Mak

10 Ro vwo vrẹn nẹ etiyin, o de kpo ughwru ri Judia vwẹ obovrẹ ri Jọdan, ihwo buebun da rhoma koko bro rhe. Kirobo rẹ ẹkuruemu rọyen hepha, ko yono ayen. 2 Ihwo ri Farisi na de bro rhe vẹ ẹwẹn rẹ ayen vwọ davwọn ni, ayen da nọ sẹ urhi rhọnvwere nẹ ọshare fan orọnvwe rọyen. 3 Ọ da kpahen kẹ ayen nẹ: “Die yen Mosis ji iji rọyen kẹ ovwan?” 4 Ayen da tanẹ: “Mosis rhọnvwere nẹ e si ọbe rẹ orọnvwe-ẹfan vwọ kẹ aye rere e siobọno.” 5 Ẹkẹvuọvo Jesu da ta kẹ ayen nẹ: “Udu ọgangan rẹ ovwan yen nẹrhẹ o si iji nana kẹ ovwan. 6 Ẹkẹvuọvo vwo nẹ ọtonphiyọ rẹ emama rhe, ‘Ọ ma ayen ọshare vẹ aye. 7 Fikirẹ ọnana ọshare kọ yanjẹ ọsẹ vẹ oni rọyen vwo, 8 ayen ivẹ na ke dia ugboma ọvo,’ kidie ayen rha dia ivẹ ọfa-a, ẹkẹvuọvo kẹ ugboma ọvo. 9 Ọtiọyena oborẹ Ọghẹnẹ tan kugbe nu, e jẹ ohwo vuọvo hẹriẹ-ẹ.” 10 Ọke rẹ ayen vwọ rhoma ro uwevwin na, idibo na ke nọ enọ kpahan ọnana. 11 Ọ da ta kẹ ayen nẹ: “Kohwo kohwo rọ sen aye rọyen rọ da rọvwọn ọfa gbe igberadja rhurho, 12 ọ da dianẹ aye sen ọshare rọyen rọ da rọvwọn ọfa, jẹ o gbe igberadja.”

13 Asaọkiephana ihwo ki muẹ imitete bro cha rere o djobọte ayen, ẹkẹvuọvo idibo na ke ghwọkuẹ ayen. 14 Jesu vwọ mrẹ ọnana, ivun de miovwo gangan, ọ da ta kẹ ayen nẹ: “Ovwan jẹ imitete na bru vwe rhe; ovwan davwẹngba rẹ ovwan vwọ dobọ rayen ji-i, kidie Uvie rẹ Ọghẹnẹ na ọ rẹ ihwo tiọyena. 15 Uyota me ta kẹ ovwan nẹ, kohwo kohwo ro rhiabọreyọ Uvie rẹ Ọghẹnẹ na kerẹ omotete-e, o vwo ọke vuọvo rọ cha vwọ ruọ-ọ.” 16 O de mu emọ na, kọ nẹrhovwo kẹ ayen, rọ vwọ ghwabọ kpahen ayen.

17 Rọ vwọ hẹ idjerhe yanran, ọshare ọvo da djẹ bro rhe, o de shiguẹ totọ vwẹ obaro rọyen, ọ da nọ nẹ: “Oyono esiri, die yen mi che ru rere mi se vwo vwo arhọ ri bẹdẹ?” 18 Jesu da ta kẹ nẹ: “Diesorọ wo vwo se vwe ọresiri? O vwo ohwo vuọvo rọ dia ọresiri-i, jokparẹ Ọghẹnẹ ọvo. 19 Wọ riẹn iji na: ‘Wo hwe ohwo-o, wo gbe igberadja-a, wo chuji-i, wo soseri rẹ efia-an, wọ ghwa ohwo ria-a, muọghọ kẹ ọsẹ wẹn vẹ oni wẹn.’” 20 Ọshare na da ta kẹ nẹ: “Oyono, nẹ ọke rẹ eghene mẹ rhe yen mi vwo ruẹ erọnvwọn nana eje.” 21 Jesu de no, o de vwo ẹguọnọ rọyen, ọ da ta kẹ nẹ, “Emu ọvo ghwrẹ vwẹ oma wẹn, yanran ra shẹ erọnvwọn ru wo vwori, wọ vwẹ igho na vwọ kẹ igbere, ku wo che vwo efe vwẹ obodjuvwu; gba yanrhe wọ rhe dia odibo mẹ.” 22 Ẹkẹvuọvo ẹkpahọnphiyọ na da nẹrhẹ o muomaphiyọ, ọ da yanran vwọrẹ omaemuophiyọ, kidie o vwo ekuakua buebun.

