Matiu

9 Ọtiọyena ọ da ro okọ na, o de kpo ẹbẹre ochekọ, ọ da ro orere rẹ obọ rọyen. 2 Nighere! ayen muẹ ọshare ọvo ro sherhẹn ehwa rọ sa kpara abọ vẹ awọ-ọ bro cha. Rọ vwọ mrẹ esegbuyota rayen, Jesu da ta kẹ ọshare rọ sa kpara abọ vẹ awọ-ọ na nẹ: “Fiudugberi, ọmọ! A vwẹ imwemwu wẹn vwo ghovwo uwe re.” 3 Asaọkiephana isiẹbe evo ke ta kẹ omoma rayen nẹ: “Ohwo nana ta eta rẹ ẹgua vwọsua Ọghẹnẹ.” 4 Jesu rọ riẹn oborẹ ayen roro na da tanẹ: “Diesorọ ovwan vwo roro erọnvwọn ebrabra vwevunrẹ ubiudu rẹ ovwan? 5 Kerẹ udje, ọvọ yen ma lọhọ, ra vwọ tanẹ, ‘A vwẹ imwemwu wẹn vwo ghovwo uwe re,’ gbanẹ ra vwọ tanẹ, ‘Vrẹn rere wọ yan’? 6 Ẹkẹvuọvo rere ovwan vwọ riẹn nẹ Ọmọ rẹ ohwo na vwo ogangan vwẹ otọrakpọ na rọ vwọ reyọ imwemwu vwo ghovwo—” ọ da ta kẹ ọ rọ sa kpara abọ vẹ awọ-ọ na nẹ: “Vrẹn, mu ehwa wẹn rere wo kpo uwevwin wẹn.” 7 O de vrẹn, o de kpo uwevwin rọyen. 8 Ọke rẹ otu na vwọ mrẹ ọnana, oshọ de mu ayen, ayen da vwẹ urinrin kẹ Ọghẹnẹ rọ vwẹ ogangan tiọyena vwọ kẹ ihworakpọ.

9 Ọyena vwọ wan nu, ri Jesu vwo vrẹn nẹ etiyin, ọ da mrẹ ọshare ọvo re se Matiu, ro chidia ọfisi ra da hwosa uyovwin, ọ da ta kẹ nẹ: “Dia odibo mẹ.” Ọtiọyena o de vrẹn, o de nene. 10 Ọke vwọ yan obaro, rọ vwọ riemu* vwevunrẹ uwevwin na, nighere! ihwo buebun ri phi osa uyovwin kugbe irumwemwu da rhe, kẹ ayen nene Jesu vẹ idibo rọyen riemu kuẹgbe.* 11 Ẹkẹvuọvo ọke rẹ ihwo ri Farisi na vwọ mrẹ ọnana, ayen da ta kẹ idibo rọyen nẹ: “Diesorọ oyono rẹ ovwan vẹ ihwo ri phi osa uyovwin kugbe irumwemwu vwọ riemu kuẹgbe?” 12 Ro vwo nyo ayen, ọ da tanẹ: “Ihwo rẹ oma rayen ganre guọnọ ọbo-o, ẹkẹvuọvo ihwo rẹ oma rayen jẹ gan yen guọnọ ọbo. 13 Ọtiọyena, ovwan yanran we re yono oborẹ ọnana mudiaphiyọ: ‘Me guọnọ arodọnvwẹ, ọ dia izobo-o.’ Kidie me rhere rhi se evwata-a, ẹkẹvuọvo irumwemwu.”

14 Ọyena vwọ wan nu, idibo ri Jọn de bro rhe, ayen da nọ nẹ: “Diesorọ avwanre vẹ ihwo ri Farisi na vwo chiri owẹnvwe, jẹ idibo wẹn chiri owẹnvwe-e?” 15 Ọtiọyena Jesu da ta kẹ ayen nẹ: “O vwo oboresorọ igbeyan rẹ ọshare ọpha na vwo vweri rẹ ọshare ọpha na vẹ ayen je vwọ herọ na-a, gbanẹ o vwo oboresorọ? Ẹkẹvuọvo ọke cha ra cha vwọ reyọ ọshare ọpha na jẹ ayen vwo, ọke yena kẹ ayen che chiri owẹnvwe. 16 O vwo ohwo vuọvo ro ko ẹbẹre amwa kpokpọ phiyọ ewun rẹ obotafe rẹ awanre-e, kidie ẹbẹre amwa kpokpọ na cha fian nẹ ewun na, ọ me rhe bẹre rhophiyọ. 17 Yẹrẹ kẹ ihwo kuẹ iwaini kpokpọ phiyọ ekpu rẹ iwaini awanre-e. Ayen de ru ọtiọyen, ekpu rẹ iwaini na cha bẹre, iwaini na mi hwẹ kufia, ekpu rẹ iwaini na me je ghwọrọ. Ẹkẹvuọvo ihwo kuẹ iwaini kpokpọ phiyọ ekpu rẹ iwaini kpokpọ, ka sa sẹro rẹ ivẹ na kuẹgbe.”

