Luk

1 Rọ vwọ dianẹ ihwo buebun davwẹngba rẹ ayen vwo koko ji si ikuegbe rẹ obo re phiare rẹ avwanre segbuyota vwẹ ohri rẹ avwanre na, 2 kirobo rẹ ihwo re dia iseri kugbe iyinkọn rẹ ovuẹ na nẹ ọtonphiyọ rhe niyẹnrẹn rọyen vwọ kẹ avwanre, 3 mi ji brorhiẹn, kidie me guọnọ otọ rẹ erọnvwọn na eje vwo nẹ ọtonphiyọ rhe gbagba, mi vwo si ayen rhe we nẹ owọ kpo owọ, ọrode eje Tiofilọs, 4 rere wọ vwọ nabọ riẹn uyota rẹ erọnvwọn ra vwẹ unu yono uwe na.

5 Vwẹ ọke ri Hẹrọd,* ovie ri Judia, o vwo orherẹn ọvo re se Zekaraya, ọvo vwẹ ẹko rẹ irherẹn re se Abija. Aye rọyen ọyen ọvo vwẹ usun rẹ emetẹ rẹ Erọn, odẹ rọyen Ẹlizabẹt. 6 Ayen ihwo ivẹ na evwata vwẹ obaro rẹ Ọghẹnẹ, ayen nene iji kugbe irhi ri Jihova* eje vwọrẹ jẹ abe ẹriọ. 7 Ẹkẹvuọvo ayen vwo ọmọ-ọ, kidie Ẹlizabẹt ẹgan, ayen ihwo ivẹ na je ghwore.

8 Asaọkiephana rọ vwọ ga kerẹ orherẹn vwẹ iruo ra vwọ kẹ ẹko rọyen vwẹ obaro rẹ Ọghẹnẹ, 9 vwo nene ẹkuruemu rẹ irherẹn na, o de rhi te ọke rọ cha vwọ torhẹ insẹnsi ọke rọ da ro asan ọfuanfon ri Jihova* na. 10 Jẹ otu buebun na nẹrhovwo vwẹ otafe, vwẹ unọke ra vwọ torhẹ insẹnsi na. 11 Amakashe ri Jihova* da vwomaphia kẹ, o mudia ẹbẹre obọrhen rẹ agbada rẹ insẹnsi na. 12 Ẹkẹvuọvo ẹwẹn ri Zekaraya da yanghan ku ọke rọ vwọ mrẹ, oshọ de muo gangan. 13 Ẹkẹvuọvo amakashe na da ta kẹ nẹ: “Wọ djoshọ-ọ, Zekaraya, kidie a nabọ nyo orẹ wẹn re, aye wẹn Ẹlizabẹt che vwiẹ ọmọshare, wo mi se Jọn. 14 Wo che vwo aghọghọ kugbe omavwerhovwẹn rode, ihwo buebun cha ghọghọ fikirẹ evwiẹ rọyen, 15 kidie ọ cha dia ohwo rode vwẹ ẹro ri Jihova.* Ẹkẹvuọvo, e jẹ ọ da iwaini yẹrẹ kudi kudi ro muẹ ohwo kakaka-a, ọ cha vọn vẹ ẹwẹn ọfuanfon tavwen a ke tobọ vwiẹ,* 16 o che ku emọ rẹ Izrẹl buebun rhẹriẹ bru Jihova* Ọghẹnẹ rayen rhe. 17 Vwọba, ọ cha kobaro kẹ vẹ ẹwẹn kugbe ogangan rẹ Ilaija, ro vwo ku ubiudu rẹ esẹ rhẹriẹ bru emọ kugbe ihwo ri jẹmienyo bru aghwanre rẹ evwata ra sa reyọ vwo ruiruo, rere o vwo muegbe rẹ ihwo phiyotọ hẹrhẹ Jihova.”*

