwan jtul jolal ta familia sok jtul ansiano ay bin chaʼoxchajp te pajal ya spasike (1 Tim. 3:4, 5). Te Jehová jaʼ ya skʼan te machʼatik ay ta jun familia te yakuk schʼuunbey skʼop te jolal ta familia soknix te ermanoetik ta kongregasion ya skʼan te yakuk schʼuunbey skʼop te ansianoetik (Col. 3:20). Te jolaletik ta familia sok te ansianoetik, ya skʼan te kʼuxuk ya yaʼiyik, te tulanuk schʼuunel yoʼtanik sok te ayuk skʼoplal ya yaʼiy sbaik te machʼatik ya swentainik, jich bitʼil ya skʼan te Jehová. Jich bitʼil lekil jolaletik ta familia, te ansianoetik ya skoltayik te ermanoetik te ya skʼanik koltayel (Sant. 2:15-17). Te Jehová ya yalbey te ansianoetik sok te jolaletik ta familia te yakuk skoltayik te ermanoetik ta schʼuunel te bin ya yal te skʼop Dios, pero te manchuk ya xjelawik ta yalel te «bin tsʼihbabil» ta Biblia (1 Cor. 4:6).

12, 13. Jich bitʼil ya yal te Romanos 7:2, ¿bintik ma pajaluk ya spasik te jolaletik ta familia sok te ansianoetik?

¹² Pero aynix te bintik ma pajaluk te bin-utʼil ya xwentainwanik te ansianoetik sok te jolaletik ta familia. Jun te bin yakʼbeyoj Jehová te ansianoetik jaʼ te ya xjuʼ ya yichʼik ta kʼop sok te ya slokʼesik ta kongregasion te machʼatik ma sujtes yoʼtanik (1 Cor. 5:11-13).

¹³ Te Jehová ay bin yakʼbeyoj spas te jolaletik ta familia te ma xjuʼ ya spas te ansianoetik. Jun te bin ya spasike, jaʼ te ya yakʼbeyik mantal te sfamilia sok te ya yil te yakuk skʼotesik ta spasel (kʼopona Romanos 7:2). Jich bitʼil jaʼ ay ta swenta yalbeyel te snichʼnab te jayeb ora ya xkʼot ta sna sok jaʼ ay ta swenta stojobtesel teme ma schʼuunik kʼop (Efes. 6:1). Te kʼalal ay bin ya sta ta nopel jtul jolal ta familia, nail ya yalbey skʼoplal sok te yinam, melel jun-nax ayik (Mat. 19:6).d

14. 1) Jich bitʼil ya yal te Marcos 10:45, ¿bin yuʼun te Jehová jaʼ la stsa te Jesús jich bitʼil jolal ta kongregasion? 2) ¿Bin aʼtelil ya spas te Kuerpo Gobernante? (Ilawil te rekuadro «Te bin ya spas te Kuerpo Gobernante»).

¹⁴ Ta swenta te la yakʼ sba ta lajel te Jesús, te Jehová ya yakʼbey skuxlejal te machʼatik ayik ta kongregasion sok spisil te ants winiketik te ay schʼuunel yoʼtanik ta stojol te Jesús (kʼopona Marcos 10:45; Hech. 20:28; 1 Cor. 15:21, 22). Te bitʼil laj ta jtojoltik te Jesús, te Jehová la stsa yuʼun jaʼ jolal ya xkʼot ta kongregasion. Jaʼ yuʼun jaʼ ay ta swenta te Jesús yalel te bin ya skʼan ya spasik te ants winiketik, te familiaetik, te kongregasion sok te yakuk skʼotesik ta pasel (Gál. 6:2). Pero ma jaʼuknax ya yakʼbotik mantaliletik, jaʼnix jich ya yakʼbotik jweʼel kuchʼeltik sok ya skanantayotik (Efes. 5:29).

15, 16. ¿Bin ya yakʼbat anop ta swenta te bin ya yal te Marley sok te Benjamin?

¹⁵ Te ermanaetik ya yakʼik ta ilel te ya yichʼik ta mukʼ te bitʼil ya xwentainwan te Cristo te kʼalal ya schʼuunbey skʼop te machʼatik tsabilik ta skanantayel te kongregasion. Jtul ermana te Marley sbiil te kuxinem ta Estados Unidos, jich ya yal: «Mukʼ skʼoplal ya kil te kaʼtel kichʼoj jich bitʼil inamil sok te lekuk ya kil te ermanoetik ta kongregasion. Ya skʼan ya jpasxan tulan yuʼun stojiluk ya kil te machʼatik yakʼoj te Jehová yuʼun ya xwentainwan. Ma wokol ya kil melel te jmamalal sok te ermanoetik ta kongregasion ya yichʼonik ta mukʼ sok jich ya kil te ya yichʼik ta mukʼ spisil te bin ya jpase». Jichniwan ya yaʼiy sbaik-euk te yantik ermanaetik.

¹⁶ Te ermanoetik ya yakʼik ta ilel te kʼoem ta yoʼtanik te bin ya yal te Biblia kʼalal ya yichʼik ta mukʼ te ermanaetik. Jtul ermano te Benjamin sbiil te yakʼ ta kuxinel ta Inglaterra, jich ya yal: «Bayal bin jnopoj yuʼun te kʼalal ya yakʼ skomentarioik te ermanaetik, te kʼalal ya yalik te bin-utʼil ya jnoptik te Biblia, te bin-utʼil ya jcholtik skʼop Dios sok te bin-utʼil ya xnojpteswanotik. Kʼax lek te bin ya spasike».

17. ¿Bin yuʼun ya skʼan ya kichʼtik ta mukʼ te machʼatik ya xwentainwanik?

¹⁷ Teme jpisiltik ta kongregasion, te winiketik, te antsetik, jolaletik ta familia sok te ansianoetik ya xkʼot ta koʼtantik sok ya kichʼtik ta mukʼ te bin-utʼil ay te machʼatik ya xwentainwanik, te kongregasion ya sta lamalkʼinal yuʼun. Teme jich ya jpastike, jaʼ ya kalbeytik yutsil skʼoplal te jTatik Jehová (Sal. 150:6).