Oyuk stsatsal koʼontontik xkaltik batel li sKʼop Diose

«Scotolic inoj ta yoʼntonic stsatsal ti Chʼul Espiritue. Jech jamal laj yalic batel li scʼop Diose; muʼyuc xiʼel laj yaʼyic.» (HECH. 4:31)

1, 2. ¿Kʼu yuʼun skʼan xkakʼtik persa ti baxbolukutik ta spasel lek li kabteltik ta chol mantale?

XI LAJ yalbe yajtsʼaklomtak Jesús kʼalal oxib xaʼox kʼakʼal skʼan xchame: «Ti lequil achʼ cʼop scʼoplal ti ventainel yuʼun ti Diose, ta xichʼ puquel ta sbejel banomil yoʼ jech ta snaʼic scotolic ti oy coltaele. Vaʼi un, ta xtal ti slajebal cʼacʼale». Kʼalal echʼem xaʼox jayibuk xemana xchaʼkuxiele, xi laj yal komel mantale: «Bat pasic ta jchʼunolajel cuʼun li cristianoetic ta jujun banamile. [...] Chanubtasic lec ta xchʼunel scotol li jmantaltac laj calboxuc avaʼyique». Laje xi to laj yale: «Te jchiʼinojoxuc o scotol cʼacʼal cʼalal to ta slajebal cʼacʼal» (Mat. 24:14, Ch; 26:1, 2; 28:19, 20).

² Li yajrextikoutik Jeova avie ta jpastik jun abtelal ti jaʼ tsta-o skolel li krixchanoetike, taje te lik talel ta baʼyel siglo. Jaʼ li abtelal ti mas tsots skʼoplale. Jaʼ yuʼun chaʼa, tsots skʼoplal ti baxbolukutik ta xcholel lek mantal xchiʼuk ta chanubtasvaneje. Li ta xchanobil liʼe te chkiltik kʼuxi tskoltautik chʼul espiritu sventa oyuk stsatsal koʼontontik li ta chol mantale, yan li ta yan chib xchanobil chtale te chkiltik kʼuxi tsbeiltasutik sventa xi jtojob mas ta chanubtasvanej xchiʼuk ti mu xkikta jbatik ta chol mantale.

Skʼan stsatsal koʼontontik

3. ¿Kʼusi vokolal ta jnuptantik ta chol mantal ti skʼan oyuk stsatsal koʼontontike?

³ Li Diose yakʼoj jun jmotontik ti mu kʼusi xkoʼolaj-oe, jaʼ li xcholbel skʼoplal Ajvalilal yuʼune. Pe oy ep vokoliletik ta jnuptantik ta skoj. Akʼo mi oy junantik krixchanoetik lek chaʼiik li lekil aʼyeje, jaʼ mas ep ti jechik kʼuchaʼal li krixchanoetik ta skʼakʼalil Noee, jech stalelalik kʼuchaʼal laj yal Jesús ti «muc xchʼunic ti chtal li pulel ta voʼe. Jaʼ to la xchʼunic ti cʼalal itale, pero ilaj o scotolic» (Mat. 24:38, 39). Junantike chlabavanik o chkontrainvanik (2 Ped. 3:3). Li kontrainel taje xuʼ van ta stojolal j-abteletik xtal, ta stojolal jchiʼiltaktik ta chanun, ta abtel o ta kutsʼ kalaltik. Pe oy to kʼusi mas ti vokol chkaʼitik ta tsalel xtoke, jaʼ ti xi jtsʼijet noʼoxe xchiʼuk ti chi jxiʼ ta skoj pʼajele. Jech ta melel, ep kʼusi tsmakutik ta be sventa jcholtik li mantale. ¿Kʼusi tskoltautik sventa «jamal acʼo cal[tik]» echʼel li sKʼop Diose xchiʼuk ti ta «stsatsal coʼnton ta xcal[tik]» echʼele? (Efe. 6:19, 20.)

4. 1) ¿Kʼusi jaʼ li stsatsal oʼontonale? 2) ¿Bu la sta stsatsal yoʼonton Pablo sventa chchol mantal li ta Tesalonicae?