18 Zekaraya da ta kẹ amakashe na nẹ: “Mavọ yen ọnana se vwo muvwẹro? Kidie me ghwore, aye mẹ rha je dia omotete-e.” 19 Amakashe na da kpahen kẹ nẹ: “Mẹvwẹ Gebrẹl, ro muẹdia obaro rẹ Ọghẹnẹ, e ji vwe rhe ta ota kẹ wẹ, ji ghwoghwo iyẹnrẹn esiri nana kẹ wẹ. 20 Ẹkẹvuọvo nighere! upho wẹn che din, wọ rha cha sa ta ota-a, bẹsiẹ rẹ erọnvwọn nana cha vwọ phia, kidie wo se eta mẹ ri che rugba vwẹ ọke re bruphiyọ kẹ ayen na gbuyota-a.” 21 Vwẹ ọke nana eje, jẹ ihwo na hẹrhẹ Zekaraya, ko gbe ayen unu oboresorọ ọ vwọ ghwọrọ ọke grongron vwevunrẹ asan ọfuanfon na. 22 Ọke rọ vwọ ro otafe, ọ rha sa ta ota kẹ aye-en, ayen da vwẹ iroro evun vwọ riẹn nẹ ọ mrẹ emramrẹ vwẹ asan ọfuanfon na. Kọ vwẹ abọ ta ota kẹ ayen, ẹkẹvuọvo ota se nẹ unu rọyen rhe-e. 23 Ọke rẹ ẹdẹ rẹ ẹga ọfuanfon rọyen* vwọ gba nu, o de kpo uwevwin rọyen.

24 Ẹdẹ evo vwọ wan nu, aye rọyen Ẹlizabẹt da mrevun, o de siomanu vwẹ emeranvwe iyorin, rọ vwọ tanẹ: 25 “Enẹ yen Jihova* nene uvwe yerin vwẹ ọke nana. Ọ karophiyọ ovwẹ ro vwo si ekan mẹ no vwẹ ohri rẹ ihwo.”

26 Evun rọyen vwọ hẹ emeranvwe esan, Ọghẹnẹ de ji amakashe Gebrẹl kpo orere ri Galili ọvo re se Nazarẹt, 27 bru ọmọtobẹ ọvo rẹ ọshare ọvo re se Josẹf ro nẹ uwevwin ri Devid rhe sa phiyotọ, odẹ rẹ ọmọtobẹ na Meri. 28 Rọ vwọ ro uwevwin na, amakashe na da ta kẹ nẹ: “Mi yeren uwe, wẹwẹ ra vwẹ ẹroesiri ni mamọ na, Jihova* vẹ owẹ herọ.” 29 Ẹkẹvuọvo ẹwẹn rọyen da yanghan ku mamọ fikirẹ eta rọyen na, kọ davwẹngba ro vwo vwo ẹruọ rẹ oborẹ uyeren nana se mudiaphiyọ. 30 Ọtiọyena amakashe na da ta kẹ nẹ: “Wo jẹ oshọ mu we-e, Meri, kidie wo vwo ẹroesiri rẹ Ọghẹnẹ re. 31 Nighere! wọ cha mrevun, wo che vwiẹ ọmọshare, wo mi se Jesu. 32 Ọ cha dia ohwo rode, ke che se Ọmọ rẹ Ọ ro Me Kpenu na, Jihova* Ọghẹnẹ cha vwẹ ekete ri Devid rọ dia ọsẹ rọyen vwọ kẹ, 33 ko che sun kerẹ Ovie vwẹ enu rẹ uwevwin ri Jekọp bedi bẹdẹ, Uvie rọyen che vwoba-a.”

34 Ẹkẹvuọvo Meri da ta kẹ amakashe na nẹ: “Mavọ yen ọnana sa vwọ phia, rọ vwọ dianẹ mi ji rhi nene ọshare vwerhẹn dẹvo-o na?” 35 Amakashe na da kpahen kẹ nẹ: “Ẹwẹn ọfuanfon cha rhe enu wẹn, ẹgba rẹ Ọ ro Me Kpenu na che rhurhu uwe. Ọtiọyena ke che se ọ re che vwiẹ na ọfuanfon, Ọmọ rẹ Ọghẹnẹ. 36 Nighere! Ẹlizabẹt rọ dia ohwo rẹ orua wẹn je mrevun rẹ ọmọshare ọvo vwẹ ọke ọghwo rọyen, evun na te emeranvwe esan re, aye rẹ ihwo se ẹgan na; 37 kidie o vwo orọnvwọn vuọvo rọ cha bẹn Ọghẹnẹ eruo-o.” 38 Meri da tanẹ: “Nighere! odibo ọmọtẹ ri Jihova! E jẹ ọ phia kẹ vwẹ kirobo ru wọ tare.” Ọtiọyena amakashe na da yan jovwo.

