¿Machʼa ya swol te lum yuʼun Dios ta ora ini?

1, 2. Patil te mo bael ta chʼulchan te Jesuse, ¿bin-niwan la sjojkʼoybey sbaik te jpuk-kʼopetike?

TE JPUK-KʼOPETIK ayik-a ta wits yuʼun Olivo sok te jpʼijubteswanej yuʼunik sok te jaʼnix yamigoik, jaʼ te Jesuse. Ta ajkʼnax la yilik bitʼil te Jesús jajch ta moel bael ta chʼulchan sok jajch ta chʼayel bael ta tokal (Hechos 1:9, 10). Ayniwan cheb jaʼbil te bayal bin nojptesotik yuʼun te Jesús, akʼbotik yip yoʼtanik sok tojobtesotik yuʼun. Jaʼukmeto, ¿bin ya spasik jich bitʼil maba jokinbilikix yuʼun te Jesuse?

² Te kʼalal mato xmo bael ta chʼulchan te Jesuse, jich la yalbey te jnopojeletik yuʼune: «Testigo ya xcʼohex cuʼun ta Jerusalén, ta spisil Judea, Samaria, soc cʼalal ta stiʼil bahlumilal» (Hechos 1:8). ¿Bin-utʼil ya xjuʼ ya spasik te aʼtelil-abi? Jamal albotik yuʼun Jesús te ya xkoltayotik yuʼun te schʼul espiritu te Diose (Hechos 1:5). Jaʼukmeto, ¿machʼa ya xwolotik yuʼun sok ya schajpan te bitʼil ya yichʼ cholel te skʼop Dios ta swolol Balumilal? Te jpuk-kʼopetik snaʼojik te la stuuntes Jehová winiketik ta swolel te israeletik ta namey kʼinal. Ta swenta-abi laniwan sjojkʼoybey sbaik teme ya sle yachʼil jwolwanej te Jehovae.

 3. 1) Kʼalal ayix ta chʼulchan te Jesuse, ¿bin la staik ta nopel te ya spasik te jpuk-kʼopetik te jun yoʼtan yakʼoj sbaike? 2) ¿Bin jojkʼoyeletik ya kakʼbeytik sujtib ta articulo ini?

³ Kʼalal mato jaluk smoel ta chʼulchan te Jesuse, te jnopojeletik yuʼun la stʼunik ta lek te sKʼop Dios, la skʼanbeyik koltayel Dios jich la stsaik te Matías yuʼun ya sjelolin te Judas Iscariote. Jich tsʼakal kʼot te lajchaytul jpuk-kʼopetike (Hechos 1:15-26). ¿Bin yuʼun bayal skʼoplal ta stojolik sok ta stojol Jehová te bin la staik ta nopel spasele? Te jnopojeletik la staik ta ilel te puersa te ya x-ayin lajchaytul jpuk-kʼopetikea (ilawil te nota). Te Jesús stsaoj jilel te jpuk-kʼopetik yuʼun sok spʼijubtesoj swenta ya spasik tulan aʼtelil ta lum yuʼun te Diose. ¿Bin-a te aʼtelil-abi? ¿Bin-utʼil koltayotik yuʼun te Jehová sok te Jesús ta spasel te aʼtelil-abi? ¿Aybal machʼatik ta ora ini te jich yakik ta spasel jun aʼtelil te pajal soke? ¿Sok bin-utʼil ya xjuʼ ya jnaʼtik te machʼatik ya swolik te lum yuʼun Dios, kʼaxemtoxan «te aʼbat te jun yoʼtan soc pʼij»? (Mateo 24:45; Hebreos 13:7). Kiltik.

 4. ¿Bin aʼtelil ay ta swenta te jpuk-kʼopetik sok yantik ancianoetik ta Jerusalén?

