Matiu

10 Ọtiọyena o de se idibo rọyen 12, ọ da kẹ ayen ogangan vwẹ enu rẹ ẹwẹn ri jẹfuọn, rere ayen vwọ djẹ ayen phia kugbe rere ayen vwo sivwin koka koka rẹ ega kugbe koka koka rẹ emiavwe.

2 Edẹ rẹ iyinkọn 12 na kẹ ena: Ẹsosuọ, Saimọn re se Pita kugbe Andru oniọvo rọyen; Jems ọmọ ri Zẹbẹdi kugbe Jọn oniọvo rọyen; 3 Filip kugbe Batolomio; Tọmọs kugbe Matiu ro phi osa uyovwin; Jems ọmọ rẹ Alfiọs; kugbe Tadiọs; 4 Saimọn rọ dia Kenanian na;* kugbe Judas Iskariọt rọ shẹrẹ ukuko na.

5 Iyinkọn 12 nana yen Jesu jiri, ọ da vwẹ odjekẹ nana kẹ ayen nẹ: “Ovwan vwẹriẹ idjerhe rẹ ẹgborho na-a, ovwan je rua orere ri Sameria vuọvo-o; 6 ukperẹ ọtiọyen, ovwan bru igodẹ rẹ uwevwin rẹ Izrẹl ri ghwruru ra ọkieje. 7 Rẹ ovwan vwọ yanran na, ovwan rhe ghwoghwo nẹ: ‘Uvie rẹ idjuvwu na sikẹre re.’ 8 Ovwan sivwin ihwo re muọga, rhọvwọn ihwo ri ghwuru, ru ehọnvwoti fon, djẹ ẹwẹn rẹ Idẹbono phia. Ọphẹ yen a vwerọ kẹ ovwan, ovwan je vwọ kẹ ihwo ọphẹ. 9 Ovwan ghwa oro yẹrẹ idọnọ ọfuanfon yẹrẹ ẹrovwo vwẹ umwehun rẹ igho rẹ ovwa-an, 10 yẹrẹ ghwa ekpu rẹ emu vwọ kẹ oyan na-a, yẹrẹ iwun ivẹ,* yẹrẹ isabato, yẹrẹ ọkpọ-ọ, kidie ofori nẹ a kẹ ọwiowian emuọre rọyen.

11 “Korere korere yẹrẹ kọko kọko rẹ ovwan roro, ovwan guọnọ ohwo ro fori vwẹ evun rọyen rere ovwan dia etiyin bẹsiẹ rẹ ovwan vwo vrẹn no. 12 Ọke rẹ ovwan da ro uwevwin na, ovwan yeren* ihwo rẹ uwevwin na. 13 Ọ da dianẹ uwevwin na fori, e jẹ ufuoma rẹ ovwan guọnọ kẹ na dia evun rọyen; ẹkẹvuọvo o rhe fo-o, e jẹ ufuoma rẹ ovwan na rhivwin bru ovwan rhe. 14 Kasan kasan rẹ ohwo rhe rhiabọreyọ ovwan yẹrẹ kerhọ rẹ eta rẹ ovwa-an, ọke rẹ ovwan de nẹ uwevwin yena yẹrẹ orere yena, ovwan tue ekpẹn nẹ awọ rẹ ovwan. 15 Uyota me ta kẹ ovwan nẹ, ọ cha bra vwọ kẹ orere yena vwẹ Ẹdẹ rẹ Ẹdjọeguo na vwọ vrẹ Sodọm vẹ Gomora.

16 “Nighere! mi jẹ ovwan yanran kerẹ igodẹ vwẹ ohri rẹ iwofu;* ọtiọyena ovwan ghwanre kerẹ eredekọ, dedena e jẹ abọ rẹ ovwan fon kerẹ ilekuku. 17 Ovwan nomaso kpahen ihwo, kidie ayen che mu ovwan kpo aguare, ayen cha fa ovwan vwevunrẹ sinagọg rayen. 18 A cha reyọ ovwan kpo obaro rẹ isun kugbe ivie fiki mẹ, rọ vwọ dia oseri vwọ kẹ ayen kugbe ẹgborho na. 19 Ẹkẹvuọvo ọke rẹ ayen da reyọ ovwan rhe obaro rayen, ovwan rua ẹnwan kpahan oborẹ ovwan cha ta yẹrẹ oborẹ ovwan cha ta wa-an, kidie a cha vwẹ oborẹ ovwan cha ta vwọ kẹ ovwan vwẹ unọke yena; 20 kidie ọ dia ovwan ọvo yen ta ota-a, ẹkẹvuọvo ẹwẹn rẹ Ọsẹ rẹ ovwan yen womarẹ ovwan ta ota. 21 Vwọba, oniọvo cha vwẹ oniọvo vwọ kpahotọ kẹ ughwu, ọsẹ che ru ọtiọyen kẹ ọmọ rọyen, emọ che vrẹn vwọso esẹ vẹ ini rayen, ayen me teyen ayen hwe. 22 Ihwo eje che vwo utuoma kpahen ovwan fikirẹ odẹ mẹ, ẹkẹvuọvo ohwo ro chirakon toba yen che vwo usivwin. 23 E de mukpahen ovwan vwẹ orere ọvo, ovwan djẹ kpo ọfa; kidie uyota me ta kẹ ovwan nẹ, o vwo ọke vuọvo rẹ ovwan che vwo kin irere rẹ Izrẹl re tavwen Ọmọ rẹ ohwo ke rhe-e.

