Iruo rẹ Iyinkọn Na

7 Ẹkẹvuọvo orherẹn rode na da tanẹ: “Erọnvwọn nana ghini uyota?” 2 Stivin da kpahen nẹ: “Iniọvo, esẹ, ovwan kerhọ. Ọghẹnẹ rẹ urinrin na vwomaphia kẹ ọsẹ rẹ avwanre rode Ebraham ọke rọ vwọ hẹ Mẹsopotemia, tavwen ọ ke ra dia Haran, 3 ọ da ta kẹ nẹ: ‘Vrẹn nẹ otọ wẹn kugbe ohri rẹ ihwo rẹ orua wẹn, wo kpo otọ ri mi che dje kẹ wẹ na.’ 4 Ọtiọyena, o de vrẹn nẹ otọ rẹ ihwo ri Kaldia na, ọ da ra dia Haran. Ọke rẹ ọsẹ rọyen vwo ghwu nu, Ọghẹnẹ da nẹrhẹ o vrẹn nẹ etiyin rhe dia otọ nana rẹ ovwan hepha asaọkiephana. 5 Dedena ọ kẹ rẹ uku vuọvo vwẹ evun rọye-en, ẹjo, kaka ichiyin ọvo dede; ẹkẹvuọvo o veri nẹ ọyen cha vwọ kẹ kerẹ uku, ọmọ* rọyen je cha riuku rọyen, dede nẹ o ji rhi vwiẹ ọmọ vuọvo ọke yena-a. 6 Vwọba, Ọghẹnẹ vuẹrẹ nẹ emọ* rọyen cha dia erhorha vwẹ otọ rọ dia ọraye-en, ihwo na cha vwẹ ayen ru eviẹn je vwẹ oja re ayen vwẹ ẹgbukpe 400. 7 ‘Me cha vwẹ ẹgborho rọ cha vwẹ ayen ru eviẹn na vwo guẹdjọ,’ ọtiọyen Ọghẹnẹ tare, ‘ọke rẹ erọnvwọn nana da phia nu, kẹ ayen che vrẹn nẹ otọ na rhe vwẹ ẹga ọfuanfon kẹ vwẹ vwẹ etinẹ na.’

8 “Ọghẹnẹ de ji nene re ọphọ rẹ oyanvwe, ọ da rhe dia ọsẹ rẹ Aizik, ọ da yanvwọ vwẹ ẹdẹ rẹrenren, Aizik da rhe dia ọsẹ ri* Jekọp, Jekọp da rhe dia ọsẹ rẹ igbuyovwin rẹ orua 12 na. 9 Igbuyovwin rẹ orua na da rioma kpahen Josẹf, ayen da shẹ kpo Ijipt, ẹkẹvuọvo Ọghẹnẹ vẹ ọyen herọ, 10 o de sivwon vwo nẹ ukpokpogho rọyen ejobi, ọ da vwẹ aghwanre kẹ je nẹrhẹ o vwo ẹroesiri vwẹ obaro ri Fero ovie rẹ Ijipt. Fero de vwo mu nẹ o sun Ijipt vẹ uwevwin rọyen ejobi. 11 Ẹkẹvuọvo owẹnvwe de fi vwẹ Ijipt ejobi kugbe Kenan, e, ukpokpogho rode, esẹ rẹ avwanre ride rha mrẹ emu vuọvo re-e. 12 Ẹkẹvuọvo Jekọp de nyo nẹ emuọre* hẹ Ijipt, o de ji esẹ rẹ avwanre ride kpo oboyin obọ rẹsosuọ. 13 Ọ rẹ obọ rivẹ, Josẹf de dje oma vwọ kẹ iniọvo rọyen, Fero de ji rhi vughe orua ri Josẹf. 14 Ọtiọyena Josẹf da vwẹ ovuẹ rhe ọsẹ rọyen Jekọp kugbe ihwo rẹ orua rọyen eje nẹ ayen rhe Ijipt, ayen ejobi ihwo* 75. 15 Ọtiọyena Jekọp de kpo Ijipt, o de ghwu vwẹ oboyin, ọtiọyen ji te esẹ rẹ avwanre ride. 16 E de mu ayen kpo Shikẹm re shi phiyọ ushi rẹ Ebraham vwẹ igho rẹ idọnọ ọfuanfon vwọ dẹ mie emọ ri Hamọr vwẹ Shikẹm.