⁴ Ta Pentecostés yuʼun te jaʼbil 33 te jpuk-kʼopetik jajchik ta swolel te kongregasion. Te Biblia ya yal ta stojol te Pedro te «la stehcʼan sba soc te buluchtuhl (11)» jpuk-kʼopetik, sok te la snojptes jtsojb ipal ants winiketik ta swenta te bintik smelelil te ya xjuʼ ya sta skolelik yuʼun (Hechos 2:14, 15). Bayal ants winiketik-abi ochik ta jchʼuunjeletik yuʼun Jesús. Patil te jich kʼot ta pasel, te yachʼil jnopojeletik «la yoʼtantayic snopel te pʼijubtesel yuʼun te jpuc-cʼopetic» (Hechos 2:42). Te jpuk-kʼopetik jaʼik te machʼatik ay ta swentaik bin-utʼil ya yichʼ tuuntesel te takʼin ta kongregasion (Hechos 4:34, 35). Jaʼnix jich ya snojptesik te lum yuʼun Dios sok ya skʼoponik Dios ta stojol. Ta melel, jich la yalik stukelik: «Te hoʼotcotique ya caʼtelincotic scʼoponel Dios soc yalel scʼop Dios» (Hechos 6:4). Ma jaʼuknax-abi, te jpuk-kʼopetik ya stikunik bael te machʼatik ayix bayal jaʼbil te yakik ta scholel skʼop Dios te banti maʼyuk cholbile (Hechos 8:14, 15). Ta patil baele, yantik ancianoetik te tsabilik te ya xbajtʼik ta chʼulchan la skoltayik te jpuk-kʼopetik ta skanantayel te kongregasionetike. Spisilik-abi, jaʼik te machʼatik ochik ta jtsojb jwolwanejetik te la swolik spisil te kongregasionetik (Hechos 15:2).

5, 6. 1) ¿Bin-utʼil akʼbotik yip te jtsojb jwolwanejetik yuʼun te chʼul espiritue? (Ilawil te lokʼomba ta sjajchibal te articulo). 2) ¿Bin-utʼil la skoltayik te chʼul-abatetik te jtsojb jwolwanejetike? 3) ¿Bin-utʼil tojobtesotik te jtsojb jwolwanejetik yuʼun te sKʼop Diose?

⁵ Te jchʼuunjeletik ta sbabial siglo schʼuunejik ta lek te jaʼ Jehová te machʼa ya swol te jtsojb jwolwanejetik ta swenta te Jesuse. ¿Bin yuʼun te jich schʼuunejik ta leke? Ta sbabial, jaʼ yuʼun te ya x-akʼbot yipik yuʼun te chʼul espiritu te jtsojb jwolwanejetike (Juan 16:13). Melelnix-a te spisil te jchʼuunjeletik te tsabilik te ya xbajtʼik ta chʼulchan akʼbotik chʼul espiritu, jaʼukmeto jaʼ bayalxan akʼbot yipik yuʼun te chʼul espiritu te jpuk-kʼopetik sok te ancianoetik ta Jerusalén yuʼun ya swentainik ta lek te kongregasionetike. Jich bitʼil ta yaʼbilal 49 te chʼul espiritu ay bin la skoltay ta stael ta nopel te jtsojb jwolwanejetik ta swenta te circuncisión. Jich bitʼil te la schʼuunik spasel te kongregasionetik te bin albotik yuʼun te jtsojb jwolwanejetik «la yichʼ xan yip schʼuhunel yoʼtanic te iglesia [«kongregasion», TNM], soc behbe pʼohlel jujun cʼahcʼal» (Hechos 16:4, 5). Te karta te la yichʼik te kongregasionetik ta swenta te circuncisión ya yakʼ ta ilel te yichʼoj te chʼul espiritu te jtsojb jwolwanejetik sok te ay taleliletik yuʼunik jich bitʼil te kʼuxul oʼtanil sok te chʼuunel oʼtanil (Hechos 15:11, 25-29; Gálatas 5:22, 23).

