Osa rẹ Arhọ ro me Yovwin

Orere rẹ Tampere vwẹ Finland yen me dia ghwanre; asan na pha fuefu. Orua mẹ ghwe muomaphiyọ irueru rẹ ẹga-a, ẹkẹvuọvo ayen vwẹ ẹro ọghanghanre vwo ni ẹbe eyono kugbe omamọ uruemu. Oni mẹ ohwo rẹ Germany. Ọke me vwọ hẹ omotete, kọke kọke yen mi vwo kpo asan rẹ ọse vẹ oni mẹ rode dia vwẹ West Germany.

Nẹ ọkiemo rhe yen mi vwo vwo omavwerhovwẹn kpahen eha. Koka koka rẹ eha yen me ha. Me vwọ hẹ omarẹ ẹgbukpe 14, mi de brorhiẹn ri mi vwo muomaphiyọ tẹnis. Mi vwo te ẹgbukpe 16, abọ ivẹ yẹrẹ erha kọyen me vwọ fa, rere obọ mẹ sa vwọ gan—mẹ vẹ ihwo ri yono uvwe da fa abọ ivẹ nu, ke me rhoma fa ọrobọ mẹ san vwẹ ovwọnvwọn. Ẹbẹre sansan rẹ eha na je vwe mamọ; vwọba, eha na sasa ovwẹ oma, ọ je nẹrhẹ mi se fobọ roro emu fiotọ. Dede nẹ me vwẹ ọkieje vwo kuomakugbe igbeyan mẹ ji nene ayen da udi, jẹ o vwo ọke vuọvo me vwọ ro okpetu fikirẹ ihuvwun egangan me reyọre yẹrẹ udi re me dare-e. Me mu akpeyeren mẹ eje kpahen tẹnis re me fa—ọyen obo re karo kẹ vwẹ.

Mi ro eha rẹ tẹnis re se ATP ọke me vwọ hẹ ẹgbukpe 17.a Mi vwo mu ohwo ẹsosuọ vwẹ eha na abọ ibro nu, ihwo buebun de rhe vughe uvwe vwẹ ẹkuotọ na. Ọke me vwọ hẹ ẹgbukpe 22, me da rhe dia ọvo usun rẹ ihwo 50 re ma riẹn tẹnis fa vwẹ akpọ na.

Me ghwọrọ ikpe buebun vwọ fa tẹnis vwẹ asan sansan vwẹ akpọ na. Me mrẹ asan iyoyovwin efa vwẹ oyan na. Ẹkẹvuọvo, oyan na je chọn vwẹ uko vwọ riẹn kpahen ebẹnbẹn buebun rehẹ akpọ na, kerẹ urhiẹchọ, ihuvwun egangan ẹreyọ, kugbe oghwọrọ rẹ ihworakpọ vwẹ obọ rayen sua. Kerẹ udje, ọke me vwọ hẹ United States, a vuẹ avwanre kpahen asan sansan rẹ ihwo de me gbozighi, a da tanẹ avwanre kẹnoma kẹ ayen. Enana eje kpokpo uvwe ẹwẹn mamọ. Vwọba, dede nẹ eha re me ha na je vwe, jẹ ọ sa kẹ vwẹ uvi rẹ omavwerhovwẹ-ẹn.

Sanna rọ dia ọmọtẹ me vẹ ọyen gba jẹ ọsen nene Iseri rẹ Jihova yono Baibol ọke yena. Dede nẹ me jẹrẹ fia fikirẹ omavwerhovwẹn ro vwo kpahen ẹga, me vuẹrẹ nẹ ọ dobọ rẹ uyono na ji-i. Avwanre rọvwọnre vwẹ 1990, aye me de rhe bromaphiyame kerẹ Oseri rẹ Jihova vwẹ 1991. Mi vwo omavwerhovwẹn kpahen ẹga-a, dede nẹ mi vwo imuẹro nẹ Ọghẹnẹ herọ. Me karophiyọ nẹ oni mẹ rode rọ dia ohwo rẹ Germany se Baibol mamọ, ọ tobọ yono uvwe obo ra nẹrhovwọ.

Ẹdẹ ọvo, mẹ vẹ aye mẹ Sanna vwọ kọn bru aye gbe ọshare ọvo re dia Iseri rẹ Jihova ra, ọshare na re se Kari de dje aroẹmrẹ rẹ Baibol kẹ vwẹ kpahen “oba rẹ ẹdẹ na.” (2 Timoti 3: 1-5) Aroẹmrẹ na te vwe ẹwẹn dẹn, kidie ọ nẹrhẹ a riẹn oboresorọ erọnvwọn ebrabra vwọ phia vwẹ akpọ na. Ẹdẹ yena, avwanre ghwa nabọ ta ota kpahen ẹga-a. Ẹkẹvuọvo, ghwe vwo nẹ ọke yena rhe, mẹ vẹ Kari ke ta ota kpahen Baibol na. Erọnvwọn eje ro yono uvwe je nabọ ro vwẹ. Jẹ, ọ dia ọkeneje yen avwanre vwọ mrẹ ọke vwo yono-o, fikirẹ erọnvwọn buebun ri mi ghwọrọ ọke phiyọ kugbe oyan mẹ rẹ ọkieje. Ẹkẹvuọvo, me vẹ Kari rhọnvwe dobọji-i. Ọke ro de si ileta vwo rhe vwe, ọ me nabọ kpahenphiyọ enọ ri mi nọ rọ ọke rẹ avwanre vwo yono. Ememerha na, Baibol na da nabọ kpahenphiyọ enọ na eje ri rhe vwe. Mi de rhe noso nẹ ovuẹ rọhẹ Baibol na eje ghwa idjedje rẹ oborẹ Uvie rẹ Ọghẹnẹ che vwo ru ọhọre rọyen gbagba. Me rhe vwọ riẹn odẹ rẹ Ọghẹnẹ kugbe obo ro ru kẹ avwanre, mi de rhi vwo ẹguọnọ kpahọn. (Une Rẹ Ejiro 83:18) Obo ro me te vwe ẹwẹn, kẹ ọrhuẹrẹphiyotọ ro ruru vwọ kẹ izobo ọtanhirhe. Izobo yena ghwa dia ọrhuẹrephiyotọ ghevweghe yẹrẹ oborẹ urhi ghwa guọnọ-ọ, ẹkẹvuọvo ọyen odjephia rẹ ẹguọnọ rẹ Ọghẹnẹ. (Jọn 3:16) Mi ji mrẹvughe nẹ me sa dia ugbeyan rẹ Ọghẹnẹ je dia bẹdẹ vwẹ paradaisi rọ vọnre vẹ ufuoma. (Jems 4:8) Ke me nọ oma mẹ, “Mavọ mi se vwo dje ọdavwaro phia?”

