Mak

9 Vwo kpobarophiyọ, ọ da ta kẹ ayen nẹ: “Uyota me ta kẹ ovwan nẹ, o vwo evo vwẹ usun rẹ ihwo ri mudia etinẹ na re cha davwen ughwu kakaka-a, jokpanẹ ayen mrẹ Uvie rẹ Ọghẹnẹ rọ rhere vwevunrẹ ogangan tavwen.” 2 Ẹdẹ esan vwọ wan nu, Jesu da reyọ Pita kugbe Jems kugbe Jọn nene oma, ọ vẹ ayen ọvo de kpo enu rẹ ugbenu ọvo ro kpenu mamọ. O de wene oma vwẹ obaro rayen; 3 iwun rẹ obotafe rọyen ki lo wrowro, e da rhe dia fuanfon popo vwọ vrẹ oborẹ kohwo kohwo rọ fọnrhọn emwa vwẹ akpọ na sa fọnrhọn ayen fon te. 4 Vwọba, Ilaija vẹ Mosis da vwomaphia kẹ ayen, kẹ ayen nene Jesu ta ota. 5 Pita da ta kẹ Jesu nẹ: “Rabbi, o yovwirin rẹ avwanre vwọ dia etinẹ. Ọtiọyena jẹ avwanre bọn itughẹ erha, ọvo vwọ kẹ wẹ, ọvo vwọ kẹ Mosis, ọvo vwọ kẹ Ilaija.” 6 Vwọrẹ uyota, ọ riẹn obo ro che ru-u, kidie oshọ mu ayen gangan. 7 Evwru ọvo de mu, o de rhurhu ayen, urhuru ọvo de nẹ evwru na rhe nẹ: “Ọnana Ọmọ mẹ, ri mi vwo ẹguọnọ rọyen. Ovwan kerhọ rọyen.” 8 Siẹvuọvo na, ayen vwo ni oma riariẹ, ayen da rhe mrẹ nẹ ohwo vuọvo vẹ ayen rha herọ ọfa-a, jokparẹ Jesu ọvo.

9 Ayen vwo wontọ nẹ ugbenu na cha, o de si ayen orhọ gangan nẹ ayen vuẹ ohwo vuọvo kpahen oborẹ ayen mrẹre na-a, bẹsiẹ rẹ Ọmọ rẹ ohwo vwo vrẹn nẹ ughwu. 10 Ayen reyọ ota na vwo te ubiudu,* ẹkẹvuọvo kẹ ayen ta vwẹ ohri rẹ omoma rayen, oborẹ evrẹn nẹ ughwu nana mudiaphiyọ. 11 Kẹ ayen nọ nẹ: “Diesorọ isiẹbe na vwọ tanẹ Ilaija cha rhe tavwen?” 12 Ọ da ta kẹ ayen nẹ: “Ilaija ghene ka rhe, ọ da rhuẹrẹ erọnvwọn ejobi phiyọ ẹdia; jẹ diesorọ e vwo si kpahen Ọmọ rẹ ohwo nẹ ọ cha rioja rẹ erọnvwọn buebun, a me je jẹfia? 13 Ẹkẹvuọvo me ta kẹ ovwan nẹ, vwọrẹ uyota Ilaija rhere, ayen de ruo obo ri je ayen, kirobo re ghwe sio kpahọn.”