⁶ Te schebal te bin yuʼun schʼuunejik ta lek te wolbil yuʼun Jehová te jtsojb jwolwanejetike, jaʼ ta swenta te koltaybilik yuʼun te chʼul-abatetike. Jich bitʼil, jtul chʼul-abat la yalbey jtul winik te Cornelio sbiil te yakuk sle te jpuk-kʼop Pedro. Te Cornelio maba judío winik sok maba yichʼoj circuncisión. Kʼalal te Pedro laj yoʼtan ta scholbeyel skʼop Dios te Cornelio sok te jayeb machʼatik ay yuʼune, la yichʼik akʼbeyel chʼul espiritu, manchukme maba yichʼojik circuncisión te winiketike. Jich te Cornelio kʼot ta sbabial winik te maba judío sok te maba yichʼoj circuncisión te och ta jchʼuunjele. Kʼalal te jpuk-kʼopetik sok yantik hermanoetik la yaʼiyik stojol te bin kʼot ta pasele, lek la yaʼiyik te bitʼil yak ta kʼoel ta pasel te skʼanojel yoʼtan te Diose, jaʼnix jich sok slekil yoʼtanik la yikʼik ta kongregasion te machʼatik maba judioetik sok te maba yichʼojik circuncisión (Hechos 11:13-18). Jaʼ-abi ya yakʼ ta ilel te koltaywanik te chʼul-abatetik ta swenta te scholel skʼop Dios te jaʼ ay ta swentaik yilel te jtsojb jwolwanejetik (Hechos 5:19, 20). Te yoxebal te bin yuʼun schʼuunejik ta lek te jaʼ wolbil yuʼun Jehová te jtsojb jwolwanejetike, jaʼ ta swenta te la yichʼik tojobtesel yuʼun te sKʼop Diose. Te hermanoetik-abi spisil-ora la sleik tojobtesel ta sKʼop Dios te kʼalal ay bin ya staik ta nopel ta swenta jun nojptesel sok ta swenta te bitʼil ya swentainik te kongregasionetike (Hechos 1:20-22; 15:15-20).

 7. ¿Bin yuʼun ya xjuʼ ya kaltik te jaʼ Jesús te machʼa la swol te jchʼuunjeletik ta sbabial sigloe?

⁷ Manchukme yichʼojik tulan yaʼtelik ta kongregasion te machʼatik ochemik ta jtsojb jwolwanejetike, kʼoem ta yoʼtanik te jaʼ te Jesucristo te Jwolwanej yuʼunike. ¿Bin-utʼil ya jnaʼtik? Te jpuk-kʼop Pablo la yal te jaʼ te Cristo te machʼa «la yacʼ te ay jpuc-cʼopetic». Jaʼnix jich la yal te jaʼ te Cristo te jolal o jwolwanej yuʼun te kongregasione (Efesios 4:11, 15). Ma jaʼuknax-abi, te Dios la skʼan te ya yichʼik naʼbeyel sba te jnopojeletik yuʼun Jesús jich bitʼil «cristianohetic», ma jaʼuk te ya yichʼik naʼbeyel sba ta sbiil jtul jpuk-kʼop (Hechos 11:26). Te Pablo snaʼoj te kʼax tulan skʼoplal te ya yichʼ chʼuunel te bin ya yakʼik ta nopel te jpuk-kʼopetik sok yantik ancianoetik te ya swentainik te kongregasione, melel lokʼem ta sKʼop Dios te bin ya yakʼik ta nopele. Manchukme jich-abi, te Pablo la yal: «Ya jcʼan yac anaʼic te bin utʼil te Cristo ha jolal yuʼun spisil winiquetic». Jaʼnix jich te jtsojb jwolwanejetik ya skʼan te ya schʼuunik te kʼopetik-abi. Ta patil te Pablo la yalxan: «Te Dios ha jolal yuʼun te Cristo» (1 Corintios 11:2, 3). Kʼax chikan ta ilel te jaʼnix Jehová te machʼa la yakʼbey yaʼtel te sNichʼan Jesucristo ta swolel te kongregasionetike.