17 “Ọke rẹ Ọghẹnẹ che vwo ru orugba rẹ ive ro ve kẹ Ebraham vwo siẹkẹrẹ re, ihwo na ki buẹnphiyọ vwẹ Ijipt, 18 bẹsiẹ ra vwọ vwẹ ovie ọfa mu vwẹ Ijipt, ohwo ro vughe Josẹfu-u. 19 Ọnana da vwẹ ọkon vwo nene uvwiẹ rẹ avwanre yerin, ọ da gba esẹ na vwọ kpairoro vrẹ emeboba rayen, rere e vwo hwe ayen. 20 Ọke yena yen e vwo vwiẹ Mosis, o vwo erhuvwu mamọ vwẹ ẹro rẹ Ọghẹnẹ. A da vwẹrote* emeranvwe erha vwẹ uwevwin rẹ ọsẹ rọyen. 21 Ẹkẹvuọvo ọke ra vwọ yan jovwo,* ọmọtẹ ri Fero de muo, ọ da yọnrọn ghwanre kerẹ ọmọ obọ rọyen. 22 Ọtiọyena e de yono Mosis aghwanre rẹ Ijipt ejobi. Vwọrẹ uyota, ọyen ohwo rọ vọnre vẹ ẹgba vwẹ eta kugbe iruo.

23 “Asaọkiephana ro vwo te ẹgbukpe 40, o de rhi vwo ẹwẹn* rọ vwọ ra mrẹ iniọvo rọyen, ihwo rẹ Izrẹl. 24 Ọke rọ vwọ mrẹ ọvo vwẹ usun rayen re shenyẹ, ọ da chochọn rẹ ọ re shenyẹ na je choja kẹ womarẹ ohwo rẹ Ijipt na rọ teyen hwe. 25 O rorori nẹ iniọvo rọyen cha riẹn nẹ Ọghẹnẹ sivwin ayen wan oma rọyen, ẹkẹvuọvo ayen riẹnre-e. 26 Ẹdẹ rọ vwọ kpahọn ọ da vwomaphia kẹ ayen ọke rẹ ayen vwọ họnra, ọ da davwẹngba rọ vwọ rhuẹrẹ ayen kugbe vwọrẹ ufuoma, rọ vwọ tanẹ: ‘Eshare, ovwan iniọvo. Diesorọ ovwan vwọ họnra ohwohwo?’ 27 Ẹkẹvuọvo ọ ro shenyẹ ọrivẹ rọyen na de geren nẹ oma, rọ vwọ tanẹ: ‘Ono yen vwẹ owẹ mu osun kugbe oguẹdjọ vwọ kẹ avwanre? 28 Gbanẹ wọ guọnọ hwe vwe kirobo ru wo hwe ohwo rẹ Ijipt na odẹ rọ wanre na?’ 29 Ọke ri Mosis vwo nyo ọnana, ọ da djẹ ra dia otọ ri Midian kerẹ orhorha, asan ro de vwiẹ emeshare ivẹ.

