Luk

14 Vwẹ ọke ọfa, ọ da ra riemu vwẹ uwevwin rẹ ọvo vwẹ usun rẹ isun rẹ ihwo ri Farisi na vwẹ Ẹdẹ Urovwoma na, jẹ ayen tẹnrovio rẹ ayen vwo no. 2 Nighere! ọshare ọvo rẹ oma rọyen vwọre* hẹ obaro rọyen. 3 Ọtiọyena Jesu da nọ otu re nabọ riẹn Urhi na kugbe ihwo ri Farisi na nẹ: “Urhi rhọnvwere nẹ e sivwin ohwo vwẹ Ẹdẹ Urovwoma na, gbanẹ ọ rhọnvwere-e?” 4 Ẹkẹvuọvo ayen kpahen ota vuọvo-o. Ọtiọyena ọ da reyọ ọshare na, o de sivwon, ọ da tanẹ ọ yanran. 5 Ọ da ta kẹ ayen nẹ: “Ono vwẹ usun rẹ ovwan na rẹ ọmọ yẹrẹ erhuẹn rọyen che she phiyọ orhare vwẹ Ẹdẹ Urovwoma na, ro de jẹ emuo no ugege yena?” 6 Ayen sa kpahen phiyọ ọnana-a.

7 Ọyena vwọ wan nu, o de ru udje ọvo vwọ kẹ ihwo re durhieri na, ọke ro vwo noso nẹ ayen sane asan ri me titi vwọ kẹ oma rayen. Ọ da ta kẹ ayen nẹ: 8 “Ọke rẹ ohwo de durhie uwe kpo emuẹriọ rẹ orọnvwe, wo chidia asan ro me titi-i. Kidie ọkiọvo, e ji durhie ohwo ọfa rọ rho nọ wẹ. 9 Ọke yena, ohwo ro durhie ovwan ihwo ivẹ na kọ cha rhe, ọ me ta kẹ wẹ nẹ, ‘Jẹ ọshare nana reyọ ẹdia wẹn na.’ Ku wọ cha yanran vẹ omavovwẹ re chidia asan ro me kpotọ. 10 Ẹkẹvuọvo ọke re de durhie uwe, re chidia asan ro me kpotọ, rere ọke rẹ ohwo ro durhie uwe na da rhe, kọ ta kẹ wẹ nẹ, ‘Ugbeyan, re chidia asan ro kpenu.’ Ọke yena, ku wo che vwo ọghọ vwẹ obaro rẹ erhorha ri chekọ na eje. 11 Kohwo kohwo rọ kpare oma rọyen kpenu, e che vwo kpotọ, kohwo kohwo rọ vwẹ oma rọyen kpotọ, a cha kparọ kpenu.”

12 Ọ da je ta kẹ ohwo ro durhire na nẹ: “Ọke wo de chere emu oghẹruvo yẹrẹ ọ rẹ ovwọnvwọn, wo se igbeyan wẹn yẹrẹ iniọvo wẹn yẹrẹ ihwo rẹ orua wẹn yẹrẹ ihwo re dia kẹrẹ owẹ ri feri-i. Kidie wo de ru ọtiọyen, ayen ji se durhie uwe, ọyena me rhe dia osaẹhwa vwọ kẹ wẹ. 13 Ẹkẹvuọvo ọke wo de chere emu, durhie igbere, ikrabọ, ikpono, irhuẹro; 14 oma kọ cha vwerhen owẹ, kidie ayen vwo orọnvwọn vuọvo rẹ ayen cha vwọ hwosa kẹ wẹ-ẹ. A cha hwosa kẹ wẹ vwẹ evrẹnushi rẹ evwata na.”

15 Ro vwo nyo enana, ọvo vwẹ usun rẹ erhorha na da ta kẹ nẹ: “Omavwerhovwẹn dia vwọ kẹ ohwo rọ riemu* vwevunrẹ Uvie rẹ Ọghẹnẹ na.”