8, 9. ¿Bin tulan aʼtelil la spas te hermano Russell?

⁸ Ta yaʼbilal 1870 te Charles Taze Russell sok chaʼoxtul yamigotak jajchik ta spasel tulan ta yichʼel ta mukʼ Dios jich bitʼil ya yakʼ ta nopel te Bibliae. Yoʼtan ya skoltayik yantik ants winiketik ta yichʼel ta mukʼ Dios te bitʼil yakik ta spasel-euke, jaʼnix jich la skʼan la skoltayik te machʼatik yan skʼopike. Ta swenta-abi, ta yaʼbilal 1884 la sjachik te organisasion Zionʼs Watch Tower Tract Society. Te hermano Russell jaʼ och ta presidente yuʼun te organisasion-abib (ilawil te nota). Jich bitʼil ya stʼunbey skʼoplal ta lek te Biblia maba xiw ta yalbeyel yantik te maba lokʼem ta Biblia te bin ya yakʼ ta nopel te Iglesia jich bitʼil te aylaj oxeb dios te jun-nax ayike sok te bitʼil aylaj schʼulel te ants winiketik te ma xlaje. Jaʼnix jich te hermano kʼot ta yoʼtan te maba ya xchiknaj ta ilel ta sitil te bin-ora ya xchaʼtal te Cristoe sok te jaʼ ta jaʼbil 1914 te ya xlaj «te yorahil yuʼun te jyanlumetique» (Lucas 21:24). Te hermano Russell la stuuntes yip, stiempo sok stakʼin ta snojptesel te ants winiketik te bintik smelelile. Ta melel te Jehová sok te Jesús la stuuntesik te hermano-abi ta swolel te kongregasion te kʼalal ay bin yak ta kʼoel ta pasel te tulan skʼoplale.

⁹ Te hermano Russell jkʼaxel maba la skʼan te ya x-ichʼot ta mukʼ yuʼun yantik. Ta jaʼbil 1896 la stsʼibay te maba ya skʼan te kʼax tulan skʼoplal ya x-ilot yuʼun jtul ants winik, jaʼnix jich la yal te maba ya skʼan te kʼax tulan skʼoplal ya x-ilotik-euk te yantik hermanoetik te yichʼoj tulan yaʼtelike. Jaʼnix jich maba la skʼanik te ya x-akʼbot sbiilik te jaʼ toyol skʼoplal ya xkʼotik yuʼun sok te ya x-ichʼbot sbiilik yuʼun jtsojb ants winiketik swenta jich ya yichʼik naʼbeyel sbaik. Ta patil bael, te hermano Russell la yal: «Te aʼtelil ini maba yuʼun winiketik».

10. 1) ¿Bin-ora la yakʼbey yaʼtel Jesús «te aʼbat te jun yoʼtan soc pʼij»? 2) Chola bin-utʼil la yichʼ akʼel ta naʼel ta jamal te ma pajaluk te Jtsojb Jwolwanejetik sok te Sociedad Watch Tower.

