Iruo rẹ Iyinkọn Na

8 Vwọ kẹ Sọl, ọ rhọnvwephiyọ ehwe re hwe Stivin na.

Vwẹ ẹdẹ yena omukpahen rode da tonphiyọ vwọso ukoko rọhẹ Jerusalẹm; ihwo ejobi jokparẹ iyinkọn na da hrabọ ro ubrakpọ ri Judia kugbe Sameria. 2 Ẹkẹvuọvo ihwo ri muọghọ okokodo kẹ Ọghẹnẹ de mu Stivin re shi, ayen de vwere uvweri gangan fiki rọyen. 3 Ẹkẹvuọvo Sọl ko kpokpo ukoko na. Ko nẹ uwevwin ọvo kpo ọfa, ro vwo kpono te eya te eshare phia, o mi do ayen phiyọ uwodi.

4 Ẹkẹvuọvo, ihwo re hrabọ na da ro otọ na ejobi, rẹ ayen vwo ghwoghwo iyẹnrẹn esiri rẹ ota na. 5 Asaọkiephana Filip de kpo orere ri Sameria,* ko ghwoghwo Kristi na kẹ ayen. 6 Vẹ ẹwẹn ọvo, otu buebun na da nabọ mu ẹwẹn phiyọ oborẹ Filip ta, rẹ ayen vwọ kerhọ rọyen, je mrẹ eka ro ruẹ. 7 Kidie ihwo buebun vwo ẹwẹn ri jẹfuọn, ẹwẹn nana ki kperẹ phia vẹ upho ọgangan, i mi nẹ ayen oma. Vwọba, e de sivwin ihwo buebun re sa kpara abọ vẹ awọ-ọ kugbe ikpono. 8 Ọtiọyena aghọghọ rode da rhe dia evunrẹ orere yena.

9 Asaọkiephana ọshare ọvo re se Saimọn hẹ orere na, tavwen a ke rhe mrẹ ọnana, o ruẹ imajiki, irueru rọyen ji gbe ihwo ri Sameria unu mamọ, jẹ ọ tanẹ ọyen ohwo rode. 10 Ayen ejobi, vwo nẹ ọ rọ ma hanvwe re te ọ rọ ma rho, nabọ kerhọ rọyen je tanẹ: “Ọshare nana yen Ogangan rẹ Ọghẹnẹ, re se Ọrode.” 11 Ọtiọyena, ayen ejobi nabọ kerhọ rọyen kidie o kriri emerha re rọ vwọ vwẹ imajiki rọyen na vwo ruẹ obo ri gbe ayen unu. 12 Ẹkẹvuọvo ọke rẹ ayen vwo se Filip gbuyota, ohwo ro ghwoghwo iyẹnrẹn esiri rẹ Uvie rẹ Ọghẹnẹ kugbe ọ rẹ odẹ ri Jesu Kristi, te eya te eshare ki bromaphiyame. 13 Saimọn dede de ji segbuyota, ọke re vwo brophiyame nu, ọ vẹ Filip da je dia; o de gbe unu ọke rọ vwọ mrẹ eka kugbe iruo rẹ igbevwunu ride re phia.

14 Ọke rẹ iyinkọn na rehẹ Jerusalẹm vwo nyo nẹ Sameria rhiabọreyọ ota rẹ Ọghẹnẹ re, ayen de ji Pita vẹ Jọn bru ayen ra; 15 Pita vẹ Jọn de bru ayen ra ra nẹrhovwo kẹ ayen rere ayen se vwo vwo ẹwẹn ọfuanfon na. 16 Kidie ohwo vuọvo vwẹ usun rayen ji rhi vwo-o, odẹ rẹ Ọrovwori Jesu ọvo yen ayen vwo bromaphiyame. 17 Ọtiọyena ayen da ghwabọ kpahen ayen, ayen de rhi vwo ẹwẹn ọfuanfon na.

18 Ọke rẹ Saimọn vwọ mrẹ nẹ ihwo vwo ẹwẹn ọfuanfon na womarẹ abọ rẹ iyinkọn na ghwẹ kpahen ayen, kọ guọnọ vwẹ igho kẹ ayen, 19 ọ da tanẹ: “Ovwan je kẹ vwẹ ogangan nana rere kohwo kohwo re me ghwabọ kpahen se vwo vwo ẹwẹn ọfuanfon na.” 20 Ẹkẹvuọvo Pita da kpahen kẹ nẹ: “E jẹ idọnọ ọfuanfon wẹn vẹ owẹ ghwọrọ kugbe, kidie wo rorori nẹ wọ sa vwẹ igho vwọ dẹ ẹserọphẹ rẹ Ọghẹnẹ. 21 Wo vwo obọ yẹrẹ ẹkẹn vwẹ iruo nana-a, kidie ubiudu wẹn dia ọsoso vwẹ ẹro rẹ Ọghẹnẹ-ẹ. 22 Ọtiọyena gbe kurhẹriẹ vwo nẹ umwemwu nana ru wo ruru na, wọ rẹ Jihova* nẹ ọ da dia obo ri shephiyọ, ọ vwẹ iroro rẹ umwemwu rọhẹ evunrẹ ubiudu wẹn na vwo ghovwo uwe; 23 kidie me mrẹvughe nẹ wẹwẹ obi rọ yara kugbe ọviẹn ri jẹ ọsoso enene.” 24 Saimọn da kpahen kẹ ayen nẹ: “Ovwan nene uvwe rẹ Jihova* rere ọvuọvo vwẹ usun rẹ erọnvwọn nana rẹ ovwan tare na vwo jẹ phia kẹ vwẹ.”

