Ya kaltik wokol yuʼun te yutsil yoʼtan Dios

1, 2. 1) Ala ta chaʼoxpʼalnax kʼop te lokʼomba kʼop yuʼun te winik te ay stsʼusubile. 2) ¿Bin-utʼil ya yakʼ ta ilel te lokʼomba kʼop ta swenta te lekil oʼtanil sok te utsil oʼtanile?

AY JTUL winik te ay stsʼusubil. Ta jun buelta lokʼ bael ta sab ta sleel j-aʼteletik yuʼun ta plaza yuʼun merkado. La yalbey jayeb ya yichʼik tojel te j-aʼteletike, jich la skʼanik. Ta patil, te winik-abi la yil te yato skʼanxan j-aʼteletik. Jaʼ yuʼun ta kʼajkʼal-abi bayal buelta bajtʼ sle yan j-aʼteletik. Sok la yal te ya yichʼik tojel ta lek. Kʼalal laj yoʼtanik ta aʼtele, te winike la stsob spisil te j-aʼteletik swenta ya yakʼbey te stojolike. Ay chaʼoxtul sjunal kʼajkʼal aʼtejik sok ay yantik te jun-nax ora. Jaʼukmeto te winike pajalnax la yakʼbey te stojolike. Te j-aʼteletik te aʼtejik ta sjunal kʼajkʼal ochik ta wulwulkʼop. Te winik la yal te jaʼiknix la skʼanik te jich ya yichʼik tojele. Soknix la yaltiklanbey te jaʼ ay ta swenta stojel te j-aʼteletik te bitʼil ya skʼan stukele. Ta patil la sjojkʼoylanbey teme ay sbikʼtal yoʼtanik yuʼun te bitʼil la yakʼ ta ilel te slekil yoʼtane (Mateo 20:1-15).

² Te Jesús la yalbey skʼoplal te aʼiyej-abi swenta la yakʼ jun lekil nojptesel ta swenta te «cʼuxultayel [«yutsil yoʼtan», XCD] yuʼun Dios» (kʼopona te 2 Corintios 6:1)^[1] (ilawil te nota ta slajibal te articulo). Ayniwan machʼatik ya yalik ta swenta te winiketik te aʼtejik sjunal kʼajkʼale, jaʼ snujpʼ la yichʼik bayalxan stojolik te bitʼil te yantike. Jaʼukmeto te yajwal te tsʼusubile la yakʼ ta ilel yutsil yoʼtan ta stojol te machʼatik maba bayal ora aʼtejike. Jtul te machʼa ya yilbey skʼoplal te Biblia la yal te bitʼil te kʼopil te ya skʼases te Biblia «utsil oʼtanil» jaʼ ya skʼan ya yal te «ay bin ya kichʼtik akʼbeyel ta majtʼanil te maba snujpʼuk ya kichʼtike» sok te «ay bin ya yichʼ akʼbeyel jtul ants winik, jaʼukmeto te maʼyuk bin spasoj swenta jich ya yichʼ akʼbeyel».

3, 4. 1) ¿Bin yuʼun yakʼoj ta ilel yutsil yoʼtan te Jehová ta stojol spisil te ants winiketike? 2) ¿Bin-utʼil la yakʼ ta ilel?

³ Te Biblia ya yal te jaʼ jun «mahtanil» te yutsil yoʼtan te Diose (Efesios 3:7). Jich bitʼil ma xjuʼ kuʼuntik schʼuunbeyel ta tsʼakal te smantal Jehovae, ma snujpʼuk te ya yakʼbotik te slekil yoʼtane. Jaʼ snujpʼ te ya xlajotike. Te ajwalil Salomón jich la yal: «Mayuc ni jtuhluc ta bahlumilal te toj yoʼtan, te ya spas te bin lec, te ma ba ya sta smul» (Eclesiastés 7:20). Ta patil bael, te jpuk-kʼop Pablo la yal te «spisilic ay smulic, ma ba yichʼbeyejic yutsilal te Diose» sok te «stojol te mulil, ha te lajele» (Romanos 3:23; 6:23a).