¹⁰ Te Jesús la yakʼbey yaʼtel «te aʼbat te jun yoʼtan soc pʼij» ta 1919, oxeb jaʼbil ta patil te laj te hermano Russel. ¿Bin yuʼun te la yakʼbey yaʼtele? Swenta «ya yaʼiy macʼlinwanej ta yorahil» ta stojol te jnopojeletik yuʼun (Mateo 24:45). Ta yorail-abi, te machʼatik la stʼunik te Cristo yakik ta yichʼel sweʼelik ta swenta skʼop Dios ta swenta jtsojb j-abatetik te tsabilik te ya xbajtʼik ta chʼulchan te ayik te banti ya yichʼ ilel te aʼtelil ta Brooklyn (Nueva York). Te kʼopil «jtsojb jwolwanejetik» jajch ta chiknajel ta junetik kuʼuntik ta yaʼbilal talel 1940. Ta yorail-abi, jich kuybil te «jtsojb jwolwanejetik» te jaʼik te machʼatik ya swentainik te Watch Tower Bible and Tract Society. Jaʼukmeto ta jaʼbil 1971 la yichʼ akʼel ta naʼel ta jamal te maba pajal te Jtsojb Jwolwanejetik sok te Sociedad Watch Tower, melel jaʼnax swentainoj-a te schajpanel kʼopetik ta swenta legal. Te kʼalal jich la yichʼ akʼel ta naʼele, ya xjuʼ x-ochikix-a ta Jtsojb Jwolwanejetik hermanoetik te maba swentainojik te Sociedad Watch Tower. Mato ayuk bayal jaʼbil te jajch ta akʼbeyel hermanoetik yuʼun te «yantic tuminchijetic» te ya swentainik te Sociedad Watch Tower sok yantik organisasion te ya stuuntes te lum yuʼun te Diose. Jich te Jtsojb Jwolwanejetik jaʼ ya xbajtʼ ta yoʼtanik smakʼlinel sok yakʼbeyel tojobtesel te lum yuʼun te Diose (Juan 10:16; Hechos 6:4). Te La Atalaya 15 yuʼun julio 2013 la schol ta swenta «te aʼbat te jun yoʼtan soc pʼij» te jaʼ skʼoplal te tut jtsojb hermanoetik te tsabilik te ya xbajtʼik ta chʼulchan te ya x-aʼtejik ta Jtsojb Jwolwanejetike.

11. ¿Bin-utʼil ya staik ta nopel te bin ya spasik te Jtsojb Jwolwanejetike?

¹¹ Te hermanoetik te ya x-aʼtejik ta Jtsojb Jwolwanejetik ay bintik kʼax tulan skʼoplal ya staik ta nopel te kʼalal ya stsob sbaik ta jujun semana. Te bitʼil spisil-ora ya stsob sbaik, jich jun-nax ayik sok jich ya xjuʼ ya yalbey sbaik te bintik yak ta kʼoel ta pasele (Proverbios 20:18). Ni jtuluk te machʼa ya x-aʼtej ta Jtsojb Jwolwanejetik toyolxan skʼoplal ta stojol te yantike. Jaʼ yuʼun ta jujun jaʼbil jujun hermano ya swentain te tsoblejetik te ya spasik ta jujun semanae (1 Pedro 5:1). Te wakeb komite yuʼun te Jtsojb Jwolwanejetik jichnix ya x-aʼtejik-euk. Ni jtuluk hermano te ya x-aʼtej ta Jtsojb Jwolwanejetik ya skuy sba ta jwolwanej yuʼun te yantike. Spisil te machʼa ya x-aʼtej ta Jtsojb Jwolwanejetik ta tulutul jaʼik-euk te machʼatik ayik ta «sna te yajwal» (ilawil te recuadro «¿Bin ya skʼan ya yal?»). Jich yuʼun ta tulutul ya yichʼik makʼlinel ta swenta skʼop Dios sok ta tulutul ya stʼunik te tojobtesel yuʼun te j-aʼbat te jun yoʼtane.

12. ¿Bin jojkʼoyeletik ya kakʼbeytik sujtib bael?