⁴ Pe skʼan jkʼeltik baʼyel kʼusi jaʼ li stsatsal oʼontonale. Li kʼusi toʼox smelolal ta baʼyel li ta griego kʼope jaʼ ti «x-al noʼox yuʼun stekel» li jun krixchanoe, ti «melel li kʼusi chale» xchiʼuk ti «jamal chkʼopoje», pe jech xtok jaʼ skʼan xal ti «spatoj yoʼonton», ti «muʼyuk xiʼel chaʼie» xchiʼuk ti «tsots yoʼontone». Pe ti skʼan tsotsuk koʼontontike maʼuk skʼan xal ti muʼyuk xa slekil koʼontontike (Col. 4:6). Lek ti oy stsatsal koʼontontike, pe skʼan mu jsaʼtik kʼop (Rom. 12:18). Skʼan me oyuk jpʼijiltik xtok kʼalal ta jcholtik echʼel li aʼyej sventa Ajvalilale, maʼuk noʼox me ti oyuk stsatsal koʼontontike, yuʼun mu jkʼantik ti oy buchʼu chopol xaʼi li kʼusi chkaltike. Kʼuchaʼal chkiltike, maʼuk noʼox skʼan stsatsal yoʼonton li yajtsʼaklom Cristoe, skʼan me yan stalelal ti vokol jutuk ta tsʼitesele. Li stsatsal koʼontontike maʼuk me ta skoj ti kʼuyelan jtalelaltike o ti jpatoj lek koʼontontik ta jtojolaltike. Jnopbetik skʼoplal jtakbol Pablo xchiʼuk xchiʼiltak kʼalal bat xcholbeik mantal krixchanoetik ta Tesalonicae. Xi chal li jtakbole: «Laj yacʼbun lec stsatsal coʼntoncutic [...], jech te cʼot jcholcutic avaʼyic». ¿Kʼu yuʼun skʼan oyuk stsatsal yoʼontonik? Yuʼun xi laj yale: «Laj quichʼcutic qʼuexlaltasel [li] ta Filipose». ¿Bu la sta li stsatsal yoʼontonike? Xi chalbutik stuk li Pabloe: «Laj yacʼbun lec stsatsal coʼntoncutic li Dios cuʼuntique» (kʼelo 1 Tesalonicenses 2:2). Jech ta melel: xuʼ slokʼes ta koʼontontik xiʼel li Jeovae xchiʼuk ti xakʼ stsatsal koʼontontik kʼuchaʼal taje.

5. ¿Kʼuxi laj yakʼbe stsatsal yoʼonton Pedro, Juan xchiʼuk yan yajtsʼaklomtak Cristo li Jeovae?

⁵ Jvules ta joltik ti Pedro xchiʼuk Juane laj yichʼik tsakel ta kʼop yuʼun «li jʼabteletique, li moletique, xchiʼuc li jchanubtasvanejetique». Xi la stakʼ xchaʼvoʼalike: «Nopo avaʼyic bu junucal tsots scʼoplal ta chʼunel. Me jaʼ xjelov scʼoplal amantalic li voʼoxuque, me jaʼ yamal scʼoplal smantal li Diose. Yuʼun mu xuʼ ta jcomtsancutic xcholel li cʼusitic quilojcutique xchiʼuc li cʼusitic caʼyojcutique». Muʼyuk la skʼanik ta orasion ti akʼo xpaj li kontrainel chichʼike, moʼoj, xi la skʼanik vokol xchiʼuk li yan yajtsʼaklomtak Cristoe: «Cajval, qʼuelavil ep chisibtasuncutic. Pero acʼbun lec stsatsal coʼntoncutic ti jamal acʼo calcutic o acʼop, vuʼuncutic li avajtuneluncutique» (Hech. 4:5, 19, 20, 29). ¿Kʼuxi la stakʼ Jeova taje? (Kʼelo Hechos 4:31.) Laj yakʼbe xchʼul espiritu sventa stsatsub yoʼontonik. Jaʼ me jech xuʼ spas ta jtojolaltik ek. Pe ¿kʼusi skʼan jpastik sventa jtatik xchiʼuk ti sbeiltasutik ta chol mantale?

Kʼuxi xuʼ jta stsatsal koʼontontik

6, 7. ¿Kʼuxi jtos ti xuʼ jtatik li chʼul espiritue? Alo kʼusi kʼotem ta pasel.