18 Rẹ ọ je vwọ vuẹ ayen erọnvwọn nana, nighere! osun ọvo ro bruro rhe da vwẹ uyovwin kpotọ kẹ, ọ da tanẹ: “O muẹro nẹ ọmọtẹ mẹ ghwuru enẹna re, ẹkẹvuọvo yanrhe rhe ghwobọ wẹn kpahọn, ko che vrẹn.”

19 Ọtiọyena Jesu de vrẹn, ọ vẹ idibo rọyen de nene. 20 Nighere! aye ọvo rọ rioja rẹ ọbara ro hwẹ nẹ oma rọyen vwẹ ẹgbukpe 12 re da yanrhe obuko rọyen, o de djobọte ejọjọ rẹ ewun rẹ obotafe rọyen, 21 kidie o dje ẹtẹta kẹ oma rọyen nẹ: “Mi de se djobọte ewun rẹ obotafe rọyen ọvo, oma mẹ cha gan.” 22 Jesu de kuomarhẹriẹ, ro vwo noso, ọ da tanẹ: “Fiudugberi, ọmọtẹ! Esegbuyota wẹn nẹrhẹ oma wẹn gan nure.” Vwo nẹ unọke yena yanran oma rẹ aye na da gan.

23 Asaọkiephana rọ vwọ ro uwevwin rẹ osun na, rọ vwọ mrẹ ihwo ri hworo iflutu kugbe otu na ri do, 24 Jesu da tanẹ: “Ovwan vrẹn nẹ etiyin, kidie ọmọtẹ na ghwuru-u, ẹkẹvuọvo ọ vwerhẹn.” Ọtiọyena kẹ ayen reyọ vwọ jehwẹ. 25 Ugege rẹ otu na vwọ ro otafe nu, ọ da ro asan ra hwa ọmọtẹ na phiyọ, ọ da yọnrọn obọ rẹ ọmọtẹ na, ọmọtẹ na de vrẹn. 26 E de gbe ikuegbe nana nene ekogho yena eje.

27 Rẹ Jesu vwo vrẹn nẹ etiyin, eshare ivẹ ri rhuẹro de nene, jẹ ayen kperẹ nẹ: “Gbe arodọnvwẹ kẹ avwanre, Ọmọ ri Devid.” 28 Ọke rọ vwọ ro uwevwin na nu, eshare ri rhuẹro na de bro rhe, Jesu da nọ ayen nẹ: “Ovwan vwo esegbuyota nẹ mi se ru ọnana?” Ayen da kpahen kẹ nẹ: “E, Ọrovwori.” 29 O de djobọte ẹro rayen, ọ da tanẹ: “E jẹ ọ phia kẹ ovwan kirobo rẹ esegbuyota rẹ ovwan hepha.” 30 Ẹro rayen de rhie. Vwọ vrẹ ọyena, Jesu de si ayen orhọ gangan nẹ: ”Ovwan vwo imuẹro nẹ ohwo vuọvo riẹn kpahen ọnana-a.” 31 Ẹkẹvuọvo ayen vwọ ro otafe nu, ayen da vuẹ ihwo rẹ ekogho yena ejobi kpahọn.

32 Ọke rẹ ayen vwo vrẹn nẹ etiyin, nighere! ihwo de mu ọshare ọvo rọ sa ta ota-a rẹ ẹwẹn rẹ Idẹbono kpokpo bro rhe; 33 ọke rọ vwọ djẹ ẹwẹn rẹ Idẹbono na no oma nu, ọshare rọ sa ta ota-a na da ta ota. Ọnana de gbe otu na unu, ayen da tanẹ: “A je rhe mrẹ orọnvwọn ọtiọna vwẹ Izrẹl dẹvo-o.” 34 Ẹkẹvuọvo ihwo ri Farisi na ke tanẹ: “Ogangan rẹ osun rẹ ẹwẹn rẹ Idẹbono na yen ọ vwọ djẹ ẹwẹn rẹ Idẹbono na phia.”

35 Jesu da tuẹn ekion rẹ irere na eje kugbe eko na phiyọ, o yono vwẹ sinagọg rayen ji ghwoghwo iyẹnrẹn esiri rẹ Uvie na, jẹ o sivwẹn koka koka rẹ ega kugbe koka koka rẹ emiavwe. 36 Rọ vwọ mrẹ otu na, aro rayen da dọn kidie ayen pha kerẹ igodẹ re wan oma, re hra nene asan eje, ri vwo osu-un. 37 Ọ da ta kẹ idibo rọyen nẹ: “E, orhọ na rhoro, ẹkẹvuọvo ewiowian na bunru-u. 38 Ọtiọyena ovwan rẹ Onini rẹ orhọ na nẹ o ji ewiowian ro evunrẹ orhọ rọyen.”