¹² Te Jtsojb Jwolwanejetik maba ya yichʼik akʼbeyel snaʼik te skʼanojel yoʼtan Dios ta swenta najalsitil sok ya xjuʼ te ay banti ya xchʼayik-euke. Ya xjuʼ xchʼayik te kʼalal ya scholbeyik skʼoplal jun nojptesel yuʼun te Biblia o te kʼalal ay bin ya yalik te ya skʼan pasele. Te Índice de las publicaciones Watch Tower yichʼoj tal te banti ya yal «Aclaración de creencias». Tey ay jun lista te ya yakʼ ta ilel bintik yichʼoj jelel jaʼto talel ta jaʼbil 1870 ta swenta te bintik jnopojtik ta Biblia. Te Jesús maba la yal te ma ya xchʼay te j-abat te jun yoʼtan sok pʼij te kʼalal ya yakʼ jweʼeltik ta swenta skʼop Dios. Jich yuʼun, ¿machʼa-a «te aʼbat te jun yoʼtan soc pʼij» te la yalbey skʼoplal te Jesuse? (Mateo 24:45). ¿Bintik ya yakʼ ta ilel te jaʼ te Jtsojb Jwolwanejetik te j-abat te jun yoʼtan sok pʼije? Kiltik bin-utʼil te Jtsojb Jwolwanejetik ta jkʼajkʼaleltik yichʼojik akʼbeyel te oxeb koltayel akʼbotik te jtsojb jwolwanejetik ta sbabial siglo.

13. ¿Bin-utʼil skoltayoj te chʼul espiritu te Jtsojb Jwolwanejetike?

¹³ Te chʼul espiritu ya skoltay te Jtsojb Jwolwanejetike. Te chʼul espiritu skoltayoj te Jtsojb Jwolwanejetik ta snaʼbeyel skʼoplal ta lek te bintik ya yakʼ ta nopel te Biblia te ma chikan ta lek skʼoplal ta nail talele. Jnop kaʼiytik ta swenta te lista te la yichʼ alel ta yan parrafo te ya yakʼ ta ilel bintik kʼoemxan ta lek ta koʼtantik ta swenta te Biblia. Ni jtuluk juʼ la snaʼbey swentail sok juʼ la scholbey skʼoplal ta stukel «te bin muquen ay yuʼun Dios» (kʼopona te 1 Corintios 2:10). Te Jtsojb Jwolwanejetik akuerdo ayik sok te bin la yal te jpuk-kʼop Pablo: «Ha ya calbecotic scʼoblal ini, ma haʼuc ta scuenta spʼijil cʼop ants-winiquetic, pero ha te cʼopiletic ya yacʼ ta nopel te Espíritu» (1 Corintios 2:13). Ta bayal ta cien jaʼbil te lotil relijionetik la swentainik te ants winiketik sok maba la snaʼik stojobtesel ta lek. Jich yuʼun, ¿bin yuʼun te bayal bintik yichʼoj naʼbeyel swentail ta lek ta swenta te bin ya yakʼ ta nopel te Biblia kʼalalto ta 1919 talele? Jaʼnax ta skaj te jaʼ Jehová te yak ta koltaywanej ta swenta schʼul espiritu.

14. Ta swenta te bin ya yal te Apocalipsis 14:6, 7, ¿bin-utʼil te chʼul-abatetik ya skoltayik te Jtsojb Jwolwanejetik sok te lum yuʼun te Diose?

¹⁴ Te chʼul-abatetik ya skoltayik te Jtsojb Jwolwanejetike. Te Jtsojb Jwolwanejetik ay ta swentaik schapel bin-utʼil ya scholik skʼop Dios te kʼaxem ta waxakeb miyon ta tul jcholkʼopetik ta swolol Balumilal. ¿Bin yuʼun te kʼax lek kʼoem ta lokʼel te aʼtelil-abi? Jun swentail jaʼ te koltaybil yuʼun te chʼul-abatetike (kʼopona te sjun Apocalipsis 14:6, 7). Bayal buelta te chʼul-abatetik stojobtesojik bael te jcholkʼopetik ta stojol ants winiketik te lajelto skʼanbeyejik koltayel te Diosec (ilawil te nota). Yak ta toyelxan te scholel skʼop Dios sok te yakʼel nojptesel ta lugaretik te banti te hermanoetik ya yichʼik kontrainel. Jaʼ-abi, jaʼnax ya xjuʼ ta pasel ta swenta te koltayel yuʼun te chʼul-abatetike.

