LECCIÓN 40
¿Bin-utʼil te maʼyuk kabakultik ta sit te Jehová?
Nopa awaʼiy te bin ya spas jtul nanil te kʼalal ya schajpan te yal yuʼun ya xbajt ta escuela. Ya yil teme atinem, teme lek sok te maʼyuk yabakul te skʼuʼ spakʼ. Jich ma stsakot ta chamel sok ya yilik te yantik te lek kanantaybil yuʼun te smeʼ state. Te Jehová te jaʼ jTatik te kʼuxotik ta yoʼtan, jaʼnix jich ya skʼan te maʼyuk kabakultik ta spisil te bin ya kaltik sok ya jpastik. Joʼotiknix ya jta jlekilaltik sok jaʼnix jich ya yichʼ albeyel yutsil skʼoplal te Diose.
1. ¿Bin ya skʼan ya jpastik swenta maʼyuk kabakultik?
Te Jehová jich ya yalbotik: «Chʼultesbiluquex» (1 Pedro 1:16). Swenta chʼultesbilotik ma skʼan te ayuk kabakultik ta jbakʼetaltik ni jaʼuk ta koʼtantik. Jaʼ yuʼun spisil-ora ya x-atinotik, ya jsakʼ jkʼuʼ jpakʼtik, ya jchajpantik sok ya jpoktik te bin ay kuʼuntik ta jnatik sok te jcarrotik. Jaʼnix jich ya xkoltaywanotik ta skusel te sNail Tsoblej. Teme maʼyuk kabakultik, ya kakʼtik ta albeyel yutsil skʼoplal te Jehová (2 Corintios 6:3, 4).
2. ¿Bintik-a te ma skʼan ya jpastik swenta maʼyuk kabakultik?
Te Biblia jich ya yalbotik: «Acʼa jpoc jbahtic yuʼun spisil bintic bohloben ta jbaqʼuetaltic soc ta coʼtantic» (2 Corintios 7:1). Jaʼ yuʼun, ya jpastik ban kʼalal ya xjuʼ kuʼuntik yuʼun ya jpʼajtik spisil te bin ya xjuʼ ya yutsʼin te jbakʼetaltik sok te jpensartike. Jaʼ ya jkʼantik te lek ya yil Jehová spisil te bin ya jnop ta koʼtantik, jaʼ yuʼun ya jpastik tulan swenta ma xkakʼtik ochel ta jpensartik te bintik ilobtik sbae (Salmo 104:34). Jaʼnix jich, ya jpastik tulan yuʼun lekuk spisil te bin ya xlokʼ ta ketike (kʼopona Colosenses 3:8).
¿Bintikxan ya yutsʼin te jbakʼetaltik o te koʼtantike? Ay bayal ta chajp te bin ya yutsʼine. Jaʼ yuʼun, mame jtuuntestik tabaco, mame jmatsʼtik o ya jxuchʼintik te yabinal coca, mame tojoluknax ya jtuuntestik poxetik jaʼnax yuʼun te ya yikʼ koʼtantik sok mame jtuuntestik droga. Jich ya jkanantay jbatik yuʼun ma stsakotik chamel sok ya kakʼtik ta ilel te mukʼ skʼoplal ta koʼtantik te jkuxlejaltike. Jaʼnix jich maba ya jpastik te bintik kʼax ilobtik sba jich bitʼil te spiktiklanel skʼunil jbakʼetaltik sok te yilel pornografía te ya sbolobtes te koʼtantik (Salmo 119:37; Efesios 5:5). Te machʼatik kʼayemik ta spasel spisil-abi wokolniwan ya yaʼiyik yijkitayel, pero te Jehová ya skʼan ya skoltaylan (kʼopona Isaías 41:13).
JNOPTIKXAN TA LEK
Kiltik bin-utʼil ya kichʼtik ta mukʼ te Jehová ta swenta te maʼyuk kabakultik sok bin-utʼil ya kijkitaytik spasel te bintik maba lekuke.