14 Ayen vwo te asan rẹ idibo ri chekọ na hepha, ayen de noso nẹ otu buebun riariẹ ayen phiyọ, isiẹbe jehẹ etiyin ri nene ayen phraphro. 15 Ẹkẹvuọvo ugege rẹ otu na ejobi vwọ mrẹ, o de gbe ayen unu, ayen da djẹ bro ra re yeren. 16 Ọtiọyena ọ da nọ ayen nẹ: “Die yen ovwan nene ayen phraphro kpahan?” 17 Ohwo ọvo vwevunrẹ otu na da kpahen kẹ nẹ: “Oyono, mi mu ọmọshare mẹ bru we rhe kidie o vwo ẹwẹn rọ nẹrhẹ ọ sa ta ota-a. 18 Kasan kasan ro de muo, ọ reyọ vwọ ghwiotọ, ugbunu rọyen ko gbe iphughẹ jẹ ọ ria akon rọyen, ẹgba rhe rhe-e. Me vuẹ idibo wẹn nẹ ayen djẹ no oma, ẹkẹvuọvo ayen se ru ọtiọye-en.” 19 Ọ da kpahen kẹ ayen nẹ: “E uvwiẹ ro jẹ esegbuyota evwo na, bro ọke yen mi che nene ovwan dia kri te? Mavọ mi che chirakon rẹ ovwan kri te? Muo rhe vwe.” 20 Ọtiọyena ayen de mu ọmọ na bro ra, ẹkẹvuọvo ugege rẹ ẹwẹn na vwọ mrẹ, ọ da nẹrhẹ ọmọ na she eshe rẹ ewẹnwẹn. O vwo she teyen otọ nu, ko gbune cha gbune kpo, jẹ ugbunu rọyen gbe iphughẹ. 21 Ọtiọyena Jesu da nọ ọsẹ na nẹ: “Bro ọke yen ọnana vwọ phia kẹ re?” Ọ da tanẹ: “Vwo nẹ ọkiemọ rhe, 22 ọke buebun yen o vwo do phiyọ erhanre, o ji do phiyọ ame, rọ vwọ ghwọrọ. Ẹkẹvuọvo ọ da dianẹ o vwo obo wo se ru, gbe arodọnvwẹ kẹ avwanre, wọ cha avwanre uko.” 23 Jesu da ta kẹ nẹ: “Ota yena, ‘Ọ da dia obo wo se ru’! Nighere, erọnvwọn ejobi sa phia kẹ ohwo ro vwo esegbuyota.” 24 Ugege yena ọsẹ rẹ ọmọ na de kperi phia nẹ: “Mi vwo esegbuyota! Cha vwẹ uko vwẹ asan me da guọnọ esegbuyota!”

25 Asaọkiephana ri Jesu vwo noso nẹ otu na họrhọ brẹ ayen cha, ọ da ghwọku ẹwẹn ro jẹfuọn na, rọ vwọ ta kẹ nẹ: “Wẹwẹ rẹ ẹwẹn rọ sa ta ota-a, rọ je dia odierhọ na, mi jurhi kẹ wẹ nẹ, vrẹn nẹ oma rọyen, wọ rha rua oma rọyen ọfa-a!” 26 Ọke ro vwo kperi phia ji she eshe rẹ ewẹnwẹn abọ buebun nu, o de nẹ oma rọyen, ọmọ na da rhe họhọ ohwo ro ghwuru, ọtiọyena ihwo buebun ke tanẹ: “O ghwure!” 27 Ẹkẹvuọvo Jesu da yọnrọn obọ rọyen, ọ da kparọ vrẹn, o de vrẹn mudia. 28 Ọtiọyena, rọ vwọ ro uwevwin ọvo nu, idibo rọyen da nọ vwẹ odjahọn nẹ: “Diesorọ avwanre sa djẹ-ẹ?” 29 Ọ da ta kẹ ayen nẹ: “Oka nana ẹrhovwo ọvo yen a sa vwọ djẹ.”

30 Ayen de vrẹn nẹ etiyin, ayen da wan Galili, ẹkẹvuọvo ọ guọnọre nẹ ohwo vuọvo riẹn kpahọ-ọn. 31 Kidie o yono idibo rọyen je vuẹ ayen nẹ: “A cha shẹ Ọmọ rẹ ohwo, e mi phiọ phiyọ obọ rẹ ihworakpọ, kẹ ayen che hwe, ẹkẹvuọvo dede nẹ ayen hwere, o che vrẹn ẹdẹ erha da wan nu.” 32 Ẹkẹvuọvo ayen vwo ẹruọ rẹ ota rọyen na-a, jẹ oshọ rẹ ayen vwọ nọ enọ muẹ ayen.