⁶ Jtos ti kʼuxi xuʼ jtatik chʼul espiritue jaʼ ti jkʼantike. Xi laj yalbe Jesús li buchʼutik la xchiʼin ta loʼile: «Voʼoxuc ti chopoloxuc onoʼoxe, xanaʼic cʼusi lec chavacʼbeic li anichʼnabique. ¡Buuc xa li Atotic te oy ta vinajele Chʼul Espíritu chacʼbe li bochʼotic ta scʼanique!» (Luc. 11:13). Taje jaʼ tstij koʼontontik ti jkʼanilanbetik Jeova ti xakʼbutik li yip ch-abteje. Xuʼ mas jech jkʼantik kʼalal skʼan stsatsal koʼontontik mi chi jxiʼ ta xcholel mantal ta buyuk noʼoxe, ta kayeetik o jaʼ li ta pʼolmajebaletike (1 Tes. 5:17).

⁷ Jaʼ jech la spas jun ermana ti Rosa sbie.a Jun velta kʼalal jaʼo te oy li ta chanob vun ti bu ch-abteje, laj yil jun maestra ti yakal tskʼelbe yaʼyejal yan chanob vun ta sventa ti chlajik ta ilbajinel ololetike. Ilin tajek ta skoj li kʼusi la skʼel li maestrae, jaʼ yuʼun xi tsots laj yale: «¡Toj tsots xa noʼox maʼ vokolile!». Li ermanae lek xa laj yaʼi sventa chcholbe mantal. ¿Bu la sta stsatsal yoʼonton? Xi laj yale: «La jkʼanbe Jeova ti akʼo xakʼbun xchʼul espiritue». La xchapbe lek smelolal li ermanae xchiʼuk laj yalbe ti chchiʼin ta loʼil yan veltae. Jaʼ jechtik kʼot ta pasel ta stojolal Milane ti ta Nueva York nakale, voʼob jabil yichʼoj. Xi chal li tsebe: «Kʼalal mu to chi bat ta chanune, ta onoʼox jpaskutik orasion xchiʼuk li jmeʼe». ¿Kʼusi tskʼanbe Jeova li meʼile? Jaʼ ti akʼo x-akʼbat stsatsal yoʼonton yuʼun Jeova li Milane sventa tukʼ xakʼ sba xchiʼuk ti xalbe skʼoplal li sDiose. Xi chal li smeʼe: «Koliyal ti vaʼ yelan ta jpaskutike xchanoj xa jtseb kʼuyelan chalbe smelolal ti muʼyuk tspasbe skʼinal lokʼel ta jabile xchiʼuk li yan kʼinetike, vaʼun jpʼel ta yoʼonton ti muʼyuk tspas li kʼinetik taje». Kʼuchaʼal chkiltike, ¡toj jtunel ta melel kʼalal ta jkʼantik ta orasion li stsatsal koʼontontike!

8. ¿Kʼusi chakʼ kiltik li kʼusi kʼot ta pasel ta stojolal Jeremiase?

⁸ Jvules ta joltik xtok li koltael la sta Jeremías sventa stsal yuʼun li xiʼele. Kʼalal biiltasat ta j-alkʼop yuʼun Jeova ta stojolal li lumetike xi la spak skʼoplale: «Mu to jnaʼ xiloʼilaj, yuʼun queremun to» (Jer. 1:4-6). Pe ta mas tsʼakal une, ta sjunul yoʼonton xchiʼuk ta sjunul yipal laj yal batel li chapanel chakʼ Jeovae, ta skoj taje pʼise ta jun krixchano ti jaʼ noʼox chalbe skʼoplal vokolile (Jer. 38:4). Mas ta 75 jabil tsots laj yakʼbe yipal spasel li yabtele. Laj yojtikinik lek ta Israel ta skoj ti tsots yoʼonton la xchol mantale, yuʼun vakib sien jabil ta mas tsʼakale la snop krixchanoetik ti jaʼ la chaʼkuxi Jeremías li kʼalal laj yilik li Jesús ti mu snaʼ xiʼ la xchol mantale (Mat. 16:13, 14). ¿Kʼuxi tsal yuʼun Jeremías ti mu toʼox skʼan spas li yabtel xchiʼuk ti mu noʼox xkʼopoj chaʼie? Xi chal stuke: «Li acʼope chlic tsanuc ta coʼnton jech chac cʼu chaʼal cʼocʼ; ta xcʼacʼub cʼalal ta jbaquiltac. Ta jcʼan ta jpajes jba ta yalel li acʼope, pero mu xuʼ cuʼun» (Jer. 20:9). Li yipal skʼop Jeovae jaʼ la stijbe yoʼonton Jeremías sventa xkʼopoje.

9. ¿Kʼuxi xuʼ jech x-abtej ta jtojolaltik kʼuchaʼal Jeremías li sKʼop Diose?