⁴ Te Jehová kʼax kʼux ta yoʼtan spisil te ants winiketike. Jaʼ yuʼun la stikun te jip jtul sNichʼan swenta ya xlaj ta jtojoltik. Jaʼ te yutsil yoʼtan te kʼax mukʼxan skʼoplal yakʼoj ta ilele (Juan 3:16). Te Pablo la yal te bitʼil te Jesús ta ora ini «aʼbotix yutsilal soc ichʼel ta mucʼ ta scaj te cʼax swocol ta lajel» sok te la yakʼ sba ta lajel ta jwentatik ta skaj te «yutsil yoʼtan Dios» (Hebreos 2:9). Jich yuʼun te majtʼanil te ya yakʼbotik te Dios jaʼ te «cuxlejal sbahtel qʼuinal ta scuenta te Cajwaltic Cristo Jesús» (Romanos 6:23b).

5, 6. 1) ¿Bin ya xkʼot ta lokʼel teme ya kakʼ jbatik ta wentainel yuʼun te mulile? 2) ¿Bin ya xkʼot ta lokʼel teme ya kakʼ jbatik ta wentainel yuʼun te yutsil yoʼtan Diose?

⁵ ¿Bin-yuʼun ya jpastik mulil sok te ya xlajotike? Te Biblia ya yal ta skaj te mulil yuʼun te Adán och te «cuentahinel yuʼun te lajele». Jich bitʼil jpisiltik talemotik ta stsʼumbal te Adán, jpisiltik jmulawilotik sok ya xlajotik (Romanos 5:12, 14, 17). Manchukme jich-abi, ya xjuʼ te maba ya kakʼ swentain jkuxlejaltik te mulile. ¿Bin-utʼil ya xjuʼ ya jpastik-abi? Jaʼ te kʼalal ya kakʼ schʼuunel koʼtantik ta swenta te la yakʼ sba ta lajel te Cristoe. Jaʼ jich ya kakʼ swentain jkuxlejaltik te yutsil yoʼtan te Jehovae. Te Biblia ya yal: «Te cʼalal bayel pʼohlix a te mulil, cʼax to xan hich pʼohl a te yutsil yoʼtan Dios, scuenta yuʼun hich te bin utʼil cuentahinwan te mulil te hich la yacʼ lajel, ha nix hich te yutsil yoʼtan Dios ya xcuentahinwan ta scuenta yaqʼuel ta toj, te hich ya yacʼ cuxlejal scuenta sbahtel qʼuinal ta scuenta te Cajwaltic Jesucristo» (Romanos 5:20, 21).

⁶ Manchukme jmulawilotikto, ma skʼan te ya kakʼ jbatik ta wentainel yuʼun te mulile. Jaʼ yuʼun, kʼalal ya jpastik te bin maba leke, ya jkʼanbeytik perdon te Jehovae. Te jpuk-kʼop Pablo la yal: «Como ma ba ya scuentahinexix te mulil, como ma ba ayex ta scuenta te Ley, ha ayexix ta scuenta te yutsil-oʼtanile» (Romanos 6:14). Teme ya kakʼ swentain jkuxlejaltik te yutsil yoʼtan te Diose, ¿bintik lekilal ya jtatik yuʼun? Te Pablo la yal te ya jpʼajtik te «spisil bintic chopol soc bintic mulantic sba ta pasel ta bahlumilal te tsahtaybiluc coʼtantic ya xʼayinotic ta ora ini, te tojuc ya xʼayinotic soc te ayuc ta coʼtantic spisil ora te Diose» (Tito 2:11, 12).

7, 8. ¿Bin ya skʼan ya yal te «bayel ta chahp» te bitʼil ya yakʼ ta ilel Jehová te yutsil yoʼtane? (Ilawil te lokʼombaetik ta sjajchibal te articulo).

