XCHANOBIL 40
«Chikʼik tal yantik ta spasel li kʼusi tukʼe»
«Li buchʼutik chikʼik tal yantik ta spasel li kʼusi tukʼe chojobajik sbatel osil jech kʼuchaʼal li kʼanaletike» (DAN. 12:3).
KʼEJOJ 151 Chkʼoponatik yuʼun Jeova
LI KʼUSI TA JCHANTIKEa
1. ¿Kʼusi labal sba chkʼot ta pasel kʼalal ch-ajvalilaj ta Jmil Jabil li Kristoe?
KʼALAL ch-ajvalilaj ta Jmil Jabil li Kristoe, ¿mi xnop xa noʼox kuʼuntik kʼu yelan chkaʼi jbatik mi lik yichʼik chaʼkuxesel li buchʼutik chamemike? Oy xa tajek ta koʼontontik ti jkʼeltik yan velta li buchʼu chamem kuʼuntike. Jaʼ jech oy ta yoʼonton li Jeova eke (Job 14:15). Ta spʼejel balumile, chijmuyubajutik kʼalal chkiltik ti chchaʼkuxiik talel li buchʼutik chamem kuʼuntike. Jech kʼuchaʼal la jkʼeltik li ta xchanobil echʼe, «li buchʼutik tukʼike» ti te xa tsʼibabil sbiik li ta livro sventa kuxlejale «chchaʼkuxiik sventa kuxlejal» (Ech. 24:15; Juan 5:29). Li buchʼutik chamem kuʼuntike xuʼ van jaʼ baʼyel chchaʼkuxiik.b Jech xtok, «li buchʼutik muʼyuk tukʼike» ti jaʼik li buchʼutik muʼyuk laj yojtikinik Jeova o ti muʼyuk tunik ta stojolale «chchaʼkuxiik sventa chapanel».
2, 3. 1) Jech kʼuchaʼal chal ta Isaias 11:9 xchiʼuk 10, ¿kʼu yelan chichʼ akʼel li chanubtasel ti muʼyuk jech ilbil-oe? 2) ¿Kʼusi ta jkʼelbetik skʼoplal li ta xchanobil liʼe?
2 Skotol li buchʼutik chchaʼkuxiik tale ep kʼusitik skʼan xchanik (Is. 26:9; 61:11). Jaʼ yuʼun, oy kʼusitik chichʼ chapanel sventa xichʼ akʼel li chanubtasel ti muʼyuk jech ilbil-oe (kʼelo Isaias 11:9, 10). Li buchʼutik muʼyuk tukʼike skʼan xchanik ta sventa li Jesukristoe, li Ajvalilal yuʼun Diose, li pojelale, ti toj tsots skʼoplal li sbi Jeovae xchiʼuk ti kʼu yuʼun jaʼ noʼox oy sderecho ch-ajvalilaje. Li buchʼutik tukʼik eke skʼan xchanik li kʼusitik yaloj tal Jeova ta sventa li kʼusi oy ta yoʼonton tspase. Junantik li yajtuneltak Jeovae jaʼo chamik kʼalal muʼyuk toʼox tsutsem stsʼibael li Vivliae. Ep kʼusitik skʼan xchanbeik skʼoplal li buchʼutik muʼyuk tukʼik xchiʼuk li buchʼutik tukʼike.
3 Li ta xchanobil liʼe chichʼ takʼel batel liʼe: ¿kʼu yelan li chanubtasel taje?, ¿kʼusi chkʼot ta stojolalik li buchʼutik chchʼamik li chanubtasele? xchiʼuk ¿kʼusi chkʼot ta stojolalik mi muʼyuk la xchʼamike? Taje skʼan me oyuk ta koʼontontik yaʼibel smelolal. Ta jkʼeltik batel junantik albil kʼop ti chal li ta slivroal Daniel xchiʼuk Apokalipsise. Taje tskoltautik ta yaʼibel smelolal li kʼusi chkʼot ta pasel kʼalal mi chaʼkuxiik talel li animaetike. Baʼyel kalbetik skʼoplal li kʼusi chal ta Daniel 12:1 xchiʼuk 2.
«EP BUCHʼUTIK CHJULAVIK TI TE VAYEMIK TA YUT BALUMILE»
4, 5. Jech kʼuchaʼal chal ta Daniel 12:1, ¿kʼusi chkʼot ta pasel li ta slajebal kʼakʼale?
