LECCIÓN 07

¿Bin yilel te Jehová?

Partitura

¿Bin yilel ya akuy te Jehovae? ¿Jichbal ya awaʼiy te kʼax mukʼ sok te kʼax namal ay ta atojole te ma xjuʼ ya awamigoine? O ¿Jichbal ya akuy te jaʼnax bayal yuʼel jich bitʼil te tulan chawuke? ¿Bin-nix yilel-a te Jehovae? Te Biblia ya yakʼ jnoptik te ay tʼujbil taleliletik yuʼun te Jehová sok ya yal te ay akʼoplal ta yoʼtane.

1. ¿Bin yuʼun ma xjuʼ ya kiltik te Diose?

«Ha Espíritu te Diose» (Juan 4:24). Te Jehová maba chʼichʼbakʼet jich bitʼil te joʼotike. Jaʼ jun espíritu te ay ta chʼulchan te ma xjuʼ ya kiltike.

2. ¿Bintik talelil ay yuʼun te Jehová?

Manchukme ma xjuʼ ya kiltik te Jehová, ya jnaʼtik te kuxule sok te ay tʼujbil taleliletik yuʼun te jaʼ ya stij koʼtantik swenta kʼux ta koʼtantik. Te Biblia ya yal: «Te Jehová cʼux ta yoʼtan te bin stojil ta pasel, soc ma ba ya spihtes te machʼatic jun yoʼtanic ta stojol» (Salmo 37:28). Jaʼnix jich bayal «ya xcʼuxultaywan soc ya snaʼbotic yoʼbolil jbahtic», kʼaxtoxan jich ya spas ta stojol te machʼatik ayik ta wokole (Santiago 5:11). «Te Jehová nopol ay ta stojol te machʼatic ayic ta mel-oʼtan, soc ya scoltay te machʼatic pichʼil yoʼtanique» (Salmo 34:18). ¿Anaʼojbal te ya xjuʼ ya kakʼbeytik stseʼelil yoʼtan te Jehová o te ya kakʼbeytik smel yoʼtane? Te machʼa jaʼ ya spas te bin ma leke ya yakʼbey smel yoʼtan te Jehovae (Salmo 78:40, 41). Pero te machʼa ya spas te bin leke ya yakʼbey stseʼelil yoʼtan (kʼopona Proverbios 27:11).

3. ¿Bin-utʼil ya yakʼ ta ilel te kʼuxotik ta yoʼtan te Jehovae?

Te mukʼul talelil yuʼun te Jehová jaʼ te kʼuxul oʼtanile. Te Biblia ya yal: «Jcʼuxul-oʼtanil stuquel te Diose» (1 Juan 4:8, TZOXCH). Ta swenta te Biblia sok te bintik spastiklanoje te Jehová ya yakʼ ta ilel te kʼuxotik ta yoʼtane (kʼopona Hechos 14:17). Nopa awaʼiy te bin-utʼil la spasotike. Ya xjuʼ ya kiltik tʼujbil coloretik, ya jmulantik yaʼiyel música sok bujtsʼan weʼeliletik, melel jaʼ ya skʼan te ya jmulantik te jkuxlejaltike.

JNOPTIKXAN TA LEK

Kiltik bin ya stuuntes te Jehová swenta ay bintik ya spas. Sok jnoptik bin-utʼil ya yakʼ ta ilel te tʼujbil taleliletik yuʼune.

4. Te schʼul espíritu te Diose

Dibujoetik te ya yakʼ ta ilel bin-utʼil stuuntesoj te schʼul espíritu te Diose: 1. Te chʼulchan sok te planetaetik. 2. Jtul winik ya stsʼibay te Biblia ta balbil jun, jaʼ ya stsʼibay te bin ya x-akʼbot ta yoʼtan yuʼun te Diose.

