“Mi Muophu Ọgangan”

E vwiẹ vwẹ vwẹ omorere rẹ San Juan Chancalaito rọhẹ ubrotọ rẹ Chiapas vwẹ ẹkuotọ rẹ Mexico. Avwanre ihwo rẹ Maya ri jẹ ephẹrẹ rẹ Chol. Mẹvwẹ yen ọ rẹ iyorin usun rẹ emọ 12 rẹ ọsẹ vẹ oni mẹ vwiẹre. Mẹ vẹ iniọvo mẹ nene Iseri rẹ Jihova yono Baibol kugbe ọke me vwọ hẹ omotete. Jẹ, ọ da vwẹ mamọ nẹ mi se ru nene obo re yono uvwe ọke yena-a.

Me vwọ hẹ ẹgbukpe 13, ke me reyọ ihuvwun egangan ji gborho ihwo. Mi de ji vrẹn nẹ uwevwin. Ki mi nẹ asan kpo asan. Mi vwo te ẹgbukpe 16, me da ton iruo phiyọ vwẹ udju ọvo ra da kọn igbo. Me wianre vwẹ etiyin te omarẹ ẹgbukpe ọvo. Avwanre vwọ vwẹ okọ fa igbo wan urhie vwẹ ason ọvo, eshare evo vẹ ihwunu ri ji chuo oka rẹ eki rẹ avwanre chua na de rhi gidi avwanre. Mi de pho phiyọ urhie na, me sa vwọ djẹ vabọ. Me da rhẹrhẹ re te unu rẹ urhie na. O kriri-i, me da djẹ kpo United States.

Mi vwo te oboyin, me da rhoma ton eki rẹ ihuvwun egangan mẹ na phiyọ. Me da je ro okpetu. Me vwọ hẹ ẹgbukpe 19, a da vwẹ urhi rẹ ujiecho vẹ ozighẹ vwo mu vwe kpo uwodi. Me vwọ hẹ uwodi, me da vwomaba ẹko rẹ inogbozighi ọvo, ji vwobọ vwẹ ozighi egbe. Ukuotọ rọyen, e de mu vwe kpo uwodi rode ra nabọ gbogba riariẹ, rọhẹ Lewisburg vwẹ Pennsylvania.

Me vwọ hẹ evunrẹ uwodi na, uruemu mẹ da rhe braphiyọ. O vwo oka ọvo rẹ ihwo rẹ ẹko mi hepha na brẹphiyọ oma. Oka yena da nẹrhẹ ọ lọhọ me vwọ mrẹ ihwo efa rehẹ ẹko rẹ avwanre vwẹ uwodi na. Uruemu rẹ ozighi-egbe mẹ na da rhe bra vrẹ obo ri jovwo; mi de nẹ ọvo ki mi kpo ọfa. Ọ tobọ vwo ọke ọvo mi vwo vwobọ vwẹ ohọnre rẹ otu vwevunrẹ ogba rẹ uwodi na. Ohọnre na ganre mamọ. Ophapha ra vwọ fa baseball vẹ erọnvwọn ra vwọ sasa oma yen avwanre vwọba họnre ohọnre na. Rere ihwo re vwẹrote uwodi na sa vwọ vwrẹ ohọnre na, ayen de do itiẹgasi yẹrẹ erọnvwọn re nẹrhẹ ibiẹro dja ohwo. Ọyena vwọ wan nu, e de mu vwe phiyọ asan re muẹ inogbozighi ri muoshọ phiyọ. Mi muophu ọgangan, me je ta eta ebrabra. Mi mu ihwo muẹ hwe. Ọ vwerhen ovwẹ oma mi de ruo. Uruemu mẹ na da vwẹ kakaka-a.

Ọke buebun na, mi nẹ evunrẹ uwodi re mu vwe phiyọ na-a, ọtiọyena me da ton isese rẹ Baibol phiyọ rere mi se vwo bru ọke fia. O kriri-i, ọvo usun rẹ ihwo re rhẹrẹ uwodi na da kẹ vwẹ ọbe re se You Can Live Forever in Paradise on Earth.a Mi vwo se ọbe na, me da rhe karophiyọ erọnvwọn buebun rẹ Iseri rẹ Jihova yono uvwe ọke me vwọ hẹ omotete. Mi de roro kpahen oborẹ ophu ọgangan mẹ na so kẹ vwẹ re. Mi ji roro kpahen orua mẹ. Me vwọ mrẹ nẹ iniọvo mẹ emetẹ ivẹ rhe dia Iseri rẹ Jihova re, ki mi roro, ‘Ayen cha dia bẹdẹ.’ Me da nọ oma mẹ, ‘Kẹ omẹvwẹ vwo?’ Ugege yena, mi de ghwe brorhiẹn nẹ mi che ru ewene.

Ẹkẹvuọvo, me riẹnre nẹ me guọnọ ukẹcha mi se vwo wene. Ọtiọyena, me da nẹrhovwo rhe Jihova je vuẹ nẹ ọ chọn vwẹ uko. Mi de ji si ọbe rhe oghọn ukoko rẹ Iseri rẹ Jihova rọhẹ United States nẹ me guọnọ uyono rẹ Baibol. Oghọn ukoko na de ru ọrhuẹrẹphiyotọ re vwo ji ohwo nẹ ukoko rọ kẹrẹ uwodi na bru vwe rhe. Ọke yena a rhọnvwa nẹ ihwo bru vwe rhe-e, jokparẹ ihwo rẹ orua mẹ. Ọtiọyena, oniọvo ọvo vwevunrẹ ukoko yena kọyen siẹ ovuẹ rẹ uchebro je vwẹ ẹbe rẹ ukoko na vwo rhe vwe. Ọyena da nẹrhẹ orhiẹn ri mi bruru nẹ mi che kurhẹriẹ na ganphiyọ.