4 (Kʼelo Daniel 12:1). Li ta slivroal Daniele lek xcholet chalbe skʼoplal li kʼusitik chkʼot ta pasel ta slajebal kʼakʼale. Jech kʼuchaʼal liʼe, li Daniel 12:1 chal ti tskoltabe steklumal Dios li Miguele, jaʼ xkaltik, li Jesukristoe. Li albil kʼop taje jaʼo lik kʼotuk ta pasel ta 1914 kʼalal lik spas mantal ta vinajel li Jesukristoe.
5 Li Daniele laj yichʼ albel xtok ti jaʼo chtots talel Jesus kʼalal jaʼo «yorail vokolil ti muʼyuk bu jech kʼotem ta pasel ti kʼuxi lik li baʼyel mukʼta lum kʼalal to li vaʼ kʼakʼale». Li yorail vokolil taje jaʼ skʼoplal li «mukʼta tsatsal vokolil» chal ta Mateo 24:21. Li Jesuse chtots talel sventa tspoj li steklumal Dios ta Armajedone, taje jaʼ xa te chlaj-o skʼoplal li vokolile. Li slivroal Apokalipsise chal ti jaʼ skʼoplalik li «epal krixchanoetik» ti «kuxul chkomik li ta mukʼta tsatsal vokolile» (Apok. 7:9, 14).
6. ¿Kʼusi chkʼot ta pasel mi nel xa ox li mukʼta tsatsal vokolile, xchiʼuk kʼu yuʼun ti jech chkaltike? (Li ta revista liʼe kʼelo xtok li jvokʼ mantal ti xi sbie: «Li kʼusitik tsjakʼ jkʼelvunetike» ti chalbe skʼoplal li chaʼkuxesel ta balumile).
6 (Kʼelo Daniel 12:2). ¿Kʼusi chkʼot ta pasel mi nel xa ox li mukʼta tsatsal vokolile? Jaʼo te chlik li chaʼkuxesel jech kʼuchaʼal chal li albil kʼope. Li chaʼkuxesel chal ta Daniel 12:2 jnopojtik toʼox ti jaʼ skʼoplal kʼalal epaj talel spasbel yabtel Dios akʼo mi tskʼan ox tspajesik cholmantal ta 1918 li jkontrainvanejetike.c Pe li kʼusi skʼan xal ta melele jaʼ li chaʼkuxesel ta achʼ balumile. ¿Kʼuxi jnaʼojtik taje? Kʼalal balumil xi ta Daniel 12:2, jaʼ chalbe skʼoplal li pukuktik ta Job 17:16, taje jaʼ skʼan xal li Mukinale. Jaʼ yuʼun, xuʼ xkaltik ti jaʼ skʼoplal li chaʼkuxesel chkʼot ta pasel mi echʼ xa ox li Armajedone.
7. 1) ¿Kʼusi skʼan xal ti oy buchʼutik chichʼik chaʼkuxesel sventa xkuxiik sbatel osile? 2) ¿Kʼu yuʼun mas lek li chaʼkuxesel taje?
7 Li ta Daniel 12:2 chal ti oy buchʼutik chchaʼkuxiik «sventa xkuxiik sbatel osil». ¿Kʼusi skʼan xal taje? Jaʼ ti xuʼ xkuxiik-o sbatel osil li buchʼutik chchaʼkuxiik mi jech-o chakʼik persa ta yojtikinel Jeova xchiʼuk Jesukristo xchiʼuk ti xchʼunik mantal li ta Jmil Jabile (Juan 17:3). Taje jaʼ «li chaʼkuxesel ti mas leke» ti mu xkoʼolaj kʼuchaʼal laj yichʼik chaʼkuxesel ta voʼnee (Ebr. 11:35). ¿Kʼu yuʼun? Yuʼun li buchʼutik laj yichʼik chaʼkuxesele chamik yan velta.
8. ¿Kʼusi skʼan xal ti chchaʼkuxiik junantik sventa xichʼik kʼexlaltasel xchiʼuk pʼajel sbatel osile?
