LECCIÓN 09

Ya xjuʼ ya jkʼopontik te Diose

Partitura

¿Aybal jich ya awaʼiy aba te ya akʼan koltayele? ¿Aybal bin awoʼtan ya anaʼ stojol? ¿Yabal akʼan te ay machʼa ya smukʼubtesbat kʼinal awaʼiy? ¿Yabal akʼan te ya xnoptsajatxan ta stojol te Jehová? Jaʼme ya skoltayat te oracione. Pero ¿bin-utʼil ya skʼan ya jkʼopontik te Diose? ¿Yabal yaʼiy Dios spisil te oracione? ¿Bin ya skʼan ya apas yuʼun ya yaʼiybat te akʼop te Diose? Kiltik.

1. ¿Machʼa ya skʼan ya jkʼopontik te kʼalal ya jpastik te oración sok bin ya xjuʼ ya kalbeytik?

Te Jesús la yal te jaʼnax ya skʼan ya jkʼopontik te jTatik te ay ta chʼulchane. Jich la spas te Jesús, la skʼopon te Jehovae. Ta jun buelta jich la yal: «Te haʼexe, hich me xacʼoponic te Diose: Jtatic te ayat ta chʼulchan...» (Mateo 6:9). Te kʼalal ya jkʼopontik te Jehová, ya xnoptsajotikxan ta stojol.

Ya xjuʼ ya kalbeytik te Dios spisil te bin ay ta koʼtantike. Pero teme ya jkʼantik te ya sutbotik te jkʼoptike, ma skʼan ya jkʼanbeytik te bin ma jaʼuk skʼanojel yoʼtane. Te Biblia ya yal teme «ya jcʼambetic te bin ya scʼan yoʼtan stuquel, ya yaʼiyotic» (1 Juan 5:14). Te Jesús la yal cheʼoxeb te bin ya xjuʼ ya jkʼanbeytik ta oración te Diose (kʼopona Mateo 6:9-13). Ma jaʼuknax ya skʼan ya kalbeytik te bin ya jkʼantike, jaʼnix jich ya skʼan ya kalbeytik wokol te Dios ta swenta te bin ya spas ta jtojoltik sok ya jkʼanbeytik te yakuk skoltay te yantike.

2. ¿Bin-utʼil ya skʼan ya jkʼopontik te Diose?

Te Biblia jich ya yalbotik: «¡Halbeyahic bin ay ta awoʼtanic [te Diose]!» (Salmo 62:8). Jaʼ yuʼun ya skʼan lokʼemuk ta koʼtantik te bin ya kalbeytik te Diose. Ya xjuʼ ya jkʼopontik ta tulan o ta koʼtantiknax, chikan te bitʼil ayotik teme tekʼelotik o nakalotik jaʼnax teme ya kakʼtik ta ilel te ya kichʼtik ta mukʼ te Diose. Jaʼnix jich, chikan jayeb ora ya xjuʼ ya jkʼopontik te Diose sok chikan banti ayotik.

3. ¿Bin-utʼil ya sutbotik jkʼoptik te Diose?

Bayal ta chajp te bin-utʼil ya sutbotike. Yame stuuntes te Biblia yuʼun ya yalbotik te bin ya jkʼan ya jnaʼtike. Te Biblia «ya yaʼbe spʼijil te machʼa mayuc bin ya snaʼ» (Salmo 19:7; kʼopona Santiago 1:5). Sok te kʼalal ayotik ta wokol, te Jehová ya yakʼbotik slamalil koʼtantik. Jaʼnix jich ya xjuʼ ya stijbey yoʼtan te j-abatetik yuʼun swenta ya skoltayotik te kʼalal ayotik ta wokole.

JNOPTIKXAN TA LEK

Kiltik bin-utʼil ya xjuʼ ya jpastik oración te lokʼem tal ta koʼtantik sok kiltik bin-utʼil ya skoltayotik te kʼalal ya jkʼopontik te Diose.

4. Ay bin-utʼil ta kʼoponel te Diose

¿Bin ya skʼan ya jpastik yuʼun ya yaʼiybotik jkʼoptik te Diose? Ilawilik te VIDEO.

VIDEO: ¿Yabal yaʼiybey skʼop spisil te machʼatik ya xkʼoponot yuʼun te Diose? (jmajkʼnax) (2:42)

Te Jehová ya skʼan te jaʼnax ya jkʼopontik stukele. Kʼoponaik Salmo 65:2 sok albeyaik skʼoplal ini:

¿Yabal skʼan ya yaʼiybat te akʼop te Diose? ¿Bin yuʼun te jich ya awale?