Mi jowọ mi vwo ru ewene rode ọvo, mi vwo brorhiẹn nẹ mi che siomanu ẹko rẹ inogbozighi re me vwomaba vwẹ ikpe buebun re. Osun rẹ ẹko na jehẹ uwodi re me hepha na. Ọtiọyena, mi de bro ra ẹdẹ ọvo rẹ avwanre vwọ heha. Me da vuẹ nẹ me guọnọ dia Oseri rẹ Jihova. Jẹ, o gbe vwe unu mamọ rọ vwọ ta kẹ vwẹ: “Wọ da ghene guọnọ ru ọtiọyen, gbe ruo. Mi che se gbowọphiyọ oyerinkugbe wẹn vẹ Ọghẹnẹ-ẹ. Ẹkẹvuọvo, ọ da dia ona wo vwo siomanu ẹko na yen wo hworo, karophiyọ obo ri che nẹ obuko rọyen rhe.”

Vwẹ uvwre rẹ ẹgbukpe ivẹ, ihwo re wian vwẹ uwodi na de rhi noso nẹ uruemu mẹ weneri mamọ re. Ọtiọyena, ayen de dje erorokẹ phia kẹ vwẹ. Kerẹ udje, ayen rhe phiẹ ejọrọn phiyọ obọ mẹ ọke rẹ ayen de sun vwe kpo asan ra da họ-ọ. Ọvo usun rayen da tobọ vwẹ uchebro kẹ vwẹ nẹ mi muẹrophiyọ ewene ri mi ruẹ na. O rhi vwo te ukpe rọ koba re me cha ghwọrọ vwẹ uwodi na, e de mu vwe kpo uwodi ọfa ri mi de se vwo emerha rẹ egbomọphẹ. Uwodi na kẹrẹ ọ ri mi hepha jovwo. E siobọnu vwe vwẹ ukpe rẹ 2004. Ukpe yena yen ọ vwọ gba ẹgbukpe ihwe re me dia uwodi. A da vwẹ imoto rẹ uwodi na vwo mu vwe rhivwin kpo Mexico.

Mi ghwe vwo te Mexico, me da guọnọ asan rẹ Ọguan Ruvie rẹ Iseri rẹ Jihova hepha. Ewun ri mi kuẹphiyọ vwẹ uwodi yen mi kuphiyọ kpo uyono, kidie ọyen ọvo yen ewun mi vwori ro fẹro. Iseri na nabọ dede uvwe, ayen davwerhọ rẹ osẹnvwe mẹ-ẹ. Uruemu esiri rayen da nẹrhẹ mi vwo imuẹro nẹ me hẹ ohri rẹ Inenikristi rẹ uyota. (Jọn 13:35) Ẹdẹ vuọvo yena, ekpako rẹ ukoko na de ru ọrhuẹrẹphiyotọ ra vwọ vwẹ uyono rẹ Baibol mu kẹ vwẹ. Ẹgbukpe ọvo vwọ wan nu, mi de bromaphiyame vwẹ September 3, 2005.

Vwẹ January 2007, me da ton iruo rẹ ọkobaro phiyọ, re me vwọ ghwọrọ inọke 70 kemeranvwe kemeranvwe vwo yono ihwo efa Baibol. Vwẹ 2011, mi de wontọ nẹ Isikuru rẹ Baibol Vwọ kẹ Iniọvo Eshare re je Rọvwọ-ọn (re se Isikuru rẹ Ihwo ri Ghwoghwo Uvie Na enẹna). Isikuru nana chọn vwẹ uko mamọ vwo mu eghwa ri te vwe obọ vwevunrẹ ukoko na.

Vwẹ 2013, me da rọvwọn avwebọ mẹ Pilar. Ọ tare nẹ ọ pha bẹnbẹn ro vwo se obo re me vuẹrẹ kpahen akpeyeren mẹ ri jovwo gbuyota. O vwo ọke vuọvo mi vwo rhivwin kpo akpeyeren mẹ ri jovwo-o. Mẹ vẹ aye mẹ vwo imuẹro nẹ ẹgba rẹ Baibol na yen mi se vwo wene.—Rom 12:2.

Mi niro nẹ eta rẹ Jesu vwẹ Luk 19:10 shekpahen ovwẹ. Etiyin Jesu da ta: “Ọmọ rẹ ohwo rhere rhe guọnọ re o sivwi i ri ghwruru.” Akpeyeren mẹ rhi vwotọ re. Mi rhe ji mu ihwo muẹ hwe ọfa-a. Baibol na chọn vwẹ uko mamọ re. Enẹna, me riavwerhen rẹ omamọ rẹ akpeyeren, me vẹ ihwo efa nabọ yerẹn kuẹgbe, ma rho kparobọ, mi rhi vwo omamọ rẹ oyerinkugbe vẹ Jihova re.