Jọn

13 Asaọkiephana kidie nẹ ọ riẹnre tavwen e ki ru Orẹ rẹ Ọwanvrẹ na nẹ ọke ro che vwo nẹ akpọ nana bru Ọsẹ na ra te re, Jesu ro vwo ẹguọnọ rẹ erọyen rehẹ evunrẹ akpọ na, de vwo ẹguọnọ rayen toba. 2 Rẹ ayen je vwọ riemu rẹ ovwọnvwọn na, jẹ Idẹbono phiro phiyọ ubiudu ri Judas Iskariọt, ọmọ ri Saimọn nure, nẹ ọ shẹ. 3 Ọtiọyena Jesu vwọ riẹn nẹ Ọsẹ na phi erọnvwọn eje phiyọ obọ rọyen nure, nẹ ọyen nẹ obọ rẹ Ọghẹnẹ rhe, nẹ o ji brẹ Ọghẹnẹ ra, 4 o de vrẹn nẹ emu ovwọnvwọn na, o de ku iwun rẹ obotafe rọyen phiyotọ. Ọ da reyọ itọwẹ, o de vwo mu ehun rọyen.* 5 Ro vwo ru ọyena nu, o de ku ame phiyọ oze, kọ hworhẹ awọ rẹ idibo na, ọ me vwẹ itọwẹ ro vwo mu ehun* na vwo rien ayen ya. 6 O de rhi te Saimọn Pita. Ọ da ta kẹ nẹ: “Ọrovwori, wọ cha hworhẹ awọ mẹ?” 7 Jesu da kpahen kẹ nẹ: “Obo ri mi ruẹ na, wo vwo ẹruọ rọyen asaọkiephana-a, ẹkẹvuọvo wo che vwo ẹruọ rọyen ọke rẹ erọnvwọn nana da wan nu.” 8 Pita da ta kẹ nẹ: “O vwo ọke vuọvo wọ cha vwọ hworhẹ awọ mẹ-ẹ.” Jesu da kpahen kẹ nẹ: “Jokpanẹ ke me hworhẹ owẹ, mẹ vẹ owẹ vwo ẹkẹ-ẹn.” 9 Saimọn Pita da ta kẹ nẹ: “Ọrovwori, ọ dia awọ mẹ ọvo wọ cha hworhẹ-ẹ, ẹkẹvuọvo je hworhẹ abọ mẹ vẹ uyovwin mẹ.” 10 Jesu da ta kẹ nẹ: “Kohwo kohwo rọ họ nure, o rhe vwo oboresorọ a vwọ hworhẹ asan efa vrẹ awọ rọye-en, ẹkẹvuọvo ọ fonro karekare. Ovwan fonro, ẹkẹvuọvo ọ dia ovwan eje-e.” 11 Kidie ọ riẹn ohwo rọ cha shẹ na. Ọnana yen sorọ ọ vwọ tanẹ: “Ọ dia ovwan eje yen fonro-o.”

12 Asaọkiephana rọ vwọ hworhẹ awọ rayen ji ku iwun rẹ obotafe rọyen phiyọ nu, ọ da rhoma chidia imẹjẹ na, ọ da ta kẹ ayen nẹ: “Ovwan vwo ẹruọ rẹ oborẹ mi ru kẹ ovwan na? 13 Ovwan se vwe ‘Oyono’ kugbe ‘Ọrovwori,’ ọyena gbare kidie ọtiọyen me hepha. 14 Ọtiọyena ọ da dianẹ mẹvwẹ, Ọrovwori kugbe Oyono na hworhẹ awọ rẹ ovwan, ovwan je hworhẹ* awọ rẹ ohwohwo. 15 Kidie mi phi udje na phiyotọ kẹ ovwan nẹ kirobo ri mi ghwe ru kẹ ovwan na, ovwan ji ru ọtiọyen. 16 Uyota, uyota me ta kẹ ovwan nẹ, odibo rho nọ onini rọye-en, yẹrẹ ohwo re jiri rho nọ ohwo ro jiro-o. 17 Ọ da dianẹ ovwan riẹn erọnvwọn nana, omavwerhovwẹn dia kẹ ovwan siẹrẹ ovwan de ru ayen. 18 Ọ dia ovwan eje yen me ta ota kpaha-an; me riẹn e re me jẹreyọ. Ẹkẹvuọvo ọnana dia ọtiọyen rere isiesi ọfuanfon na se vwo rugba: ‘Ọ rọ ria ibrẹdi mẹ kpare uchukowọ rọyen vwọso ovwẹ.’* 19 Nẹ ọke nana yanran, me vuẹ ovwan tavwen ọ ke rhe phia, rere ọke rọ da phia, ovwan se vwo segbuyota nẹ mẹvwẹ yen ohwo na. 20 Uyota, uyota me ta kẹ ovwan nẹ, kohwo kohwo ro rhiabọreyọ ohwo ri mi jiri ji rhiabọreyọ ovwẹ, kohwo kohwo ro rhiabọreyọ ovwẹ ji rhiabọreyọ Ohwo ro ji vwe rhe.”