Teme ya jkʼantik te ya yaʼiybotik jkʼoptik te Diose, ya skʼan ya jpastik tulan ta spasel te bin ya smulane. Kʼoponaik Miqueas 3:4 sok 1 Pedro 3:12, sok albeyaik skʼoplal ini:

¿Bin ya skʼan ya jpastik yuʼun ya yaʼiybotik jkʼoptik te Diose?

Teme ay chaʼtsojb soldadoetik te ya skʼanbeyik Dios te ya xjuʼ yuʼunik te tsalawe, ¿yabal sutbot skʼopik yuʼun te Diose?

5. Lokʼemuk ta koʼtantik te bin ya kaltik ta oración

Bayal machʼatik snopojik te jaʼ ya skʼan ya sutilanik ta alel te oración te snopojix ta yoʼtanike. Pero, ¿jaʼbal jich ya smulan te Dios-abi? Kʼoponaik Mateo 6:7 sok albeyaik skʼoplal ini:

¿Bin ya skʼan ya jpastik yuʼun ma jaʼuk ya kalulantik ta oración te bin jilemix ta koʼtantike?

Nopa ta jujun kʼajkʼal te bin lek kʼaxem ta akuxlejal sok albeya wokol Jehová yuʼun. Teme jich ya apas ta jun semanae, ay jukchajp te bin la awalbeye.

Jtul ala kerem yak ta skʼoponel te smeʼ stat. — Jtul lekil tatil ya skʼan te ya x-albot te bin ay ta yoʼtan te snichʼane. Jaʼnix jich te Jehová ya skʼan te lokʼemuk tal ta koʼtantik te bin ya kalbeytik ta oracione.

6. Te oración jaʼ jun majtanil yuʼun Dios

¿Bin-utʼil ya skoltayotik te oración kʼaxtoxan-a te kʼalal ayotik ta wokole? Ilawilik te VIDEO.

VIDEO: Te oración ya yakʼbotik yip koʼtantik (1:32)

Te Biblia ya yalbotik te ya jtatik slamalil kʼinal kaʼiytik te kʼalal ya jkʼopontik te Diose. Kʼoponaik Filipenses 4:6, 7 sok albeyaik skʼoplal ini:

Manchukme ma xlaj spisil te jwokoltik te kʼalal ya jkʼopontik te Diose, ¿bin-utʼil ya skoltayotik?
¿Bintik ya akʼan ya awalbey te Diose?

¿Anaʼojbal-a?

Te kʼopil jichuk ya skʼan ya yal te «jichuk akʼa kʼotuk ta pasel». Jaʼto tal ta namey kʼinal ya yalik «jichuk» te kʼalal ya xlaj yoʼtanik ta skʼoponel Dios (1 Crónicas 16:36).

7. Lokʼesa tiempo ta skʼoponel te Diose

Ayniwan ya xchʼay ta koʼtantik skʼoponel Dios ta skaj te bayal kaʼteltike. ¿Bin-utʼil la yakʼ ta ilel te Jesús te mukʼ skʼoplal ta yoʼtan te ya skʼopon te Diose? Kʼoponaik Mateo 14:23 sok Marcos 1:35 sok albeyaik skʼoplal ini:

¿Bin-utʼil la slokʼes tiempo te Jesús yuʼun ya skʼopon Dios?
Jaxan te jaʼate, ¿bin-utʼil ya xjuʼ ya alokʼes atiempo yuʼun ya akʼopon Dios?

Jtul ants ya skʼopon Dios bayal buelta ta jun kʼajkʼal: 1. Kʼalal ya xjajch ta sab. 2. Sok te yalatak. 3. Ta yaʼtel. 4. Te kʼalal ya xweʼ.

AY MACHʼATIK JICH YA YALIK: «Tojolnax ya jkʼopontik te Diose ma sutbotik te jkʼoptike».

¿Bin ya anop te jaʼate?

¿BINTIK LA JNOPTIK?

Teme lokʼem ta koʼtantik te bin ya kalbeytik te Diose, ya xnoptsajotik ta stojol. Jaʼnix jich ya yakʼbotik slamalil koʼtantik sok ya skoltayotik ta spasel te bin ya skʼanbotik te Jehová.