8 Mu skotoluk li buchʼu chchaʼkuxiik tale chchʼamik li chanubtasel chakʼ Jeovae. Li albil kʼop ta Daniele chal ti jlom ti buchʼu chchaʼkuxiik tale jaʼ «sventa xichʼik kʼexlaltasel xchiʼuk pʼajel sbatel osil». Ta skoj ti tstoy sbaike, muʼyuk te chichʼ tsʼibabel sbiik li ta livro sventa kuxlejale xchiʼuk chichʼik «pʼajel sbatel osil», jaʼ xkaltik, chichʼik lajesel. Li Daniel 12:2 jaʼ chalbe skʼoplal li kʼusi chkʼot ta stojolalik li buchʼutik chchaʼkuxiike, yuʼun jaʼ chichʼ tsakel ta venta li kʼusi tspasik kʼalal mi chaʼkuxiemik xa oxed (Apok. 20:12). Junantike chkuxiik sbatel osil, li yantike muʼyuk.
«CHIKʼIK TAL YANTIK TA SPASEL LI KʼUSI TUKʼE»
9, 10. 1) Jech kʼuchaʼal chal ta Daniel 12:3, ¿kʼusi yan chkʼot ta pasel mi tsuts xa ox li mukʼta tsatsal vokolile? 2) ¿Buchʼutik ti «sakmesanik noʼox likel jech kʼuchaʼal li vinajele»?
9 (Kʼelo Daniel 12:3). ¿Kʼusi yan chkʼot ta pasel mi tsuts xa ox li yorail vokolile? Li ta Daniel 12:3 chal ti oy to kʼusi yan chkʼot ta pasel kʼalal mi echʼem xa ox li mukʼta tsatsal vokolile.
10 ¿Buchʼutik ti «sakmesanik noʼox likel jech kʼuchaʼal li vinajele»? Te ta jtabetik stakʼobil ta Mateo 13:43 ti jaʼ laj yal li Jesuse. Xi laj yale: «Li vaʼ kʼakʼale, li buchʼutik tukʼike ta xojobajik tajek kʼuchaʼal kʼakʼal li ta Ajvalilal yuʼun Stotike». Kʼalal laj yal Jesus taje, jaʼ yakal chalbe skʼoplal «li xnichʼnab Ajvalilale», jaʼ xkaltik, li buchʼutik tʼujbil chbatik ta vinajel ti ch-ajvalilajik xchiʼuke (Mat. 13:38). Jaʼ yuʼun, li Daniel 12:3 jaʼ van chalbe skʼoplal li buchʼutik tʼujbil chbatik ta vinajele xchiʼuk li kʼusi tspasik kʼalal mi ajvalilajik li ta Jmil Jabile.
Li 144 mile jmoj ch-abtejik xchiʼuk Jesukristo sventa sbeiltasik li chanubtasel chichʼ akʼel li ta Jmil Jabile. (Kʼelo parafo 11).
11, 12. ¿Kʼusi tspasik li 144 mil li ta Jmil Jabile?
11 Li buchʼutik tʼujbil chbatik ta vinajele, ¿kʼuxi «chikʼik tal yantik ta spasel li kʼusi tukʼe»? Jaʼo kʼalal jmoj ch-abtejik xchiʼuk Jesukristo ta sbeiltasel li chanubtasel chichʼ akʼel ta spʼejel balumil li ta Jmil Jabile. Li 144 mile maʼuk noʼox ch-ajvalilajik, yuʼun chtunik ta paleal xtok (Apok. 1:6; 5:10; 20:6). Jaʼ yuʼun, tskoltaik li krixchanoetik sventa ta kʼunkʼun xtukʼibike (Esek. 47:12; Apok. 22:1, 2). Li buchʼutik chmuyik ta vinajele xmuyubajik tajek ti tskolta sbaike.
12 ¿Buchʼutik ti chichʼik ikʼel batel «ta spasel li kʼusi tukʼe»? Jaʼik li buchʼutik chchaʼkuxiike, li buchʼutik kuxul chjelavik ta Armajedone xchiʼuk li buchʼutik jaʼ to chvokʼik li ta achʼ balumile. Mi tsuts li Jmil Jabile, naka tukʼil krixchanoetik xa ox. Jaʼ yuʼun chaʼa, ¿bakʼin chichʼ tsʼibabel sbiik ta lapisero xkaltik li ta livro sventa kuxlejale?
SLAJEB PREVA
13, 14. Li tukʼil krixchanoetik ti chkuxiik ta balumile, ¿kʼusi skʼan xakʼik ta ilel kʼalal skʼan toʼox staik li kuxlejal sbatel osile?
