Wo Muegbe Wo Vwo Bromaphiyame Re?

 1. Die ofori nẹ ohwo ru tavwen ọ ke ton uwevwin ẹbọn phiyọ?

VWẸRO roro ohwo rọ guọnọ bọn uwevwin. Ọ riẹn oka rẹ uwevwin rọ guọnọ bọn. Jẹ ofori nẹ ọ ghwa ra dẹ ekuakua rọ cha vwọ bọn uwevwin na, je tuẹn ẹbọn phiyọ? Ẹjo. Tavwen ọ ke ton iruo phiyọ, o vwo emu ọghanghanre ọvo ro fori nẹ o ru, ofori nẹ o roro uchunu igho uwevwin na cha reyọ. Diesorọ? Ofori nẹ ọ riẹn sẹ igho ro rhere obọ na che te vwọ bọn uwevwin na re. O de chidia roro uchunu ro muru, o muẹro nẹ ọ sa bọn uwevwin na re.

 2. Vwo nene eta rehẹ Luk 14:27-30, die ofori nẹ wo roro kpahen tavwen wo ki bromaphiyame?

² Ẹguọnọ vẹ ọdavwaro wo vwo kpahen Jihova gan te asan wo de roro kpahen omaebrophiyame re? Ọ da dia ọtiọyen, kọyen wọ ghwa họhọ ohwo rọ guọnọ bọn uwevwin. Diesorọ a vwọ ta ọtiọyen? Roro kpahen eta ri Jesu rehẹ Luk 14:27-30. (Se.) Jesu ta ota kpahan obo ro mudiaphiyọ ra vwọ dia odibo rọyen. Ra sa vwọ dia odibo rọyen, ofori nẹ e “roro unu ro muru,” rọ dia egbabọse vẹ erọnvwọn efa re che vwo ze. (Luk 9:23-26; 12:51-53) Ọtiọyena, wo ki bromaphiyame, nabọ roro kpahen oborẹ wo che rhiẹromrẹ siẹrẹ wo da dia odibo ri Jesu. Ọnana cha chọn wẹ uko vwọ fuevun ga Jihova, o toro obo re phiare-e.

 3. Die yen a cha fuẹrẹn vwẹ uyono nana?

³ E vwo bromaphiyame je dia odibo ri Jesu ghanre te ẹdia ra da vwẹ erọnvwọn evo vwo ze? Dẹn! Omaebrophiyame cha nẹrhẹ ebruphiyọ buebun te avwanre obọ enẹna vẹ ọke rọ cha obaro. E jẹ a fuẹrẹn enọ eghanghanre evo ri shekpahen omaebrophiyame. Ọnana cha chọn wẹ uko vwọ kpahenphiyọ onọ nana: “Mi muegbe mi vwo bromaphiyame re?”

 4. (a) Die yen omaẹvwọkpahotọ? (b) Vwo nene obo rehẹ Matiu 16:24, die yen o mudiaphiyọ a vwọ “sen” oma rẹ ohwo?

⁴ Die yen omaẹvwọkpahotọ? Wọ cha vwomakpahotọ tavwen wo ki se bromaphiyame. Omaẹvwọkpahotọ yen wọ vwọ vuẹ Jihova vwẹ ẹrhovwo ro nẹ otọ udu rhe nẹ ọyen wọ cha ga bẹdẹ. Wọ da vwomakpahotọ kẹ Ọghẹnẹ, kọyen wọ “sen” oma wẹn. (Se Matiu 16:24.) Nẹ ọke yena yanran, Jihova kọyen ri vwo we, ọnana okpuphẹn rode. (Rom 14:8) Wo ve kẹ nẹ, ghwe nẹ ọke yena yanran wo che mu ẹwẹn phiyọ eruo rẹ ọhọre rọyen ukperẹ ọ romobọ wẹn. Omaẹvwọkpahotọ wẹn ọyen ive rẹ owẹ komobọ ve kẹ Ọghẹnẹ. Jihova gba ohwo ve ive nana-a. Ẹkẹvuọvo, siẹrẹ e de ve ive nana, ofori nẹ a yanmuo.—Une 116:12, 14.

