Akpọ mẹ ko Kiẹn Riariẹ

Tonga rọ dia ẹkuotọ ro vwo omarẹ etọ 170 rẹ ame riariẹ phiyọ yen orua mẹ nurhe; Tonga hẹ uherevie rẹ obaro vẹ obohwẹre ọnre na vwẹ Pacific. Avwanre re dia Tonga ghwe vwo igho-o, avwanre vwo urhukpe yẹrẹ imoto-o. Ẹkẹvuọvo avwanre vwo ame, avwanre ji vwo ehọ evo. Isukuru de kpo omaerovwon, me vẹ iniọvo mẹ ivẹ re dia emeshare ke chọn ọsẹ avwanre uko vwọ vwẹrote aghwa rẹ avwanre ra kọn enẹ, idibo, idu, kugbe imidaka phiyọ. Iruo rẹ aghwa na vẹ imiruo rẹ ọsẹ mẹ ruẹ, yen ọ vwọba vwẹrote orua avwanre. Kerẹ ihwo efa re dia orere na, orua avwanre ni Baibol na ghanghanre, ọke eje yen avwanre vwo kpo ishọshi. Dedena, avwanre niro nẹ a cha kua kpo ẹkuotọ rẹ obọ de yovwon ihwo, tavwen e ki se yeren omamọ rẹ akpọ.

Ọke me vwọ hẹ ẹgbukpe 16, oniọvo rẹ oni mẹ otete da kua orua rẹ avwanre kpo California vwẹ U.S.A. Ẹkuruemu rẹ ihwo rehẹ oboyin na fẹnẹ ọ rẹ avwanre dibidibi! Dede nẹ obọ yovwon avwanre emerha ukuko na, jẹ asan rọ vọnre vẹ ivwiogbere yen avwanre diare; asan na vọnre vẹ ihwo ri gbe ozighi, vẹ e re reyọ ihuvwun egangan. Kason kason yen avwanre vwo nyo edo rẹ ọhwunu; iji re vọn ekogho na nẹrhẹ oshọ muẹ ihwo buebun re dia kẹrẹ avwanre. Ọtiọyena, ihwo buebun ki muẹ ihwunu yan, rere ayen sa vwọ chochọn rẹ oma rayen yẹrẹ rhuẹrẹ ẹghwọ. Upe jehẹ asan rẹ egbọlọ sheri vwẹ udu mẹ te ọke na.

Me vwọ hẹ kọleji, me guọnọ dia kerẹ ighene efa. Ememerha na ki mi kpo ipati re de ru uruemu ri jodo jodo, me je da idi egangan, vwobọ vwẹ ozighi egbe, ji reyọ ihuvwun egangan. O kriri-i, me da rhe dia ọviẹn vwọ kẹ isigati ọgangan re se kokeni. Mi de ji ton uji echo phiyọ, me sa vwọ dẹ ihuvwun egangan. Dede nẹ ihwo rẹ orua mẹ kpo ishọshi mamọ, ayen sa chọn vwẹ uko vwo phi ọnyẹ rẹ otu ro miovwo uvwe na kparobọ-ọ. E mu vwe phiyọ uwodi abọ buebun fikirẹ ozighi egbe. Akpọ mẹ ko kiẹn riariẹ, mi rhe se suo-on! Uwodi kọyen mi de kuo phiyotọ.

Me vwọ hẹ uwodi vwẹ 1997, vwẹ ẹdẹ ọvo, ohwo ọfa rọ jehẹ uwodi na da mrẹ Baibol vwẹ obọ mẹ. Ọke yena ja re orẹ ri Krismasi rẹ ihwo ri Tonga nẹ fuanfon. Ọ da nọ vwẹ sẹ me riẹn oborẹ Baibol na ta kpahen ẹdẹ re vwiẹ Jesu; ẹkẹvuọvo, me riẹn emuvuọvo kpahọ-ọn. O de dje ikuegbe rọhẹ Baibol na kpahen ọke re vwiẹ Jesu kẹ vwẹ, me da rhe mrẹvughe nẹ Baibol na tobọ djunute erọnvwọn buebun re ruẹ vwẹ ọke ri krismasi-i. (Matiu 2:1-12; Luk 2:5-14) O gbevwunu mamọ, ki mi di roro sẹ erọnvwọn efa je herọ rẹ Baibol na ta ota kpahen. Ọshare na kpo emẹvwa rẹ Iseri ri Jihova ruẹ kudughwrẹn kudughwrẹn vwẹ uwodi na, mi de brorhiẹn me vwọ vwomaba ayen. Ọbe rẹ Ẹvwọphia rọhẹ Baibol na yen ayen yono. Dede nẹ mi vwo ẹruo rẹ erọnvwọn buebun rẹ ayen tare-e, je me riẹnre nẹ erọnvwọn eje rẹ ayen tare nẹ Baibol na rhe.

