Nye tua kũlĩha catiamẽla kohenda ya Yehova? Eye wa lekisa ndati okuti “ka yongola okuti umue o nyõliwa?” (2 Pet. 3:9) Tu konomuisi ndomo Yehova a lekisa okuti ukuahenda komanu vamue va linga akandu anene. Soma Daviti wa linga akandu anene oku kongelamo ukahokolo kuenda umondi. Pole, Daviti wa likekembela kuenje Yehova lohenda wo wecela. (2 Sam. 12:​1-12) Soma Manase wa linga ovina vialua ka via sungulukile vokuenda kuonepa yalua yomuenyo waye. Ndaño lovina viaco, Yehova wa lekisa ohenda ku Manase kuenda wo wecela momo eye wa likekembela. (2 Asa. 33:​9-16) Ovolandu a-a a tu ivaluisa okuti, Yehova olonjanja viosi o lekisa ohenda eci ku molẽha esunga lioku ci linga. Eye o ka pindula omanu vaco, momo ovo va limbuka okuti va lingile akandu anene kuenda va likekembela. w24.05 4 ¶12

Yehova noke lioku yovola afendeli vaye kupika Kegito, wa nõla ovitunda oco vi vumbe vo tavernakulu. Va Lewi va nõliwile oco va linga ovopange akuavo atiamẽla kocitumãlo caco ci kola. Anga hẽ vana va kala oku vumbila vo tavernakulu, ale vana va tungile ocipepi layo, Yehova wa va tata lonjila ya velapo okuti, vakuavo ci sule? Sio! Ku Yehova omanu vosi vamuamue, momo eye hokuacameko. Omunu lomunu pokati ka va Isareli, wa ponduile oku kala ekamba lia Yehova. Ndeci, Yehova wa ecelela okuti epata liosi lia va Isareli, li mola elende kuenda ulienge wondalu wa kala kilu lio tavernakulu. (Etu. 40:38) Eci elende lia enda oku votoka oco li va songuile konepa yikuavo, ndaño muẽle vana va kala ocipãla lo tavernakulu, va ponduilevo oku ci mola. Kuenje apata a ponduile oku longeka ovikuata viavo, loku longolola olombalaka kuenda oku kuama epata liosi. (Ate. 9:​15-23) Cimuamue haico koloneke vilo, kuosi tu sangiwa kilu lieve, vosi yetu tu pondola oku limbuka ocisola ca Yehova poku tu tata kuenda eteyuilo liaye. w24.06 4 ¶10-12

Omuenyo wa Daviti wa kala kohele, momo omõlaye Avisalome wa yonguile oku u ponda oco a piñale pomangu yaye ndosoma. (2 Sam. 15:​12, 13) Kuenje Daviti wa sukilile oku tilila ko Yerusalãi lonjanga yalua! Akuenje vaye va kala oku tila, Daviti wa limbuka okuti umue wa sukilile oku siala ko Yerusalãi oco a kũlĩhe ovina Avisalome a kala oku sokiya loku u sapuilako. Omo liaco, wa tuma Sadoke kuenda ovitunda vikuavo oku tiukila volupale oco vo sapuile ovina via kala oku pita. (2 Sam. 15:​27-29) Pole, ovo va sukilile oku kuata utate. Daviti wa kuatele esokiyo limue, pole, oco li tẽlisiwe wa sukilile ekuatiso lia Sadoke kuenda liekamba lia koleliwile okuti Husiai. (2 Sam. 15:​32-37) Husiai wa sukilile oku likembisa okuti wa kala oku kuatisa Avisalome, loku eca onumbi ndomo eye a ponduile oku ñualilapo isiaye. Pole, eci ca laikele oku eca ku Daviti epuluvi lioku lipongiyila uyaki. Eci Avisalome a nõlapo oku kuama olonumbi via Husiai, Husiai wa sapuila Sadoke kuenda Aviatare esokiyo liaco. (2 Sam. 17:​8-16) Kuenje ovo va tuma esapulo limue ku Daviti lina lia tẽla oku teyuila omuenyo wa Daviti.—2 Sam. 17:​21, 22. w24.07 4-5 ¶9-10