16 Jesu da ta kẹ nẹ: “Ọshare ọvo chere emu ovwọnvwọn vọn asan eje, o de durhie ihwo buebun. 17 O de ji odibo rọyen yanran vwẹ unọke rẹ emu ovwọnvwọn na ra ta kẹ ihwo re durhieri na nẹ, ‘Ovwan yanrhe, kidie erọnvwọn eje choma asaọkiephana re.’ 18 Ẹkẹvuọvo ayen eje ke sian edurhie na. Ọrẹsosuọ na da ta kẹ nẹ, ‘Me dẹ udju ọvo, me guọnọ yanran re no; biko me rẹ wẹ, me cha sa rhe-e.’ 19 Ọfa da tanẹ, ‘Me dẹ erhuẹn ihwe,* me guọnọ ra fuẹrẹn ayen; biko me rẹ wẹ, me cha sa rhe-e.’ 20 Ọfa da je tanẹ, ‘Me ghwa rọvwọn nu obọ, ọtiọyena me cha sa rhe-e.’ 21 Ọtiọyena odibo na da rhe niyẹnrẹn rẹ erọnvwọn nana kẹ onini rọyen. Ophu de mu onini rẹ uwevwin na gangan, ọ da ta kẹ odibo rọyen nẹ, ‘Yanran kpakpata kpo irhuvwun ride kugbe irhuvwun itete rẹ orere na, wọ reyọ igbere, ikrabọ, irhuẹro kugbe ikpono rhe etinẹ.’ 22 Ọke vwọ yan obaro, odibo na da tanẹ, ‘Onini, mi ru oborẹ wọ tare na nure, jẹ asan ji rhiephiyọ.’ 23 Ọtiọyena onini na da ta kẹ odibo na nẹ, ‘Yanran kpo idjerhe na kugbe idjerhe ehwahwa na, wọ gba ihwo na rhe, rere uwevwin mẹ na sa vwọ vọn. 24 Kidie me ta kẹ ovwan nẹ, o vwo ọvuọvo vwẹ usun rẹ ihwo re durhieri jovwo na rọ cha davwen emu ovwọnvwọn mẹ na-a.’”

25 Asaọkiephana ihwo buebun nene vwẹ oyan rọyen, o de kuomarhẹriẹ, ọ da ta kẹ ayen nẹ: 26 “Ọ da dianẹ ohwo bru vwe rhe, jẹ o vwo utuoma kpahen* ọsẹ, oni, aye, emọ, iniọvo eshare, kugbe iniọvo emetẹ, e, arhọ* romobọ rọyen dede-e, ọ cha sa dia odibo mẹ-ẹ. 27 Kohwo kohwo ro mu urhe rẹ oja* rọyen ro de nene uvwe-e, cha sa dia odibo mẹ-ẹ. 28 Kerẹ udje, ono vwẹ usun rẹ ovwan na rọ guọnọ bọn uwevwin ro kpenu, ro che je chidia totọ tavwen rere o roro uchunu rọ cha ghwọrọ ọ sa vwọ riẹn sẹ o vwo igho ro che te vwọ bọn re? 29 Ọ rha dia ọtiọye-en, ọ sa tọn uchivwo rọyen, ẹkẹvuọvo ọ cha sa bọn re-e, ihwo eje ri no ke cha reyọ vwọ jehwẹ, 30 nẹ: ‘Ọshare nana ton ebanbọn phiyọ, ẹkẹvuọvo ọ sa bọn re-e.’ 31 Yẹrẹ ovie vọ yen re nene ovie ọfa họnre vwẹ ofovwin, ro che je chidia totọ tavwen rere ọ reyọ uchebro sẹ ọyen sa vwẹ isodje 10,000 vwo nene ọ ro bro cha vẹ isodje 20,000 na họnre? 32 Vwọrẹ uyota, ọ da dianẹ o che se ru ọtiọye-en, ọke rẹ ọyena je vwọ hẹ ugboko na, ko che ji ẹko rẹ ikọn bro ra ra guọnọ arhuẹrẹ. 33 Vwẹ idjerhe vuọvo na, ovwan jẹ o mu ovwan ẹro nẹ o vwo ohwo vuọvo vwẹ usun rẹ ovwan na rọ sa dia odibo mẹ-ẹ, jokpanẹ kẹ o siobọnẹ* erọnvwọn eje ro vwori.

34 “Vwọrẹ uyota, ughwanka yovwirin. Ẹkẹvuọvo ọ da dianẹ ughwanka ku avwerhen rọyen kufia, kẹ die yen e che vwo phi avwerhen phiyọ? 35 E che se vwo ru emuọvo vwẹ otọ na yẹrẹ vwo ru imaniọ-ọ.* Ihwo kuo kuẹfia. E jẹ ohwo ro vwo erhọ ro vwo nyo, nyo.”