⁹ Xi la stsʼiba Pablo li ta skarta sventa j-hebreoetike: «Li scʼop Diose cuxul, oy stsatsal, echʼem to jech chtuchʼ jelovel yuʼun jech chac cʼu chaʼal espada ti chaʼjot lec yee. Ch-och cʼalal to ta yut jol coʼntontic. Tsliʼ jelovel cʼalal to ta jtsʼacaliltic, cʼalal to ta jchʼuxuviltic. Xchiʼuc snaʼ cʼusi oy ta coʼntontic, xchiʼuc cʼusitic ta jnoptic» (Heb. 4:12). Li skʼop o li yaʼyej Diose jaʼ me jech ch-abtej ta jtojolaltik kʼuchaʼal li Jeremiase. Jvules ta joltik ti maʼuk ta spʼijil krixchano likem tal li Vivliae. Melel onoʼox ti viniketik la stsʼibae, pe akʼbat snaʼik yuʼun Dios li kʼusi la stsʼibaike. Jech kʼuchaʼal xi chal 2 Pedro 1:21: «Li scʼop Diose mu ta yoʼntonuc cristiano ilocʼ tal. Jaʼ iventainatic yuʼun Chʼul Espíritu. Jaʼ viniquetic icʼopojic ta sventa Dios». Jaʼ yuʼun kʼalal oy ta koʼontontik xchanel li Vivlia jaʼ ta jnojes ta jnopbentik li aʼyejetik laj yichʼ alel ta stojolal chʼul espiritue (kʼelo 1 Corintios 2:10). Li lekil aʼyejetik taje «chlic tsanuc ta coʼnton[tik] jech chac cʼu chaʼal cʼocʼ» sventa mu chʼanxiuk xi jkom yuʼun.

10, 11. 1) ¿Kʼu yelan skʼan jchan jVivliatik sventa xakʼ stsatsal koʼontontik li ta chol mantale? 2) Alo kʼusi anopoj cha pas sventa xlekub batel avuʼun ti kʼuxi cha chan aVivliae.

¹⁰ Mi ta jkʼantik akʼo x-abtej lek ta jtojolaltik li xchanel jVivlia jtuktike skʼan me x-och lek kʼalal to yutil koʼontontik li mantaletik chale xchiʼuk ti sjel li kʼusi oy ta koʼontontike. Jnopbetik skʼoplal avaʼi li Ezequiele. Akʼbat yil yuʼun Jeova ti akʼo sloʼ jun balbil vun ti jaʼ te tsakal skʼoplal li tsatsal mantal ti skʼan xalbe jun jteklum ti pim ta mantale. Li j-alkʼope skʼan xojtikin lek li mantaletik taje, jaʼ to mi jaʼ xa kuxul-o chaʼi sbae. Mi jech tspas kʼuchaʼal taje, jun me yutsil chaʼi kʼuchaʼal pom li yabtel ta chol mantale (kʼelo Ezequiel 2:8–3:4, 7-9).

¹¹ Jaʼ jech oyutik avi kʼuchaʼal li Ezequiele. Mu kʼunuk ta cholbel li smantal Diose, yuʼun ep krixchanoetik ti mu skʼan xaʼi li mantale. Sventa xkuch batel kuʼuntik spasel li kabteltike toj tsots me skʼoplal ti jchotan lek ta koʼontontik li mantaletik ta Vivlia kʼalal chi jchanunaje. Mu stakʼ mi bakʼintik noʼox ta jchantik li Vivliae; skʼan jchanilantik-o batel. Jechuk oy ta koʼontontik kʼuchaʼal xi kʼejin li jtsʼibajom yuʼun salmoe: «Mucʼul Dios, jaʼ acʼo locʼuc ta que, jaʼ acʼo jnopilan ta coʼnton li cʼusi lec chavile, voʼot li mucʼta ton cʼotemot cuʼune, voʼot li jpojvanejot cuʼune» (Sal. 19:14). Tsots me skʼoplal ti jnopbetik lek skʼoplal li kʼusi ta jkʼeltik ta Vivliae, yuʼun me jaʼ jech chkom lek ta koʼontontik li mantale. Jech ta melel, jtekeltik skʼan xkakʼtik persa sventa jchantik batel kʼuxi stakʼ jchantik lek li Vivliae.b

12. ¿Kʼu yuʼun tsots skʼoplal xi jbat ta tsobajeletik sventa sbeiltasutik li chʼul espiritue?

