Inenikristi re Kpakore​—Jihova ni Evun-ẹfuọn rẹ Ovwan Ghanghanre

VWẸ akpọneje, ekpako rehẹ evunrẹ ukoko rẹ Jihova vwẹ ẹro ọghanghanre vwo ni uphẹn rẹ ẹga rayen. Ayen ebruphiyọ vwọ kẹ avwanre eje. Jẹ, o krinọ-ọ na, e de ru ewene ọvo, ra vwọ vuẹ ekpako re ghwanrire nẹ ayen siobọnu eghwa evo kẹ ekpako re dia ighene. Vwẹ idjerhe vọ?

A tare nẹ, e jẹ iniruo okinriariẹ vẹ iyono rẹ isikuru sansan wontọ siẹrẹ ayen de te ẹgbukpe 70 re. Vwọba, a da je tanẹ ekpako re te ẹgbukpe 80 re, re ga kerẹ erevwẹrote Umẹ Rọvwẹrote Oghọn Ukoko yẹrẹ re ga kerẹ erevwẹrote iruo rẹ ekpako ji siobọnu iruo rayen kẹ ekpako re dia ighene. Die yen ekpako nana ru kpahen ewene ra vwọphia na? Ayen nabọ fuevun kẹ Jihova vẹ ukoko rọyen!

Ken rọ gare kerẹ ọrọvwẹrote Umẹ Rọvwẹrote Oghọn Ukoko vwẹ omarẹ ẹgbukpe 49 da ta: “Ọrhuẹrẹphiyotọ na je vwe. Vwọrẹ uyota, me nẹrhovwo rhe Jihova vwẹ urhiọke rẹ ẹdẹ ra vwerọphia na, nẹ o jẹ a mrẹ eghene ro se muwan vwọ kẹ ẹdia na.” Ẹwẹn ro rhe Ken na yen ji rhe ekpako re ghwanrire vwẹ akpọneje. Dedena, ofu dje ayen emerha, kidie ayen ji vwo ẹwẹn rẹ ayen vwọ ga.

Esperandio rọ gare kerẹ ọrọvwẹrote iruo rẹ ekpako na vwẹ ukoko rọ hepha da ta: “Ọ da vwẹ emerha. Jẹ, me ghene guọnọ ọke re me sa vwọ nabọ vwẹrote omakpokpọ mẹ.” Ẹkẹvuọvo, Esperandio jẹ ebruphiyọ kẹ ukoko rọ hepha, kidie ọ dobọ rẹ ẹga rọyen ji-i.

Kẹ iniruo okinriariẹ sansan ri wontọ nẹ iruo rayen vwo? Allan rọ gare kerẹ oniruo okinriariẹ vwẹ ẹgbukpe 38 da ta: “Mi vwo nyo kpahen ewene na, mi de ghwu mu.” Dedena, ọ mrẹvughe nẹ erere herọ siẹrẹ o de yono ighene phiyọ iruo na. Ọ je fuevun ga Jihova te ọke na.

Russell rọ gare kerẹ oniruo okinriariẹ vẹ oyono vwẹ isikuru rẹ ukoko na vwẹ ẹgbukpe 40 vwo djisẹ rẹ oboresorọ ofu vwo dje ọyen vẹ aye rọyen ẹsosuọ, da ta: “Avwanre vwo ẹguọnọ rẹ iruo na mamọ. Vwọba, avwanre niro nẹ ẹgba ji rhe avwanre re se vwo ruiruo na.” Enẹna, Russell vẹ aye rọyen vwẹ ona vẹ erianriẹn rayen vwọ vwẹ ukẹcha kẹ iniọvo rehẹ ukoko rẹ ayen hepha. Oma rayen vwerhen iniọvo na.

Ọ da tobọ dianẹ wọ je rhe ta oka rẹ eta rẹ iniọvo nana tare-e, ikuegbe rọhẹ ọbe rẹ 2 Samuẹl sa chọn wẹ uko vwo vwo ẹruọ rẹ oboresorọ ayen vwọ ta oborẹ ayen tare na.

Vwẹro roro obo re phiare ọke rẹ ọmọ rẹ Ovie Devid re se Absalọm vwo gbevwọso ọsẹ rọyen. Devid da djẹ nẹ Jerusalẹm kpọ Mahanaim rọhẹ ẹbẹre obuko ọnre rẹ Urhie rẹ Jọdan. Etiyin kọyen Devid de rhi noso nẹ ayen guọnọ ekuakua sansan. Wọ karophiyọ obo re phiare?