23 Jesu vwo ni oma riariẹ nu, ọ da ta kẹ idibo rọyen nẹ: “Ọ cha bẹn rẹ ihwo ri vwo igho vwọ ro Uvie rẹ Ọghẹnẹ na!” 24 Ẹkẹvuọvo eta rọyen de gbe idibo na unu. Jesu da kpahen nẹ: “Emọ na, ọ cha bẹn ra vwọ ro Uvie rẹ Ọghẹnẹ na! 25 Ọ lọhọre rẹ ikamẹl vwọ wan ẹro* rẹ ukoti* vwọ vrẹ ọ rẹ ọdafe vwọ ro Uvie rẹ Ọghẹnẹ na.” 26 Ọ da rhoma gbe ayen unu phiyọ, ayen da ta kẹ nẹ:* “Kẹ ono yen se sivwin rhọ?” 27 Rọ vwọ tẹnrovi ayen, Jesu da tanẹ: “Vwọ kẹ ihworakpọ ọnana cha sa phia-a, jẹ ọ dia ọtiọyen yen ọ hepha kẹ Ọghẹnẹ-ẹ, kidie Ọghẹnẹ se ru emu eje.” 28 Pita kọ ta kẹ nẹ: “Nighere! Avwanre yanjẹ erọnvwọn eje vwo, avwanre de nene uwe.” 29 Jesu da tanẹ: “Uyota me ta kẹ ovwan nẹ, o vwo ohwo vuọvo rọ yanjẹ iwevwin yẹrẹ iniọvo eshare yẹrẹ iniọvo eya yẹrẹ oni yẹrẹ ọsẹ yẹrẹ emọ yẹrẹ idju vwo fiki mẹ kugbe fikirẹ iyẹnrẹn esiri na 30 ro che jẹ ayen evwo abọ 100 asaọkiephana vwẹ uvwrẹ ọke nana-a—iwevwin, iniọvo eshare, iniọvo eya, ini, emọ, kugbe idju, vẹ omukpahen⁠—kugbe arhọ ri bẹdi bẹdẹ vwẹ eyeren* rọ cha na. 31 Ẹkẹvuọvo ihwo buebun re dia erẹsosuọ cha kuko, e re kuko me dia erẹsosuọ.”

32 Asaọkiephana rẹ ayen vwọ hẹ idjerhe kpo Jerusalẹm, Jesu kobaro kẹ ayen, o de gbe ayen unu, ẹkẹvuọvo oshọ ko muẹ ihwo ri nene. Vwẹ obọfa, ọ da reyọ Ihwivẹ na kpo ọkọkọ, kọ vuẹ ayen erọnvwọn nana re cha phia kẹ ọyen kẹrẹkpẹ na: 33 “Nighere! Avwanre kpo Jerusalẹm, e che phi Ọmọ rẹ ohwo na phiyọ obọ rẹ irherẹn ride na kugbe isiẹbe na. Ayen che brorhiẹn rẹ ughwu hwe, ayen me vwọ kẹ ihwo rẹ ẹgborho na, 34 enana cha vwọ jehwẹ, dje enya kuo, fa, ji hwe, ẹkẹvuọvo ẹdẹ erha da wan nu ko che vrẹn.”