25 Ọtiọyena, ọke rẹ ayen vwo soseri ro fiotọ je ta ota ri Jihova* nu, ayen de rhivwin kpo Jerusalẹm, rẹ ayen vwọ yanran na jẹ ayen ghwoghwo iyẹnrẹn esiri na vwẹ eko ri Sameria buebun.

26 Ẹkẹvuọvo, amakashe ri Jihova* da ta kẹ Filip nẹ: “Vrẹn wo kpo idjerhe ro nẹ Jerusalẹm kpo Gaza, rọhẹ obọrhen ọnre na.” (Ọnana idjerhe rẹ aton.) 27 Ọtiọyena o de vrẹn, ọ da yanran, nighere! ohwo rode* rẹ Etiopia ọvo, ọshare ro vwo ogangan vwẹ otọ rẹ usuon ri Kandase, ovie aye rẹ Etiopia, ro ji vwo ogangan vwẹ enu rẹ efe rọyen ejobi. O kpo Jerusalẹm ra ga ẹga jovwo, 28 ko rhivwin kpo jẹ o chidia akpẹrẹ rọyen, ro vwo se ọbe rẹ ọmraro Aizaya phia gorigori. 29 Ọtiọyena ẹwẹn na da vuẹ Filip nẹ: “Yanran wo sikẹrẹ akpẹrẹ na.” 30 Filip da djẹ bro ra, o de nyo ro vwo se ọbe rẹ ọmraro Aizaya phia gorigori, ọ da nọ nẹ: “Wo ghini vwo ẹruọ* rẹ obo ru wo se na?” 31 Ọ da kpahen kẹ nẹ: “Mavọ mi se vwo vwo ẹruọ rọyen jokpanẹ kẹ ohwo yono uvwe?” Ọ da vuẹ Filip nẹ ọ ruọ rere o chidia kẹrẹ ọyen. 32 Asaọkiephana ọnana yen asan ro se vwẹ Isiesi Ọfuanfon na: “Kerẹ ogodẹ, e muro kpo asan re de che hwe, kerẹ ọmọ rẹ ogodẹ rọ fọre gbiẹi vwẹ obaro rẹ ihwo ri brẹ ẹton rọyen, ọtiọyen o ji jẹ unu rọyen erhie. 33 Ọke ra vwọ phọphọ, e brorhiẹn ọsoso kẹ-ẹ. Ono yen cha nabọ dje uvwiẹ rọyen fiotọ? Kidie a reyọ arhọ rọyen vwo nẹ akpọ na.”

34 Ohwo rode* na da ta kẹ Filip nẹ: “Biko vuẹ vwẹ, ono yen ọmraro na ta ota nana kpahen? Oma rọyen gbanẹ ohwo ọfa?” 35 Filip da vwẹ asan ro se vwẹ isiesi ọfuanfon na vwọ tuẹn ota phiyọ, o de ghwoghwo iyẹnrẹn esiri ro shekpahen Jesu kẹ. 36 Rẹ ayen vwọ yanran vwẹ idjerhe na, ayen de rhi te asan rẹ ame hepha, ohwo rode* na da tanẹ: “Nighere! Ame hẹ etinẹ, die yen cha djẹ vwẹ oma ebrophiyame?” 37 *⁠—— 38 Ọtiọyena, ọ da tanẹ akpẹrẹ na mudia, Filip vẹ ohwo rode* na de wontọ ro ame na, o de brophiyame. 39 Ọke rẹ ayen vwo nẹ evunrẹ ame na rhe, ẹwẹn ri Jihova* de sun Filip yanran kpakpata, ohwo rode* na rha mrẹ ọfa-a, ẹkẹvuọvo o de kpo asan rọ ra vẹ aghọghọ. 40 Ẹkẹvuọvo, Filip da mrẹ oma rọyen vwẹ Ashdọd, ọ da wan otọ na vrẹ, jẹ o ghwoghwo iyẹnrẹn esiri na vwẹ irere na ejobi bẹsiẹ ro rhi vwo te Sizaria.