Ayen vwọ nọ vwẹ sẹ ayen sa vwẹ uyono ri Baibol mu kẹ vwẹ, me da rhọnvwe. A da vuẹ vwẹ kpahen ive rẹ Baibol veri nẹ otọrakpọ na cha dia paradaisi. (Aizaya 35:5-8) Mi de rhi noso nẹ me da guọnọ ru obo re cha nẹrhẹ oma vwerhen Ọghẹnẹ, ki mi ru ewene vwẹ akpeyeren mẹ. Me da je rhe mrẹvughe nẹ Jihova cha rhọnvwe nẹ mi ro akpọ kpokpọ na ji mi ruẹ erọnvwọn re brare-e. (1 Kọrẹnt 6:9, 10) Ọtiọyena, mi de brorhiẹn ni mi che sun ophu ọgangan mẹ, kẹnoma kẹ isigati ephopho, ji siobọnu udi ẹda vroma vẹ ihuvwun egangan ẹreyọ kare kare.

Tavwen ẹdẹ re bru kẹ vwẹ ne me dia uwodi na te ki rhi vwoba, e de mu vwe kpo uwodi ọfa vwẹ 1999. Vwẹ ọsoso ẹgbukpe ọvo gbẹ, mi rhie ẹro mrẹ Iseri ri Jihova-a. Dedena mi brorhiẹn nẹ mi che ru ewene. Vwẹ ukpe ri 2000, usuon na da sen nẹ mi rhe vwo uturhi me vwọ dia United States ọfa-a, a da vwẹ ovwẹ rhivwin rhe Tonga.

Me vwọ hẹ Tonga, me da guọnọ Iseri ri Jihova mrẹ, me da rhoma ton uyono ri Baibol mẹ phiyọ. Mi vwo ẹguọnọ rẹ obo re yono uvwe, oma je vwerhen ovwẹ mamọ me vwọ mrẹ nẹ Iseri ri Jihova rehẹ orere na mu uyono rayen eje kpahen Baibol na kirobo rẹ Iseri ri Jihova rehẹ United States ji ru.

Ọse mẹ ọyen ohwo ra nabọ vughe vwẹ orere na kidie ọ hẹ ẹdia rode vwẹ ishọshi rọ ra. Ọtiọyena, ẹsosuọ o de gbe ihwo rẹ orua mẹ unu mamọ ne me vwomaba Iseri ri Jihova, ivun de ji miovwo ayen. Jẹ, ọke vwọ yanran na, oma da rhe vwerhen ọsẹ vẹ oni mẹ nẹ Baibol na wene akpeyeren mẹ mamọ re.

Emuọvo rọ ma bẹn vwẹ esiobọno kẹ udi ọvo rẹ ihwo muẹ da vwẹ orere mẹ. Eshare ri Tonga buebun ghwọrọ inọke buebun kudughwrẹn kudughwrẹn vwọ da udi re se kava ro muẹ ohwo mamọ; esiri rẹ okankọn rẹ iribo yen e vwo ruo. Mi de rhi vwo ẹkuruemu ri mi vwo kpo iklọbu ọvo ra da da udi re se kava na, me me da vroma; enẹ kọyen mi ruẹ kason kason. Emuọvo ro toroba ebẹnbẹn mẹ na yen igbeyan ri mi vwori re muọghọ kẹ Baibol na-a. Jẹ, ukuko na a da chọn vwẹ uko vwọ mrẹvughe nẹ uruemu mẹ nẹrhẹ ivun miovwo Ọghẹnẹ. Mi de ru ewene rere oma mẹ sa vwọ vwerhen Ọghẹnẹ.

Ki mi kpo emẹvwa eje rẹ Iseri ri Jihova ruẹ. Ugbeyan mi vwo mu ihwo re davwẹngba vwo ruẹ obo re vwerhen Jihova oma da chọn vwẹ uko vwọ kẹnoma kẹ edavwini. Mi de bromaphiyame kerẹ ọvo usun rẹ Iseri ri Jihova vwẹ 2002.

Mi mrẹ erere vwo nẹ edirin ri Jihova kirobọ rẹ Baibol na tare: “Ọrovwohwo . . . chirako rẹ ovwan, ọ guọnọre nẹ ohwo ọvuọvo ghwru-u, ẹkẹvuọvo nẹ ihwo ejobi kurhẹriẹ.” (2 Pita 3:9) Jihova guọnọre nẹ ihwo kerẹ omẹvwẹ na dia igbeyan rọyen, ọ rha dia ọtiọye-en jọ ghwọrọ akpọ na kri re. Me guọnọre nẹ ọ je reyọ ovwẹ vwọ chọn ihwo efa uko vwo ru ewene.

Womarẹ ukẹcha ri Jihova, akpọ mẹ ro kiẹn riariẹ na da domaji. Mi rhe chuji vwọ dẹ idi vẹ ihuvwun eganga-an. Ukperẹ ọtiọyen, me davwẹngba vwọ chọn ihwo efa uko vwọ dia igbeyan ri Jihova. Vwẹ ohri rẹ Iseri ri Jihova yen me da mrẹ avwebọ mẹ re se Tea. Avwanre ihwo ivẹ na vẹ ọmọshare avwanre yerẹn kuẹgbe vẹ omavwerhovwẹn. Avwanre ji yono ihwo oborẹ Baibol na ta kpahen iphiẹrophiyọ ra vwọ dia bẹdẹ bẹdẹ vwẹ akpọ kpokpọ rẹ ufuoma rọ cha obaro.