24 “Ohwo re yono rho vrẹ oyono rọye-en, ọviẹn je rho vrẹ onini rọye-en. 25 O teri rẹ ohwo re yono vwọ dia kerẹ oyono rọyen, rẹ ọviẹn je vwọ dia kerẹ onini rọyen. Ọ da dianẹ ihwo se onini rẹ uwevwin na Bẹlzibọb,* kẹ ihwo rẹ evwruwevwin rọyen yen ayen che je se ọtiọyen? 26 Ọtiọyena ovwan djoshọ raye-en, kidie o vwo orọnvwọn vuọvo re rhurhuru re che je rhie-e, o ji vwo orọnvwọn vuọvo rọ djahenre re che jẹriẹ-ẹn. 27 Obo re me vuẹ ovwan vwevunrẹ ebri, ovwan ta vwẹ aruphẹn, obo re dje phiyọ ovwan orhọ, ovwan ghwoghwo vwo nẹ enu rẹ uwevwin na rhe. 28 Ovwan djoshọ rẹ ihwo ri hwe ugboma na ẹkẹvuọvo ayen che se hwe erhi* na-a; ukperẹ ọtiọyen, ovwan djoshọ rẹ ohwo rọ sa ghwọrọ erhi na vẹ ugboma na vwẹ Gehina.* 29 Igho otete* ro te emuọvo-o yen a shẹ igue ivẹ, gbanẹ ọ dia ọtiọyen? Dedena o vwo ọvuọvo vwẹ usun rayen ro che she teyen otọ rẹ Ọsẹ rẹ ovwan rọhẹ obodjuvwu de jẹriẹ-ẹn. 30 Ẹkẹvuọvo ẹton rẹ uyovwin rẹ ovwan dede, e kere ayen ejobi. 31 Ọtiọyena ovwan djoshọ-ọ; ovwan ghanre vrẹ igue buebun.

32 “Ọtiọyena kohwo kohwo rọ rhọnvwere nẹ ọyen vughe uvwe vwẹ obaro rẹ ihworakpọ, ke me je cha rhọnvwe vwẹ obaro rẹ Ọsẹ mẹ rọhẹ obodjuvwu na nẹ mi vughire. 33 Ẹkẹvuọvo kohwo kohwo rọ sen vwẹ vwẹ obaro rẹ ihworakpọ, ke me je siọn vwẹ obaro rẹ Ọsẹ mẹ rọhẹ obodjuvwu na. 34 Ovwan roro nẹ me rhere rhi phi ufuoma phiyọ akpọ na-a; me rhere rhi phi ufuoma phiyọ-ọ, ẹkẹvuọvo ọlọkọ. 35 Kidie me rhere rhe so ohẹriẹ, ọshare vwọso ọsẹ rọyen, ọmọtẹ vwọso oni rọyen, aye vwọso oni orọnvwe rọyen. 36 Vwọrẹ uyota, ivwighrẹn rẹ ohwo cha dia ihwo rẹ evwruwevwin robọ rọyen. 37 Kohwo kohwo ro vwo ẹguọnọ rẹ ọsẹ yẹrẹ oni vwọ vrẹ vwẹ fo kẹ vwẹ-ẹ; kohwo kohwo ro vwo ẹguọnọ rẹ ọmọshare yẹrẹ ọmọtẹ rọyen vwọ vrẹ vwẹ fo kẹ vwẹ-ẹ. 38 Kohwo kohwo ro rhiabọreyọ urhe rẹ oja* rọyen ro de nene uvwe-e, ji fo kẹ vwẹ-ẹ. 39 Kohwo kohwo rọ davwẹngba rọ vwọ sẹro rẹ erhi* rọyen che kuo kufia, kohwo kohwo ro ku erhi* rọyen kufia fiki mẹ cha mrẹ.

40 “Kohwo kohwo ro rhiabọreyọ ovwan ji rhiabọreyọ ovwẹ, kohwo kohwo ro rhiabọreyọ ovwẹ ji rhiabọreyọ Ohwo ro ji vwe rhe. 41 Kohwo kohwo ro rhiabọreyọ ọmraro kidie nẹ ọmraro o ruẹ, che vwo osa rẹ ọmraro, kohwo kohwo ro rhiabọreyọ ọvwata kidie nẹ ọvwata o ruẹ, che vwo osa rẹ ọvwata. 42 Kohwo kohwo rọ vwẹ uko ame odjidjiro vwọ kẹ ọvo vwẹ usun rẹ imitete nana da kidie nẹ odibo o ruẹ, me vuẹ wẹ vwọrẹ uyota nẹ o vwo ọke vuọvo rẹ osa rọyen cha vwọ va abọ-ọ.”