¿Lekbal teme ya jpasbey jba jun tatuaje?

Ta Biblia jun-nax buelta ya yalbey skʼoplal te tatuaje, ta Levítico 19:28, te banti ya yal: «Ma me xapas locʼombahetic ta anuhculelic». Te Dios la yakʼbey te israeletik te mantalil ini, melel ma ya skʼan te ya skʼayinbeyik stalel te puebloetik te nopol yilojik te ya slokʼtayik ta snujkulelik te sdiosik sok te sbiilike (Deuteronomio 14:2). Manchukme te j-abatetik yuʼun Dios maba wentainbilikix yuʼun te Ley la yakʼ te Dios ta stojol te israeletik, te mantalil ini ya skʼan ya kichʼtik ta wenta.

¿Lekbal te ya yakʼ ta pasel statuaje te j-abat yuʼun Dios?

Kiltik cheʼoxeb textoetik ta Biblia te ya xjuʼ ya skoltayotike:

• «Te scuentahiluc ya slap scʼuʼ-spaqʼuic te antsetic, te stojiluc soc ma ba cʼax bayel chʼalbilic» (1 Timoteo 2:9). Jaʼnix jich te mantal ini ya xtuun yuʼun te winiketik. Te j-abat yuʼun Dios ya skʼan ya yichʼ ta wenta te bin-utʼil ya yaʼiy sbaik te yantik teme ay jun statuaje o te bin yilele.

• Ay machʼatik te ya yakʼ ta pasel statuajeik yuʼun ya yakʼik ta ilel te bin yilel stalelik, te libre ya skʼan ya yaʼiy sbaik sok te jaʼ swentainojik te sbakʼetalik. Pero te Biblia jich ya yalbey te j-abatetik yuʼun te Dios: «Yacuc awacʼ abaqʼuetalic scuenta cuxul chicʼbil mahtanil, te chʼultesbil soc te lec yoʼtan Dios yuʼun, te hich ya scʼan chʼuhuntayel awuʼunic te Diose» (Romanos 12:1). Jaʼ ini ya xjuʼ ya xkoltayot te machʼa ya skʼan ya spas jun statuaje swenta yuʼun ya yil te bin yuʼun ya skʼan ya spas. Jich bitʼil yuʼun-niwan ya skʼan ya stʼun jun moda o ya skʼan ya yakʼ ta ilel te ochem ta jun grupo, pero ya skʼan ya sjojkʼoybey sba: ¿Bin ya jpas teme ya xkʼax ta moda te jtatuaje o teme maba ya jmulanix-ae? Lekme te bin ya sta ta nopel teme nail ya yil bin yuʼun te ya skʼan ya spas jun statuaje (Proverbios 4:7).

• «Te bintic chahpambil te nopbil ta lec, ya yacʼ te ay bintic ya yichʼ tahel a, pero spisil te bin ahnimal chahpambil ya yacʼ pobrehil» (Proverbios 21:5). Jteb ma spisiluk-ora te machʼa ya spas jun statuaje animalnax ya sta ta nopel, pero te machʼa jich ya spase ya sta swokol yuʼun ta yaʼtel o te kʼalal ya sjokin sba sok te yantik. Jaʼnix jich te stupʼel te tatuaje kʼax toyol stojol sok kʼax kʼux. Tabil ta ilel te bayal ants winiketik te machʼa ya yakʼ ta pasel jun statuajeik patil ma smulanikix-a, melel jich ya yakʼ ta ilel ta ora ini ta swenta te bayalix negocio yuʼun stupʼel tatuaje.