 5. Die yen ofẹnẹ rọhẹ omaẹvwọkpahotọ vẹ omaebrophiyame?

⁵ Die yen ofẹnẹ rẹ omaẹvwọkpahotọ vẹ omaebrophiyame? Owẹ vẹ Jihova ọvo yen riẹn kpahen omaẹvwọkpahotọ wẹn. Ẹkẹvuọvo omaebromaphiyame, azagba yen e de ruo vwẹ isikoko yẹrẹ eghwẹkoko. Ẹdẹ ru wo bromaphiyame yen ihwo vwọ riẹn nẹ wọ vwomakpahotọ kẹ Jihova jovwore.b Ọtiọyena, omaebrophiyame nẹrhẹ ihwo riẹn nẹ wọ vwẹ udu, iroro vẹ ẹgba wẹn eje vwo vwo ẹguọnọ ri Jihova, nẹ wo ji brorhiẹn wọ vwọ ga bẹdẹ.—Mak 12:30.

6-7. Vwo nene eta rehẹ 1 Pita 3:18-22, erhọ yen iroro ivẹ re sorọ re vwo bromaphiyame?

⁶ O ghini fo nẹ e bromaphiyame? Roro kpahen eta rehẹ 1 Pita 3:18-22. (Se.) Kirobo rẹ okọ rẹ Noa dia odjephia rẹ esegbuyota rọyen, eriyin omaebrophiyame je dia odjephia rẹ omaẹvwọkpahotọ wẹn kẹ Jihova. Jẹ, o ghini fo re vwo bromaphiyame? E, ofori. Pita vuẹ avwanre oboresorọ. Ẹsosuọ, ọ tare nẹ omaebrophiyame yen ri “sivwẹ ovwan.” Omaebrophiyame se sivwin avwanre siẹrẹ e de vwo esegbuyota nẹ Jesu ghwu kẹ avwanre, nẹ a je rhọvwọn nushi kpo “obọrhe rẹ Ọghẹnẹ.”

⁷ Ọrivẹ, omaebrophiyame kẹ ohwo “evun ọfuanfon” yẹrẹ ẹwẹn obrorhiẹn rọ fonron. Avwanre da vwomakpahotọ ji bromaphiyame kọyen avwanre vẹ Jihova rhi vwo oyerinkugbe roghẹresan re. Fikirẹ okurhẹriẹ vẹ esegbuyota re vwo kpahen ọtanhirhe na, Ọghẹnẹ ko vwoghovwo imwemwu rẹ avwanre. Ọtiọyena, avwanre ki se vwo ẹwẹn obrorhiẹn rọ fonron.

 8. Ọrhọ yen emu ọvo kiriguo ro mu we vwo bromaphiyame?

⁸ Die yen che mu we vwo bromaphiyame? Kidie nẹ wọ frẹkotọ yono Baibol na, wo rhi yono emu buebun kpahen Jihova, iwan rọyen vẹ obo ro ruemu wan re. Obo wo yono kpahen Jihova kẹ wẹ omavwerhovwẹn, ọ jẹ nẹrhẹ ẹguọnọ ru wo vwo kpahọn kodophiyọ. Ẹguọnọ ru wo vwo kpahen Jihova yen emu ọvo kiriguo ro fori nẹ o mu we vwo bromaphiyame.

 9. Vwo nene eta rehẹ Matiu 28:19, 20, die yen o mudiaphiyọ re vwo bromaphiyame vwẹ odẹ rẹ Ọsẹ, Ọmọ vẹ ẹwẹn ọfuanfon?

⁹ Emu ọfa ro mu we vwo bromaphiyame yen uyota ri Baibol na ru wo rhiabọrayọ. Roro kpahen ota ri Jesu rọ vwọ tanẹ e re gbe idibo. (Se Matiu 28:19, 20.) Vwo nene obo ri Jesu tare, ihwo ri che bromaphiyame che ru ọtiọyen “vwẹ odẹ rẹ Ọsẹ vẹ ọ rẹ Ọmọ kugbe [“ẹwẹn ọfuanfon,” NW].” Die yen ota nana mudiaphiyọ? Se oborẹ Baibol na ta kpahen Jihova, Jesu rọ dia Ọmọ rọyen, vẹ ẹwẹn ọfuanfon na gbuyota. Iyono nana pha ghanghanre, i ji te ubuidu na. (Hib. 4:12) E je yono kpahen evo vwẹ usun rayen.

