LECCIÓN 54
Te yaʼtel te «aʼbat te jun yoʼtan soc pʼij»
Te Jesús jaʼ «jolal» yuʼun te congregacione (Efesios 5:23). Ta kʼajkʼal ini, te Jesús kʼalalto ta chʼulchan ya swol te j-abatetik yuʼun Dios te ayik ta Balumilal ta swenta te «aʼbat te jun yoʼtan soc pʼij» (kʼopona Mateo 24:45). Te Jesús jaʼ la stsa sok la yakʼbey yaʼtel te j-abat-abi. Manchukme mukʼ yaʼtelik, ya x-abatinik ta stojol te Cristo sok te yermanotak. ¿Machʼa-a te j-abat-abi, sok bin-utʼil ya skanantayotik?
1. ¿Machʼa-a te «aʼbat te jun yoʼtan soc pʼij»?
Te Jehová spisil-ora stsaoj jtsob winiketik o jtul winik yuʼun ya swol te lum yuʼune (Malaquías 2:7; Hebreos 1:1). Jich bitʼil te kʼalal laj te Jesús, te jpuk-kʼopetik sok te ancianoetik ta Jerusalén jaʼ la swolik te congregación (Hechos 15:2). Jich bitʼil ta namey, ta kʼajkʼal ini ay jtsob ancianoetik te ya swolotik—naʼbil sbaik bitʼil Cuerpo Gobernante yuʼun te Testigoetik yuʼun Jehová—jaʼ ya smakʼlinotik ta swenta te skʼop Dios sok ya swentainik te scholel skʼop Diose. Te Jesús jaʼ la yakʼbey yaʼtel te «aʼbat te jun yoʼtan soc pʼij» (Mateo 24:45a). Ta spisilik tsabilik yuʼun te chʼul espíritu yuʼun ya xbajtik ta wentainwanej ta chʼulchan sok te Cristo.
2. ¿Bin-utʼil ya smakʼlinotik te j-abat te jun yoʼtan sok pʼij?
Te Jesús la yal te jaʼ ya smakʼlin ta yorail te yantik jchʼuunjeletike (Mateo 24:45b). Jich bitʼil te weʼelil te ya skoltayotik sok ya yakʼ kiptik, te weʼelil te lokʼem talel ta sKʼop Dios ya yakʼ kiptik yuʼun jun koʼtantik ta stojol te Jehová sok ya jpastik te aʼtelil la yakʼbotik jilel te Jesuse (1 Timoteo 4:6). Ya kichʼtik akʼbeyel te weʼelil-abi ta swenta te tsoblejetik, mukʼul tsoblejetik, junetik sok videoetik te lokʼemik ta Biblia. Spisil-abi ya skoltayotik ta snaʼel te bin ya skʼan ta jtojoltik te Jehová sok ya yakʼ xnoptsajotikxan ta stojol.
JNOPTIKXAN TA LEK
Kiltik bin yuʼun ya jkʼantik te koltayel yuʼun te «aʼbat te jun yoʼtan soc pʼij» te jaʼ te Cuerpo Gobernantee.
Te Cuerpo Gobernante ya stojobtes, ya skoltay sok ya smakʼlin ta swenta skʼop Dios te testigoetik yuʼun Jehová ta swolol Balumilal.
3. Te lum yuʼun Jehová ya skʼan te chajpanbiluk ta lek
Te Jesús la swol te sbabial jchʼuunjeletik, jaʼnix jich ta kʼajkʼal ini ya swol te Cuerpo Gobernante yuʼun ya schajpanik te aʼtelil ya spasik te testigoetik yuʼun Jehová. Ilawilik te VIDEO.
Kʼoponaik 1 Corintios 14:33, 40 sok albeyaik skʼoplal ini:
Jich bitʼil ya yal te versiculoetik ini, ¿bin yuʼun te Jehová ya skʼan te lek chajpanbiluk te Testigoetik yuʼune?
4. Te j-abat te jun yoʼtan ya swentain te scholel skʼop Dios
Te sbabial jchʼuunjeletik kʼax mukʼ skʼoplal ya yilik-a te scholel skʼop Diose. Kʼoponaik Hechos 8:14, 25 sok albeyaik skʼoplal ini:
¿Machʼatik ya swentainik-a te scholel skʼop Dios ta sbabial siglo?
¿Bin la spasik te Pedro sok te Juan te kʼalal ay banti tikunotik bael yuʼun te jpuk-kʼopetike?
