Lekubtesa te bin-utʼil ya achol te skʼop Diose: Akʼbeya yil te machʼa ya anojptes te bin-utʼil ya skʼan ya schajpan te sjune

TE BIN YUʼUN TULAN SKʼOPLALE. Teme ya schajpan sba sok te sjun te machʼa ya kakʼbeytik snop te Bibliae jichme maba wokol ya xkʼot ta yoʼtan sok maba ya xchʼay ta yoʼtan te bin ya kakʼbeytik snope. Jaʼme ya xkoltayot yuʼun oranax ya xchʼi ta swenta skʼop Dios. Te kʼalal yichʼojix jaʼ-ae, jaʼnix jich ya skʼan ya schajpan sba yuʼun te tsoblejetik sok te kʼalal ya schol te skʼop Dios swenta jich kuxul yoʼtan-a (Mt 25:13). Jich yuʼun te kʼalal ya snaʼ ta lek snopel te skʼop Diose sok teme la skʼaytes sba ta spasele jaʼme ya xkoltayot ta skuxlejal. Ta sjajchibalto ya skʼan ya jkoltaytik te machʼa ya kakʼbeytik snop te Biblia te yakuk skʼaytes sba ta schajpanel te bin ya xbajtʼ kilbeytik skʼoplal soke.

TE BIN-UTʼIL TA PASEL

• 

  Jaʼ nail xa awakʼ ta ilel (Ro 2:21). Ayuk ta awoʼtan te machʼa ya awakʼbey snop te Biblia te kʼalal ya achajpan abae (km 11/15 paj. 3). Akʼbeya yil te ajun te akitsoj o abonoje.

• 

  Tijbeya yoʼtan yuʼun ya schajpan sba sok te sjune. Te kʼalal maba ya yijkʼitayix ta snopel-a te Bibliae albeya te ya skʼan ya schajpan sba te kʼalal ya snop te Bibliae, melel jich ya skʼan pasel sok albeya te bayal lekilal ya sta yuʼune. Albeya cheʼoxebuk te bintik-utʼil ya xjuʼ ya slokʼes tiempo ta spasel-abi. Te bin spasojik chaʼoxtul hermanoetik jaʼ te ya yakʼbeyik smajan te sjunik te machʼatik yakʼik ta nopel te Biblia te banti skitsojik te kʼalal ya snopik te Biblia yuʼun jich ya yilik-a te bin yuʼun jaʼ lek te jich ya skʼan ya schajpan sbaik-euke. Albeya lek skʼoplal te kʼalal ya schajpan sba sok te sjune.

• Akʼbeya yil te bin-utʼil ya skʼan ya schajpan te sjune. Ay jcholkʼopetik te ya yakʼbeyik yil cheʼoxeb buelta te machʼatik ya xkaj snopik te Biblia te bitʼil ya skʼan ya schajpan te sjunike.