15. Akʼa ta ilel sok junuk ejemplo bin-utʼil te maba pajal te Jtsojb Jwolwanejetik sok te jwolwanejetik yuʼun te relijionetik te schʼuunejik Cristo ta skʼopike.

¹⁵ Te sKʼop Dios ya stojobtes te Jtsojb Jwolwanejetike (kʼopona te sjun Juan 17:17). Jnop kaʼiytik ta swenta te bin kʼot ta pasel ta jaʼbil 1973. Te La Atalaya 15 yuʼun octubre yuʼun te jaʼbil-abi la spas te jojkʼoyel ini: «¿Yabal xjuʼ ya yichʼik jaʼ te machʼatik maba yijkʼitayojik snukʼel te maye?». Te sujtib la yakʼ jaʼ te maʼuke, jich la yal ta swenta te bin ya yal te Biblia. Te revista la yalbey skʼoplal bayal versiculoetik ta Biblia swenta ya schol bin yuʼun ya skʼan te ya yichʼ lokʼesel ta kongregasion te machʼa maba ya skʼan ya yijkʼitay snukʼel te maye (1 Corintios 5:7; 2 Corintios 7:1). Te La Atalaya la schol te bitʼil te tulan mantalil-abi maba talem ta swenta jtul winik, la yal te jaʼ talem «ta stojol Dios te ya yakʼ ta naʼel ta swenta te sKʼope». Jaʼnax te organisasion yuʼun te testigoetik yuʼun Jehová jun yoʼtan yakʼoj sba ta tojobtesel ta jkʼaxel yuʼun te sKʼop Dios. Jich spasoj manchukme ay chaʼoxtul testigoetik wokol yaʼiyojik te ya yakʼ sbaik ta tojobtesele. Mato jaluk kʼajkʼal, jun libro te ya yal skʼoplal ta swenta te relijionetik ta Estados Unidos jich la yal: «Te jwolwanejetik yuʼun te relijionetik te schʼuunejik Cristo ta skʼopike bayal ya yilulanik te nojptesel yuʼunik swenta ya sjelik jaʼ chikan te bin ya smulanik schʼuunel sok te bin ya snopik te machʼatik ayik ta srelijionik sok spisil te ants winiketike». Yan stukel te Jtsojb Jwolwanejetik ma jaʼuk ya spasik te bin ya skʼan yoʼtan jteb ma spisiluk te ants winiketik. Jaʼ ya yakʼ sbaik ta tojobtesel yuʼun te sKʼop Dios. Jaʼ-abi ya yakʼ ta ilel ta jamal te jaʼ Jehová te machʼa ya stojobtes te lum yuʼune.

16. ¿Bin-utʼil ya xjuʼ ya jnaʼtik te Jtsojb Jwolwanejetike?

¹⁶ (Kʼopona te sjun Hebreos 13:7). Te Biblia ya yal te ya skʼan ya jnaʼtik «te jcanan» kuʼuntik te jaʼ te machʼatik ya swolotike. Jun te bitʼil ya xjuʼ ya jpastike jaʼ te ya jkʼopontik Dios ta stojol te Jtsojb Jwolwanejetike (Efesios 6:18). Te hermanoetik-abi yichʼojik bayal aʼtelil. Jich bitʼil, ya smakʼlinotik ta swenta skʼop Dios, ya schapik bin-utʼil ya yichʼ cholel te skʼop Dios ta swolol Balumilal sok ya yilik bin-utʼil ya yichʼ tuuntesel te majtʼan takʼin te ya yichʼ akʼele. Ta melel, ya skʼan te ya jkʼopontik Dios spisil-ora ta swenta te hermanoetik-abi.

17, 18. 1) ¿Bin-utʼil ya jkoltaytik te Jtsojb Jwolwanejetike? 2) ¿Bin yuʼun te ya skʼan ya jpastik te bantito kʼalal ya xjuʼ kuʼuntik ta scholel te skʼop Diose?