39 Ọtiọyena Meri de mu oyan phiyọ vwẹ ọke yena, o de brokpakpa kpo ubrakpọ rọ vọnre vẹ igbenu na, kpo orere ọvo vwẹ Juda, 40 Ọ da ro uwevwin ri Zekaraya, o de yeren Ẹlizabẹt. 41 Ẹlizabẹt vwo nyo uyeren ri Meri, ọmọ rọhẹ evun rọyen de pho, Ẹlizabẹt da vọn vẹ ẹwẹn ọfuanfon 42 o de kperi gangan nẹ: “Ebruba dia kẹ wẹ vwẹ ohri rẹ eya, ebruba dia kẹ omamọ rọhẹ evun wẹn na! 43 Mavọ uphẹn nana se vwo te vwe obọ, rẹ oni rẹ Ọrovwovwe vwo bru vwe rhe? 44 Kidie nighere! ugege mi vwo nyo uyeren wẹn, ọmọ rọhẹ evun mẹ na de pho vẹ aghọghọ. 45 Omavwerhovwẹn je dia vwọ kẹ aye ro segbuyota, kidie erọnvwọn ri Jihova* ta kẹ na che rugba karekare.”

46 Meri da tanẹ: “Erhi mẹ* ghwoghwo ọrho ri Jihova,* 47 ẹwẹn mẹ ghọghọre fikirẹ Ọghẹnẹ rọ dia Osivwin mẹ, 48 kidie o ni odibo ọmọtẹ rọyen vwẹ ẹdia ro kpotọ rọ hepha. Kidie nighere! vwo nẹ ọke nana yanran, uvwiẹ na eje che ghwoghwo nẹ mẹvwẹ ohwo rẹ oma vwerhan, 49 kidie Ọrovwẹgba na ru emu ride kẹ vwẹ, ọfuanfon yen odẹ rọyen, 50 nẹ uvwiẹ ra ro uvwiẹ, arodọnvwẹ rọyen hẹ enu rẹ ihwo re djoshọ rọyen. 51 Ọ vwẹ ugbobọ rọyen vwo ruiruo ride; ọ hra otu re kparoma vwevunrẹ iroro rẹ ubiudu rayen. 52 O si ihwo ri vwo ẹgba nẹ ekete, ọ da kpare ihwo ri kpotọ kpenu; 53 ọ vwẹ erọnvwọn esiri kẹ ihwo rẹ owẹnvwe hwe, evun da vọn ayen kẹrẹnkẹrẹn, o de ji edafe kpo vẹ abọ fefe. 54 Ọ rhe vwẹ ukẹcha kẹ Izrẹl odibo rọyen, ọ karophiyọ arodọnvwẹ rọyen, 55 kirobo rọ ta kẹ esẹ rẹ avwanre ride, vwọ kẹ Ebraham kugbe ọmọ* rọyen bẹdi bẹdẹ.” 56 Meri de nene dia omarẹ emeranvwe erha tavwen o ki rhivwin kpo uwevwin obọ rọyen.