⁷ Te jpuk-kʼop Pedro la yal: «Te mahtanil aʼbot yuʼun Dios ta jtuhlutuhl, tuhunahic ta stojol yantic scuenta lequil jcanan yuʼun te bayel ta chahp mahtaniletic ya yacʼ te Diose» (1 Pedro 4:10). ¿Bin ya skʼan ya yal te «bayel ta chahp» te bitʼil ya yakʼ ta ilel Jehová te yutsil yoʼtane? Jaʼ ya skʼan ya yal te chikanuk bin wokolil ay ta jkuxlejaltike, te Jehová ya yakʼbotik te bin ya xtuun kuʼuntik swenta ya stsʼijk kuʼuntik (1 Pedro 1:6). Spisil-ora ya yakʼbotik te bintik ya xtuun kuʼuntik ta jujun wokolil swenta ya xkʼax kuʼuntik.

⁸ Jich bitʼil yakotik ta yilele, bayal ta chajp bin-utʼil ya yakʼ kiltik Jehová te yutsil yoʼtane. Te jpuk-kʼop Juan jich la stsʼibay: «Jpisiltic quichʼbeyejtic te bintic bayel ay yuʼun, ha quichʼojtic cajalcaj yutsil-oʼtanil» (Juan 1:16). Jich bitʼil bayal ta chajp bin-utʼil ya yakʼ ta ilel yutsil yoʼtan te Jehovae, ya jtatik bayal bendisionetik. Kiltik chaʼoxchajpuk te bendisionetik-abi.

 9. 1) ¿Bin lekilal ya jtatik ta swenta yutsil yoʼtan te Diose? 2) ¿Bin-utʼil ya kakʼtik ta ilel te ya kaltik wokole?

⁹ Te Jehová ya spasbotik perdon yuʼun te jmultike. Ta skaj te yutsil yoʼtan, te Jehová ya spasbotik perdon yuʼun te jmultike. Jaʼukmeto jaʼnax ya spas teme ya jsujtes koʼtantik sok teme ya jpastik tulan yuʼun maba ya jpastikix te bin chopole (kʼopona 1 Juan 1:8, 9). Ta skʼajkʼalel te jpuk-kʼop Pablo la scholbey te jchʼuunjeletik te tsabilik te ya xbajtʼik ta chʼulchan bin-utʼil te Jehová ya spas perdon yuʼun te jmultike. Ta swenta te Dios jich la yal: «Ha la scoltayotiquix loqʼuel ta yip te yihcʼal qʼuinal, la yicʼotiquix ochel ta banti ay te cuentahinel yuʼun te Snichʼan te cʼux ta yoʼtan, te ha ta scuenta te mambil jcoleltic ta schʼichʼel, ha te perdón yuʼun te jmultique» (Colosenses 1:13, 14). Teme ya kaltik wokol yuʼun te bin spasoj ta jtojoltik te Diose, ya kakʼtik ta ilel kʼalal ya kichʼtik ta mukʼ. Jich bitʼil ya spasbotik perdon yuʼun te jmultike ya xjuʼ ya jtatik bayal tʼujbil bendisionetik.

10. ¿Bintik-a te ya jmulantik ta skaj te yutsil yoʼtan te Diose?