10-11. Iyono vọ kpahen Ọsẹ na yen wo yonori ji rhiabọreyọ?

¹⁰ Karophiyọ ọke ru wo vwo yono uyota nana kpahen Ọsẹ na nẹ, “Jihova” yen odẹ rọyen, ọyen “Me Kpenu vwẹ enu rẹ akpọ na ejobi,” ọyen ọvo yen “Ọghẹnẹ” rẹ uyota na. (Une 83:18, NW; Aiz. 37:16) Jihova yen Ọmemama rẹ avwanre, “esivwo” ọ rọyen. (Une 3:8; 36:9) O ru ọrhuẹrẹphiyotọ ro vwo sivwin avwanre vwo nẹ umwemwu vẹ ughwu, ọ je kẹ avwanre uphẹn re vwo vwo arhọ ri bẹdẹ. (Jọn 17:3) Omaẹvwọkpahotọ vẹ omaebrophiyame yen che dje we phia kerẹ Oseri ri Jihova. (Aiz. 43:10-12) Ku wọ cha re dia ẹbẹre ọvo rẹ orua rẹ ihwo re ga Ọghẹnẹ vwẹ akpọeje, re vwẹ odẹ rọyen yan, ji vuẹ ihwo efa kpahọn.—Une 86:12.

¹¹ Okpuphẹn yen ọ hepha re vwo vwo ẹruọ rẹ obo ri Baibol na yonori kpahen Ọsẹ na! Wo vwo rhiabọrayọ iyono nana re pha ghanghanre na, udu wẹn de mu we vwọ vwomakpahotọ kẹ Jihova ji bromaphiyame.

12-13. Iyono vọ kpahen Ọmọ na yen wo yonori ji rhiabọreyọ?

¹² Mavọ yen oma ru we, wo vwo yono erọnvwọn nana kpahen Ọmọ na? Jesu yen ohwo rivẹ ro marho vwẹ idjuvwu vẹ akpọ. Ọyen yen tan avwanre hirhe. Ọ vwẹ arhọ rọyen kpahotọ kẹ avwanre. A da vwẹ uruemu vwo djephia nẹ e vwo esegbuyota kpahen ọtanhirhe na, ka sa vwẹ imwemwu rẹ avwanre vwo ghovwo avwanre. Ke ji che vwo uvi rẹ oyerinkugbe vẹ Jihova kugbe arhọ ri bẹdẹ. (Jọn 3:16) Jesu yen Orherẹn Rode rẹ avwanre. Ọ guọnọ chọn avwanre uko vwọ mrẹ erere vwo nẹ ọtanhirhe na ji sikẹrẹ Jihova. (Hib. 4:15; 7:24, 25) Kerẹ Ovie rẹ Uvie rẹ Ọghẹnẹ, Jihova cha reyọ vwo ru odẹ rọyen fon, phi oba phiyọ umwemwu je ghwa ebruphiyọ ri bẹdẹ rhe vwẹ Iparadaisi. (Mat. 6:9, 10; Ẹvwọ. 11:15) Jesu ọyen oniru rẹ avwanre. (1 Pita 2:21) Jesu nabọ ru ọhọre rẹ Ọghẹnẹ, ọtiọyena ọyen uvi rẹ oniru kẹ avwanre.—Jọn 4:34.

¹³ Ọke wo vwo rhiabọreyọ oborẹ Baibol na yono kpahen Jesu, wo de rhi vwo ẹguọnọ kpahen Ọmọ na. Kerẹ Ọmọ na, ẹguọnọ yena da nẹrhẹ wo vwo owenvwe wo vwo ru ọhọre rẹ Ọghẹnẹ. Ọtiọyena, wo de rhi vwo ẹwẹn wọ vwọ vwomakpahotọ ji bromaphiyame.

14-15. Iyono vọ kpahen ẹwẹn ọfuanfon na yen wo yonori ji rhiabọreyọ?