Te joʼotike ya jtuuntestik te jkʼabtik yuʼun ya x-aʼtejotik, yan stukel te Jehová ya stuuntes te schʼul espíritu. Te Biblia maba ya yal te jaʼ jtul ants winik te chʼul espiritue, jaʼ yuʼel te Dios te ya stuuntes ta spasel spisil te bin ya skʼan yoʼtane. Kʼoponaik Lucas 11:13 sok Hechos 2:17, sok albeyaik skʼoplal ini:

Te Dios ya smal koel te schʼul espíritu ta stojol te machʼa ya xkʼanbot yuʼune. Jich yuʼun, ¿jaʼbal jtul ants winik te chʼul espíritu o jaʼbal te yuʼel te Diose? ¿Bin yuʼun te jich ya awale?

Te Jehová ya stuuntes te schʼul espíritu kʼalal ay bintik ya spase. Kʼoponaik Salmo 104:30 sok 2 Pedro 1:20, 21, sok albeyaik skʼoplal ini:

¿Bin-utʼil stuuntesoj te schʼul espíritu te Jehovae?

5. Te Jehová ay tʼujbil taleliletik yuʼun

Manchukme te Moisés yakix ta abatinel ta stojol-a te Diose, la skʼan la snaʼbeyxan sba ta lek. Jaʼ yuʼun te Moisés la yalbey te Jehová: «Aʼbon jnaʼ te bin ay ta awoʼtan, scuenta yuʼun ya jnaʼbat aba» (Éxodo 33:13). Te Jehová la yakʼbey snaʼ te Moisés cheʼoxeb talelil yuʼun. Kʼoponaik Éxodo 34:4-6 sok albeyaik skʼoplal ini:

¿Bintik talelil ay yuʼun te Jehovae?
¿Bintik talelil yuʼun Jehová te ya amulanxane?

6. Te Jehová ay skʼoplal ta yoʼtan te ants winiketike

Te lum yuʼun Dios ta namey la yichʼik mosoinel ta Egipto. ¿Bin yaʼiyel la yaʼiy sba Jehová te kʼalal la yil te ayik ta wokole? Chʼama awaʼiyik te AUDIO sok tʼuna ta aBibliaik, o kʼoponaik Éxodo 3:1-10. Ta patil albeyaik skʼoplal ini:

AUDIO: Te Jehová kʼux la yaʼiy te kʼalal la yil te ay swokol te lum yuʼune (2:45)

¿Bin ya yakʼbat anop ta swenta te bin yaʼiyel ya yaʼiy sba Jehová kʼalal ya yil te ya xwoklaj te ants winiketike? (Ilawilik te versículo 7 sok 8).
¿Yuʼun-nixbal ya skʼan ya skoltayotik-a te Jehovae? ¿Yabal xjuʼ yuʼun? ¿Bin yuʼun te jich ya awale?

7. Chikan ta ilel te taleliletik yuʼun te Jehová

Dibujoetik: Jkojt mukʼul chay te orca sbiil sjokinej yal, nichimetik sok jkojt tsʼunun.

Te Jehová ya yakʼ ta ilel te bin yilel stalel ta swenta te bintik spastiklanoje. Ilawilik te VIDEO. Ta patil kʼoponaik Romanos 1:20 sok albeyaik skʼoplal ini:

VIDEO: Te skʼuxul yoʼtan te Jehová ya xchiknaj ta ilel ta swenta te bintik spasoje: Te bin-utʼil pasbilotik (1:57)

Ta swenta te bintik pastiklanbile, ¿bin talelil yuʼun Jehová ya ata ta ilel te jaʼate?

AY MACHʼATIK JICH YA YALIK: «Maʼyuk jkʼoplaltik ta yoʼtan te Diose».

¿Bin ya awal te jaʼate?
¿Bin yuʼun te jich ya awale?

¿BINTIK LA JNOPTIK?

Te Jehová jaʼ jun espíritu, jaʼ yuʼun ma chikanuk ta ilel. Ay tʼujbil taleliletik yuʼun, jich bitʼil te kʼuxul oʼtanil te spisil-ora ya yakʼ ta ilele.