Tu pondola oku ci linga, poku sanda oku linga eci ciwa kakamba va Yehova kuenda oku lekisa esumbilo kokuavo. (Va Rom. 12:10) Osamo 15:4 yi popiavo okuti, omunu una okuti ukombe vombalaka ya Yehova, “ka litiukamo kohuminyo yaye ndaño cu nenela epese.” Eci tu siapo oku tẽlisa olohuminyo vietu, tu pondola oku sumuisa vakuetu. (Mat. 5:37) Ndeci, Yehova o lavoka okuti ulume lukãi va tẽlisa olohuminyo va linga komunu lukuavo keteke liolohuela. Yehova o sanjukavo calua eci olonjali vi likolisilako oku tẽlisa olohuminyo va linga komãla vavo. Omo liocisola tu kuetele Yehova kuenda omanu, tu likolisilako oku tẽlisa olohuminyo vietu. Onjila yikuavo yoku sumbila akamba va Suku, poku va yekisa kuenda oku va poka. (Va Rom. 12:13) Oku pita otembo la vamanji okuti ka tu ci lingi lika kolohongele, ale kupange woku kunda, ci ka tu kuatisa oku pamisa ukamba tu kuete lavo kuenda la Yehova. Handi vali, poku kala vakuakuyekisa, tu kasi oku setukula Yehova. w24.06 12 ¶15-16

Yehova o situluila lika ocili kambombe. (Mat. 11:25) Kuenje etu lumbombe, tu tava kekuatiso lioku lilongisa ocili. (Ovil. 8:​30, 31) Pole, tu sukila oku kuata utate oco ka tu ka kale vakuepela. Momo nda tua linga vakuepela, tu fetika oku sima okuti ovisimĩlo vietu via velapo vali okuti, olonumbi Viembimbiliya kuenda viocisoko ca Yehova vi sule. Nda tu yongola oku amamako oku kala ambombe, tu sukila oku ivaluka okuti etu tu sule, oku ci sokisa la Yehova. (Osa. 8:​3, 4) Tu sukilavo oku likutilila ku Yehova oku pinga oco tu kale ambombe, loku tava oku longisiwa laye. Yehova o tu longisa ovisimĩlo viaye pocakati Cembimbiliya kuenda ocisoko caye. Omo liaco, poku tanga Embimbiliya seteka oku limbuka ndomo Yehova a sole ocituwa cumbombe kuenda ndomo a suvuka epela, loku litunula. Likolisilako oku amamako oku lekisa umbembe eci o tambula ocikele cimue ci pondola oku ku kokela oku kuata unene umue kuenda oluhimo. w24.07 10 ¶8-9

Tunde kunyamo wo 1919, Yesu wa siata oku talavaya locimunga cimue citito colombuavekua, oco ci sokiye upange woku kunda kuenda oku eca okulia kuespiritu kotembo ya sokiyiwa. (Luka 12:42) Ocili okuti, Yehova wa siata oku sumũlũisa upange wo cimunga caco. (Isa. 65:​13, 14) Nda okuti pokati ketu tuafendeli va Yehova ka pa kalele esokiyo liwa, nda ka tua tẽlele oku tẽlisa upange Yesu a tu kundika. (Mat. 28:​19, 20) Ndeci, nda okuti vamanji ka va sokiyile ovikanjo viekongelo tu kundila, omunu lomunu nda wa kundila kocitumãlo a seya. Handi vali citava okuti, nda tua kundila vovikanjo vimue olonjanja vialua, osimbu okuti vikuavo ka via kundiwilile. O pondola hẽ oku sokolola kolonjila vikuavo tu kuatisiwa omo lioku kuata esokiyo liwa? Ovina Yesu a linga eci a kala palo posi, via eca ongangu yiwa konjila ndomo ocisoko cetu ci pondola oku talavaya koloneke vilo. w24.04 8-9 ¶2-4