¹⁴ Die yen wo rorori ọke wo vwo yono erọnvwọn nana kpahen ẹwẹn ọfuanfon na? Ọ dia ohwo-o, ẹkẹvuọvo, ẹgba rẹ Ọghẹnẹ vwo ruiruo. Jihova vwẹ ẹwẹn ọfuanfon na vwo mu ihwo vwo si Baibol na, ọyen je chọn avwanre uko vwo vwo ẹruọ rẹ obo re se vwẹ Baibol na ji ruẹ nene. (Jọn 14:26; 2 Pita 1:21) Jihova vwẹ ẹwẹn ọfuanfon na vwọ kẹ avwanre ẹgba “rọ basa-an.” (2 Kọr. 4:7) Ọ kẹ avwanre ẹgba vwo ghwoghwo ota, phi edavwini vẹ ofudjevwe kparobọ, ji chirakon rẹ ebẹnbẹn. Ọ je chọn avwanre uko vwo dje iruemu iyoyovwin re dia “omamọ rẹ [“ẹwẹn,” NW] na” phia. (Gal. 5:22) Ọghẹnẹ ji siobọnẹ ẹwẹn ọfuanfon na odedede kẹ ihwo re vwẹrosuọ re je yare ukẹcha rọyen mie.—Luk 11:13.

¹⁵ Mavọ yen ọ vwerhoma te ra vwọ riẹn nẹ Jihova vwẹ ẹwẹn ọfuanfon rọyen vwọ chọn idibo rọyen uko vwọ ga! Wo de rhiabọreyọ uyota ro shekpahen ẹwẹn ọfuanfon na, o che mu we vwọ vwomakpahotọ kẹ Jihova ji bromaphiyame.

16. Die yen yono rhavwẹnsiẹ na?

¹⁶ Orhiẹn-ebro wẹn wọ vwọ vwomakpahotọ ji bromaphiyame na pha ghanghanre. Kirobo re yono re na, choma wo vwo hirharoku egbabọse evo je vwẹ erọnvwọn evo vwo ze. Ẹkẹvuọvo, ebruphiyọ wọ cha mrẹ rhọ nọ egbabọse na. Omaebrophiyame se sivwin uwe je kẹ wẹ ẹwẹn obrorhiẹn rọ fonron. Ẹguọnọ ru wo vwo kpahen Jihova yen emu ọvo kiriguo ro fori nẹ o mu we vwo bromaphiyame. Wọ me je vwẹ ẹwẹn wẹn eje vwo se iyono ri shekpahen Ọsẹ, Ọmọ kugbe ẹwẹn ọfuanfon na gbuyota. E vwo yono enana eje nure na, mavọ kọyen wọ cha kpahenphiyọ onọ nana: “Mi muegbe mi vwo bromaphiyame re?”

17. Owọẹjẹ vọ yen ohwo cha jẹ tavwen o ki bromaphiyame?

¹⁷ Wo de roro nẹ wo muegbe ru wo vwo bromaphiyame re, kọyen wo ru ewene buebun re rere oyerinkugbe wẹn vẹ Jihova vwọ ganphiyọ.c Kidie nẹ wo yono Baibol na ọkieje, wọ da rhe riẹn emu buebun kpahen Jihova vẹ Jesu. Wo de rhi vwo esegbuyota. (Hib. 11:6) Wọ vwẹroso ive ri Jihova rọhẹ Baibol na karekare, ji vwo imuẹro nẹ esegbuyota ru wo vwo kpahen izobo ri Jesu che sivwin uwe nẹ umwemwu vẹ ughwu. Wo siobọnu imwemwu wẹn re, kọyen imwemwu wo ruru na da wẹ, wọ da je yare evwoghovwo ri Jihova. Wo kuobọrhẹriẹ, wọ da sen orharhe akpọ ru wo yerin jovwo, wọ da rhe tuẹn eruo rẹ ọhọre rẹ Ọghẹnẹ phiyọ. (Iruo 3:19) Wọ guọnọ vuẹ ihwo efa kpahen esegbuyota wẹn. Wọ da rhe dia oghwoghwota ro ji bromaphiyame-e, ọtiọyena ku wọ vwomaba iniọvo rẹ ukoko na kpo aghwoghwo. (Mat. 24:14) Oma wẹn vwerhen Jihova fikirẹ ewene nana wo ruru na. Wọ nẹrhẹ ubiudu rọyen ghọghọ.—Isẹ 27:11.