13 Teuk ta joltik ti maʼuk skʼan xal ti chkuxi xa sbatel osil li buchʼu tukʼe. Kalbetik skʼoplal li Adan xchiʼuk Evae. Akʼo mi tukʼil krixchanoetik toʼox, skʼan xchʼunbeik smantal Jeova sventa xkuxiik sbatel osil. Pe mu jechuk la spasik (Rom. 5:12).
14 Jech kʼuchaʼal laj xa kiltike, naka tukʼil krixchanoetik xa ox ta balumil mi tsuts li Jmil Jabile. Li krixchanoetik taje, ¿mi chakʼik van ti jaʼ xa xventainatik-o sbatel osil yuʼun li Ajvalilal yuʼun Diose? ¿O mi tstoy van sbaik jech kʼuchaʼal la spasik li Adan xchiʼuk Evae? ¿Kʼuxi xuʼ xichʼ naʼel taje?
15, 16. 1) Li krixchanoetike, ¿bakʼin chakʼik ta ilel mi tukʼ chakʼ sbaik ta stojolal Jeova? 2) ¿Kʼusi chkʼot ta pasel mi tsuts li slajeb prevae?
15 Li Satanase chichʼ chukel jmil jabil. Li vaʼ sjalile, muʼyuk tsloʼla li krixchanoetike. Pe mi tsuts li jmil jabile, chichʼ koltael lokʼel. Vaʼun, chakʼ persa ta sloʼlael li tukʼil krixchanoetike. Kʼalal mi laj yichʼik akʼel ta prevae, skʼan xakʼik ta ilel mi chichʼbeik ta mukʼ sbi li Diose xchiʼuk mi chakʼ sbaik ta ventainel li ta Ajvalilal yuʼune (Apok. 20:7-10). Vaʼun, te me chvinaj mi te tsʼibabil chkom-o sbiik li ta livro sventa kuxlejale.
16 Mu jnaʼtik jayvoʼ krixchano chlik stoy sbaik ta stojolal Jeova jech kʼuchaʼal la spasik li Adan xchiʼuk Evae. ¿Kʼusi chkʼot ta stojolalik? Xi chal Apokalipsis 20:15: «Li buchʼutik muʼyuk te tsʼibabil skʼoplalik li ta slivroal kuxlejale laj yichʼik jipel ochel ta nab ti oy skʼakʼale». Li buchʼutik tstoy sbaike chichʼik-o lajesel ta sbatel osil. Pe jutuk mu skotoluk li krixchanoetike tukʼ chakʼ sbaik. Jaʼ yuʼun, te tsʼibabil-o chkom sbiik li ta livro sventa kuxlejale.
LI TA SLAJEBAL KʼAKʼALE
17. ¿Kʼusi albat Daniel ti chkʼot ta pasel li ta slajebal kʼakʼale? (Daniel 12:4, 8-10).
17 ¡Oy xa tajek ta koʼontontik ti xkʼot ta pasel li kʼusitik laj xa kalbetik skʼoplale! Oy jun anjel ti laj yalbe Daniel li kʼusi chkʼot ta pasel li ta slajebal kʼakʼale (kʼelo Daniel 12:4, 8-10; 2 Tim. 3:1-5). Xi laj yalbee: «Ch-epaj li melel yojtikinobile». Jaʼ yuʼun, li steklumal Diose chaʼibeik lek smelolal li albil kʼopetik li ta slivroal Daniele. Li anjele laj yal ti oy to kʼusi yan chkʼot ta pasel li ta slajebal kʼakʼale. Xi laj yale: «Li buchʼutik toj chopolike mas to chopol kʼusi tspasik xchiʼuk muʼyuk chaʼibeik smelolal».
18. ¿Kʼusi poʼot xa xkʼot ta stojolalik li chopol krixchanoetike?
18 Li ta jkʼakʼaliltike, muʼyuk noʼox kʼusi chichʼik pasbel yileluk li chopol krixchanoetike (Mal. 3:14, 15). Pe li Jesuse poʼot xa xakʼbe stoj smul li buchʼutik xkoʼolaj kʼuchaʼal tentsune xchiʼuk chchʼak lokʼel li buchʼutik xkoʼolajik kʼuchaʼal chijetike (Mat. 25:31-33). Li chopol krixchanoetike te chichʼik lajesel li ta mukʼta tsatsal vokolile xchiʼuk muʼyuk chichʼik chaʼkuxesel li ta achʼ balumile. Muʼyuk chichʼ tsakbel sbiik li ta «livro sventa svulesobil ta jolil» ti chal ta Malakias 3:16.