¹² Yan ti kʼuxi xuʼ jtatik xtok li chʼul espiritue jaʼ ti xkakʼ ta jkuxlejaltik li tojobtasel liʼe: «Acʼo jnoptic cʼu xʼelan tscʼan chcalbe jbatic, yuʼun jech coʼol acʼo cʼuxubinvancutic xchiʼuc coʼol acʼo jpastic cʼusitic lec. Mu me xi jpaj ti ta jtsobilan jbatic ta yaʼyel scʼop Diose» (Heb. 10:24, 25). Li tsobobbaile jaʼ jtos ti kʼuyelan tsbeiltasutik li chʼul espiritue; jaʼ yuʼun mi ta jkʼantik akʼo xi sbeiltasutike skʼan me xkakʼtik persa ti xi jbat ta stekel tsobajeletike, jtsʼetanbetik lek xchikinal xchiʼuk ti xkakʼ ta jkuxlejaltik li kʼusi ta jchantik tee (kʼelo Apocalipsis 3:6).

Oy sbalil kʼalal tsots koʼontontike

13. ¿Kʼusi chkʼot ta nopel kuʼuntik kʼalal ta jkʼelbetik skʼoplal li chol mantal la spas yajtsʼaklomtak Cristo ta baʼyel sigloe?

¹³ Li chʼul espiritu ti jaʼ li juʼelal mas tsots ta sjunul vinajel-balumile, chakʼbe yipal li yajtuneltak Jeova sventa spas yuʼunik li kʼusi tskʼan yoʼonton Diose. Jaʼ jech kʼot ta stojolalik li yajtsʼaklomtak Cristo ta baʼyel sigloe, ep tajek la xcholik mantal, jaʼ yuʼun xi laj yalike: «Laj xa yichʼ cholbel scotol cristianoetic liʼ ta banamile» (Col. 1:23). Mi ta jtsaktik ta venta ti «muʼyuc chanubtasbilic, xchiʼuc ti muʼyuc yabtelique», jaʼ skʼan xal ta melel ti oy kʼusi toj tsots tijbat-o yoʼontonike (Hech. 4:13).

14. ¿Kʼusi skʼan jpastik sventa x-abtej ta jtojolaltik li chʼul espiritue?

¹⁴ Kʼalal jaʼ jech chkuxi kʼuchaʼal li beiltasel chakʼ chʼul espiritu li yajtsʼaklom Cristoe jaʼ me jech tsots yoʼonton li ta chol mantale. Jtos ti kʼusi chkoltaatik sventa akʼo xtijbat yoʼontonik yuʼun «li chʼul espiritue» jaʼ ti akʼo skʼanilanbeik Jeovae, ti baxbolikuk ta xchanel sVivlia stukike, ti akʼo spasik orasion sventa snopbeik smelolal li kʼusi la xchanike xchiʼuk ti xbatik ta stekel tsobajeletike (Rom. 12:11, NM). Jech kʼuchaʼal kʼalal «icʼot ta Éfeso jun judío vinic, Apolos sbi, liquem ta lum Alejandría. Lec snaʼ xloʼilaj». ¿Kʼusi koltaat ti muʼyuk xiʼel chaʼie? Xi tstakʼbutik li Vivliae: «Ta scotol yoʼnton ta xcholilan [«ta stojolal li chʼul espiritue», NM], xchiʼuc lec jamal chchanubtasvan ta sventa li Jesuse» (Hech. 18:24, 25). Mi chkakʼ akʼo stij koʼontontik ek «li chʼul espiritue» mas to me tsots koʼontontik li ta chol mantal ta naetike (Rom. 12:11, NM).

15. ¿Kʼusi sbalil ta jtatik kʼalal oy stsatsal koʼontontik ta chol mantale?

¹⁵ Toj lek me kʼusi chkʼot ta pasel kuʼuntik kʼalal ta sjunul koʼontontik ta jcholtik mantale. Chlekub jtalelaltik, yuʼun chkaʼibetik mas smelolal ti toj tsots skʼoplal xchiʼuk ti oy sbalil li kabteltike. Mas xkuxet koʼontontik xchiʼuk xi jmuyubaj ta skoj ti mas ta jchantik batel chanubtasvaneje. Mas ch-ayan ta koʼontontik xtok ta skoj ti jnaʼojtik ti skʼan xa noʼox pasel ta anil li chol mantale.