Eshare erha vwẹ ekogho na, de mu emu, ehwa, vẹ ekuakua sansan vwo rhe ayen. Bazillai, ọyen ọvo usun rẹ eshare na. (2 Sam. 17:27-29) Ẹvwọsuọ rẹ Absalọm vwo she hwe nu, Barzillai de sun Devid te Urhie rẹ Jọdan ọke ro vwo rhivwin kpo Jerusalẹm. Barzillai guọnọ emuọre rẹ Ovie na-a, “kidie o feri gangan.” Dedena, Devid de ve kẹ nẹ ọyen cha nabọ ghẹrẹ vwobẹ Jerusalẹm siẹrẹ o de nene ọyen kpo. (2 Sam. 19:31-33) Ọ sa dianẹ Devid ta ọtiọyen kidie o vwo ọdavwaro kpahen ukẹcha rẹ Barzillai vwọ kẹ, ọ je guọnọ mrẹ erere vwo nẹ uchebro rọyen. Ọnana ke ghwa uphẹn rẹ Barzillai vwọ dia evunrẹ egodo rẹ Ovie, je wian vwọ!

Barzillai vwọ dia ohwo ro vwo ẹro abavo rọ je vwomakpotọ na, ọ da vuẹ Ovie na nẹ ọyen te ẹgbukpe 80 re. Vwọba, ọ da ta: “Mi ji se vughe emuesiri vẹ ọbrabra?” Die yen ọyena mudiaphiyọ? O muẹro nẹ Barzillai yono aghwanre womarẹ obo ro rhiẹromrẹ vwẹ uvwre rẹ ikpe rọ dia akpọ kri te re. Eriyina, ọ sa vwẹ uchebro rẹ aghwanre phia, kirobo rẹ “ekpako” rehẹ ọguan rẹ Ovie Rehoboam ruru ọke wọ yan obaro. (1 Ivie 12:6, 7; Une 92:12-14; Isẹ 16:31) Ọtiọyena, ọ sa dianẹ ewene rẹ ọghwo so kẹ yen Barzillai niri vwọ tanẹ ọyen che se vughe emuesiri vẹ ọbrabra-a. Ọ tare nẹ ọghwo na tobọ djobọte ẹrẹnvwe vẹ erhọ rọyen re. (Aghwo. 12:4, 5) Barzillai da vuẹ Devid nẹ ọ reyọ eghene re se Chimham nene oma kpo Jerusalẹm. Ọkiọvo, Chimham ọmọ rẹ Barzillai.​—2 Sam. 19:35-40.

Ẹwẹn re vwo ru ewene re djunute vwẹ ọtonphiyọ na ghwe shephiyọ vẹ uruemu rẹ Barzillai djephia. Ẹkẹvuọvo, ọ dia ẹdia vẹ ẹgba rẹ ohwo ọvo yen ukoko na ni vwo brorhiẹn rẹ ewene re ruru na-a. Obo ri che shephiyọ kẹ ekpako ri fuevun ga vwẹ akpọneje yen e ni vwo ru ewene na.

Ekpako ri fuevun riẹnre nẹ ọrhuẹrẹphiyotọ kpokpọ nana cha ghwa ẹyan-obaro vẹ ọbọngan rhe ukoko rẹ Jihova siẹrẹ ayen de siobọnu oghwa rẹ ayen muẹ jovwo na, vwọ kẹ ekpako re dia ighene. Kirobo rẹ Barzillai yono ọmọ rọyen, rẹ Pọl de ji yono Timoti, eriyin iniruo re kpakore na ji yono ighene na. (1 Kọr. 4:17; Fil. 2:20-22) Ighene re yonori na rhi hirhephiyọ otu re vwo “ru ẹse kẹ” avwanre, “vwọ kẹ ebanbon rẹ ugboma ri Kristi.”​—Ẹfe. 4:8-12; ji ni Ukeri 11:16, 17, 29.

Iniọvo buebun ri siobọnu iruo rẹ ayen ruẹ jovwo, rhe rhiabọreyọ uphẹn rẹ ẹga efa vwevunrẹ ukoko na.

Marco rọ gare kerẹ oniruo okinriariẹ vwẹ ẹgbukpe 19, da ta: “Eghwa ri mi siobọnu na, nẹrhẹ ovwẹ sa mrẹ ọke vwọ vwẹ ukẹcha kẹ eshare rẹ eya rayen ọvo hẹ ukoko na.”