19. ¿Kʼusi skʼan jpastik li avie, xchiʼuk kʼu yuʼun? (Malakias 3:16-18).
19 Jaʼ xa yorail ti xkakʼtik ta ilel ti mu xijkoʼolaj kʼuchaʼal li chopol krixchanoetike (kʼelo Malakias 3:16-18). Li Jeovae yakal tstsob «jun jteklum ti stuk noʼox jeche», jaʼ xkaltik, li kʼusi toj ep sbalil chile. ¿Mi mu jechuk ti ta jkʼantik ti teuk jkʼoplaltike?
¡Chijmuyubaj mi chaʼkuxiik sventa xichʼ smotonik ta achʼ balumil li Daniel, li kutsʼ kalaltik xchiʼuk li yantike! (Kʼelo parafo 20).
20. ¿Kʼusi albat li Daniele, xchiʼuk kʼu yuʼun oy ta avoʼonton ti xkʼot xa ta pasele?
20 Labal sba li kʼusitik yakal chkʼot ta pasel avie. Pe mas to labal sba li kʼusitik chkʼot ta pasel ta tsʼakale. Poʼot xa xlaj skʼoplal li choplejale, vaʼun chkiltik chkʼot ta pasel li kʼusi xi albat yuʼun Jeova li Daniele: «Chatots talel sventa xavichʼ amoton li ta slajebal kʼakʼale» (Dan. 12:13). ¿Mi chakʼan xa ti xkʼot skʼakʼalil ti chchaʼkuxi talel li Daniel xchiʼuk li buchʼutik chamem avuʼune? Mi jeche, akʼo avipal sventa tukʼuk xavakʼ aba ta stojolal Jeova. Vaʼun, te tsʼibabil chkom abi li ta livro sventa kuxlejale.
KʼEJOJ 80 Pasik preva ti toj lek li Jeovae
a Li ta xchanobil liʼe ta jkʼeltik ti jel xa ti kʼu toʼox yelan chichʼ aʼibel smelolal li Daniel 12:2 xchiʼuk 3 ta sventa ti kʼu yelan ep buchʼutik chichʼ chanubtasele. Chkalbetik skʼoplal bakʼin chkʼot ta pasel xchiʼuk buchʼutik chkoltavanik. Ta jkʼeltik xtok ti tstabeik sbalil li chanubtasel li buchʼutik chkuxiik ta balumil sventa xkuch yuʼunik li slajeb prevae, ti jaʼo chkʼot ta pasel mi laj li Ajvalilal ta Jmil Jabil yuʼun Kristoe.
b Yikʼaluk van jaʼ baʼyel chichʼik chaʼkuxesel li yajtuneltak Jeova ti chamik ta slajebal kʼakʼale, vaʼun ta kʼunkʼun chichʼik chaʼkuxesel batel li buchʼu mas xa voʼne xchamelike. Mi jech kʼot ta pasele, jaʼ oy buchʼutik xojtikinik li buchʼutik chchaʼkuxiik tale. Li Vivliae chal ti «xkechet chchaʼkuxiik» batel li ta vinajele, jaʼ yuʼun xuʼ xkaltik ti xkechet chchaʼkuxiik talel li ta balumil eke (1 Kor. 14:33; 15:23).
c Ti kʼu yelan laj yichʼ chapbel smelolal liʼe mu xa jechuk kʼuchaʼal chal ta kapitulo 17 li ta livro Prestemos atención a las profecías de Daniel xchiʼuk li ta revista La Atalaya ta 1 yuʼun julio ta 1987, pajina 21 kʼalal ta 25.
d Kʼalal chalbe skʼoplal ta Echos 24:15 «li buchʼutik tukʼike xchiʼuk li buchʼutik muʼyuk tukʼike» xchiʼuk kʼalal chalbe skʼoplal ta Juan 5:29 «li buchʼutik lek kʼusitik la spasike» xchiʼuk «li buchʼutik toj chopol kʼusitik la spasike», jaʼ chalbe skʼoplal li kʼusi la spasik kʼalal skʼan toʼox xchamike.