16. ¿Kʼusi stakʼ jpastik mi muʼyuk xa mas ta koʼontontik chol mantal kʼuchaʼal ta slikebale?

¹⁶ Pe ¿kʼusi stakʼ jpastik mi muʼyuk xa mas ta koʼontontik chol mantal kʼuchaʼal ta slikebale? Ti kʼusi baʼyel skʼan jpastike jaʼ ti jkʼel jbatik leke, jech kʼuchaʼal xi chalbutik Pabloe: «Nopo lec avaʼay atuquic me jun avoʼnton achʼunojique; aʼyo lec aba avaʼay atuquic cʼu xaʼelanic» (2 Cor. 13:5). Xi jakʼbe jbatike: «¿Mi kuxul lek ta koʼonton li chʼul espiritue? ¿Mi ta jkʼanbe Jeova ti akʼo xakʼbun li yipal ch-abteje? ¿Mi xvinaj ta j-orasion ti jpatoj lek koʼonton ta stojolal Dios ti jaʼ tskoltaun ta spasbel li kʼusi tskʼan yoʼontone? ¿Mi koliyal chkalbe ta skoj ti jaʼ jun matanal chkaʼi ti chi tun ta chol mantale? ¿Mi nopem xkaʼi chi chanunaj? ¿Kʼu sjalil ta jnopbe skʼoplal li kʼusi ta jkʼel xchiʼuk chkaʼie? ¿Mi chkakʼilan jloʼil ta tsobajeletik?». Kʼalal jech ta jakʼbe jbatike jaʼ me te chkakʼtik venta kʼusi skʼan jtukʼibtastik batel xchiʼuk ti kʼusi skʼan jpastik ta skoje.

Akʼo yakʼ stsatsal koʼontontik li chʼul espiritue

17, 18. 1) ¿Kʼu to yepal epajem avi li chol mantale? 2) ¿Kʼuxi xuʼ «jamal [jcholtik]» echʼel li lekil aʼyeje?

¹⁷ Xi laj yalbe yajtsʼaklomtak li Jesús kʼalal chaʼkuxiem xaʼoxe: «Cʼalal me laj avichʼic li Chʼul Espiritue, chavichʼic avuʼel atsatsalic. Jech voʼoxuc chavalic batel liʼ ta lum Jerusalén, xchiʼuc ta yosilal Judea, xchiʼuc ta Samaria banamil, xchiʼuc ta sbejel banamil li cʼusi laj avilic ta jventae» (Hech. 1:8). Ti kʼu to yepal epajem li abtelale, mu xa noʼox bu xkiltik-o jech ta sjunul kuxlejal. Oy xa vukub miyon yajrextikotak Jeova chalik batel mas ta 230 lumetik li Ajvalilal yuʼun Diose. Jutuk mu 1,500 miyon ora chcholik mantal jujun jabil. ¡Toj lek xa noʼox ti ta jkolta jbatik li ta chol mantal ti muʼyuk bu chichʼ pasel jech yan veltae!

¹⁸ Jech kʼuchaʼal li ta baʼyel sigloe, li chol mantal ta spʼejel Balumil avie beiltasbil yuʼun chʼul espiritu. Jamal me ta jcholtik echʼel mantal mi chkakʼ akʼo sbeiltasutik li chʼul espiritue (Hech. 28:31). Jaʼ yuʼun akʼo me sbeiltasutik skotol ora li chʼul espiritu kʼalal ta jcholtik echʼel li lekil aʼyej sventa Ajvalilal yuʼun Diose.

[Tsʼibetik ta yok vun]

¿Kʼusi la achan?

• ¿Kʼu yuʼun skʼan stsatsal koʼontontik kʼalal chkaltik echʼel sKʼop Diose?

• ¿Kʼusi koltaatik sventa muʼyuk xiʼik ta chol mantal li yajtsʼaklomtak Cristo ta baʼyel sigloe?

• ¿Kʼuxi xuʼ stsatsub mas koʼontontik?

• ¿Kʼusi sbalil tstabe li yajtsʼaklom Cristo kʼalal tsots yoʼontone?

[Lokʼol ta pajina 7]

¿Kʼuxi xuʼ jkoltatik sventa tsotsuk yoʼonton li kalab jnichʼnabtike?

[Lokʼol ta pajina 8]

Ta me xakʼ stsatsal koʼontontik ta xcholel mantal kʼalal ta jpastik jlikeluk orasione