Me da nabọ fuẹrẹn akpeyeren mẹ. Baibol na yono uvwe nẹ ọkokẹ yen che me vwo omavwerhovwẹn. Mi de rhi vwo ẹwẹn re me vwọ vuẹ ihwo efa kpahen oborẹ mi segbuyota. (Iruo Rẹ Iyinkọn Na 20:35) Fikirẹ tẹnis re me fa, me sa ghwọrọ omarẹ ẹdẹ 200 vwẹ asan efa vwẹ ẹgbukpe ọvo. Orua mẹ mu ẹwẹn rayen eje kpahen oborẹ ayen sa vwọ chọn vwẹ uko vwọ dia ohwo ro titiri vwẹ tẹnis ẹfa. Me de noso nẹ ofori mi vwo ru ewene.

Me riẹnre nẹ ihwo buebun che se vwo ẹruọ rẹ oboresorọ ohwo vwọ vwẹ fikirẹ ẹga vwo chukoku tẹnis ẹfa rọ cha nẹrhẹ o titi-i. Ẹkẹvuọvo, me mrẹ vughe nẹ uphẹn re me vwọ riẹn Jihova vrẹ obo ri jovwo ji vwo arhọ rẹ bẹdẹ, ghanre vrẹ kosa kosa ro se te vwe obo vwẹ tẹnis. Ọyena nẹrhẹ ọ lọhọ mi vwo brorhiẹn. Mi brorhiẹn nẹ me cha kẹrhọ rẹ oborẹ ihwo ta-a, kidie mẹvwẹ yen vwo orhiẹn na. Ẹkpo rẹ Baibol rọ nabọ chọn vwẹ uko vwo phi ọnyẹ kparobọ yen Une Rẹ Ejiro 118:6: “Ọrovwohwo vẹ ovwẹ vwọ obọ na me gbe djẹ oshọ-ọ. Kidie ohwo se ru vwe?”

Vwẹ uvwre ọke nana, ihwo evo de mu ikọntrati ọvo bru vwe rhe, rọ cha nẹrhẹ me sa fa tẹnis vrabọ rẹ ẹnwan vwẹ ikpe buebun. Ẹkẹvuọvo, kidie nẹ mi brorhiẹn mẹ nure, me da sen kẹ ayen, mi de ji siomanu ATP re me da fa jovwo. Mi vwo muomaphiyọ uyono rẹ Baibol te asan ọvo nu, mi de bromaphiyame vwẹ July 2, 1994.

Me rhiẹromrẹ obo re brare tavwen mi ki mu ẹwẹn kpahen Ọghẹnẹ-ẹ. Me je davwẹngba vwọ guọnọ uyota-a. Mi niro nẹ akpeyeren mẹ shephiyọ, me guọnọ ukẹcha vuọvo-o. Jẹ, siẹvuọvo na, ko ghwa họhọ nẹ uyota rẹ Baibol na siomanu, rọ vwọ hẹrhẹ ọke me vwọ guọnọ mrẹ. Akpọ me de rhi vwo oto, o de ji yovwin vrẹ oborẹ mi rhẹro rọyen! Oyerinkugbe rẹ orua rẹ avwanre gan vrẹ obo ri jovwo enẹna. Oma vwerhen ovwẹ nẹ emeshare mẹ erha nene udje ri mi phi phiyotọ kerẹ Onenikristi, ọ dia kerẹ owena rẹ tẹnis ẹfa-a.

Me je riavwerhen rẹ eha rẹ tẹnis te ọke na. Iruo ri churobọ si tẹnis yen me vwọ vwẹrote oma mẹ vwẹ ikpe buebun re. Kerẹ udje, me wian kerẹ ikoshi kugbe imaneja rẹ asan ra da fa tẹnis. Jẹ, mi mu akpeyeren mẹ kpahen eha na-a. Devure, me sa ghwọrọ inọke buebun kudughwrẹn kudughwrẹn vwo yono eha na rere me vwọ dia ọwena vwọ. Asaọkiephana oma vwerhen ovwẹ me vwọ chọn ihwo efa uko vwo yono je yeren akpọ vwo nene irhi rẹ Baibol ri wene akpeyeren mẹ. Me mrẹ uvi rẹ omavwerhovwẹn kidie me vuẹ ihwo efa kpahen oborẹ mi phi iphiẹrophiyọ kpahen, oyerinkugbe mẹ vẹ Jihova re gan phiyọ.—1 Timoti 6:19.