3. Te Jehová ya smulan te maʼyuk kabakultik
Kʼalal ya jkʼopontik ta Biblia te leyetik la yakʼbey te lum Israel, ya kiltik te mukʼ skʼoplal ya yil te Jehová te maʼyuk kabakultik. Kʼoponaik Éxodo 19:10 sok 30:17-19, sok albeyaik skʼoplal ini:
¿Bin ya yakʼ kiltik te textoetik ini ta swenta te bitʼil ya yil te Jehová te bintik ay yabakule?
¿Bintik ya xjuʼ ya jpastik yuʼun maʼyuk kabakultik-a?
Ya skʼan ya jpastik tulan sok ya jlokʼestik tiempo ta spokel o sakʼel te bin ay kuʼuntike. Ya xjuʼ jich ya jpastik chikan banti nainemotik o teme ay o maʼyuk jtakʼintik. Ilawilik te VIDEO sok albeyaik skʼoplal ini:
Teme ya yilik te machʼatik ya jcholbeytik skʼop Dios te pokbil o sakʼbil te bin ay kuʼuntik, ¿lekbal bin ya yalik ta stojol te Jehová? ¿Bin yuʼun?
4. Ijkitaya te bin ma leke
Te Jehová ya skoltayotik ta yijkitayel biluk-a te kʼayemotik ta spasel.
Teme ya anukʼ may, ya atuuntes poxiletik jaʼnax yuʼun te ya yikʼbat awoʼtan o ya atuuntes droga, ya anaʼ te ma orauk ta ijkitayel. Te bin ya xjuʼ ya skoltayat jaʼ te ya anop bin-utʼil ya yutsʼinbat te akuxlejale. Kʼoponaik Mateo 22:37-39 sok albeyaik skʼoplal bin-utʼil te tabaco sok yantikxan te bin ya xkʼayotik ta stuuntesel ya yutsʼin...
... te bitʼil kamigoinej jbatik sok te Jehová.
... te jfamiliatik sok yantikxan.
Nopa awaʼiy bin ya xjuʼ ya apas yuʼun ya awijkitay.a Ilawilik te VIDEO.
Kʼoponaik Filipenses 4:13 sok albeyaik skʼoplal ini:
Teme ya jkʼaytes jbatik ta spasel oración, ta snopel te Biblia sok te ya xbootik ta tsoblejetik, ¿yabal yakʼ kiptik ta yijkitayel te bintik ma lek kʼayemotik ta spasele? ¿Bin yuʼun te jich ya awale?
5. Ijkitaya snopilanel sok spasel te bin ilobtik sba
Kʼoponaik Colosenses 3:5 sok albeyaik skʼoplal ini:
¿Bin-utʼil ya jnaʼtik te ya yilay Jehová te pornografía, te sexteob sok te ay machʼa ya spiktiklan te skʼunil sbakʼetale?
¿Snujpʼbal te ya skʼanbotik te Jehová te maba ya jpastik te bin ilobtik sba? ¿Bin yuʼun?
Ilawil bin ya skoltayotik ta slokʼesel ta jpensartik te bin ilobtik sba. Ilawilik te VIDEO.
Te Jesús la yal jun ejemplo te ya yakʼ ta naʼel te ay bin ya skʼan ya jpastik swenta ma xyichʼ yabakul kʼoem te koʼtantik. Kʼoponaik Mateo 5:29, 30 sok albeyaik skʼoplal ini:
Te Jesús maba la skʼan la yal te yuʼun-nix ya jbojtik lokʼel kok jkʼabtik-a, jaʼ la skʼan la yal te ay bin ya skʼan ya jpastik ta oranax. ¿Bin ya skʼan ya jpastik yuʼun ya jpʼajtik te bin ma lek ya xtal ta koʼtantike?c
Teme yakatix ta spasel tulan yuʼun maba ya xtal ta awoʼtan te bintik ilobtik sba, naʼame te bayal skʼoplal ta yoʼtan Jehová te jich ya apase. Kʼoponaik Salmo 103:13, 14 sok albeyaik skʼoplal ini:
Teme ay bin ma lek kʼayemat ta spasel, ¿yabal skoltayat te textoetik ini ta spaselxan tulan ta yijkitayel? ¿Bin yuʼun?