¹⁷ Jaʼnix jich ya kakʼtik ta ilel te ya jnaʼtik te Jtsojb Jwolwanejetik te kʼalal ya jchʼuuntik spasel te bin ya yalbotik sok te kʼalal ya jchʼuuntik te tojobtesel yuʼunike. Te Jtsojb Jwolwanejetik ya stojobtesotik ta swenta te junetik, tsoblejetik sok te mukʼul tsoblejetike. Jaʼnix jich jaʼ ya yakʼbeyik yaʼtel te machʼa ya x-och ta superintendente yuʼun circuito, te superintendenteetik yuʼun circuito jaʼ ya yakʼbeyik yaʼtelik te machʼa ya x-ochik ta ancianoil ta kongregasion. Te superintendenteetik yuʼun circuito sok te ancianoetik ya snaʼik te Jtsojb Jwolwanejetik te kʼalal ya stʼunik ta lek spasel te bin ya x-albotik yuʼunik te ya skʼan ya spasike. Jaʼnix jich, ta jpisiltik ya kakʼtik ta ilel te ya kichʼtik ta mukʼ te Jwolwanej kuʼuntik te jaʼ Jesús te kʼalal ya jchʼuunbeytik skʼop te hermanoetik te yak ta stuuntesel ta ora ini (Hebreos 13:17).

¹⁸ Yan te bitʼil ya kakʼtik ta ilel te ya jnaʼtik te Jtsojb Jwolwanejetik jaʼ teme ya jpastik te bantito kʼalal ya xjuʼ kuʼuntik ta scholel te skʼop Diose. Te Hebreos 13:7 ya stij koʼtantik ta skʼayinbeyel te schʼuunel yoʼtanik te hermanoetik te ya swolotike. Te Jtsojb Jwolwanejetik yakʼojik ta ilel te ay bayal schʼuunel yoʼtanik, melel sok sbujtsʼ yoʼtanik ya scholik skʼop Dios sok tulan ya x-aʼtejik swenta ya yichʼxan cholel te lek yachʼil kʼope. ¿Yakotikbal ta skoltayel ta spasel te aʼtelil te kʼax tulan skʼoplale? Teme jich ya jpastik, kʼax tseʼel koʼtantik ya kaʼiy jbatik te kʼalal jich ya yalbotik te Jesuse: «Te bin utʼil hich la apasbeyic te jtuhl quermano te peqʼuel ay, hoʼon me la apasbonic abi» (Mateo 25:34-40).

19. ¿Bin yuʼun te jich jnopojtik te ya jtʼuntik te Jwolwanej kuʼuntik te jaʼ te Jesuse?

¹⁹ Kʼalal te Jesús sujt bael ta chʼulchan maba stukel la yijkʼitay te jnopojeletik yuʼune (Mateo 28:20). Snaʼoj te bitʼil te chʼul espiritu, te chʼul-abatetik sok te sKʼop Dios koltayot yuʼun ta swolel te jnopojeletik yuʼun te kʼalal ayin ta Balumilale. Ta ora ini jaʼnix jich ya yakʼbey te oxeb koltayel-abi te j-abat te pʼije. Te Jtsojb Jwolwanejetik «ya stʼunic ta bayuc ya xbaht te Jcolel Tuminchij» (Apocalipsis 14:4). Jaʼ yuʼun te kʼalal ya jtʼuntik te tojobtesel ya yakʼ te Jtsojb Jwolwanejetik jaʼ yakotik ta stʼunel te Jwolwanej kuʼuntik te jaʼ Jesús. Kʼax nopolix te ya stojobtesotik «bahel ta banti ay sloqʼuib haʼetic scuenta cuxlejal», jich ya xkuxinotik ta sbajtʼelkʼinal (Apocalipsis 7:14-17). Maʼyuk jtuluk jwolwanej winik ya xjuʼ ya yalbotik ta jamal te jich ya spas ta jtojoltike.