Luk

21 Asaọkiephana rọ vwọ kpare opharo, ọ da mrẹ edafe na ri phiẹ ekẹ rayen phiyọ ikpeti rẹ utoro na. 2 Ọ da mrẹ ayeuku ọvo rọ dia ovwiogbere, ro phi igho itete ivẹ* ri te emuọvo-o phiyọ, 3 ọ da tanẹ: “Uyota me ta kẹ ovwan nẹ, ayeuku nana rọ dia ovwiogbere na phi phiyọ bun vrẹ ayen ihwo ri chekọ na eje. 4 Kidie ihwo nana eje phi okẹ phiyọ vwo nẹ oborẹ ayen re chekọ, ẹkẹvuọvo aye na, vwẹ ẹdia rẹ ọkanrovwẹ rọyen* yen o de phi erọnvwọn eje ro vwori vwẹ akpeyeren phiyọ.”

5 Ọke vwọ yan obaro, rẹ ihwo evo vwọ ta ota kpahan uwevwin rẹ ẹga na, obo ra vwẹ ikuta iyoyovwin vẹ erọnvwọn ra vwọ kpahotọ vwọ rhuẹrẹ fia, 6 ọ da tanẹ: “Vwọ kẹ erọnvwọn nana rẹ ovwan mrẹ asaọkiephana, ọke cha, a cha yanjẹ ukuta ọvo vwo vwẹ enu rẹ ọfa re de jẹ ayen ekporon she-e.” 7 Ọtiọyena ayen da nọ nẹ: “Oyono, ọke vọ yen erọnvwọn nana cha ghene vwọ phia, die yen cha dia oka rẹ ọke rẹ erọnvwọn nana cha vwọ phia?” 8 Ọ da tanẹ: “Ovwan nomaso rere e vwo jẹ ovwan esuon ghwrẹ, kidie ihwo buebun cha rhe vwẹ odẹ mẹ, kẹ ayen cha tanẹ, ‘Mẹvwẹ yen ọyen,’ ayen je cha tanẹ, ‘Ọke na sikẹre re.’ Ovwan nene aye-en. 9 Vwọba, ọke rẹ ovwan de nyo kpahen ifovwin kugbe oyanghan,* ovwan jẹ oshọ mu ovwa-an. Kidie erọnvwọn nana cha phia tavwen, ẹkẹvuọvo oba na cha rhe ugege yena-a.”

10 Ọ da ta kẹ ayen nẹ: “Ẹkuotọ cha vwọso ẹkuotọ, uvie cha vwọso uvie. 11 Etọ che kpogho gangan, ọkanrovwẹ rẹ emu kugbe ega sansan cha dia nẹ asan ọvo vwo kpo ọfa; a cha mrẹ obo ri muoshọ, eka ride ji che nẹ obodjuvwu rhe.

12 “Ẹkẹvuọvo tavwen erọnvwọn nana eje ke phia, ihwo che shabọ phiyọ ovwan ji mukpahen ovwan, ayen cha vwẹ ovwan kpahotọ vwẹ sinagọg ji do ovwan phiyọ uwodi. A cha reyọ ovwan kpo obaro rẹ ivie kugbe isun fikirẹ odẹ mẹ. 13 Ọnana cha nẹrhẹ ovwan soseri. 14 Ọtiọyena, ovwan brorhiẹn vwevunrẹ ubiudu rẹ ovwan nẹ ovwan che muegbe rẹ oborẹ ovwan cha chochọn rẹ oma rẹ ovwan wan phiyotọ-ọ, 15 kidie me cha kẹ ovwan eta kugbe aghwanre rẹ ihwo eje re vwọso ovwan cha sa phrọ yẹrẹ vwọso-o. 16 Vwọba, esẹ vẹ ini, iniọvo, ihwo rẹ orua kugbe igbeyan cha vwẹ ovwan kpahotọ,* kẹ ayen che hwe evo vwẹ usun rẹ ovwan, 17 ihwo eje che vwo utuoma kpahen ovwan fikirẹ odẹ mẹ. 18 Ẹkẹvuọvo ogẹton rẹ uyovwin rẹ ovwan vuọvo cha ghwọrọ-ọ. 19 Womarẹ akoechiro rẹ ovwan yen ovwan cha vwọ sẹro rẹ arhọ rẹ ovwan.*