¹⁰ Ya xjuʼ ya jmulantik te lamalnax kʼinal ya kaʼiy jbatik sok Dios sok ya xjuʼ ya kamigointik. Kʼalal ya x-ayinotik ta kʼinal jkontratikix-a te Diose, melel jmulawilotik. Manchuk jich ay-abi, te jpuk-kʼop Pablo la yal: «Como te cʼalal jcontrahinej jbahtic soc a te Diose, la yacʼ te chaʼlecub xan yoʼtan ta jtojoltic ta scuenta te laj te Snichʼane» (Romanos 5:10). Ta swenta te laj ta jtojoltik te Jesuse ya xjuʼ xchaʼlekubxan yoʼtan te Dios ta jwentatik. Te bin ya skʼan ya yal-abi, jaʼ te ya xjuʼ te lamalnax koʼtantik ya kaʼiy jbatik sok te Dios sok te ya xjuʼ ya kamigointike. Jaʼukmeto, ¿bin-utʼil snitojbey sba skʼoplal-abi sok te yutsil yoʼtan te Diose? Te Pablo la scholbey skʼoplal te kʼalal jich la yalbey te jchʼuunjeletik te tsabilik ya xbajtʼik ta chʼulchan: «Ha yuʼun te bin utʼil halbotic te toj ayotic ta scuenta schʼuhunel-oʼtanil, hich lamal qʼuinal ya caʼiytic ta stojol Dios ta scuenta te Cajwaltic Jesucristo, te ha ta scuenta schʼuhunel coʼtantic ta stojol te ya xhuʼ ya xʼochotic ta stojol te yutsil yoʼtan Dios» (Romanos 5:1, 2). Ya skʼan te ya kakʼtik ta ilel te ya kaltik bayal wokol te bitʼil lamalnax kʼinal ya kaʼiy jbatik sok Dios sok te kamigoinej jbatik soke.

11. ¿Bin-utʼil te machʼatik ya xbajtʼik ta chʼulchan ya yikʼik tal ta stojol bin toj ta pasel te «yantic tuminchijetic»?

¹¹ Ya xjuʼ ya yilotik jich bitʼil tojil ants winikotik te Diose. Te j-alwanej Daniel la stsʼibay ta stojol te machʼatik ya xbajtʼik ta chʼulchan te ya xkuxinik ta slajibal kʼajkʼal te bayal machʼatik ya yikʼik tal ta stojol «bin toj ta pasel» (kʼopona te sjun Daniel 12:3). ¿Bin-utʼil ya spasik-abi? Te machʼatik ya xbajtʼik ta chʼulchane ya scholbeyik skʼoplal te Ajwalinel te miyonetik ta tul «yantic tuminchijetic» sok ya yakʼbeyik snop te leyetik yuʼun te Jehovae (Juan 10:16). Jich ya skoltayik te ants winiketik-abi, yuʼun ya yichʼik ilel bin-utʼil tojil ants winiketik ta sit te Diose. Te aʼtelil-abi jaʼnax ya xjuʼ ta pasel ta swenta yutsil yoʼtan Dios. Te jpuk-kʼop Pablo jich la yal: «Ta scuenta yutsil yoʼtan Dios ta mahtanil halbotic te toj ayic, ta scuenta stojel mulil ta scuenta Cristo Jesús» (Romanos 3:23, 24).

12. ¿Bin-utʼil snitojbey sba skʼoplal te yutsil yoʼtan Dios sok te skʼoponele?

¹² Ta swenta skʼoponel te Diose ya xjuʼ xnoptsajotik ta stojol. Ta swenta yutsil yoʼtan te Diose ya xjuʼ ya jkʼopontik. Jich bitʼil te Jehová ya xwentainwan sok yutsil yoʼtan, te jpuk-kʼop Pablo la yal ta stojol te jukul ta «mucʼul-huctajibal [...] banti ay yutsil-oʼtanil» sok ya yikʼotik «yuʼun junuc coʼtantic acʼa nopojucotic bahel ta stojol te mucʼul-huctajibal» (Hebreos 4:16a). Ta swenta sbiil te Jesuse ya xjuʼ spisil-ora ya jkʼopontik te Diose. Jaʼ jun mukʼul majtʼanil-abi. Te Pablo jich la yal: «Ta scuenta Cristo soc ta scuenta schʼuhunel coʼtantic ta stojol, jun coʼtantic ya xhuʼ ya xnohpojotic ta stojol Dios» (Efesios 3:12).

13. ¿Bin-utʼil ya skoltayotik te yutsil yoʼtan Jehová «ta yorahil te jwocoltique»?

