Matiu

19 Ọke ri Jesu vwọ ta eta nana nu, o de vrẹn nẹ Galili, o de kpo ughwru ri Judia vwẹ obovrẹ ri Jọdan. 2 Vwọba, otu buebun nenire, o de sivwin ayen vwẹ etiyin.

3 Ihwo ri Farisi na de bro rhe vẹ ẹwẹn rẹ ayen vwọ davwọn ni, ayen da nọ nẹ: “Urhi rhọnvwere nẹ ọshare fan orọnvwe rọyen fikirẹ korọnvwọn korọnvwọn?”* 4 Ọ da kpahen nẹ: “Ovwan ji rhi se nẹ ohwo rọ ma ayen nẹ ọtonphiyọ rhe ma ayen ọshare vẹ aye 5 rọ da tanẹ: ‘Fikirẹ ọnana ọshare kọ yanjẹ ọsẹ vẹ oni rọyen vwo, ko churu mu aye rọyen, ayen ivẹ na ke dia ugboma ọvo’? 6 Kidie ayen rha dia ivẹ ọfa-a, ẹkẹvuọvo kẹ ugboma ọvo. Ọtiọyena oborẹ Ọghẹnẹ tan kugbe nu, e jẹ ohwo vuọvo hẹriẹ-ẹ.” 7 Ayen da ta kẹ nẹ: “Kẹ diesorọ Mosis vwọ tanẹ a vwẹ ọbe rẹ orọnvwe-ẹfan vwọ kẹ aye rere e siobọno?” 8 Ọ da ta kẹ ayen nẹ: “Udu ọgangan rẹ ovwan yen nẹrhẹ Mosis rhọnvwe nẹ ovwan fan orọnvwe rẹ ovwan, ẹkẹvuọvo ọ dia ọtiọyen ọ hepha nẹ ọtonphiyọ rhe-e. 9 Me ta kẹ ovwan nẹ kohwo kohwo rọ fan orọnvwe rọyen jokpanẹ fikirẹ ọfanrhiẹn,* rọ da rọvwọn ohwo ọfa gbe igberadja.”

10 Idibo na da ta kẹ nẹ: “Ọ da dia ọtiọyen yen ọ hepha vwọ kẹ ọshare vẹ aye rọyen, kọyen o rhe fo nẹ a rọvwọ-ọn.” 11 Ọ da ta kẹ ayen nẹ: “Ọ dia ihwo eje yen se ru oborẹ ovwan ta na-a, ẹkẹvuọvo ihwo ri vwo okẹ na ọvo. 12 Kidie o vwo ichibẹ re vwiẹre ọtiọyen, o vwo ichibẹ rẹ ihworakpọ ru phiyọ ichibẹ, o ji vwo ichibẹ ri ru oma rayen phiyọ ichibẹ fikirẹ Uvie rẹ idjuvwu na. Ohwo ro se ruo, e jẹ o ruo.”

13 E de mu imitete bro rhe rere ọ ghwabọ kpahen ayen je nẹrhovwo kẹ ayen, ẹkẹvuọvo idibo na da ghwọku ayen. 14 Jesu da tanẹ: “Ovwan yanjẹ imitete na vwo, ovwan davwẹngba rẹ ovwan vwọ dobọ rayen ji rẹ ayen vwo juvwe ebro cha-a, kidie Uvie rẹ idjuvwu na ọ rẹ ihwo tiọyena.” 15 Ọ da ghwabọ kpahen ayen, o de vrẹn nẹ etiyin.

16 Asaọkiephana nighere! ohwo ọvo de bro rhe, ọ da tanẹ: “Oyono, emu esiri vọ yen mi che ru rere mi se vwo vwo arhọ ri bẹdẹ?” 17 Ọ da ta kẹ nẹ: “Diesorọ wọ vwọ nọ vwẹ kpahen obo re dia emu esiri? Ohwo ọvuọvo yen ohwo esiri. Ẹkẹvuọvo, ọ da dianẹ wọ guọnọ vwo arhọ ri bẹdẹ, gba yọnrọn iji na ọkieje.” 18 Ọ da ta kẹ nẹ: “Evọ?” Jesu da tanẹ: “Wo hwe ohwo-o, wo gbe igberadja-a, wo chuji-i, wo soseri rẹ efia-an, 19 muọghọ kẹ ọsẹ wẹn vẹ oni wẹn, rere wo ji vwo ẹguọnọ rẹ ọrivẹ wẹn kirobo wo vwo ẹguọnọ rẹ oma wẹn.” 20 Eghene ọshare na da ta kẹ nẹ: “Mi ruẹ enana eje; die ọfa yen chekọ?” 21 Jesu da ta kẹ nẹ: “Wọ da guọnọ dia gbagba, yanran ra shẹ erọnvwọn ru wo vwori, wọ vwẹ igho na vwọ kẹ igbere, ku wo che vwo efe vwẹ obodjuvwu; gba yanrhe wọ rhe dia odibo mẹ.” 22 Ọke rẹ eghene ọshare na vwo nyo ọnana, ọ da yanran vwọrẹ omaemuophiyọ, kidie o vwo ekuakua buebun. 23 Ọtiọyena Jesu da ta kẹ idibo rọyen nẹ: “Uyota me ta kẹ ovwan nẹ, ọ cha bẹn vwọ kẹ ọdafe rọ vwọ ro Uvie rẹ idjuvwu na. 24 Me rhoma ta kẹ ovwan nẹ, ọ lọhọre rẹ ikamẹl vwọ wan ẹro* rẹ ukoti* vwọ vrẹ ọ rẹ ọdafe vwọ ro Uvie rẹ Ọghẹnẹ na.”

25 Ọke rẹ idibo na vwo nyo ọnana, o de gbe ayen unu gangan, ayen da tanẹ: “Kẹ ono yen se ghini sivwin rhọ?” 26 Rọ vwọ tẹnrovi ayen, Jesu da tanẹ: “Vwọ kẹ ihworakpọ ọnana cha sa phia-a, ẹkẹvuọvo Ọghẹnẹ se ru emu eje.”

27 Ọtiọyena Pita da kpahen nẹ: “Nighere! Avwanre yanjẹ erọnvwọn eje vwo, avwanre de nene uwe; kẹ erere vọ yen che te avwanre obọ?” 28 Jesu da ta kẹ ayen nẹ: “Uyota me ta kẹ ovwan nẹ, vwẹ ẹrhomama na, ọke rẹ Ọmọ rẹ ohwo de chidia enu rẹ ekete rẹ urinrin rọyen, ovwan ri nene uvwe na che chidia enu rẹ ekete 12 vwo guẹdjọ rẹ uvwiẹ 12 rẹ Izrẹl. 29 Kohwo kohwo rọ yanjẹ iwevwin yẹrẹ iniọvo eshare yẹrẹ iniọvo eya yẹrẹ ọsẹ yẹrẹ oni yẹrẹ emọ yẹrẹ idju vwo fikirẹ odẹ mẹ, che vwo ayen abọ ujorin ọ me je riuku rẹ arhọ ri bẹdẹ.

30 “Ẹkẹvuọvo ihwo buebun re dia erẹsosuọ cha kuko, e re kuko me dia erẹsosuọ.