30 “Ẹgbukpe 40 vwọ wan nu, amakashe ọvo da vwomaphia kẹ vwevunrẹ aton rẹ Ugbenu ri Sinae, vwevunrẹ erhanre rọ la vwẹ umurhe ọvo ro vwo inwe. 31 Ọke ri Mosis vwọ mrẹ, obo rọ mrẹre na de gbe unu mamọ. Ẹkẹvuọvo ro vwo siẹkẹrẹ rọ vwọ nabọ no, o de nyo urhuru ri Jihova* rọ tare nẹ: 32 ‘Mẹvwẹ Ọghẹnẹ rẹ esẹ wẹn ride, Ọghẹnẹ rẹ Ebraham, Aizik kugbe Jekọp.’ Mosis kọ phariẹ, o rhe yivwin si kẹrẹ vrẹ ọtiọyen ọfa-a. 33 Jihova* da ta kẹ nẹ: ‘Ku isabato rehẹ awọ wẹn na nu, kidie asan wo mudia na otọ ọfuanfon. 34 Vwọrẹ uyota, me mrẹ oja ra vwọ ria ihwo mẹ rehẹ Ijipt, mi ji nyo irhivwẹn rayen re, mi wontọ rhe mi vwo sivwin ayen. Asaọkiephana, gba yanrhe, mi che ji we kpo Ijipt.’ 35 Mosis nana rẹ ayen senre rẹ ayen vwọ tanẹ: ‘Ono yen vwẹ owẹ mu osun kugbe oguẹdjọ?’ yen Ọghẹnẹ jiri kerẹ osun kugbe osivwin womarẹ amakashe rọ vwomaphia kẹ vwevunrẹ umurhe ro vwo inwe na. 36 Ọshare nana yen sun ayen vwo nẹ Ijipt, ro vwo ruiruo rẹ igbevwunu kugbe eka vwẹ Ijipt, Abadi Ọvwavware na kugbe aton na vwẹ ẹgbukpe 40.

37 “Mosis nana yen ta kẹ ihwo rẹ Izrẹl nẹ: ‘Ọghẹnẹ cha vwẹ ọmraro ọvo kerẹ omẹvwẹ vwo mu kẹ ovwan vwo nẹ ohri rẹ iniọvo rẹ ovwan.’ 38 Ọnana yen ohwo rọ rhe dia ohri rẹ ukoko na vwevunrẹ aton na vẹ amakashe rọ ta ota kẹ vwẹ Ugbenu ri Sinae kugbe esẹ rẹ avwanre ride, a da vwẹ eta efuanfon re herọ yerẹn vwọ kẹ nẹ ọ vwọ kẹ avwanre. 39 Esẹ rẹ avwanre ride rhọnvwe kerhọ rọye-en, ayen de bio phiyọ ọkọkọ, ayen de vwo ẹwẹn rẹ ayen vwo rhivwin kpo Ijipt, 40 rẹ ayen vwọ ta kẹ Erọn nẹ: ‘Ma eghẹnẹ kẹ avwanre re cha kobaro kẹ avwanre, kidie avwanre riẹn obo re phia kẹ Mosis nana ro sun avwanre vwo nẹ otọ rẹ Ijipt na-a.’ 41 Ọtiọyena ayen da ma ọmọ rẹ erhuẹn vwẹ ọke yena, ayen da reyọ izobo vwo rhe oma na, kẹ ayen ria orẹ vwọ ghọghọ fikirẹ iruo rẹ abọ rayen na. 42 Ọtiọyena Ọghẹnẹ da yanjẹ ayen vwo, ọ da vwẹ uphẹn kẹ ayen rẹ ayen vwọ vwẹ ẹga kẹ erọnvwọn eje rehẹ obodjuvwu kirobo re siro vwẹ ọbe rẹ Emraro na nẹ: ‘Ọ dia omẹ yen ovwan ze izobo je vwẹ okẹ kẹ vwẹ ẹgbukpe 40 vwevunrẹ aton na-a, gbanẹ omẹvwẹ, E uwevwin rẹ Izrẹl? 43 Ẹkẹvuọvo utughẹ ri Molọk kugbe isio rẹ ọghẹnẹ na Refan yen ovwan muru, ema rẹ ovwan kare rere ovwan vwẹ ẹga kẹ ayen. Ọtiọyena me cha djẹ ovwan shesheri vwọ vrẹ Babilọn.’