¹³ Ya xjuʼ ya kichʼtik koltayel ta yorail te jwokoltike. Te Pablo la sjukotik ta skʼoponel te Jehová kʼalal ya jkʼantik koltayel «scuenta yuʼun ya jtahtic cʼuxultayel soc yuʼel te ya scoltayotic ta yorahil te jwocoltique» (Hebreos 4:16b). Te kʼalal ay jwokoltike ya xjuʼ ya jkʼanbeytik koltayel te Jehová. Maba sujbiluk ta yaʼiyel te jkʼoptike jaʼukmeto ya yaʼiybotik. Bayal buelta ya skoltayotik ta swenta te kermanotaktik ta yutil jkongregasiontik. Te Jehová ya yaʼiy jkʼoptik «ha yuʼun jun coʼtantic ya caltic: Ha jcoltaywanej cuʼun te Cajwaltic; ma ba ya jxiʼ te bin ya xhuʼ ya spasbon te winique» (Hebreos 13:6).

14. ¿Bin yan lekilal ya jtatik ta swenta yutsil yoʼtan te Jehovae?

¹⁴ Ya xjuʼ ya jtatik smukʼul koʼtantik. Yan mukʼul bendision te ya jtatik ta swenta yutsil yoʼtan te Jehovae jaʼ te smukʼul koʼtantik te ya yakʼbotik kʼalal kʼax pichʼil koʼtantik-a. Te Pablo jich la stsʼibay ta stojol te jchʼuunjeletik yuʼun Tesalónica kʼalal yakik ta utsʼinel-a: «Ha nix te Cajwaltic Jesucristo soc te Jtatic Dios, te ha la scʼuxultayotic soc la yaʼbotic yip coʼtantic scuenta sbahtel qʼuinal soc smucʼul coʼtantic ta scuenta yutsil yoʼtan, acʼa yaʼbeyex yip awoʼtanic soc acʼa scoltayex ta spasel soc ta yalel spisil bintic lec» (2 Tesalonicenses 2:16, 17). ¿Mabal jichuk te ya yakʼ smukʼul koʼtantik snaʼel te kʼuxotik ta yoʼtan te Jehová sok te ya skanantayotik ta skaj te yutsil yoʼtane?

15. ¿Bin ya yakʼ jmaliytik te yutsil yoʼtan te Diose?

¹⁵ Ya xjuʼ ya jtatik te kuxlejalil ta sbajtʼel kʼinal. Te manchuk ya skoltayotik te Jehovae maʼyuk bin ya jmaliytikix te jichuke, melel jmulawilotik (kʼopona te sjun Salmo 49:7, 8). Jaʼukmeto ay bin kʼax tʼujbil ya yakʼ jmaliytik. ¿Bin-a? Te Jesús jich la yal: «Hich ay te bin ya scʼan yoʼtan te machʼa la sticonon tal: ha te ayuc scuxlejal sbahtel qʼuinal spisil te machʼa ya yil te Nichʼanil soc ya schʼuhun» (Juan 6:40). Jich yuʼun, jaʼnax ta swenta te yutsil yoʼtan Dios te ya yakʼ jmaliytik te kuxlejalil ta sbajtʼel kʼinal. Te Pablo jich la yal: «Como chicnajemix te yutsil yoʼtan Dios scuenta yuʼun ay colel ta stojol spisil ants-winiquetic» (Tito 2:11).

16. ¿Bin-utʼil te jelawik ta swenta te yutsil yoʼtan Dios chaʼoxtul sbabial jchʼuunjeletike?