Teme ay yalat ¡mame xchebaj awoʼtan!
Jichniwan ya awal: «Chaʼyalon ta spasel; bistukxan ya jpas tulan». Pero nopa awaʼiy ini. Teme ay machʼa yak ta animal bael ya skʼojchin yok sok ya xyal, ma skʼan ya yal te ya xbajt schaʼjach talel te animal sok te ma xkʼotix te banti yak ta baele. Jaʼ pajal sok te kʼalal ya achaʼpas te bin apasoj tulan ta yijkitayele, ma skʼan ya yal te ma xjuʼix awuʼun sok te tojolnax te la apas tulane. Aynix jich ya xkʼot ta pasel-a te ya xchaʼyalotik ta spasele. Pero ¡mame xa akom aba! Te Jehová ya skoltayat ta yijkitayel te bin ilobtik sba.
AY MACHʼATIK JICH YA YALIK: «Ma xjuʼ kuʼun yijkitayel, mero ya yikʼbon koʼtan».
¿Bin texto ya xjuʼ ya atuuntes yuʼun ya awakʼbey yil te ya skoltayotik te Jehová ta yijkitayel te bin ma lek kʼayemotik ta spasel?
¿BINTIK LA JNOPTIK?
Ya kakʼbeytik stseʼelil yoʼtan te Jehová teme maʼyuk kabakultik sok teme ma jnoptik sok ma jpastik te bin ilobtik sba.
¿Jilbal ta awoʼtan into?
¿Bin yuʼun mukʼ skʼoplal te maʼyuk kabakultik?
¿Bin ya skʼan ya jpastik yuʼun maʼyuk kabakultik-a?
¿Bin ya skʼan ya jpastik yuʼun maba ya jnoptik sok ya jpastik te bin ilobtik sba?
YA XJUʼ YA ANOPXAN INI
Manchukme maʼyuk bayal jtakʼintik, ¿bin ya xjuʼ ya jpastik swenta maʼyuk kabakultik?
Ilawil bin ya xjuʼ ya skoltayat yuʼun ya awijkitay snukʼel may.
«¿Bin-utʼil ya xjuʼ ya kijkitay snukʼel may?» (¡Wikʼame asit!, mayo 2010)
Ilawil bin-utʼil ya x-utsʼinwan te yilel pornografía.
«¿Yabal x-utsʼinwan te pornografía o maʼuk?» (Te J-ilkʼinal ta toyol, 1 yuʼun agosto 2013)
Ilawil te bin la spas jtul winik yuʼun ya yijkitay yilel te pornografía.
«Juʼ kuʼun yijkitayel te yilel pornografía» (Te J-ilkʼinal ta toyol, julio 2016)
a Te articuloetik «¿Bin-utʼil ya xjuʼ ya kijkitay snukʼel may?» ya xjuʼ ya skoltayat ta yijkitayel biluk-a te kʼayemat ta spasele, yame ata ta lección ini te banti ya yal «Ya xjuʼ ya anopxan ini».
b Te sexteo jaʼ stikunel mensaje, foto o video te yichʼoj mulwej
c Swenta ya anaʼ bin-utʼil ya xjuʼ ya yijkitay spiktiklanel te skʼunil sbakʼetal te machʼa kʼayem ta spasele, kʼopona te capítulo 25 yuʼun te libro Te sujtib te bintik ya sjojkʼoyik te jchʼieletik (volumen 1), «¿Yabal xjuʼ ya kijkitay spiktiklanel te skʼunil jbakʼetale?».