18. Die ọfa yen wo che ru tavwen wo ki se bromaphiyame?

¹⁸ Tavwen wo ki bromaphiyame, o ji vwo erọnvwọn efa ru wo che ru. Wọ cha vwomakpahotọ kẹ Jihova tavwen kirobo re yono re na. Nẹrhovwo rhe nẹ otọ ẹwẹn wẹn rhe, wo ve kẹ nẹ ọhọre rọyen kọyen wo che ru. (1 Pita 4:2) Wo de ru ọnana nu, wọ me vuẹ Ọrọvwẹrote Iruo rẹ Ekpako na nẹ wọ guọnọ bromaphiyame. Ọ cha vuẹ ekpako evo nẹ ayen mrẹ wẹ. Wo jẹ oshọ mu we-e. Ekpako nana vughe uwe, ayen ji vwo ẹguọnọ wẹ. Ayen che nene uwe rhoma fuẹrẹn iyono ri Baibol evo kiriguo ru wo yonori. Ayen guọnọ riẹn sẹ wọ nabọ vwo ẹruọ iyono yena kugbe ọghanrovwẹ rẹ omaẹvwọkpahotọ vẹ omaebrophiyame. Ayen da mrẹ nẹ wo muegbe, ayen cha vuẹ wẹ nẹ wo se bromaphiyame vwẹ osikoko yẹrẹ ọghwẹkoko rọ cha na.

19-20. Die ofori nẹ wo ru siẹrẹ wo de bromaphiyame nu?

¹⁹ Die wo che ru ọke wo de bromaphiyame nu?d Karophiyọ nẹ omaẹvwọkpahotọ ọyen ive, Jihova guọnọre nẹ a yanmuo. Ọtiọyena, wo de bromaphiyame nu, wọ me yanmu ive rẹ omaẹvwọkpahotọ wẹ na. Mavọ yen wo se vwo ru ọnana?

²⁰ Bicha ukoko wẹn. Wo vwo bromaphiyame nu, wọ da rhe dia ẹbẹre ọvo rẹ “imoni” rẹ akpọeje. (1 Pita 2:17) Iniọvo rẹ ukoko na pha kerẹ orua wẹn. Wọ cha bọn oyerinkugbe wẹn vẹ ọ rẹ iniọvo na gan siẹrẹ wo de kpo uyono ọkieje. Se Ota rẹ Ọghẹnẹ re wo ji roro kpahọn kẹdẹ kẹdẹ. (Une 1:1, 2) Wo de se ẹkpo ri Baibol ọvo nu, wo mi roro kokodo kpahen oborẹ wo seri na. Oborẹ wo seri na ko che te ubiudu wẹn. “Rẹ” yẹrẹ nẹrhovwo ọkieje. (Mat. 26:41) Ẹrhovwo ẹnẹ cha nẹrhẹ wo sikẹrẹ Jihova phiyọ. “Gba ka guọnọ uvie rẹ Ọghẹnẹ.” (Mat. 6:33) Wo se ru ọtiọyen siẹrẹ wọ da vwẹ iruo rẹ aghwoghwo na vwọ kobaro vwẹ akpeyeren wẹn. Wo vwo vwobọ vwẹ iruo nana ye, esegbuyota wẹn kọ cha rhe gan, ọkiọvo wo me je rhe chọn ihwo evo uko vwọ yan vwẹ idjerhe rẹ arhọ ri bẹdẹ na.—1 Tim. 4:16.

21. Erere vọ yen che te we obọ siẹrẹ wo de bromaphiyame?

²¹ Orhiẹn wọ vwọ vwomakpahotọ ji bromaphiyame yen orhiẹn rọ ma ghanre ru wo se bru. Vwọrẹ uyota, wọ cha vwẹ erọnvwọn evo vwo ze. Erere wọ cha mrẹ bun vrẹ oborẹ wo che vwo ze. Ebẹnbẹn eje ru wo hirharokuẹ vwẹ akpọ nana ro kuẹphiyọ re na, e rẹ “ọmọke.” (2 Kọr. 4:17) Ẹkẹvuọvo, wo de bromaphiyame, ku wo che yerin omamọ rẹ akpọ enẹna ji vwo “uvi rẹ arhọ” vwẹ obaro. (1 Tim. 6:19) Ọtiọyena, gba nabọ nẹrhovwo ji roro kpahen ẹkpahọnphiyọ wẹn vwọ kẹ onọ nana: “Mi muegbe mi vwo bromaphiyame re?”