¹⁶ Jich bitʼil la kiltikixe, ta swenta yutsil yoʼtan Dios ya jtatik bayal bendisionetik. Jaʼukmeto ya skʼan te ma xjelawotik ta swenta te yutsil yoʼtan te Diose sok mame skʼan te ya jkuytik te ya xjuʼ spasbotik perdon biluk mulil ta jichnax. Ta skʼajkʼalel te sbabial jchʼuunjeletik ay machʼatik kʼan «sjelic ta chijil-oʼtanil te yutsil yoʼtan Dios» (Judas 4). Jich yaʼiyel te la skuyik te winiketik-abi te maba jun yoʼtanik ta stojol te Jehová te ya xjuʼ ya spasik muliletik sok te ya xpasbotik perdon yuʼun spisil-ora. Sok la spasik tulan yuʼun te jaʼnix jich ya spasik muliletik-euk te yantike. Spisil te machʼatik jich ya spasik ta ora ini tulan mulil ya spasik ta stojol «te Espíritu yuʼun yutsil-oʼtanil» (Hebreos 10:29).

17. ¿Bin tsitsel te tulan skʼoplal la yakʼ te Pedroe?

¹⁷ Ta ora ini, te Satanás sloʼlayoj chaʼoxtul jchʼuunjeletik ta snopel te ya xjuʼ ya spasik mulil sok te ya snopik te jichnax ya yichʼik pasbeyel perdon yuʼun te Jehovae. Melelnix-a te ya skʼan spasbey perdon Jehová te machʼatik ya sujtes yoʼtanik yuʼun te smulike. Jaʼukmeto jaʼnix jich ya skʼan te ya jpastik tulan ta skontrainel te spasel te bintik chopole. Te Jehová la yakʼbey stsʼibay te jpuk-kʼop Pedro te tsitsel ini: «Canantaya abahic scuenta yuʼun ma ba ya snitex bahel te showilcʼopic te machʼatic ya spasic biluc ya scʼanic, te hich ya xyahlat cohel ta banti jun awoʼtan achʼuhunejique. Behbehuc me mucʼubel te yutsil-oʼtanil soc ta snaʼbeyel xan sba te Cajwaltic Jesucristo, te Jcoltaywanej cuʼuntique» (2 Pedro 3:17, 18).

18. Jich bitʼil yakʼojbotik ta ilel yutsil yoʼtan te Diose, ¿bin ya skʼan ya jpastik?

¹⁸ Teme ya kaltik wokol yuʼun te yutsil yoʼtan te Diose, yame skʼan jtuuntestik te bintik ya yakʼbotik ta swenta yichʼel ta mukʼ sok ta skoltayel yantik. ¿Bin-utʼil ya xjuʼ ya jpastik? Te Pablo la yal: «Ay chahpalchahp mahtaniletic cuʼuntic, ha chican bin aʼbibilotic yuʼun Dios: te machʼa ha smahtan [...] aʼbatinel, acʼa yacʼ sba ta aʼbatinel; te machʼa ya xpʼijubteswan, acʼa yaʼiy pʼijubteswanej; [...] te machʼa ya xmahtanteswan, junuc me yoʼtan acʼa yacʼ; [...] te machʼa ya yaʼiy cʼuxultaywanej, tseʼeluc me yoʼtan acʼa spas» (Romanos 12:6-8). ¿Bin ya skʼan ya yal spisil-abi? Jich bitʼil yakʼojbotik ta ilel yutsil yoʼtan te Diose, ayme ta jwentatik spasel tulan ta scholel skʼop Dios, snojptesel ta Biblia yantik, smukʼubtesel kʼinal yaʼiyik te kermanotaktik sok spasbeyel perdon te machʼatik ay bin maba lek ya spasbotike.

19. ¿Bin ya kilbeytik skʼoplal ta yan articuloe?

¹⁹ Jich bitʼil bayal bendisionetik yakʼojbotik te Jehová ta skaj te yutsil yoʼtane, yame skʼan te ya jpastik tulan ta yalbeyel skʼoplal ta tsʼakal «te lec yachʼil cʼop yuʼun te yutsil yoʼtan te Diose» (Hechos 20:24). Ta yan articulo yame kilbeytik skʼoplal te bin-utʼil ta pasel-abi.