20 “Ẹkẹvuọvo, ọke rẹ ovwan da mrẹ Jerusalẹm rẹ ituofovwin gbogba riariẹ phiyọ, ovwan gba riẹn nẹ ọke ra cha vwọ ghwọrọ sikẹre re. 21 E gbe jẹ ihwo rehẹ Judia ton onẹdjẹ phiyọ kpo igbenu na, e jẹ ihwo rehẹ evun rọyen vrẹn no, e jẹ ihwo rehẹ eko na rua evun rọye-en, 22 kidie enana ẹdẹ re che vwo brorhiẹn* rere erọnvwọn eje re si phiyotọ na se vwo rugba. 23 Okpetu rode vwọ kẹ eya re mrevun kugbe e re vwẹ evie kẹ emọ vwẹ ọke yena! Kidie ofudjevwe rode cha dia evunrẹ otọ na kugbe ophu ọgangan vwọso ihwo nana. 24 Ayen che she womarẹ ọlọkọ, e mi mu ayen kpo eviẹn vwẹ ẹgborho na eje; ẹgborho* na che chiyin Jerusalẹm muotọ bẹsiẹ ọke re bruphiyọ vwọ kẹ ẹgborho* na vwọ gba.

25 “Vwọba, eka cha dia evunrẹ ọnre na kugbe emeranvwe na kugbe isio na, ẹgborho rẹ akpọ na re riẹn oborẹ ayen che ru-u che muomaphiyọ fikirẹ edo rẹ abadi na kugbe ohọnre rọyen. 26 Ihwo che shero fikirẹ oshọ kugbe erọnvwọn re rhẹro rọyen nẹ e cha phia vwẹ otọrakpọ na, kidie ẹgba rẹ idjuvwu na ki che kpogho. 27 Ọke yena kẹ ayen cha mrẹ Ọmọ rẹ ohwo rọ cha vwevunrẹ evwru vẹ ogangan kugbe urinrin rode. 28 Ẹkẹvuọvo erọnvwọn nana da tonphiyọ re, ovwan mudia kpomavi, ovwan kpare uyovwin rẹ ovwan kpenu, kidie usivwin rẹ ovwan sikẹre re.”

29 Ọtiọyena o de ru udje ọvo kẹ ayen nẹ: “Ovwan vwo oniso rẹ urhe rẹ ifigi na kugbe irhe ri chekọ na eje. 30 Ọke rẹ ayen da ghwẹ ẹbe phiyọ, ovwan komobọ mrẹ, kẹ ovwan je riẹn nẹ ọke uvo sikẹre asaọkiephana re. 31 Vwẹ idjerhe vuọvo na, ọke rẹ ovwan da mrẹ erọnvwọn nana re phia, ovwan gba riẹn nẹ Uvie rẹ Ọghẹnẹ na sikẹre re. 32 Uyota me ta kẹ ovwan nẹ, o vwo ọke vuọvo rẹ uvwiẹ nana cha vwọ wanvrẹ bẹsiẹ rẹ erọnvwọn eje vwọ phia-a. 33 Odjuvwu vẹ akpọ cha wanvrẹ, ẹkẹvuọvo o vwo ọke vuọvo rẹ eta mẹ cha vwọ wanvrẹ-ẹ.

34 “Ẹkẹvuọvo ovwan ni oma rẹ ovwan so rere ọrevrẹ kugbe ọdavrẹ kugbe ẹnwan rẹ akpeyeren vwo jẹ oghwa ekron nyẹ ubiudu rẹ ovwan, rẹ ẹdẹ yena vwo jẹ ovwan ebro cha siẹvuọvo 35 kerẹ ufi. Kidie o che bru ihwo eje re dia otọrakpọ na rhe. 36 Ọtiọyena ovwan rha rhẹrẹ, ovwan rẹ orẹ ọkieje rere ovwan sa vwọ vrabọ rẹ erọnvwọn nana eje re cha phia na, ji mudia obaro rẹ Ọmọ rẹ ohwo.”

37 Ọtiọyena ko yono vwẹ uwevwin rẹ ẹga na vwẹ aruphẹn, ẹkẹvuọvo vwẹ ason, ọ me yanran ra dia ugbenu re se Ugbenu rẹ Oliv. 38 Ihwo na eje mi bro rhe vwẹ edegburhiọke rhe kerhọ rọyen vwẹ uwevwin rẹ ẹga na.