21 Ọke rọ vwọ ta eta nana nu, ẹwẹn ri Jesu da rhe yanghan ku, o de soseri rọ vwọ tanẹ: “Uyota, uyota me ta kẹ ovwan nẹ, ọvo vwẹ usun rẹ ovwan na cha shẹ vwẹ.” 22 Idibo na ki nẹ ohwohwo, kẹ ayen ruẹ gedegede kidie ayen riẹn ohwo rọ ta ota kpaha-an. 23 Ọvo vwẹ usun rẹ idibo na, ọ ri Jesu vwo ẹguọnọ rọyen na chidia kẹrẹ* Jesu. 24 Ọtiọyena Saimọn Pita de phi uyovwin kẹ ọnana rọ vwọ ta kẹ nẹ: “Vuẹ avwanre ohwo rọ ta ota kpahan.” 25 Ọtiọyena ọnana da vwẹ oma rẹrẹ udu ri Jesu, ọ da ta kẹ nẹ: “Ọrovwori, ono yen ohwo na?” 26 Jesu da kpahen nẹ: “Ohwo re me cha vwẹ ibrẹdi ri mi che duvwun phiyọ na vwọ kẹ.” Ọtiọyena ro vwo duvwun ibrẹdi na phiyọ nu, ọ da reyọ, ọ da vwọ kẹ Judas ọmọ ri Saimọn Iskariọt. 27 Ọke ri Judas vwọ reyọ ibrẹdi na nu, Eshu da ro oma rọyen. Ọtiọyena Jesu da ta kẹ nẹ: “Obo wo ruẹ na, ruo kpakpata.” 28 Ẹkẹvuọvo o vwo ọvuọvo vwẹ usun rẹ ihwo ri chidia imẹjẹ na rọ riẹn oboresorọ ọ vwọ ta ọnana kẹ-ẹ. 29 Vwọrẹ uyota, evo roro nẹ rọ vwọ dianẹ Judas yen yọnrọn ekpeti rẹ igho na, Jesu vuẹ nẹ, “Dẹ oborẹ avwanre guọnọre vwọ kẹ orẹ na,” yẹrẹ nẹ ọ vwẹ orọnvwọn kẹ igbere na. 30 Rọ vwọ reyọ ibrẹdi na nu, ọ da ro otafe ugege yena. Jẹ ọke she re.

31 Ọtiọyena, ọke rọ vwọ ro otafe nu, Jesu da tanẹ: “Asaọkiephana a vwẹ urinrin kẹ Ọmọ rẹ ohwo re, a je vwẹ urinrin kẹ Ọghẹnẹ wan oma rọyen re. 32 Ọghẹnẹ komobọ cha vwẹ urinrin kẹ, ọ cha vwẹ urinrin kẹ nananana. 33 Imitete, me vẹ ovwan cha dia ọmọke krẹn. Ovwan cha guọnọ ovwẹ; kirobo me ta kẹ ihwo ri Ju na nẹ, ‘Asan me ra na, ovwan cha sa rhe-e,’ ọtiọyen me je ta kẹ ovwan asaọkiephana. 34 Me vwẹ iji kpokpọ kẹ ovwan, nẹ ovwan vwo ẹguọnọ rẹ ohwohwo; kirobo ri mi vwo ẹguọnọ rẹ ovwan, ovwan ji vwo ẹguọnọ rẹ ohwohwo. 35 Womarẹ ọnana yen ihwo eje cha vwọ riẹn nẹ ovwan idibo mẹ—ọ da dianẹ ovwan vwo ẹguọnọ vwẹ ohri rẹ ovwan.”

36 Saimọn Pita da ta kẹ nẹ: “Ọrovwori, tivọ wọ ra?” Jesu da kpahen nẹ: “Asan me ra na, wo che se nene uvwe asaọkiephana-a, ẹkẹvuọvo wo che nene uvwe obọ.” 37 Pita da ta kẹ nẹ: “Ọrovwori, diesorọ mi che se nene uwe asaọkiephana-a? Me cha vwẹ arhọ* mẹ kpahotọ fiki wẹn.” 38 Jesu da kpahen nẹ: “Wọ cha vwẹ arhọ* wẹn kpahotọ fiki mẹ? Uyota, uyota me ta kẹ wẹ nẹ, o vwo ọke vuọvo rẹ ọhọ* che vwo bo tavwen wọ ke sen vwẹ abọ erha-a.”