Te scholel skʼop Dios jaʼ te aʼtelil te kʼax mukʼ skʼoplal ya swentain te Cuerpo Gobernante. Ilawilik te VIDEO.
Te Jesús la yakʼ ta naʼel te kʼax mukʼ skʼoplal te scholel skʼop Diose. Kʼoponaik Marcos 13:10 sok albeyaik skʼoplal ini:
¿Bin yuʼun te Cuerpo Gobernante kʼax mukʼ skʼoplal ya yil te scholel skʼop Diose?
¿Bin yuʼun ya skʼan te ya schajpanik ta lek te scholel skʼop Dios ta swolol Balumilal te Cuerpo Gobernantee?
5. Ya stojobtesotik te j-abat te jun yoʼtan sok pʼij
Te Cuerpo Gobernante ya stojobtes spisil te jchʼuunjeletik ta swolol Balumilal. ¿Bin-utʼil ya staik ta nopel te bin tojobtesel ya yakʼike? Kiltik bin-utʼil la spasik te cuerpo gobernante ta sbabial siglo. Kʼoponaik Hechos 15:1, 2 sok albeyaik skʼoplal ini:
¿Bin-a te maba acuerdo ayik-a te jchʼuunjeletik ta sbabial siglo?
Yuʼun ya xchajpaj-a te kʼope, ¿machʼatik la skʼanbeyik koltayel te Pablo, Bernabé sok te yantik jchʼuunjeletike?
Kʼoponaik Hechos 15:12-18 sok 23-29, sok albeyaik skʼoplal ini:
¿Bin nail la spas te cuerpo gobernante ta sbabial siglo swenta ya xtojobtesotik yuʼun te Diose? (Ilawilik te versículo 12, 15 sok 28).
Kʼoponaik Hechos 15:30, 31 sok 16:4, 5, sok albeyaik skʼoplal ini:
¿Bin yaʼiyel la yaʼiy sbaik te sbabial jchʼuunjeletik kʼalal la yichʼik akʼbeyel te tojobtesel yuʼun te cuerpo gobernante?
¿Bin-utʼil ya jnaʼtik te akʼbotik bendición yuʼun Jehová ta swenta te la schʼuunik mantale?
Kʼoponaik 2 Timoteo 3:16 sok Santiago 1:5, sok albeyaik skʼoplal ini:
Teme ay bin ya schapik te Cuerpo Gobernante ta kʼajkʼal ini, ¿bin-utʼil ya skʼanbeyik koltayel te Diose?
AY MACHʼATIK JICH YA YALIK: «Jaʼme yakotik ta schʼuunbeyel skʼop winiketik teme jaʼ ya jchʼuunbeytik skʼop te Cuerpo Gobernante».
¿Bin yuʼun ya schʼuun awoʼtan te jaʼ te Jesús te yak ta stojobtesel te Cuerpo Gobernante?
¿BINTIK LA JNOPTIK?
Te Cuerpo Gobernante jaʼ te «aʼbat te jun yoʼtan soc pʼij» te la yichʼ tsael yuʼun te Jesuse. Te j-abat ini ya smakʼlin ta swenta skʼop Dios sok ya stojobtes te jchʼuunjeletik ta swolol Balumilal.
¿Jilbal ta awoʼtan into?
¿Machʼa akʼbot yaʼtel yuʼun te «aʼbat te jun yoʼtan soc pʼij»?
¿Bin-utʼil ya skanantayotik te Cuerpo Gobernante?
¿Yabal schʼuun awoʼtan te jaʼ te Cuerpo Gobernante te «aʼbat te jun yoʼtan soc pʼij»?
YA XJUʼ YA ANOPXAN INI
Ilbeya skʼoplal bin-utʼil ya schajpanik te aʼtelil ya spasik te Cuerpo Gobernante.
«¿Machʼa-a te Cuerpo Gobernante yuʼun te stestigotak Jehová?» (Ay ta jw.org)
Ilbeya skʼoplal bin ya spas te Cuerpo Gobernante yuʼun jaʼ ya yakʼ jnoptik te bin smelelil ya yal te Bibliae.
¿Bin yaʼiyel ya yaʼiy sbaik te machʼatik ya x-aʼtejik ta Cuerpo Gobernante ta swenta te aʼtelil akʼbot spasik yuʼun te Jesuse?
¿Bin-utʼil ya xchiknaj ta ilel ta tsoblej sok ta mukʼul tsoblej te jaʼ Jehová te machʼa ya yakʼbey koltayel te Cuerpo Gobernantee?