35 Jems vẹ Jọn, emọ ri Zẹbẹdi de bro rhe, ayen da ta kẹ nẹ: “Oyono, avwanre guọnọre nẹ wo ru kemu kemu rẹ avwanre nọ mie we kẹ avwanre.” 36 Ọ da ta kẹ ayen nẹ: “Die yen ovwan guọnọre nẹ mi ru kẹ ovwan?” 37 Ayen da kpahen nẹ: “Rhọnvwe kẹ avwanre nẹ avwanre chidia, ọvo vwẹ obọrhen wẹn ọvo vwẹ obohwẹre wẹn vwevunrẹ urinrin wẹn.” 38 Ẹkẹvuọvo Jesu da ta kẹ ayen nẹ: “Ovwan riẹn oborẹ ovwan nokpẹn rọyen na-a. Ovwan sa da vwo nẹ uko re me da na yẹrẹ bromaphiyame vẹ omaebrophiyame re bru vwe phiyọ na?” 39 Ayen da ta kẹ nẹ: “Avwanre se ru ọtiọyen.” Jesu da ta kẹ ayen nẹ: “Uko re me da na, ovwan cha da vwọ, omaebrophiyame re bru vwe phiyọ na, e che bru ovwan phiyọ. 40 Jẹ ọ dia omẹvwẹ yen che brorhiẹn rẹ ohwo ro che chidia obọrhen yẹrẹ obohwẹre mẹ-ẹ, ẹkẹvuọvo ọ herọ vwọ kẹ ihwo ra rhuẹrerẹ phiyotọ kẹ.”

41 Ọke rẹ ihwe ri chekọ na vwo nyo kpahọn, ophu de mu ayen gangan kpahen Jems vẹ Jọn. 42 Ẹkẹvuọvo Jesu de se ayen te oma, ọ da ta kẹ ayen nẹ: “Ovwan riẹnre nẹ ihwo ra riẹn phiyọ isun rẹ ẹgborho na vwẹ oma ruẹ inini vwẹ enu rayen, ihwo ride rayen vwẹ ogangan rayen vwo ruiruo vwẹ enu rayen. 43 E jẹ ọ dia ọtiọyen vwẹ ohri rẹ ovwa-an; ẹkẹvuọvo kohwo kohwo rọ guọnọ dia ohwo rode vwẹ ohri rẹ ovwan kọ dia odibo rẹ ovwan, 44 kohwo kohwo rọ guọnọ dia ohwo rẹsosuọ vwẹ ohri rẹ ovwan kọ dia ọviẹn rẹ ihwo eje. 45 Kidie Ọmọ rẹ ohwo dede rhere, ọ dia ọ re vwo gbodibo kẹ-ẹ, ẹkẹvuọvo ro vwo gbodibo rere ọ vwẹ arhọ* rọyen vwọ kpahotọ kerẹ ọtanhirhe vwọ kẹ ihwo buebun.”

46 Ayen da ro evunrẹ Jẹriko. Ẹkẹvuọvo ọke rọ vẹ idibo rọyen kugbe otu buebun vwo nẹ Jẹriko, Batimiọs (ọmọ ri Timiọs), rọ dia orhuẹro rọ yara emu, chidia orhoma rẹ idjerhe na. 47 Ọke ro vwo nyo nẹ Jesu rọ dia ohwo ri Nazarẹt na yen wanvrẹ, ko kperẹ nẹ: “Ọmọ ri Devid, Jesu, gbe arodọnvwẹ kẹ vwẹ!” 48 Ọtiọyena ihwo buebun ke ghwọkuo rẹ ayen vwọ vuẹ nẹ o fotovwin, ẹkẹvuọvo kọ rhoma kperẹ ganphiyọ nẹ: “Ọmọ ri Devid, gbe arodọnvwẹ kẹ vwẹ!” 49 Ọtiọyena Jesu da domaji, ọ da tanẹ: “Ovwan se rhe vwe.” Ọtiọyena ayen de se ọshare ro rhuẹro na, rẹ ayen vwọ ta kẹ nẹ: “Fiudugberi! Vrẹn; o se we.” 50 O de do ewun rẹ obotafe rọyen kufia, o de pho kpenu, o de mudia, o de bru Jesu ra. 51 Jesu da ta kẹ nẹ: “Die yen wọ guọnọre nẹ mi ru kẹ wẹ?” Ọshare ro rhuẹro na da ta kẹ nẹ: “Raboni,* juvwe rhoma mrorẹ.” 52 Jesu da ta kẹ nẹ: “Yanran. Esegbuyota wẹn nẹrhẹ oma wẹn gan nure.” Ugege yena ọ da rhoma mrorẹ, ko nene vwẹ idjerhe na.