33 Ayen de rhi te Kepanọm. Asaọkiephana rọ vwọ hẹ evunrẹ uwevwin na, ọ da nọ ayen nẹ: “Die yen ovwan phraphro kpahan vwẹ idjerhe siẹvure?” 34 Ayen kpahen ota vuọvo-o, kidie ayen vwọ hẹ idjerhe, ayen phraphro vwẹ ohri rẹ omoma rayen kpahen ohwo rọ ma rho. 35 Ọtiọyena o de chidia totọ, o de se Ihwivẹ na, ọ da ta kẹ ayen nẹ: “Ọ da dianẹ ohwo guọnọ dia ohwo rẹsosuọ, kọ dia ọ rọ kuko rẹ ihwo eje kugbe odibo rẹ ihwo eje. 36 Ọ da reyọ omotete ọvo vwo mudia vwẹ ohri rayen; rọ vwọ ghwabọ kpahen igabọ rọyen, ọ da ta kẹ ayen nẹ: 37 “Kohwo kohwo ro rhiabọreyọ ọvo vwẹ usun rẹ imitete tiọna fikirẹ odẹ mẹ ji rhiabọreyọ ovwẹ; kohwo kohwo ro rhiabọreyọ ovwẹ, ọ dia omẹvwẹ ọvo yen o rhiabọreyọ-ọ, o ji rhiabọreyọ Ohwo ro ji vwe rhe.”

38 Jọn da ta kẹ nẹ: “Oyono, avwanre mrẹ ohwo ọvo rọ vwẹ odẹ wẹn vwọ djẹ ẹwẹn rẹ Idẹbono phia, avwanre da davwẹngba rẹ avwanre vwọ dobọ rọyen ji, kidie o nene avwanre-e.” 39 Ẹkẹvuọvo Jesu da tanẹ: “Ovwan davwẹngba rẹ ovwan vwọ dobọ rọyen ji-i, kidie o vwo ohwo vuọvo rọ cha vwẹ odẹ mẹ vwo ruiruo rẹ igbevwunu rọ sa fobọ ta orharhe ota kpahen ovwẹ-ẹ. 40 Kidie kohwo kohwo rọ vwọso avwanre-e, jẹ ọ vẹ avwanre obọ. 41 Kohwo kohwo rọ vwẹ uko ame kẹ ovwan da kidie nẹ ovwan vẹ Kristi herọ, me vuẹ ovwan vwọrẹ uyota nẹ, o vwo ọke vuọvo rẹ osa rọyen cha vwọ vabọ-ọ. 42 Ẹkẹvuọvo kohwo kohwo rọ so ekprowọ kẹ ọvo vwẹ usun rẹ itete nana ri vwo esegbuyota na, o che yovwin ra vwọ gba ukuta rode ra vwọ lọ erọnvwọn rẹ ekẹkẹtẹ kiẹn si ohọre rọyen rere e do phiyọ abadi.

43 “Ọ da dianẹ obọ wẹn yen nẹrhẹ wọ kprowọ, bro no. O yovwirin wo vwo vwo arhọ vẹ ẹbẹre ọvo rẹ oma wẹn re bru no, vwọ vrẹ ọ rẹ wọ vwọ vwẹ abọ ivẹ vwọ ro Gehina,* erhanre re che se fu-un na. 44 *—— 45 Ọ da dianẹ owọ wẹn yen nẹrhẹ wọ kprowọ, bro no. O yovwirin wo vwo vwo arhọ kerẹ ukpono, vwọ vrẹ ọ re vwo do we vẹ awọ ivẹ phiyọ Gehina.* 46 *—— 47 Ọ da dianẹ ẹro wẹn nẹrhẹ wọ kprowọ, do kufia. O yovwirin wọ vwọ ro Uvie rẹ Ọghẹnẹ vẹ ẹro ọvo vwọ vrẹ ọ re vwo do we vẹ ẹro ivẹ phiyọ Gehina,* 48 asan rẹ ihori rọyen ghwẹ-ẹ, rẹ erhanre rọyen ji fuẹ-ẹn.

49 “Kidie a cha kpare erhanre ku ihwo ejobi kirobo re tue ughwanka phiyọ emu. 50 Ughwanka yovwirin, ẹkẹvuọvo ọ da dianẹ ughwanka ku avwerhen rọyen kufia, kẹ die yen ovwan che vwo phi avwerhen phiyọ? Ovwan vwo ughwanka vwẹ oma rẹ ovwan, rere ovwan nene ohwohwo yerin vwọrẹ ufuoma.”