Geraldo rọ gare kerẹ oniruo okinriariẹ vwẹ ẹgbukpe 28, da ta: “Asaọkiephana avwanre davwẹngba vwọ vwẹ ukẹcha kẹ ihwo rẹ avwanre vwẹ Baibol vwo yono vẹ iniọvo re dobọ rẹ aghwoghwo ji.” Vwọba, ọ tare nẹ, ọ vẹ aye rọyen vwo ihwo 15 rẹ ayen vwẹ Baibol vwo yono, ayen je chọn ihwo evo uko vwọ rhoma ton uyono ẹra phiyọ.

Allan re djunute vwẹ ọtonphiyọ na da ta: “Avwanre nabọ ghwọrọ ọke buebun vwẹ iruo rẹ aghwoghwo na enẹna. Avwanre vwobọ vwẹ aghwoghwo rẹ azagba kugbe ọ rẹ ruẹ vwevunrẹ eki. Avwanre ji ghwoghwo kẹ ihwo re dia kẹrẹ avwanre, ivẹ usun rayen tobọ ji kpo Ọguan Ruvie obọ ọvo re.”

Wọ da dia oniọvo re wene iruo rọyen vwevunrẹ ukoko na, wo se toroba ẹyan-obaro rẹ ukoko rẹ Jihova vwẹ idjerhe oghẹresan. Wọ sa vwẹ erianriẹn ro rhe we, vwọ vwẹ ukẹcha kẹ ighene rehẹ evunrẹ ukoko na. Russell da ta: “Nonẹna, Jihova yono ighene re vwomakpahotọ kẹ, o ji kuẹ ebruphiyọ kuẹ ayen. Iniọvo rẹ avwanre rehẹ akpọeje nabọ mrẹ erere vwo nẹ ona rẹ uyono rayen, vẹ ẹgbaẹdavwọn rẹ ayen vwọ vwẹrote igegede rẹ Ọghẹnẹ!”​—Ni ekpeti na “Chọn Ighene Eshare Uko Vwọ Nabọ Muwan.”

Wọ da dia ohwo re wene uphẹn rẹ ẹga rọyen, wo brudu-u. Obo wo ruru vwẹ ikpe re wanre na, nabọ fi erere kẹ ihwo buebun. Wọ je davwan. Ẹguọnọ rẹ iniọvo na vwo kpahen owẹ che se shefia-a.

Ọ rọ ma rho, ẹgbaẹdavwọn rẹ ovwan vwerhen Jihova oma. O che “jẹ iruo esiri kugbe ẹguọnọ rẹ ovwan vwo kẹ odẹ rọye [ẹkarohọ-ọ,] ri we ru kẹ ihwo efuanfon na fiki rọye, kirobo rẹ ovwan ji ruẹ na.” (Hib. 6:10) Ẹkpo rẹ Baibol nana nẹrhẹ a riẹn nẹ ive rẹ Jihova ji shekpahen oborẹ avwanre ruẹ enẹna. Fikirẹ oborẹ ovwan ghanre kẹ Jihova te na, oborẹ ovwan ru kẹ vwẹ obuko vẹ oborẹ ovwan ji ruẹ asaọkiephana cha sa chọrọ ẹro-o!

Ọ da tobọ dianẹ uphẹn rẹ ẹga wẹn weneri-i, uyovwinrota nana ji se fi erere kẹ wẹ. Vwẹ idjerhe vọ?

Wo de vughe oniọvo rọ kpakore rẹ uphẹn rẹ ẹga rọyen weneri, wọ sa mrẹ erere vwo nẹ aghwanre vẹ uchebro rọyen. Bro ra vwọ kẹ uchebro. Nokpẹn rẹ iroroẹjẹ rọyen. Wo mi ji vwo oniso rẹ obo rọ vwẹ erianriẹn rọyen vwọ vwẹrote iruo ro ruẹ enẹna.

Wọ da dia ọkpako re wene iruo rọyen, yẹrẹ oniọvo aye yẹrẹ ọshare ro se yono mie ọkpako tiọyen, noso nẹ Jihova vwẹ ẹro ọghanghanre vwo nẹ evun-ẹfuọn rẹ ihwo eje ri fuevun ga vwẹ ikpe buebun cha re, ri ji ruẹ ọtiọyen enẹna.