57 Ọke rẹ Ẹlizabẹt che vwo vwiẹ de rhi te, o de vwiẹ ọmọshare. 58 Ihwo re dia kẹrẹ vẹ ihwo rẹ orua rọyen de nyo nẹ Jihova* gbe arodọnvwẹ rode kẹ, ayen de nene ghọghọ. 59 Ro vwo te ẹdẹ rẹrenren, ayen da rhe rhe yanvwe ọmọ na, kẹ ayen guọnọ mu odẹ rẹ ọsẹ rọyen Zekaraya vwọ kẹ. 60 Ẹkẹvuọvo oni rọyen da kpahen nẹ: “Ẹjo! Jọn yen e che se.” 61 Ọtiọyena ayen da ta kẹ nẹ: “O vwo ohwo rẹ orua wẹn vuọvo re se odẹ nana-a.” 62 Ayen da vwẹ obọ vwọ ta ota kẹ ọsẹ rọyen rẹ ayen vwọ nọ odẹ rọ guọnọ nẹ e se. 63 Ọtiọyena ọ da tanẹ a kẹ ọyen ophapha, o de si phiyọ nẹ: “Jọn yen odẹ rọyen.” Ọnana de gbe ayen eje unu. 64 Ugege yena unu rọyen de rhie, e de siobọnẹ ẹrẹnvwe rọyen, kọ ta ota ro vwo jiri Ọghẹnẹ. 65 Oshọ de mu ihwo eje re dia ekogho rayen, kẹ ayen ta ota kpahan erọnvwọn nana eje vwẹ ubrakpọ ri Judia eje rọ vọnre vẹ igbenu na. 66 Ihwo eje ri nyo kpahọn da kọn phiyọ ubiudu rayen, kẹ ayen tanẹ: “Oka rẹ ohwo vọ yen ọmọ nana cha dia?” Kidie vwọrẹ uyota, obọ ri Jihova* vẹ ọyen herọ.

67 Ọtiọyena Zekaraya ọsẹ rọyen da rhe vọn vẹ ẹwẹn ọfuanfon, ọ da mraro nẹ: 68 “E jẹ e jiri Jihova* Ọghẹnẹ rẹ Izrẹl, kidie ọ karophiyọ ihwo rọyen re, ọ ghwa usivwin bru ayen rhire. 69 Ọ vwẹ idjo rẹ usivwin ọvo vwo mu kẹ avwanre vwevunrẹ uwevwin rẹ odibo rọyen Devid re, 70 kirobo rọ wan unu rẹ emraro efuanfon rọyen rẹ awanre ta, 71 kpahen esivwon nẹ obọ rẹ ivwighrẹn rẹ avwanre, kugbe vwo nẹ obọ rẹ ihwo eje ri vwo utuoma kpahen avwanre; 72 ro vwo gbe arodọnvwẹ fikirẹ esẹ rẹ avwanre ride, rọ je vwọ karophiyọ ọphọ ọfuanfon rọyen, 73 ọphọ ro nene ọsẹ rẹ avwanre rode Ebraham re, womarẹ iyorin ro duvwunru, 74 nẹ e de sivwin avwanre vwo nẹ obọ rẹ ivwighrẹn nu, kọ kẹ avwanre uphẹn ra vwọ vwẹ ẹga ọfuanfon kẹ vwọrẹ jẹ oshọ ẹdjẹ 75 kugbe evun-ẹfuọn kugbe ophiọnphiọn vwẹ obaro rọyen vwẹ ẹdẹ rẹ avwanre eje. 76 Ẹkẹvuọvo vwọ kẹ wẹ, ọmọ, e che se we ọmraro rẹ Ọ ro Me Kpenu na, kidie wọ cha kobaro kẹ Jihova* ra rhuẹrẹ idjerhe rọyen, 77 wọ cha vwẹ erianriẹn rẹ usivwin kẹ ihwo rọyen womarẹ evwoghovwo rẹ imwemwu rayen, 78 fikirẹ arodọnvwẹ rẹ Ọghẹnẹ rẹ avwanre. Fikirẹ arodọnvwẹ nana, elo rẹ ọke ro rhieri che nẹ obenu bru avwanre rhe, 79 rọ vwọ vwẹ orẹmrẹ kẹ ihwo ri chidia ebri vẹ uhoho rẹ ughwu, ro ji vwo sun awọ rẹ avwanre vwẹ idjerhe rẹ ufuoma.”

80 Ọmọ na da rhe rho, o de ji vwo ogangan vwevunrẹ ẹwẹn, ọ da dia evunrẹ aton na rhirin re te ẹdẹ ro vwo dje oma rọyen phia kẹ Izrẹl vwẹ azagba.