44 “Esẹ rẹ avwanre ride vwo utughẹ* rẹ oseri na vwevunrẹ aton na, vwo nene iji rọ vwọ kẹ Mosis ọke rọ vwọ vuẹ nẹ ọ bọn nene obo rọ mrẹre na. 45 Esẹ rẹ avwanre ride da reyọ vwọ riuku, ayen vẹ Joshua de muo rhe otọ rẹ Ọghẹnẹ djẹ ẹgborho na nu vwọ kẹ esẹ rẹ avwanre ride. Etinẹ kọyen ọ hepha rhirin ri te ọke ri Devid. 46 Ọ mrẹ ẹroesiri rẹ Ọghẹnẹ, ọ da nokpẹn rẹ uphẹn rọ vwọ bọn uwevwin vwọ kẹ Ọghẹnẹ ri Jekọp. 47 Ẹkẹvuọvo Solomọn kọyen rhe bọn uwevwin kẹ. 48 Dedena, Ọ ro Me Kpenu na dia evunrẹ iwevwin ra vwẹ obọ bọ-ọn, kirobo rẹ ọmraro na tare nẹ: 49 ‘Odjuvwu na ọyen ekete mẹ, otọrakpọ na ke rha asan me ghwẹ awọ kpahan. Oka rẹ uwevwin vọ yen wọ cha bọn kẹ vwẹ? Ọtiọyen Jihova* tare. Yẹrẹ tivọ yen asan rẹ omaerovwon mẹ hepha? 50 Obọ mẹ yen ma erọnvwọn nana ejobi, ọ dia ọtiọyen?’

51 “Ovwan ihwo ri ruẹ uyovwin gangan re yanvwere vwẹ ubiudu kugbe erhọ-ọ na, ọkieje yen ovwan vwọ reyọ vwọsua ẹwẹn ọfuanfon na; kirobo rẹ esẹ rẹ ovwan ride ruru, ọtiọyen ovwan ji ruẹ. 52 Ọvọ vwẹ usun rẹ emraro na yen esẹ rẹ ovwan ride mukpahe-en? E, ayen hwe ihwo ri ghwoghwo ẹcha rẹ ọvwata na, ohwo rẹ ovwan shẹre, rẹ ovwan ji hwe, 53 ovwan ri rhiabọreyọ Urhi na ra vwọ phia womarẹ emekashe ẹkẹvuọvo ovwan yọnrerọ-ọ.”

54 Ọke rẹ ayen vwo nyo eta nana, ophu de mu ayen gangan vwevunrẹ ubiudu rayen, kẹ ayen ria akon rayen kpahọn. 55 Ẹkẹvuọvo, vẹ ẹwẹn ọfuanfon rọ vọnrọ oma na, o de ni odjuvwu na, ọ da mrẹ urinrin rẹ Ọghẹnẹ kugbe ọ ri Jesu ro mudia phiyọ obọrhen rẹ Ọghẹnẹ, 56 ọ da tanẹ: “Nighere! Me mrẹ idjuvwu na ri rhiephiyọ, Ọmọ rẹ ohwo mudia vwẹ obọrhen rẹ Ọghẹnẹ.” 57 Ayen de kperi phia vẹ upho ọgangan, ayen da vwẹ abọ din erhọ rayen, ayen ejobi da họrhọ ruọ. 58 Ọke rẹ ayen vwo do phiyọ otafe rẹ orere na nu, kẹ ayen phio. Iseri na ghwẹ iwun rẹ obotafe rayen phiyọ asan awọ rẹ eghene ọshare ọvo re se Sọl. 59 Rẹ ayen vwo phiẹ Stivin na, ọ da rẹ orẹ nana: “Ọrovwori Jesu, reyọ ẹwẹn mẹ.” 60 O de shiguẹ totọ, o de kperi phia vẹ upho ọgangan nẹ: “Jihova, wo kere umwemwu nana ba ayen abọ-ọ.” Ọke rọ vwọ ta ọnana nu, ọ da vwerhẹn vwọrẹ ughwu.